ទស្សនៈយុវជន៖ យុវជនកម្ពុជា និងការប្រឆាំងនឹងអំពើពុករលួយ
នរណាៗក៏ដឹងដែរថា អំពើពុករលួយគឺជាឧបសគ្គដ៏ធំមួយនៅក្នុងការអភិវឌ្ឍន៍សង្គមក៏ដូចជាសេដ្ឋកិច្ច របស់ប្រទេសទាំងឡាយនៅលើពិភពលោក ដែលក្នុងនោះក៏មានប្រទេសកម្ពុជាផងដែរ។ ប្រជាជនទូទៅ មានការត្អូញត្អែរអំពីផលប៉ះពាល់នៅក្នុងជីវិតរបស់ពួកគាត់។
ចុះចំណែកក្រុមយុវជនវិញ? តើពួកគេរងផលប៉ះពាល់យ៉ាងណាខ្លះពីអំពើពុករលួយ? តើពួកគេអាចធ្វើអ្វីបានខ្លះដើម្បីដោះស្រាយបញ្ហានេះ?
ថ្ងៃនេះ LIFT ចង់ដឹងអំពីទស្សនៈយុវជន-យុវតីកម្ពុជា ៣ រូបជុំវិញប្រធានបទ «អំពើពុករលួយ» ដែលពួកគេសុទ្ធតែមានស្មារតីពុំគាំទ្រជាដាច់ខាតចំពោះអំពើពុករលួយ។
ក្នុងវ័យ ១៨ឆ្នាំ កញ្ញា ហូល ឆៃលី ជានិស្សិតឆ្នាំទី ១ ផ្នែកសិក្សាអន្តរជាតិនៃវិទ្យាស្ថានភាសាបរទេសបានឲ្យដឹងថា បញ្ហាអំពើពុករលួយមានផលប៉ះពាល់ជាខ្លាំងដល់យុវជនកម្ពុជា ហើយយុវជនកម្ពុជាខ្លួនឯងត្រូវតែតាំងចិត្តក្នុងការប្រឆាំងជាមួយនឹងវា។
កញ្ញាពោលថា៖ អំពើពុករលួយនៅក្នុងទម្រង់នៃការសូកប៉ាន និងបក្សពួកឬគ្រួសារនិយម អាចនឹងឆក់យកឱកាសទទួលបានការអប់រំ និងការងារពីពួកខ្ញុំដែលជាយុវជន»។
«ជាឧទាហរណ៍ ខ្ញុំសង្កេតឃើញមនុស្សមួយចំនួនបានទទួលអាហារូបករណ៍ ឬ ការងារទាំងដែលពួកគេពុំមានសមត្ថភាពពិតប្រាកដក្នុងការទទួលបានវា ដោយសារតែពួកគេមានប្រាក់សូក ឬមានខ្សែស្រឡាយនៅក្នុងស្ថាប័នទាំងនោះ។ ចុះចំណែកក្រុមយុវជនដែលមានសមត្ថភាពពិតប្រាកដវិញ? ពួកគេត្រូវបាត់បង់ឱកាសដោយសារតែអំពើពុករលួយនេះ»។
«ទោះជាយ៉ាងណាក្តី ក្នុងនាមជាយុវជន យើងពុំអាចធ្វើអ្វីបានច្រើននោះឡើយ ក្រៅពីការប្តេជ្ញាចិត្តថា នឹងកែប្រែស្ថានភាពនេះនៅពេលដែលយើងអភិវឌ្ឍខ្លួនឯងឲ្យក្លាយជាបុគ្គលដែលមានសមត្ថភាពគ្រប់គ្រាន់ និងមានគេទទួលស្គាល់»។
យុវតី វ័យ ១៩ ឆ្នាំម្នាក់ទៀត គឺ កញ្ញា អ៊ិន ចរិយា ជានិស្សិតឆ្នាំទី ១ ផ្នែកសំណង់ស៊ីវិលនៃសាកលវិទ្យាល័យហ្សាម៉ាន បានបញ្ចេញមតិថា យុវជនពុំត្រឹមតែអាចចូលរួមដោះស្រាយបញ្ហាអំពើពុករលួយបាននៅពេលនេះនោះទេ ថែមទាំងជាកម្លាំងចលករដ៏ខ្លាំងនៅក្នុងការប្រឆាំងនេះថែមទៀតផង។
កញ្ញាដ៏ស្រស់សោភារូបនេះបានពន្យល់ថា៖« យុវជនកម្ពុជាមួយចំនួនធំនៅក្នុងសម័យបច្ចុប្បន្ននេះមានការយល់ដឹងច្រើន ហើយក៏មានការយល់ឃើញ និងឆន្ទះខុសពីមនុស្សចាស់»។
«ជាការពិតណាស់ យើងតែម្នាក់ ឬពីរនាក់ពុំអាចធ្វើអ្វីបានច្រើននោះទេ ក៏ប៉ុន្តែប្រសិនជាពួកយើងរួបរួមគ្នាជាធ្លុងមួយដោយចាប់យកស្មារតីស្អប់ខ្ពើមអំពើពុករលួយមកធ្វើជាស្មារតីសាមគ្គី ពួកយើងនឹងអាចចូលរួមប្រឆាំងជាមួយអំពើពុករលួយបានយ៉ាងមានប្រសិទ្ធភាព»។
«ការប្រឆាំងដែលសំខាន់ និងចម្បងបំផុតគឺ យើងខ្លួនឯងត្រូវប្តេជ្ញាចិត្តពុំប្រព្រឹត្តអំពើពុករលួយ មិនថាក្នុងទម្រង់ណាក៏ដោយ ហើយយើងត្រូវប្រកាន់ខ្ជួបនូវការប្តេជ្ញាចិត្តនេះជាដរាប មិនថាទោះបីជាយើងបានក្លាយជាអ្វី ឬជួបនឹងស្ថានភាពបែបណាក៏ដោយ»។
យុវជន តេង លីហេង មន្ត្រីផ្នែកច្បាប់វ័យ ២២ ឆ្នាំនៃការិយាល័យមេធាវី អាស៊ី កម្ពុជា បានសម្តែងទស្សនៈយល់ស្របទៅនឹងមតិរបស់យុវតីទាំងពីរូបខាងលើនេះ ក៏ប៉ុន្តែរូបគេពុំយល់ស្របទាំងស្រុងទៅលើទស្សនៈខាងណាមួយនោះឡើយ។
លីហេង ថា៖ «យើងពិតជាពុំអាចប្រកែកបានទេថា សមត្ថភាពប្រឆាំងនឹងអំពើពុករលួយរបស់ក្រុមយុវជនពិតជាមានកម្រិត តែវាពុំមែនមានន័យថា យុវជនពុំអាចប្រឆាំងនឹងអំពើពុករលួយបាននោះទេ។ យើងអាចចូលរួមប្រឆាំងនឹងអំពើពុករលួយបានដោយប្រកាន់យកស្មារតីមិនគាំទ្រអំពើពុករលួយនៅក្នុងខ្លួនគ្រប់កាលៈទេសៈ ព្រមទាំងតាមរយៈការគោរពច្បាប់ផងដែរ»។
«ប្រសិនជាយើងពុំគោរពច្បាប់ យើងនឹងត្រូវប្រឈមមុខនឹងការផាកពិន័យ ឬការផ្តន្ទាទោស ហើយគឺពេលនោះហើយដែលយើងចាប់ផ្តើមងាកមកការប្រព្រឹតអំពើពុករលួយដើម្បីយករួចខ្លួន»។
ចុះអ្នកវិញ? បើសិនជាអ្នកចង់បញ្ចេញមតិរបស់អ្នកចំពោះប្រធានបទនេះ ឬប្រធានបទផ្សេងៗទៀត សូមសរសេរមកកាន់ លោក តាំង រីនិត្យ rynith2014@gmail.com។
No comments:
Post a Comment