ដោយ ថា កិត្យា
2016-09-18
តំណាងរាស្ត្រគណបក្សសង្គ្រោះជាតិមណ្ឌលតាកែវ លោក អ៊ូ ច័ន្ទរ័ត្ន (រូបស្ដាំ) ពេលចេញពីសួរសុខទុក្ខមន្ត្រី និងសកម្មជនបក្សរបស់ខ្លួន នៅពន្ធនាគារព្រៃស កាលពីថ្ងៃទី២៣ ខែមីនា ឆ្នាំ២០១៦។ RFA/Morm Moniroth
តំណាងរាស្ត្រគណបក្សសង្គ្រោះជាតិ មួយរូបដាក់លិខិតស្នើសុំរដ្ឋាភិបាល ឲ្យបង្កើតសួនរំឭកវិញ្ញាណក្ខន្ធវីរជន និងអតីតយុទ្ធជនដែលបានធ្វើពលិកម្ម និងបាត់បង់ជីវិតក្នុងបុព្វហេតុជាតិ។ តែមន្ត្រីរដ្ឋាភិបាល មិនទាន់ឆ្លើយតបចំពោះសំណើនេះទេ ខណៈមន្ត្រីសង្គមស៊ីវិលចាត់ទុកសំណើនេះ គឺជារឿងល្អមួយដែលរដ្ឋាភិបាលគួរឆ្លើយតបជាវិជ្ជមាន។
លិខិតដែលស្នើសុំរដ្ឋាភិបាលតាមរយៈប្រធានរដ្ឋសភា លោក ហេង សំរិន នោះ គឺតំណាងរាស្ត្រគណបក្សសង្គ្រោះជាតិ លោក អ៊ូ ច័ន្ទរ័ត្ន លើកឡើងថា កាលពីពេលថ្មីៗនេះ មានការប្រតិកម្មពីលេខាធិការដ្ឋានសមាគមអតីតយុទ្ធជន និងទាំងយុទ្ធជនមួយចំនួននៅតាមបណ្ដាញសង្គមហ្វេសប៊ុក (facebook) ចំពោះសំណើសុំទីលានប្រជាធិបតេយ្យ ដើម្បីតម្កល់រូបសំណាកលោកបណ្ឌិត កែម ឡី។
លោក អ៊ូ ច័ន្ទរ័ត្ន បញ្ជាក់ថា ប្រតិកម្មនេះធ្វើឲ្យលោកបានគិតពីគុណបំណាច់ និងវីរភាពយុទ្ធជន ដូច្នេះលោកមានបំណងប្រាថ្នាចង់ឲ្យរដ្ឋាភិបាល បង្កើតឲ្យមានសួនរំឭកវិញ្ញាណក្ខន្ធណាមួយដើម្បីតម្កល់រូបសំណាក ឬផ្ទាំងសីលាមានចារិកឈ្មោះវីរជន និងអតីតយុទ្ធជនដែលបានធ្វើពលិកម្ម និងបាត់បង់ក្នុងបុព្វហេតុជាតិ។
លោក អ៊ូ ច័ន្ទរ័ត្ន សង្ឃឹមថា រដ្ឋាភិបាលនឹងពិនិត្យពិចារណាចំពោះសំណើរបស់លោក ព្រោះការបង្កើតឲ្យមានសួនរំឭកវិញ្ញាណក្ខន្ធយុទ្ធជនគ្រប់ជំនាន់ និងគ្រប់ភាគីនេះ ដើម្បីឲ្យប្រជាពលរដ្ឋទូទៅផ្តល់នូវការគោរពចំពោះវីរភាព និងវិញ្ញាណក្ខន្ធវីរបុរសរបស់ពួកគាត់ និងក៏អាចជានិមិត្តរូបនៃការផ្សះផ្សាបង្រួបបង្រួមជាតិដែរ៖ «ប្រសិនបើរដ្ឋាភិបាលយល់ថាមិនមានប្រយោជន៍ក្នុងការរៀបចំធ្វើឲ្យមានសួននេះទេ ដូច្នេះរដ្ឋាភិបាលក្រោយៗលោកពិចារណាទៅ ព្រោះប្រទេសមួយចំនួនគេធ្វើ ព្រោះគេឲ្យតម្លៃទៅលើយុទ្ធជនដែលបានពលីជីវិត ដាច់ដៃ ដាច់ជើងដើម្បីប្រទេស»។
តំណាងរាស្ត្រមណ្ឌលតាកែវ នៃគណបក្សសង្គ្រោះជាតិ រូបនេះបញ្ជាក់ថា លោកបានដាក់លិខិតនេះតាំងពីថ្ងៃទី១ ខែកញ្ញា តាមរយៈប្រធានរដ្ឋសភា លោក ហេង សំរិន តែលិខិតនេះនៅត្រឹមខុទ្ទកាល័យលោក ហេង សំរិន ក្រោមហេតុផលថា លោក ហេង សំរិន កំពុងមានជំងឺ។
អាស៊ីសេរី មិនអាចទាក់ទងសុំការឆ្លើយតបពីអ្នកនាំពាក្យទីស្ដីការគណៈរដ្ឋមន្ត្រី លោក ផៃ ស៊ីផាន បានឡើយ ដើម្បីសុំការឆ្លើយតបចំពោះការស្នើសុំរបស់តំណាងរាស្ត្របក្សប្រឆាំងនេះ។
មន្ត្រីស៊ើបអង្កេតនៃអង្គការលីកាដូ (LICHADO) លោក អំ សំអាត មានមតិថា នេះគឺជាសំណើល្អមួយដែលចង់ឲ្យរដ្ឋាភិបាល បង្កើតសួនរំឭកវិញ្ញាណក្ខន្ធយុទ្ធជនដែលពលីជីវិតដើម្បីជាតិមាតុភូមិ៖ «ធ្វើដូច្នេះដើម្បីសម្ដែងការលើកទឹកចិត្ត និងដឹងគុណនូវការបម្រើជាតិរបស់គាត់រហូតដល់ពលីជីវិតដើម្បីជាតិ ហើយក៏ជាការមួយលើកទឹកចិត្តសម្រាប់ក្រុមគ្រួសារគាត់ ហើយក៏ជំរុញឲ្យបងប្អូនប្រជាពលរដ្ឋមានទឹកចិត្តក្នុងកិច្ចការពារជាតិមាតុភូមិ»។
កាលពីថ្ងៃទី១៧ ខែសីហា កន្លងទៅ តំណាងរាស្ត្រគណបក្សសង្គ្រោះជាតិ លោក អ៊ូ ច័ន្ទរ័ត្ន បានដាក់លិខិតទៅអភិបាលរាជធានីភ្នំពេញ ស្នើសុំតម្កល់រូបសំណាកលោកបណ្ឌិត កែម ឡី សង់អំពីស្ពាន់នៅទីលានប្រជាធិបតេយ្យ។ សំណើនេះ មានបំណងរំឭកដល់វីរភាពរបស់លោកបណ្ឌិត កែម ឡី ផង ចាត់ទុកជានិមិត្តរូបនៃសេរីភាពបញ្ចេញមតិផង និងដើម្បីសម្ដែងនូវការគោរពដល់ដួងវិញ្ញាណក្ខន្ធរបស់លោកផង។ តែមកដល់ពេលនេះ សាលាក្រុងមិនទាន់សម្រេចនៅឡើយទេ។
ភ្លាមៗ លេខាធិការដ្ឋានសមាគមអតីតយុទ្ធជន និងទាំងយុទ្ធជនមួយចំនួន បានចេញប្រតិកម្មប្រឆាំង ដោយអះអាងថា ពួកគេបានបូជាឈាមស្រស់ សាច់ស្រស់ ដើម្បីប្រទេសជាតិពិត ដូច្នេះពួកលោកគួរត្រូវផ្តល់ងារលើសពីលោក កែម ឡី។
ទោះយ៉ាងណា លោក អ៊ូ ច័ន្ទរ័ត្ន មានប្រសាសន៍ថា រឿងយុទ្ធជន និងលោកបណ្ឌិត កែម ឡី នេះ គឺជារឿងពីរដាច់ដោយឡែកពីគ្នា ព្រោះលោកបណ្ឌិត កែម ឡី គឺជាអ្នកវិភាគសង្គម និងនយោបាយដ៏ល្បី ដូច្នេះលោកបណ្ឌិត កែម ឡី គួរតែទទួលបាននូវតម្លៃខ្ពស់មួយផ្សេងទៀត៕
No comments:
Post a Comment