ដោយ ស៊ុន ហេង
2016-10-17
លោកនាយករដ្ឋមន្ត្រី ហ៊ុន សែន (ឆ្វេង) និងប្រធានអង្គភាពប្រឆាំងអំពើពុករលួយ លោក ឱម យ៉ិនទៀង។ RFA/Brach Chev
RFA/Brach Chev
ប្រធានសមាគមជ័យលាភីបញ្ញាជនកម្ពុជា លោក រស់ សារ៉ុម ដែលត្រូវបានគេស្គាល់ថាជាអ្នករៀបគម្រោងប្ដឹងលោក កឹម សុខា និងលោក អេង ឆៃអ៊ាង ទៅអង្គភាពប្រឆាំងអំពើពុករលួយ ឲ្យមានការស៊ើបអង្កេតទ្រព្យសម្បត្តិ ថ្លែងប្រាប់អាស៊ីសេរី នៅថ្ងៃទី១៧ តុលា ថា ស្ថាប័នរបស់លោកគ្រោងនឹងដាក់ពាក្យបណ្ដឹងដូចគ្នានេះ ប្ដឹងលោកនាយករដ្ឋមន្ត្រី ហ៊ុន សែន ព្រមទាំងប្រធានរបស់អង្គភាពប្រឆាំងអំពើពុករលួយផ្ទាល់ គឺលោក ឱម យ៉ិនទៀង ទៀតផង។
ប្រធានសមាគមជ័យលាភីបញ្ញាជនកម្ពុជា លោក រស់ សារ៉ុម អះអាងថា ស្ថាប័នលោកគ្រោងប្ដឹងមន្ត្រីជាន់ខ្ពស់នៃបក្សកាន់អំណាច ឲ្យបើកបង្ហាញកញ្ចប់ថវិការបស់ពួកគេដាក់ឲ្យស៊ើបអង្កេត ដើម្បីបង្ហាញពីភាពស្អាតស្អំ។
ក្រោយជំនួបប្រជុំរបស់ថ្នាក់ដឹកនាំសមាគម នៅថ្ងៃច័ន្ទ ទី១៧ តុលា លោក រស់ សារ៉ុម ដែលជាប្រធានសមាគមជ័យលាភីបញ្ញាជនកម្ពុជា មានប្រសាសន៍ថា ស្ថាប័នលោកនឹងយកពាក្យបណ្ដឹងប្ដឹងលោក កឹម សុខា និងលោក អេង ឆៃអ៊ាង ទៅដាក់នៅអង្គភាពប្រឆាំងអំពើពុករលួយ ក្រោយការចុះឈ្មោះបោះឆ្នោតបានបញ្ចប់ជាស្ថាពរ ដោយលើកមូលហេតុថា ស្ថាប័នលោកជាប់រវល់រៀបចំដង្ហែញត្តិនៅថ្ងៃទី២៣ តុលា ខាងមុខ និងលោកចង់ទុកពេលឲ្យប្រជាជនចុះឈ្មោះបោះឆ្នោតបានស្រួល គ្មានការប៉ះពាល់អារម្មណ៍៖ «យើងចង់ឃើញការបោះឆ្នោតជ្រើសតាំងតំណាងរាស្ត្រនៅពេលខាងមុខ បេក្ខជនតំណាងរាស្ត្រទាំងអស់ពីគ្រប់គណបក្ស មុននឹងឈរឈ្មោះ ត្រូវប្រកាសទ្រព្យសម្បត្តិសិន»។
នៅពេលអ្នកយកព័ត៌មានអាស៊ីសេរី ចោទសួរពីសមាសភាពមន្ត្រីបក្សកាន់អំណាចដែលខាងសមាគមគ្រោងនឹងប្ដឹងដែរ លោក រស់ សារ៉ុម បង្ហាញពីភាពស្ទាក់ស្ទើរបន្តិច មុននឹងលោកបញ្ចេញអត្តសញ្ញាណថា លោកនឹងប្ដឹងលោកនាយករដ្ឋមន្ត្រី ហ៊ុន សែន និងលោក ឱម យ៉ិនទៀង ជាប្រធានអង្គភាពប្រឆាំងអំពើពុករលួយ ផងនោះ៖ «អ្នកទាំងពីរហ្នឹង ខ្ញុំមិនចង់ចុចឈ្មោះទេ តែជាថ្នាក់ដឹកនាំកំពូលតែម្តង។ កំពូលរបស់រដ្ឋាភិបាល និងកំពូលរបស់អង្គភាពប្រឆាំងអំពើពុករលួយ»។
នាយកប្រតិបត្តិសម្ព័ន្ធគណនេយ្យភាពសង្គមកម្ពុជា (ANSA) លោក សន ជ័យ កាលពីថ្ងៃទី១៥ ថា ខាងសមាគមរបស់លោក រស់ សារ៉ុម គួរផ្ដោតខ្លាំងទៅមន្ត្រីជួររដ្ឋាភិបាល ដែលភាគច្រើនមានទ្រព្យស្តុកស្តម្ភ។ ក្រោយពីបានឮថាខាងសមាគមលោក រស់ សារ៉ុម គ្រោងដាក់បណ្ដឹងដូចគ្នាប្ដឹងមន្ត្រីកាន់អំណាច ឲ្យបើកកញ្ចប់ថវិកា ឬការប្រកាសទ្រព្យសម្បត្តិនេះ លោក សន ជ័យ ថាវាជារឿងគួរឲ្យសាទរ៖ «យើងសាទរនៅពេលដែលឮថាមានខាងសង្គមស៊ីវិលធ្វើរឿងប្រឆាំងអំពើពុករលួយ។ ការដាក់ពាក្យប្ដឹងប្រឆាំងអ្នកមានអំណាចក្តី អ្នកមានអំណាចតិចក្តី។ តែយើងនៅតែទាមទារឲ្យពួកគេពិនិត្យមើលទៅលើព័ត៌មាន ឬការរកឃើញនានាឲ្យបានគ្រប់ជ្រុងជ្រោយសិន»។
លោក រស់ សារ៉ុម ធ្លាប់បានប្ដឹងមន្ត្រីរបស់គណៈកម្មាធិការជាតិរៀបចំការបោះឆ្នោត (គ.ជ.ប) ទៅអង្គភាពប្រឆាំងអំពើពុករលួយដែរ ប៉ុន្តែត្រូវបានអង្គភាពមិនចាត់ការបណ្ដឹងនេះ ដោយសារខ្វះភស្តុតាង។ លោក រស់ សារ៉ុម បានចេញមុខសុំទោសជាសាធារណៈទៅ គ.ជ.ប កាលពីខែមិថុនា កន្លងទៅ។
ចំពោះករណីគណបក្សសង្គ្រោះជាតិ វិញ គម្រោងប្ដឹងនេះកើតឡើងដោយសារលោក រស់ សារ៉ុម ថាទ្រព្យសម្បត្តិថ្នាក់ដឹកនាំគណបក្សនេះមានការកើនឡើងខ្លាំង ដូចជាចម្ការម្រេចរបស់លោក កឹម សុខា និងវីឡារបស់លោក អេង ឆៃអ៊ាង នៅបុរីសែនសុខ រាជធានីភ្នំពេញ ដែលទើបតែទិញថ្មីៗ។
លោក រស់ សារ៉ុម ថាលោកមិនទាន់អាចចែករំលែកព័ត៌មានលម្អិតទាក់ទងនឹងគម្រោងប្ដឹងលោក ហ៊ុន សែន និងលោក ឱម យ៉ិនទៀង ថានៅពេលណានោះទេ តែលោកឲ្យដឹងថា ស្ថាប័នលោកកំពុងប្រមូលភស្តុតាង ហើយកាលបរិច្ឆេទនៃការប្ដឹង គឺកៀកគ្នានឹងករណីគណបក្សសង្គ្រោះជាតិ ដែរ៕
No comments:
Post a Comment