ដោយ ជុន ច័ន្ទបុត្រ
2021-03-11 rfa
លោកនាយករដ្ឋមន្ត្រី ហ៊ុន សែន
រូប៖ ហ្វេសប៊ុកនាយកដ្ឋានសោតទស្សន៍
លោក ហ៊ុន សែន តែងដូរចិត្តជារឿយៗ អំពីការគ្រោងកាន់តំណែងជានាយករដ្ឋមន្ត្រីរបស់លោក។ ម្ដងលោកថានឹងបន្តធ្វើតែពីរអាណត្តិទៀត។ ម្ដងលោកថានឹងធ្វើរហូតបើគេនៅតែបោះឆ្នោតឱ្យលោក។ ថ្មីៗ នេះ លោកក្រឡះសំដីម្ដងទៀត។ លោកថានឹងធ្វើរហូតទាល់តែលោកលែងចង់ធ្វើខ្លួនឯង។
លោកបញ្ជាក់ទៀតថា សេចក្ដីប្រកាសចុងក្រោយនេះ គឺជាការបញ្ចប់ការប៉ាន់ស្មានទាំងឡាយថាលោកមានគម្រោងផ្ទេរតំណែងនេះទៅកូនរបស់លោក។
តើអ្វីខ្លះអាចជាដើមហេតុនាំឱ្យលោក ហ៊ុន សែន ប្រកាសធ្វើនាយករដ្ឋមន្ត្រីរហូតលែងចង់បែបនេះ?
បន្ទាប់ពីចាក់វ៉ាក់សាំងអាស្ត្រា ហ្សនិកា (AstraZeneca) ហើយសើមៗ ភ្លាម លោក ហ៊ុន សែន ប្រកាសនៅនឹងមន្ទីរពេទ្យតែម្ដង អំពីផែនការក្រាញអំណាចរបស់លោក៖ «ខ្ញុំនៅបន្តនៅហ្នឹងងាយងាប់ទៅណា?ឥលូវមានវ៉ាក់សាំងទៀត អត់ងាយងាប់សោះ ឥលូវឈប់ប្រកាសពីរឿង១០ឆ្នាំ២០ឆ្នាំ ធើហ្អែងទាល់តែឈប់ចង់ធើ កុំឱ្យវាពិបាកពេក។ បន្តិចថាផ្ទេរតំណែងឱ្យហ៊ុន ម៉ាណែត បន្តិចថាផ្ទេរឱ្យអ្នកនេះអ្នកនោះ។ ឥលូវមិនបាច់ផ្ទេរតែម្ដង នៅអញ្ចឹងតែម្ដងទៅ»។
ការលើកឡើងរបស់លោក ហ៊ុន សែន កាលពីថ្ងៃទី៤ ខែមីនា នៅមន្ទីរពេទ្យកាល់ម៉ែត្រនេះ ផ្ទុយស្រលះពីសំដីរបស់លោក កាលពីពេលមុនៗ។ កាលនោះលោកថានឹងឈប់ធ្វើនាយករដ្ឋមន្ត្រីនៅ ២អាណត្តិទៀត ឬនៅត្រឹមអាយុ ៧៨ឆ្នាំ។
បើទោះជាលោកហ៊ុន សែន ធ្លាប់ប្រើសំដីបាតដៃខ្នងដៃបែបនេះជារឿយៗក្ដី ការប្រកាសលើកនេះ អាចមិនមែនជារឿងចៃដន្យនោះឡើយ។ លោកប្រហែលជាមានបំណងផ្ញើសារនេះ ទៅកាន់ក្រុមមនុស្សមួយចំនួន។ នោះគឺអ្នកទាំងឡាយណាដែលខ្វល់ខ្វាយពីតំណែងនាយករដ្ឋមន្ត្រីរបស់ លោក ហ៊ុន សែន។
តើអ្នកណាខ្លះ ដែលយកចិត្តទុកដាក់ពីតំណែងនាយករដ្ឋមន្ត្រីរបស់ លោក ហ៊ុន សែន?
ប្រាកដណាស់ មិនមែនមានតែក្រុមអ្នកជំទាស់នឹងលោក ឬអ្នកនយោបាយប្រឆាំងទេ ដែលខ្វល់ខ្វាយនឹងតំណែងរបស់លោក ហ៊ុន សែន តាមពិតអ្នកដែលនៅក្បែរៗ ក្លៀករបស់លោក មានពួកអ្នកដែលទទួលផលប្រយោជន៍ ឬក្រុមរណបលោក និងពួកអ្នកមានអំណាចគ្រាក់ៗ ក្នុង CPP ក៏ចាប់អារម្មណ៍នឹងការកាន់អំណាចរបស់លោក ហ៊ុន សែន សម្បើមណាស់ដែរ។
លោក ហ៊ុន សែន ទំនងជាចង់ឌឺដងឱ្យអ្នកមានជំហរប្រឆាំង ចង់លួងលោមក្រុមអ្នកទទួលផលប្រយោជន៍ និងជាពិសេសអាចចង់បង្ក្រាបចរន្តដណ្ដើមអំណាចគ្នាក្នុងជួរគណបក្សប្រជាជនកម្ពុជាតែម្ដង។
លោក ហ៊ុន សែន មិនលាក់បាំងឡើយថា លោកចង់ឱ្យក្រុមអ្នកមានជំហរជំទាស់ ឬអ្នកនយោបាយប្រឆាំងដឹងពីថេរៈវេលាកាន់អំណាចដល់ទីបញ្ចប់របស់លោក៖ «អ្នកណាចង់ឈ្នះមកឈរមក ក្នុងក្របខណ្ឌនៃច្បាប់កំណត់ ហើយបើអ្នកឯងចង់ផ្ដួលតាមផ្លូវដូចដែលអ្នកឯងប្រកាសកន្លងទៅឱ្យកម្លាំងប្រដាប់អាវុធបែរចុងកាណុងមកផ្ដួលតាមរបៀបឧបឃាត អ្នកឯងត្រូវទទួលរបៀបម៉េចអាហ្នឹងរឿងរបស់អ្នកឯង»។
លោក ហ៊ុន សែន ចង់ផ្លែផ្កាឱ្យក្រុមអ្នករិះគន់ដឹងថា ការកាន់តំណែងយូរនិងក្រាញអំណាចរបស់ខ្លួននឹងមិនមានឧបសគ្គអ្វីសោះឡើយ។ លោកតែងឈ្នះគ្រប់សមរភូមិបោះឆ្នោត បើទោះជាចាញ់ ក៏លោកនៅតែអាចប្រើល្បិចឈ្នះវិញបានដដែល ដូចករណីដណ្ដើមធ្វើជានាយករដ្ឋមន្ត្រីបន្ទាប់ពីចាញ់ឆ្នោតឆ្នាំ១៩៩៣ ជាឧទាហរណ៍ស្រាប់។
អ្នកនយោបាយជំទាស់និងអ្នកមានជំហរឯករាជ្យ តែងស្រមៃចង់ឃើញប្រទេសកម្ពុជាមានអ្នកដឹកនាំផ្សេងទៀតដែលល្អជាងលោក ហ៊ុន សែន ព្រមទាំងទទូចចង់ឱ្យកម្ពុជា គោរពនីតិរដ្ឋ និងលទ្ធិប្រជាធិបតេយ្យ។ ប៉ុន្តែអ្នកដែលប្រឆាំងហ៊ុន សែន មួយចំនួនត្រូវជាប់គុក ជាប់បណ្ដឹងនៅតុលាការ។ មួយចំនួនរត់ចោលស្រុក និងមួយចំនួនទៀតត្រូវបានគេសម្លាប់ ដូចយ៉ាងព្រឹត្តិការណ៍រដ្ឋប្រហារឆ្នាំ១៩៩៧ និងព្រឹត្តិការណ៍បាញ់សម្លាប់កម្មករនៅផ្លូវ វេង ស្រេង នៅឆ្នាំ២០១៤ ជាដើម។
ក្រៅពីនោះមន្ត្រីសង្គមស៊ីវិល មេសហជីព អ្នកការពារបរិស្ថាន អ្នកសារព័ត៌មាន និងអ្នកវិភាគសង្គម និងនយោបាយ ត្រូវបានឃាតកសម្លាប់ ជាបន្តបន្ទាប់។ លោកហ៊ុន សែន បានផ្ដួលគណបក្សហ៊្វ៊ុនស៊ិនប៉ិច តាមរយៈទិញសមាជិកសំខាន់ៗនៃគណបក្សនេះ អោយធ្វើសង្គ្រាមដណ្ដើមអំណាច បំបែកបំបាក់ផ្ទៃក្នុង ព្រមទាំងគំរាមកំហែង និងប្រើប្រព័ន្ធតុលាការគាបសង្កត់។
លោកកម្ចាត់គណបក្សសង្គ្រោះជាតិ ដោយបង្កើតច្បាប់គណបក្សនយោបាយតាមតែទំនើងចិត្ត ទោះជារំលោភរដ្ឋធម្មនុញ្ញក៏ដោយ នៅពេលដែលលោកដឹងច្បាស់ថាបក្សប្រឆាំងមានសំឡេងគាំទ្រប្រដំប្រសងគ្នា ឬក៏អាចមានប្រៀបជាងគណបក្សបក្សប្រជាជនកម្ពុជារបស់លោក។
ចំពោះក្រុមអ្នកទទួលផលប្រយោជន៍ និងក្រុមរណបវិញ វាសនារបស់ពួកគេពឹងផ្អែកទាំងស្រុងទៅនឹងតំណែងជានាយករដ្ឋមន្ត្រី របស់លោក ហ៊ុន សែន។ អ្នកទាំងនេះប្រៀបដូចទៅនឹងបរាសិត ឬជាបញ្ញើក្អែក។ គឺត្រូវតែផ្ញើខ្លួននិងអាចរីកធំធាត់រាតត្បាតបាន ដោយអាស្រ័យទៅលើរាងកាយអ្នកដទៃតែប៉ុណ្ណោះ។ ដូច្នេះពួកគេ មិនចង់អោយរាងកាយនោះចុះថមថយនោះទេ។ បើកាលណារាងកាយដែលគេពឹងផ្អែកទៅលើនោះអស់ឥទ្ធិពល ពួកគេក៏នឹងចុះថមថយរលំរលាយទៅតាមនោះដែរ។
ពួកគេគឺជាក្រុមឈ្មួញឧកញ៉ាមហាសេដ្ឋីធំៗ នៅក្នុងស្រុក ដែលបានទទួលប្រយោជន៍យ៉ាងច្រើនសម្បើមពីរបររកស៊ីបំផ្លាញធនធានធម្មជាតិ រកស៊ីមិនបង់ពន្ធ ពុករលួយ រំលោភសិទ្ធិមនុស្សជាដើម ដោយមានខ្នងបង្អែកជាប្រមុខរដ្ឋាភិបាល។ ក្រុមនេះ តែងចូលរួមបង់វិភាគទានជាប្រចាំដល់គណបក្សប្រជាជនកម្ពុជា។ ផ្ដល់លុយរាប់លានដុល្លារក្នុងមួយលើកៗ ទោះជាមានការអំពាវនាវ ឬដោយមិនចាំបាច់មានការកៀរគរ ពីលោក ហ៊ុន សែន ក៏ដោយចុះ។
រីឯក្រុមរណប ពួកគេជាប្រភេទអ្នកនយោបាយលក់ខ្លួនដែលទទួលតំណែងដោយការសន្ដោសប្រោសប្រណី ឬអ្នកដែលលោកហ៊ុន សែន ប្រើប្រាស់ដើម្បីបំផ្លាញគូប្រជែងនយោបាយជាដើម។
បើលោកហ៊ុន សែន បាត់បង់តំណែងនាយករដ្ឋមន្ត្រី ក្រុមអ្នកទទួលផលប្រយោជន៍ នឹងរៀបចំលុយកាក់ប្រាក់កាសចងស្ពានមានមេត្រីជាមួយបេក្ខភាពផ្សេង ហើយក្រុមអ្នកនយោបាយលក់ខ្លួនវិញ ក៏រកវិធីដើម្បីបន្តរស់ក្នុងនាមជាបញ្ញើក្អែកជាមួយអ្នកដទៃបន្តទៅដែរ។
ខុសពីដើមឈើដែលអាចឈររឹងមាំដោយខ្លួនឯង ដោយមិនត្រូវការបញ្ញើក្អែក លោកហ៊ុន សែន ក៏ដូចជាមេដឹកនាំផ្ដាច់ការដទៃទៀតនៅលើពិភពលោកដែរ លោកត្រូវការប្រើប្រាស់ ក្រុមទទួលផលប្រយោជន៍ និងអ្នកនយោបាយលក់ខ្លួន តាមតម្រូវការជាក់ស្ដែង ដូចជាការជួយរកលុយ ឬក៏ជួយឈរលម្អ អោយសួនផ្ដាច់ការរបស់លោក អោយមើលទៅដូចជាសួនប្រជាធិបតេយ្យជាដើម។ ហេតុដូច្នេះហើយ លោកក៏ថែទាំទ្រាំធ្វើជាបង្អែកអោយពួកគេដែរ។ ធ្វើយ៉ាងណាកុំអោយក្រុមបរាសិតបញ្ញើក្អែកទាំងនេះចាកចេញពីលោក។
ចំណែកទំនាស់ដណ្ដើមតំណែងក្នុងជួរបក្សប្រជាជនកម្ពុជាវិញ ទំនងជាអ្វី ដែលលោកហ៊ុន សែន ព្រួយជាទីបំផុត និងចង់ប្រាប់ថា កុំអាលឈ្លោះគ្នាទុកមេចាត់ចែង។ លោកប៉ិនប្រសប់ខ្លាំងក្នុងការប្រើយុទ្ធសាស្ត្របំបែកបំបាក់ ហេតុនេះលោកក៏មិនធ្វេសប្រហែសចំពោះខ្លួនឯងដែរ។
សាស្ត្រាចារ្យវិទ្យាសាស្ត្រនយោបាយនៃសាកលវិទ្យាល័យមីស្ហីហ្គេន (University of Michigan) នៃសហរដ្ឋអាមេរិក និងជាអ្នកនិពន្ធសៀវភៅមានចំណងជើងថា «របបផ្ដាច់ការនិយម ឬ Authoritarianism» អ្នកស្រី អេរិកា ហ្វ្រាន់ស៍ (Erica Frantz) សរសេរថា នៅក្នុងរបបផ្ដាច់ការ មេដឹកនាំផ្ដាច់ការ និងមន្ត្រីនៅក្នុងជួរផ្ទៃក្នុងបក្សតែងប្រកួតប្រជែងគ្នាជានិច្ច។ ពួកគេមិនត្រឹមតែប្រកួតប្រជែង ជាមួយអ្នកកាន់អំណាចផ្ដាច់ការទេ តែប្រកួតប្រជែងរវាងគ្នាឯងផងដែរ។ អ្នកស្រីបន្តថាមេដឹកនាំផ្ដាច់ការ តែងវាយតម្លៃបានថា អ្នកដែលអាចដណ្ដើមអំណាចពីដៃខ្លួនបានមុនគេ គឺជាមនុស្សនៃក្រុមផ្ទៃក្នុងតែម្តង។ អ្នកស្រីសន្និដ្ឋានថា គឺដោយហេតុនេះហើយបានជា អ្នកកាន់អំណាចផ្ដាច់ការ ប្រើគ្រប់មធ្យោបាយដើម្បីបន្ថយឥទ្ធិពល អ្នកនៅក្នុងជួរបក្សរបស់ខ្លួនឯងផងដែរ។
នៅកម្ពុជា ថ្វីត្បិតតែសញ្ញានៃការប្រកួតប្រជែងដណ្ដើមអំណាចនៅក្នុងជួរបក្សប្រជាជនកម្ពុជា ត្រូវគេខំលាក់មិនអោយលេចធ្លាយចេញមកក្រៅ និងមើលទៅហាក់រឹងមាំពីលើដល់ក្រោម នៅក្នុងបក្សនេះមានប៉ូលអំណាចផ្សេងៗ គ្នា និងសម្លឹងសម្លក់ដាក់គ្នាទៅវិញទៅមក។
បច្ចុប្បន្ន បក្សកាន់អំណាច មានសែធំៗ យ៉ាងតិចណាស់៤ មានជាអាទិ៍ ក្រុមលោកសាយ ឈុំ ក្រុម លោក ទៀ បាញ់ ក្រុមលោក ស ខេង និងក្រុមបងធំជាងគេ គឺក្រុមលោក ហ៊ុន សែន។
ក្រុមកូនចៅលោក សាយ ឈុំ អគ្គលេខាបក្ស កំពុងកាន់កាប់ដឹកនាំព្រឹទ្ធសភាហើយតំណែងព្រឹទ្ធសភានេះសំខាន់ណាស់ ព្រោះជាតំណែងប្រមុខរដ្ឋស្ដីទីនៅពេលដែលអវត្តមានព្រះមហាក្សត្រ។ កូនប្រុសលោក សាយ ឈុំ គឺលោក សាយ សំអាល់ ជារដ្ឋមន្ត្រីក្រសួងបរិស្ថាន ជាបុគ្គលមានអំណាចម្នាក់ក្នុងចំណោមអ្នកជំនាន់ថ្មី។ កាលពីឆ្នាំមុន ប្រធានគណបក្សខ្មែរក្រោកលោក សុខ សុវណ្ណ វឌ្ឍនាសាប៊ុង ត្រូវបានគេបណ្ដេញចេញពីសមាជិកនៃឧត្ដមក្រុមប្រឹក្សាពិគ្រោះ និងផ្ដល់យោបល់ភ្លាម បន្ទាប់ពីមេបក្សរូបនេះនិយាយបរិហារក្រុមមន្ត្រីបរិស្ថានបានត្រឹម ២ថ្ងៃប៉ុណ្ណោះ។ តំណែងទេសរដ្ឋមន្ត្រីមួយទាំងមូលត្រូវគេដកដូចកូនស្ពៃនេះ ជាសារមួយប្រាប់ថាប៉ះមិនបានទេ ហ៊ានប៉ះ គឺរលាក។
ក្រុមលោក ទៀ បាញ់ ជាប៉ូលអំណាចមួយ ដែលជាមរតកបន្សល់ទុកពីអតីតសមាជិកការិយាល័យនយោបាយបក្ស លោក សាយ ភូថង។ ក្រុមនេះដឹកនាំដោយលោក ទៀ បាញ់ រដ្ឋមន្ត្រីក្រសួងការពារជាតិ និងប្អូនប្រុសរបស់គាត់ជាមេបញ្ជាការកងទ័ពជើងទឹកលោក ទៀ វិញ។ ក្រុមនេះដឹកនាំមូលដ្ឋានខេត្តសៀមរាប និងខេត្តជាប់សមុទ្រទាំងអស់។ កូនប្រុសរបស់លោក ទៀ បាញ់ ជាចៅហ្វាយខេត្តសៀមរាប។ កូនប្រុសលោក ទៀ វិញ ជាមេបញ្ជាការរងកងទ័ពជើងទឹក។ ក្រុមនេះសម្បូរទាំងលុយ មានទាំងកាំភ្លើងនៅក្នុងដៃ ហើយកំពុងគ្រប់គ្រងដែនលំហសមុទ្ររបស់កម្ពុជាទាំងមូលផង។
ក្រុមធំមួយទៀតជាក្រុមរបស់លោក ស ខេង អនុប្រធានបក្ស និងជាឧបនាយករដ្ឋមន្ត្រីដែលធំជាងគេ។ លោក ស ខេង មានអំណាចស្ទើរប្រហែលលោក ហ៊ុន សែន ដែរ ដោយហេតុថា លោកគ្រប់គ្រងចៅហ្វាយស្រុក ចៅហ្វាយខេត្តទូទាំងប្រទេស។ លោក ស ខេង មានកម្លាំងប៉ូលិសនៅក្នុងដៃ មានទាំងទ្រព្យសម្បត្តិ និងមធ្យោបាយស្ទើរគ្រប់បែបយ៉ាង រាប់តាំងពីប្រព័ន្ធផ្សព្វផ្សាយ និងក្រុមការងារដ៏រឹងមាំ។ មូលដ្ឋានសំខាន់របស់ក្រុមនេះ គឺនៅបន្ទាយមានជ័យ បាត់ដំបង ព្រៃវែង និងរាជធានីភ្នំពេញជាដើម។
ក្រុមចុងក្រោយគឺក្រុមលោក ហ៊ុន សែន តែម្ដង។ លោក ហ៊ុន សែន ដណ្ដើមតំណែងបានធំជាងគេបង្អស់នៅក្នុងជួរបក្សនិងក្នុងជួររដ្ឋាភិបាល។ កូនៗ របស់លោកក៏កាន់តំណែងសំខាន់ៗជាងកូនអ្នកផ្សេងដែរ។ លោក ហ៊ុន ម៉ាណែត ជាមេបញ្ជាការទ័ពជើងគោក។ លោក ហ៊ុន ម៉ានិត កាន់តំណែងជាមេចារកម្មយោធា។ លោក ហ៊ុន ម៉ានី ជាប្រធានយុវជនដែលមានសមាជិកស្នូល ក្នុងជួរថ្នាក់ដឹកនាំរដ្ឋបាលនៅទូទាំងប្រទេស ។ ក្រុមគ្រួសាររបស់លោកមានទាំងលុយ មានទាំងកម្លាំងអាវុធ និងបន្ទាយទ័ពនៅក្នុងដៃដាក់នៅក្បែរផ្ទះផង។ មិនតែប៉ុណ្ណោះ កូនៗ លោក ហ៊ុន សែន ក្រោមការដឹកនាំដ៏ភ្លឺស្វាងរបស់ឪពុកខ្លួនខិតខំពង្រីកបណ្ដាញអ្នកគាំទ្រខាងក្រុមខ្លួន ដើម្បីអោយមានតុល្យភាពខាងអំណាចផង និងអោយមានប្រៀបជាងក្រុម លោក សាយ ឈុំ លោក ទៀ បាញ់ ឬ ក្រុម លោក ស ខេង ផង។ មានដៃជើងរបស់កូនៗ លោក ហ៊ុន សែន ដែលត្រូវគេស្គាល់ថាជាក្រុមស្ទាវដៃឆៅមិនតិចទេ ដែលត្រូវលោក ហ៊ុន សែន ព្រមទាំងកូនលោកចាត់ចែងតែងតាំងអោយមានមុខតំណែងធំៗ ក្នុងបក្ស និងក្នុងជួររដ្ឋាភិបាល។
លោកនាយករដ្ឋមន្ត្រីហ៊ុន សែន ធ្លាប់ថ្លែងកាលពីឆ្នាំមុនថា លោក អូន ព័ន្ធមុន្នីរ័ត្ន និង លោក ហ៊ុន ម៉ាណែត ជាបេក្ខភាពកាន់តំណែងជានាយករដ្ឋមន្ត្រី នៅក្នុងចំណោមបេក្ខជនដទៃទៀត។ យ៉ាងនេះក្ដី មានតែលោកហ៊ុន ម៉ាណែត មួយប៉ុណ្ណោះដែលឡើងតំណែងសំខាន់ក្នុងបក្សក្លាយជាប្រធានយុវជនគណៈមជ្ឈិមបក្ស ខណៈដែលលោកអូន ព័ន្ធមុន្នីរ័ត្ន ត្រឹមជាសមាជិកអចិន្ត្រៃយ៍បក្សប៉ុណ្ណោះ។
សរុបសេចក្ដីមក តំណែងនាយករដ្ឋមន្ត្រីបន្តពីលោក ហ៊ុន សែន ជាតំណែងមួយដែលមានតែក្រុមកាន់អំណាចធំៗក្នុងបក្សប្រជាជនប៉ុណ្ណោះ ដែលអាចចូលរួមជជែកពិភាក្សាគិតគូរគ្នាបាន។ ប្រការដែលលោក លោកហ៊ុន សែន ប្រកាសថានឹងធ្វើនាយករដ្ឋមន្ត្រីរហូតលែងចង់ធ្វើនោះ អាចជាសញ្ញាបញ្ជាក់ថា ស្ថានការណ៍ទូទៅ រួមនិងស្ថានការណ៍ផ្ទៃក្នុងបក្សផង នៅមិនទាន់អនុញ្ញាតអោយលោកអាចប្រកាសជាចំហនូវសមាសភាពអ្នកស្នងតំណែង ដូចដែលលោកចិញ្ចឹមចិត្តទុកនោះបាននៅឡើយទេ។ បើវាយតម្លៃថា មិនទាន់មានសំឡេងគាំទ្រគ្រប់គ្រាន់ លើបេក្ខភាពដែលលោកដៅទុកនោះបាននៅឡើយ ជម្រើសដែលល្អបំផុត របស់លោកគឺនៅបន្តក្អោបអំណាចខ្លួនឯងសិន ហើយប្រកាសប្រាប់គេឯងថា លោកនៅកាន់តំណែងនេះរហូតលោកលែងចង់។
នៅពេលដែលលោករិះរកវិធីដើម្បីសម្រេចគោលបំណង ផ្ទេរអំណាចទៅអោយបេក្ខជនរបស់លោកដោយសុវត្ថិភាពបានហើយ លោកអាចនឹងប្រកាសភ្លាមថាលោកលែងចង់ធ្វើនាយករដ្ឋមន្ត្រីតទៅទៀតហើយ៕
2 comments:
Military dictatorship.
Ah Chker Chkuot Hun Sen can say whatever he wanted until Khmer people running out of patience, then he will " Seuch Sess, laughing horse".
Post a Comment