Khmer Circle: When has he ever thought about the poor or the poorest?
🔺🔺🔺
ដោយ មួង ណារ៉េត
2021-12-13
ោក ហ៊ុន សែន ចូលរួមក្នុងពិធីក្រុងពាលី និងសំណេះសំណាលជាមួយក្រុមការងារថតខ្សែភាពយន្តភាគ «រឿងកូនប្រុសក្រោមពន្លឺព្រះចន្ទពេញបូណ៌មី» នៅទីបញ្ជាការដ្ឋានកងអង្គរក្សលោកហ៊ុន សែន នៅក្រុងតាខ្មៅខេត្តកណ្ដាលនៅព្រឹកថ្ងៃចន្ទ ទី១៣ ខែធ្នូ ឆ្នាំ២០២១។
រូប៖ ហ្វេសប៊ុក SMP
ប្រជាពលរដ្ឋ និងសកម្មជនគណបក្សប្រឆាំង រិះគន់រដ្ឋាភិបាលដែលបន្តយកថវិកាជាតិផលិតភាពយន្តពីការតស៊ូរបស់លោកនាយករដ្ឋមន្ត្រី ហ៊ុន សែន ថា ជាការខ្ជះខ្ជាយថវិកាជាតិ និងជាការមិនគិតគូរដល់ពលរដ្ឋក្រីក្រដែលកំពុងអត់ឃ្លាន។ ប្រតិកម្មនេះធ្វើឡើងក្រោយពេលលោក ហ៊ុន សែន ចាប់ផ្ដើមធ្វើពិធីក្រុងពាលីនិង សំណេះសំណាលជាមួយក្រុមការងារថតខ្សែភាពយន្តភាគរឿង «កូនប្រុសក្រោមពន្លឺព្រះចន្ទពេញបូរមី» នៅព្រឹកថ្ងៃទី១៣ ខែធ្នូ ឆ្នាំ២០២១។
ប្រជាពលរដ្ឋនិងសកម្មជនគណបក្សប្រឆាំងលើកឡើងថា ស្ថានភាពការរាតត្បាតជំងឺកូវីដ-១៩ ដូចសព្វថ្ងៃនេះ រដ្ឋាភិបាលក្រុងភ្នំពេញ គួរតែដោះស្រាយពីទុក្ខលំបាករបស់ប្រជាពលរដ្ឋប្រសើរជាងយកថវិកាជាតិទៅចំណាយថតខ្សែភាពយន្តដើម្បីប្រយោជន៍ផ្ទាល់ខ្លួនរបស់លោក ហ៊ុន សែន។
ប្រជាពលរដ្ឋម្នាក់រស់នៅខេត្តស្វាយរៀងលោកស្រី អ៊ុក ចន្ធី ប្រាប់វិទ្យុអាស៊ីសេរីនៅថ្ងៃទី១៣ ខែធ្នូថា សព្វថ្ងៃនេះមានប្រជាពលរដ្ឋជាច្រើនម៉ឺននាក់កំពុងមានជីវភាពខ្វះខាតនិងលំបាកវេទនា ដោយសារអត់ការងារធ្វើ ហើយជំពាក់បំណុលធនាគារ។ ស្ត្រីវ័យ ៤៨ ឆ្នាំរូបនេះ បន្តថា ស្ថានភាពបែបនេះរដ្ឋាភិបាលគួរតែឧបត្ថម្ភស្បៀងអាហារនិងថវិកាជួយដល់ពួកគាត់ គឺពុំមែនយកពេលវេលាក្នុងម៉ោងការងាររដ្ឋនិងថវិការបស់ជាតិ ទៅថតខ្សែភាពយន្តដែលរៀបរាប់អំពីការតស៊ូរបស់លោក ហ៊ុន សែននោះទេ។ លោកស្រីចាត់ទុកទង្វើបែបនេះថា ជាការខ្ជះខ្ជាយថវិកាជាតិដើម្បីផ្គាប់ចិត្តលោក ហ៊ុន សែន៖ «ខ្ញុំគិតថា ធ្វើហ្នឹងដើម្បីវីរភាពរបស់គាត់ គឺលោក ហ៊ុន សែន ចង់បង្ហាញឱ្យគេដឹងថាគាត់ហ្នឹងមានការតស៊ូជាខ្លាំងអីចឹង។តែគាត់អត់ខ្វល់ពីទុក្ខ លំបាករបស់ប្រជាពលរដ្ឋទេ។បើគាត់ចង់ឱ្យឃើញថា មានការគោរពវីរភាពរបស់គាត់ សំខាន់បំផុតគឺជួយប្រជាពលរដ្ឋបានពលរដ្ឋមើលឃើញវីរភាពរបស់គាត់»។
ចំណែកសកម្មជនគណបក្សសង្គ្រោះជាតិដែលកំពុងភៀសខ្លួននៅប្រទេសថៃលោក ជឹម សុផាត ថ្លែងថា លោកក៏មិនគាំទ្រនឹងការថតខ្សែភាពយន្តនេះដែរ ពីព្រោះជាការចំណាយថវិកាជាតិឥតប្រយោជន៍។ លោកយល់ថា ការថតខ្សែភាពយន្តបែបនេះថា ជាការសម្ដែងបោកប្រាស់ប្រជាពលរដ្ឋ ដើម្បីកេងចំណេញនយោបាយរបស់លោក ហ៊ុន សែន ប៉ុណ្ណោះ៖ «មកដល់ពេលនេះយើងដឹងហើយថា កៀកនឹងការបោះឆ្នោតអីចឹងគាត់ត្រូវរំលឹករឿងចាស់ ដើម្បីឱ្យប្រជាពលរដ្ឋខ្មែរដឹងគុណគាត់ថា គាត់ហ្នឹងគឺជាវរបុរស។ ប៉ុន្តែរឿងនេះ ពលរដ្ឋខ្មែរបានដឹងហើយ បើសិនជាគាត់ចិត្តសឿងក្លាហានហ៊ានបោះឆ្នោតដោយត្រឹមត្រូវនិងយុត្តិធម៌ គឺគាត់អត់មានសមត្ថភាពទេ។ អីចឹងការរំលឹកវីរភាពរបស់ខ្លួនឯងនេះអត់មានអីជាអស្ចារ្យជាដុំកំភួនឱ្យប្រជាពលរដ្ឋមើលឃើញទេ»។
ប្រតិកម្មរបស់ពលរដ្ឋធ្វើឡើងក្រោយពេលលោក ហ៊ុន សែន ចូលរួមជាអធិបតីក្នុងពិធីក្រុងពាលី និងជួបសំណេះសំណាលជាមួយក្រុមការងារថតខ្សែភាពយន្តភាគរឿង «កូនប្រុសក្រោមពន្លឺព្រះចន្ទពេញបូរមី» ដែលរៀបរាប់អំពីដំណើរជីវិតតស៊ូរបស់លោក ហ៊ុន សែន។ ពិធីនេះ មានកូនប្រុសច្បងរបស់លោកហ៊ុន សែន គឺលោក ហ៊ុន ម៉ាណែត និងមន្ត្រីជាន់ខ្ពស់រដ្ឋាភិបាលជាច្រើននាក់ទៀតចូលរួមដែរ នៅទីបញ្ជាការដ្ឋានកងអង្គរក្សលោកហ៊ុន សែន នៅក្រុងតាខ្មៅខេត្តកណ្ដាលនៅព្រឹកថ្ងៃទី១៣ ខែធ្នូ។ ប្រព័ន្ធផ្សព្វផ្សាយស្និទ្ធនឹងលោកហ៊ុន សែន ចុះផ្សាយថា រដ្ឋលេខាធិការក្រសួងព័ត៌មានលោក ហ៊ីម សុទិត្យ ជាប្រធានដឹកនាំគណៈកម្មការផលិតភាពយន្តភាគនេះ និងមានមនុស្សជាង ១០ នាក់ទៀតជាសមាជិក។ រឿងនេះ និពន្ធ និងដឹកនាំដោយលោក ហ៊ុយ វាសនា។ ដំបូងឡើយ ភាពយន្តមួយនេះ ដឹកនាំផលិតដោយរដ្ឋលេខាធិការក្រសួងព័ត៌មានលោក ម៉ៅ អាយុទ្ធ ប៉ុន្តែលោក បានស្លាប់ដោយសារឆ្លងជំងឺកូវីដ-១៩ កាលពីខែមេសាកន្លងទៅ។
ទាក់ទងនឹងបញ្ហានេះប្រធានអង្គភាពអ្នកនាំពាក្យរដ្ឋាភិបាលលោក ផៃ ស៊ីផាន ប្រាប់វិទ្យុអាស៊ីសេរីថា លោកពុំដឹងថា ភាពយន្តនេះគ្រោងចំណាយថវិកាអស់ប៉ុន្មាននោះទេ ប៉ុន្តែលោកអះអាងថា ការចំណាយថតភាពយន្តមួយនេះជាថវិកាឯកជន គឺមិនពាក់ព័ន្ធថវិកាជាតិឡើយ៖ «ទី១វាជាខ្សែភាពយន្តប្រវត្តិសាស្ត្រដែលពាក់ព័ន្ធនឹងដំណើរជីវិតរបស់នាយករដ្ឋមន្ត្រី នៅពេលដែលលោកគេចចេញពីការតាមកាប់សម្លាប់របស់ប៉ុល ពត ដែលលោកភៀសខ្លួនទៅវៀតណាម ហើយបានបង្កើតកម្លាំងចូលមកវិញ។ អាហ្នឹងគឺជាចំណែកនៃប្រវត្តិសាស្ត្រមួយនៃជីវិតរបស់នាយករដ្ឋមន្ត្រី ហើយក៏ជាប្រវត្តិសាស្ត្ររបស់ជាតិដែរ ក្នុងការតតាំងជាមួយ ខ្មែរក្រហមនោះ»។
ជុំវិញរឿងនេះ ប្រធានអង្គការសម្ព័ន្ធគណនេយ្យភាពសង្គមកម្ពុជាលោក សន ជ័យ គាំទ្រនឹងការថតខ្សែភាពយន្តទាំងឡាយដែលអប់រំដល់យុវជនខ្មែរដើម្បីស្វែងយល់អំពីប្រវត្តិសាស្ត្ររបស់ខ្លួន។ ប៉ុន្តែលោកបញ្ជាក់ថា ការថតខ្សែភាពយន្តបែបនេះគួរធ្វើឱ្យបានស្នើភាពគ្នា គ្រប់និន្នាការគណបក្សនយោបាយ និងធ្វើដើម្បីបម្រើយោជន៍សាធារណៈ៖ «មេរៀនតាមរយៈប្រវត្តិសាស្ត្រនេះបានបង្ហាញទៅសាធារណជន គេត្រូវឈរលើមូលដ្ឋានថា តើអ្នកណាខ្លះជាតួអង្គដែលត្រូវធ្វើកិច្ចការទៅលើរឿងនេះ។ ក្រសួងជំនាញណាមួយអ្នកប្រវត្តិសាស្ត្រហើយការប្រើប្រាស់ធនធានសាធារណៈ ថាតើការប្រើប្រាស់ធនធាននោះវាជាប្រយោជន៍សាធារណៈឬមួយក៏ប្រយោជន៍សម្រាប់ក្រុមណាមួយជាក់លាក់»។
ទោះជាយ៉ាងណា អ្នកវិភាគនយោបាយលោក គឹម សុខ យល់ថា ចេតនាដែលលោក ហ៊ុន សែន ផលិតភាពយន្តនៃការតស៊ូនេះ គឺដើម្បីឱ្យពលរដ្ឋជាពិសេស អ្នកនៅជនបទឱ្យផ្ដោតអារម្មណ៍លើកតម្កើងពីតម្លៃគ្រួសាររបស់លោក ហ៊ុន សែន។ លោកថា រូបភាពនេះជាការប្រើអក្សរសិល្ប៍នយោបាយក្នុងការៀបចំផែនការផ្ទេរអំណាចរបស់លោក ហ៊ុន សែន ទៅឱ្យលោក ហ៊ុន ម៉ាណែត៖ «រឿងនេះ វាគឺជាការរៀបចំរបត់ផ្លូវនៃការលើកតម្កើងគ្រួសារមួយ ហើយមិនមានតថភាព សច្ចភាពដំណើរប្រវត្តិសាស្ត្រត្រឹមត្រូវដែលប្រជាពលរដ្ឋខ្មែរអាចរៀនសូត្របានទេ។ គ្រាន់តែលើកតម្កើងគ្រួសារហ៊ុន ដើម្បីផែនការអំណាចគ្រួសារ ហើយមែនទែនទៅវាចំណាយនូវកម្លាំងរបស់មន្ត្រីរាជការ អ្នកឧកញ៉ា និងមន្ត្រីធំៗ ទាំងថវិកាជាតិអាចនឹងពាក់ព័ន្ធទៅលើការលាងលុយក្រខ្វក់ផង»។
កាលពីឆ្នាំ២០១៧ លោក ហ៊ុន សែន ធ្លាប់លើកឡើងថា លោកមិនឲ្យអ្នកផ្សេងឈ្នះដើម្បីសរសេរប្រវត្តិសាស្ត្រឡើយ។ លោកថា គ្មានឱកាសសម្រាប់ឲ្យអ្នកដទៃ ដែលជាអ្នកចាញ់សរសេរប្រវត្តិសាស្ត្រទេ គឺមានតែអ្នកឈ្នះទេ ដែលជាអ្នកសរសេរប្រវត្តិសាស្ត្រ។
កន្លងមកលោក ហ៊ុន សែន ក៏បានបង្កើតល្ខោនវិទ្យុរឿងកូនប្រុសក្រោមពន្លឺព្រះចន្ទពេញបូណ៌មីនេះដែរ និងត្រូវបានវិទ្យុបាយ័នរបស់កូនស្រីលោក ហ៊ុន សែន គឺអ្នកស្រី ហ៊ុន ម៉ាណា ចាក់ផ្សាយ ជាច្រើនឆ្នាំមកហើយ ជាពិសេសនៅពេលជិតដល់រដូវកាលបោះឆ្នោតម្តងៗ។
ទោះជាយ៉ាងណា ប្រជាពលរដ្ឋ និងអ្នកវិភាគអះអាងថា លោក ហ៊ុន សែន កំពុងតែកាឡៃប្រវត្តិសាស្ត្រតាមរយៈការផលិតខ្សែភាពយន្តនេះ។ អ្នកវិភាគថា ពលរដ្ឋជាច្រើនបានដឹងពីប្រវត្តិសាស្ត្រពិត ដែលមិនអាចកែប្រែបាននោះ គឺលោកជាអតីតទាហានខ្មែរក្រហម និងបានឡើងកាន់អំណាចដោយសារការជួយជ្រោមជ្រែងរបស់វៀតណាម។ អ្នកវិភាគលើកឡើងថា ការផលិតខ្សែភាពយន្តនេះ លោក ហ៊ុន សែន ចង់បង្កើតសាច់រឿងថ្មីបំភ្លៃប្រវត្តិសាស្ត្រពិតទាំងនេះ ក្នុងទិសដៅលើកតម្កើងខ្លួនឯងផង និងចង់ទទួលបានការអាណិតអាសូរពីពលរដ្ឋផង ដើម្បីឈានទៅពង្រឹងអំណាចតពូជពង់វង្សត្រកូលនៅពេលអនាគត៕
1 comment:
Ah Hun Sen Chlang Chkuot Pi Ah Sihanouk.
Post a Comment