ដោយ វិទ្យុអាស៊ីសេរី
2023.06.05
តោះ... ប្រកួតប្រជែងគ្នាដាក់ចំណងជើងឱ្យរូបត្លុកនយោបាយមួយនេះ!
រូប៖ RFA
ពលរដ្ឋខ្មែរកម្ពុជាក្រោម នៅលើទឹកដីខ្មែរ និងនៅកម្ពុជាក្រោម បាននាំគ្នាប្រារព្ធពិធីរំឭកខួប ៧៤ឆ្នាំ ដែលអាណានិគមនិយមបារាំងបានកាត់ដីកម្ពុជាក្រោម ចំនួន ២១ខេត្ត ឱ្យវៀតណាមគ្រប់គ្រង កាលពីថ្ងៃទី៤ ខែមិថុនា ឆ្នាំ១៩៤៩។ ប៉ុន្តែ ការប្រារព្ធពិធីនេះ នៅលើទឹកដីកម្ពុជាក្រោម ត្រូវបានអាជ្ញាធរវៀតណាមរារាំង និងបានប្រើអំពើហិង្សាលើព្រះសង្ឃ និងពលរដ្ឋខ្មែរក្រោម ឱ្យរងរបួសជាច្រើននាក់។
រយៈពេល ៧៤ឆ្នាំ ដែលទឹកដីកម្ពុជាក្រោម ស្ថិតក្រោមការគ្រប់គ្រងរបស់វៀតណាមនេះ ពលរដ្ឋខ្មែរកម្ពុជាក្រោម បានខិតខំប្រឹងប្រែងថែរក្សាប្រពៃណីទំនៀមទំលាប់ វប្បធម៌ អក្សរសាស្ត្រ ដើម្បីថែរក្សាអត្តសញ្ញាណខ្មែររបស់ខ្លួនជាជនជាតិដើម បើទោះជាមានការគាបសង្កត់ ពីសំណាក់អាជ្ញាធរវៀតណាម យ៉ាងណាក្តី។ អ្វីដែលពលរដ្ឋខ្មែរកម្ពុជាក្រោម ចង់បាននោះ គឺសិទ្ធិក្នុងការសម្រេចចិត្តដោយខ្លួនឯង ក្នុងនាមជាជនជាតិដើមរស់នៅលើទឹកដីកំណើតរបស់ខ្លួន។ ប៉ុន្តែ រដ្ឋាភិបាលវៀតណាម តែងបដិសេធ និងបង្ក្រាបការទាមទារទាំងនេះ ដោយយកលេសប្រាសចាកពីការពិតថា ពលរដ្ឋខ្មែរកម្ពុជាក្រោម មិនមែនជាជនជាតិដើមទេ ប៉ុន្តែ ជាជនជាតិភាគតិចទៅវិញ។ ទោះជាយ៉ាងនេះក្តី ពលរដ្ឋខ្មែរកម្ពុជាក្រោម នៅតែមានសង្ឃឹមថា ថ្ងៃណាមួយ ពួកគាត់នឹងអាចទាមទារឲ្យរដ្ឋាភិបាលវៀតណាម ផ្តល់សិទ្ធិជាជនជាតិដើមដល់ពលរដ្ឋខ្មែរកម្ពុជាក្រោម ដែលពួកគាត់អាចមានសិទ្ធិស្វ័យសម្រេចលើជោគវាសនារបស់ខ្លួនបាន៕
No comments:
Post a Comment