ដោយ ឃុន បញ្ញាវឌ្ឍន៍
2016-03-18
យុវជន គង់ រ៉ៃយ៉ា (រូបកណ្ដាល) ពេលបញ្ជូនមកសាកសួរ នៅសាលាដំបូងរាជធានីភ្នំពេញ នៅថ្ងៃទី២៦ ខែកុម្ភៈ ឆ្នាំ២០១៦។
RFA/Rann Samnang
ការិយាល័យសិទ្ធិមនុស្សអង្គការសហប្រជាជាតិប្រចាំតំបន់អាស៊ីអាគ្នេយ៍ (OHCHR) សម្ដែងការព្រួយបារម្ភយ៉ាងខ្លាំងដែលតុលាការកម្ពុជា កាត់ទោសនិស្សិតសាកលវិទ្យាល័យមួយរូបឈ្មោះ គង់ រ៉ៃយ៉ា ដោយសារការបង្ហោះសារបដិវត្តន៍តាមហ្វេសប៊ុក (Facebook)។
និស្សិត គង់ រ៉ៃយ៉ា ដែលមានអាយុ ២៥ឆ្នាំ ជានិស្សិតនៅសាកលវិទ្យាល័យខេមរៈ ត្រូវបានតុលាការសម្រេចផ្ដន្ទាទោសកាលពីថ្ងៃទី១៥ ខែមីនា ឆ្នាំ២០១៦ ឱ្យជាប់ពន្ធនាគារ ១៨ខែ ពីបទញុះញង់ឲ្យប្រព្រឹត្តបទឧក្រិដ្ឋជាអាទិ៍ ឬរំខានដល់សន្តិសុខសង្គម ដោយសារតែការបង្ហោះសារមួយនៅលើទំព័រហ្វេសប៊ុក ឈ្មោះ សូរីយា កូកូ (Soriya Koko) ថា "នៅថ្ងៃណាមួយនៅពេលអនាគត ខ្ញុំនឹងធ្វើបដិវត្តន៍ពណ៌ដើម្បីផ្លាស់ប្ដូរសង្គមខ្មែរ..."។
ការិយាល័យ OHCHR ជំរុញឲ្យរដ្ឋាភិបាលកម្ពុជា បញ្ឈប់ការកាត់ទោសនានា ដោយគ្រាន់តែមានការសម្ដែងគំនិតប៉ុណ្ណោះ។ តំណាងស្ដីទីនៃការិយាល័យ OHCHR ប្រចាំតំបន់នៅទីក្រុងបាងកក លោក ឡោរែន មីឡា (Laurent Meilla) មានប្រសាសន៍ថា សេរីភាពនៃការសម្ដែងមតិ គឺជាសិទ្ធិរបស់ពលរដ្ឋគ្រប់រូប និងជាសមាសធាតុដ៏សំខាន់មួយនៃលទ្ធិប្រជាធិបតេយ្យពិតប្រាកដ៕
No comments:
Post a Comment