ដោយ ម៉ៅ សុធានី
2016-09-12
rfa
លោកស្រី អេង លីគង់ និងលោក ស៊ីវ ស៊ីចាន់ ចុះអនុស្សរណៈជាមួយគ្នាពាក់ព័ន្ធនឹងការបង្កើតក្រុមហ៊ុនទិញអង្ករពីកម្ពុជា។
Provided Photo
ជនរងគ្រោះក្នុងករណីបណ្ដឹងពីបទឆបោកប្រាក់ ១លានដុល្លារអាមេរិក បន្តស្វែងរកយុត្តិធម៌នៅតុលាការសហរដ្ឋអាមេរិក ទោះបីចុងចោទម្នាក់បានធ្វើអត្តឃាតក៏ដោយ។
វេជ្ជបណ្ឌិតទន្តពេទ្យ អ្នកស្រី អេង លីគង់ បានបញ្ជាក់ប្រាប់អាស៊ីសេរី តាមទូរស័ព្ទកាលពីយប់ថ្ងៃច័ន្ទ ទី១២ កញ្ញា ថា ជនជាប់ចោទម្នាក់ក្នុងចំណោម ៤នាក់ គឺលោក វីលៀម នូហ្យេ (William Nojay) អាយុ ៥៩ឆ្នាំ បានធ្វើអត្តឃាតកាលពីចុងសប្ដាហ៍មុន។
អ្នកស្រីបន្តថា ការបាញ់សម្លាប់ខ្លួនឯងនេះ សបញ្ជាក់ថា ជនជាប់ចោទបារម្ភពីទោសព្រហ្មទណ្ឌដែលខ្លួនបានប្រព្រឹត្ត៖ «ខ្ញុំគិតថា ជាសញ្ញាវិជ្ជមានមួយសម្រាប់ខ្ញុំដែលគាត់ពិតជាទទួលដឹងឮថា ខ្លួនគាត់នឹងមានទោសព្រហ្មទណ្ឌ។ ទោះបីជាម្នាក់ស្លាប់ក៏ដោយ បើខ្ញុំអត់ប្ដឹងបន្ត ខ្ញុំឈប់ពាក់កណ្ដាលទី ខ្ញុំម៉េចដឹងថា អ្វីដែលគាត់ប្ដឹងខ្ញុំនៅស្រុកខ្មែរហ្នឹង អត់ដឹងយ៉ាងម៉េច។ ប្រាក់ដែលបាត់នោះមួយលានដុល្លារ។ ពីមុនខ្ញុំចង់បានប្រាក់សងជាជំងឺចិត្ត ប៉ុន្តែឥឡូវនេះចង់បានយុត្តិធម៌សម្រាប់ខ្លួនខ្ញុំ»។
លោក វីលៀម នូហ្យេ គឺជាអតីតមេធាវី ជាសហគ្រិន និងជាសមាជិកសភាពីខាងគណបក្សសាធារណរដ្ឋប្រចាំរដ្ឋញូវយ៉ក (New York)។ លោក វីលៀម នូហ្យេ និងជនជាប់ចោទ ៣នាក់ទៀត រួមមានលោក ស៊ីវ ស៊ីចាន់ អតីតឯកអគ្គរដ្ឋទូតសហរដ្ឋអាមេរិកប្រចាំអង្គការសហប្រជាជាតិ លោក រីឆឺរ៍ សាន ពាណិជ្ជករខ្មែរ-អាមេរិកាំង នៅរដ្ឋកាលីហ្វ័រញ៉ា (California) និងពាណិជ្ជករមួយរូបទៀតពីរដ្ឋតិចសាស់ (Texas) គឺលោក ថូម៉ាស វីលែម (Thomas Willems)។ អ្នកទាំង ៤នាក់នោះ បានរួមគ្នាបង្កើតក្រុមហ៊ុនមួយឈ្មោះ អាក្រា (AKRA) ដើម្បីរកទីផ្សារលក់ និងបង្កើនផលិតផលកសិកម្មពីប្រទេសកម្ពុជា មកសហរដ្ឋអាមេរិក។ តុលាការក្រុងភ្នំពេញ នឹងបើកសវនាការក្នុងរឿងក្តីនេះ នៅថ្ងៃទី២៧ ខែកញ្ញា ខាងមុខ៕
No comments:
Post a Comment