ដោយ ម៉ែន សុធីរ
2016-10-23
សកម្មភាពគ្រឿងចក្រឈូសឆាយសម្អាតបាតអាងនៃទំនប់វារីអគ្គិសនីទន្លេសេសានក្រោម២ កាលពីថ្ងៃទី២៨ ខែមីនា ឆ្នាំ២០១៥។ RFA/Brach Chev
RFA/Brach Chev
ពលរដ្ឋរស់នៅឃុំស្រែគរ ស្រុកសេសាន ខេត្តស្ទឹងត្រែង អះអាងថា រថយន្តយីឌុបជាង ៣០គ្រឿងត្រៀមដឹកឈើមុខកាត់ធំៗចេញពីបរិវេណបាតអាងនៃទំនប់វារីអគ្គិសនីសេសានក្រោមពីរ កាលពីថ្ងៃទី២២ តុលា ទំនងយកទៅក្រៅប្រទេស។ អ្នកភូមិថា ឈើទាំងនោះក្រុមឈ្មួញបានដឹកជញ្ជូនពីតំបន់ឆ្ងាយៗនៃស្រុកសេសាន និងស្រុកសៀមប៉ាង មកអារច្រៀកក្នុងបរិវេណផ្ទៃអាងទំនប់វារីអគ្គិសនីសេសានក្រោមពីរ ដើម្បីធ្វើទៅជាឈើស្របច្បាប់ រួចដឹកចេញក្រៅ។
ពលរដ្ឋអះអាងថា ឈើដែលមានមុខកាត់ធំៗ និងមួយចំនួនតូចជាឈើប្រណិត ឋិតនៅតំបន់ព្រៃចាស់ក្នុងស្រុកសៀមប៉ាង និងស្រុកសេសាន កំពុងត្រូវបានគេកាប់រំលំគគ្រឹកគគ្រេង រួចដឹកជញ្ជូនចូលក្នុងបរិវេណបាតអាងទំនប់វារីអគ្គិសនីសេសានក្រោមពីរ ដើម្បីអារច្រៀក ងាយស្រួលដឹកជញ្ជូនតាមរថយន្តធំៗចេញក្រៅ ទំនងយកទៅប្រទេសវៀតណាម និងផ្គត់ផ្គង់ទីផ្សារក្នុងស្រុក។
ពលរដ្ឋរស់នៅឃុំស្រែគរ ស្រុកសេសាន ថ្លែងសុំមិនបញ្ចេញឈ្មោះ មើលឃើញថា កម្មករសម្រុកកាប់ឈើមានមុខកាត់ធំៗ ដូចជា ស្រឡៅ ផ្ចឹក ឈើទាល និងសុក្រំ ជាដើម ដែលឋិតនៅតំបន់ព្រៃចាស់ស្រុកសៀមប៉ាង និងតំបន់ព្រៃស្រោងមួយចំនួនទៀត រួចដឹកជញ្ជូនចូលផ្ទៃអាងទំនប់វារីអគ្គិសនីសេសានក្រោមពីរ មានរថយន្តយីឌុបរាប់សិបគ្រឿងត្រៀមដឹកចេញក្រៅ។ លោកថា ការដឹកជញ្ជូនឈើក្រៅផ្ទៃអាង កើតមានឡើងច្រើនឆ្នាំកន្លងមក ពុំឃើញមានអាជ្ញាធររដ្ឋាភិបាលណាចេញមុខទប់ស្កាត់ជាដុំកំភួនឡើយ៖ «ប្រហែលជា ៣០យីឌុប ឃើញឡានគេឈប់។ អស់អាលីងហើយឈើអាណត្តិនេះ ឈើនៅស្រែគរ គ្មានសេសសល់ទេ»។
ពលរដ្ឋរស់នៅខេត្តក្រចេះ អះអាងថា កាលពីថ្ងៃទី១៨ តុលា រថយន្តយីឌុបជាង ១០គ្រឿង បានដឹកជញ្ជូនឈើចេញពីផ្ទៃអាងទំនប់វារីអគ្គិសនីសេសានក្រោមពីរ បំណងយកទៅខេត្តស្វាយរៀង ដោយមានលិខិតអនុញ្ញាតពីមន្ត្រីរដ្ឋបាលព្រៃឈើ។
អតីតមន្ត្រីសម្របសម្រួលអង្គការបណ្ដាញការពារទន្លេបី លោក មៀច មាន ធ្លាប់មានប្រសាសន៍ថា បច្ចុប្បន្ននេះពុំមានឈើក្នុងតំបន់បាតអាងនោះទេ គឺត្រូវក្រុមហ៊ុនបាតអាងសម្រុកកាប់លក់អស់តាំងពីឆ្នាំ២០១៥។ បញ្ហានេះ បង្ខំឲ្យក្រុមហ៊ុនចាំបាច់ត្រូវប្រើប្រាស់ឈើក្រៅផ្ទៃអាង ដើម្បីសាងសង់លំនៅឋានថ្មីជូនពលរដ្ឋរងផលប៉ះពាល់ដោយសារទំនប់វារីអគ្គិសនីសេសានក្រោមពីរ។ លើសពីនេះ ផែនការដកហូតឈើ ឬប្រើប្រាស់ក្នុងតំបន់ផ្ទៃអាងរបស់ក្រុមហ៊ុន ក៏ពុំមានលក្ខណៈច្បាស់លាស់។
អាស៊ីសេរី មិនអាចទាក់ទងតំណាងក្រុមហ៊ុនសម្អាតបាតអាងទំនប់វារីអគ្គិសនីសេសានក្រោមពីរ លោក អ៊ុំ រ៉េត ដើម្បីសុំការបញ្ជាក់បញ្ហានេះបានទេនៅថ្ងៃទី២៣ តុលា។
ផ្ទៃអាងទំនប់វារីអគ្គិសនីសេសានក្រោមពីរ មានផ្ទៃដី ៣៦.០០០ហិកតារ ឋិតក្នុងស្រុកសេសាន ខេត្តស្ទឹងត្រែង ដែលមានឧកញ៉ា លឹម ប៊ុនណា ហៅខ្នារ ទទួលសិទ្ធិសម្អាតបាតអាងតាំងពីឆ្នាំ២០១២។
អ្នកនាំពាក្យសាលាខេត្តស្ទឹងត្រែង លោក ម៉ែន គុង ឲ្យដឹងថា រដ្ឋបាលខេត្តមិនទាន់ទទួលព័ត៌មានករណីនេះទេ។ តែយ៉ាងណាលោកថា កន្លងមក អាជ្ញាធរខេត្តបានជំរុញឲ្យសមត្ថកិច្ចចុះធ្វើការស្រាវជ្រាវ និងចុះពិនិត្យជាក់ស្តែងករណីនេះដែរ។ លោកថា អាជ្ញាធរមូលដ្ឋាននៅតំបន់នោះមានកាតព្វកិច្ចតាមដាន និងអនុវត្តភារកិច្ចមួយចំនួនពាក់ព័ន្ធការការពារធនធានធម្មជាតិ ហើយអាចរាយការណ៍ផ្ទាល់មករដ្ឋបាលខេត្ត៖ «ទាក់ទងព័ត៌មានឮថាប្រមូលឈើក្រៅតំបន់បាតអាង មិនទាន់ព័ត៌មានហ្នឹងជាក់លាក់នៅឡើយទេ។ យើងទទួលព័ត៌មានពីពលរដ្ឋ យើងបានឲ្យសមត្ថកិច្ចចុះធ្វើការស្រាវជ្រាវ បើឃើញមានករណីហ្នឹងមែន យើងត្រូវតែទប់ស្កាត់»។
មន្ត្រីអង្កេតជាន់ខ្ពស់ផ្នែកដីធ្លី និងធនធានធម្មជាតិនៃសមាគមអាដហុក (ADHOC) លោក ប៉ែន ប៊ុណ្ណារ៍ យល់ថា ប្រសិនបើពលរដ្ឋបានប្រទះឃើញបទល្មើសឧក្រិដ្ឋកើតឡើងនៅមូលដ្ឋានរបស់ខ្លួន ពលរដ្ឋអាចប្រើសិទ្ធិរបស់ខ្លួនផ្ដិតមេដៃប្ដឹងករណីនេះមកស្ថាប័នអយ្យការ ដើម្បីចាត់វិធានការច្បាប់។ លោកថា បទល្មើសឧក្រិដ្ឋព្រៃឈើកំពុងក្លាយជាអំពើពុករលួយជាប្រព័ន្ធ ប្រសិនបើមន្ត្រីពាក់ព័ន្ធរួមគំនិតជាមួយក្រុមហ៊ុននាំឈើចេញក្រៅផ្ទុយពីច្បាប់៖ «អ្នកដឹកនាំរដ្ឋលោកព្រមាន។ លោកបញ្ជាអត់មានប្រសិទ្ធភាពចឹង ស្ថាប័នទី៣ ត្រូវតែអនុវត្តហើយយោងតាមការអនុវត្តរបស់ស្ថាប័នទី៣ តុលាការហ្នឹង គឺពលរដ្ឋទាំងអស់នៅខេត្តស្ទឹងត្រែង រួមទាំងសង្គមស៊ីវិល ត្រូវតែផ្ដិតមេដៃប្ដឹង។ ពីបទប្រព្រឹត្តបទល្មើសឧក្រិដ្ឋនៅតំបន់នោះ»។
ប្រធានអង្គការកិច្ចការពិសេសសិទ្ធិមនុស្សកម្ពុជា លោក អ៊ូច ឡេង យល់ថា រដ្ឋាភិបាលត្រូវចាត់វិធានការតឹងរ៉ឹងពីភាពមិនប្រក្រតីនៃអាជីវកម្មឈើទ្រង់ទ្រាយធំ របស់ក្រុមហ៊ុនសម្អាតបាតអាង និងអនុវត្តច្បាប់លើក្រុមហ៊ុននោះ បើរកឃើញថា ពាក់ព័ន្ធការដឹកជញ្ជូនឈើក្រៅផ្ទៃអាងខុសច្បាប់ ដើម្បីស្រោចស្រង់ព្រៃឈើដែលនៅសេសសល់ចុងក្រោយ។ លោកថា បើរដ្ឋាភិបាលមិនចាត់វិធានការនេះទេ មានន័យថា រដ្ឋាភិបាលក៏រួមចំណែកបំផ្លាញធនធានធម្មជាតិដែរ៖ «នេះហើយយើងមានការព្រួយបារម្ភមែនទែនពីវិនាសកម្មព្រៃឈើក្នុងប្រទេសកម្ពុជា។ ដែលអ្នកស្រែកនៅតែស្រែក អ្នកកាប់នៅតែកាប់ អ្នករកស៊ីនៅតែរកស៊ី។ ប្រសិនគេចាប់ទៅ បង់តែលុយទៅ វារួចខ្លួនទៅហើយ»។
កាលពីថ្ងៃទី២២ កញ្ញា រាជរដ្ឋាភិបាលបានចេញសារាចរស្ដីពីវិធានការគ្រប់គ្រងធនធានធម្មជាតិ ក្នុងនោះរាជរដ្ឋាភិបាលបានដាក់ចេញនូវវិធានការមួយចំនួនទៅឲ្យស្ថាប័នពាក់ព័ន្ធ ត្រូវចាត់វិធានការឲ្យបានហ្មត់ចត់ដើម្បីទប់ស្កាត់ និងបង្ក្រាប ព្រមទាំងលុបបំបាត់បទល្មើសធនធានធម្មជាតិគ្រប់ប្រភេទ រួមទាំងការរុករានដីក្នុងតំបន់ព្រៃការពារ និងអភិរក្សធម្មជាតិដែលស្ថិតនៅក្នុងដែនសមត្ថកិច្ចរបស់ខ្លួន៕
No comments:
Post a Comment