ដោយ ម៉ែន សុធីរ
2016-10-22
ក្រុមយុវជន ខែត្រស្ទឹងត្រែង ដើររើសសំរាមតាមផ្លូវសាធារណៈក្នុងក្រុងស្ទឹងត្រែង កាលពីថ្ងៃទី១៨ ខែតុលា ឆ្នាំ២០១៦។
RFA/Men Sothyr
អាជ្ញាធរខែត្រស្ទឹងត្រែង អំពាវនាវមន្ត្រីរាជការ អង្គការសង្គមស៊ីវិល អាជីវករ និងពលរដ្ឋទាំងអស់យកចិត្តទុកដាក់កែប្រែឥរិយាបថទុកដាក់សំរាមឲ្យបានត្រឹមត្រូវនៅតាមទីសាធារណៈ អគាររដ្ឋបាលសាធារណៈ ផ្ទះធ្វើអាជីវកម្ម លំនៅឋាន និងទីផ្សារជាដើម។
មន្ត្រីនៃមន្ទីរទេសចរណ៍សហការជាមួយក្រុមសហភាពសហព័ន្ធយុវជនកម្ពុជា និងអាជ្ញាធរមូលដ្ឋានបាននាំយុវជន និស្សិត និងសិស្សានុសិស្សជាង ១០០នាក់ នៅព្រឹកថ្ងៃទី១៨ ខែតុលា ដើររើសសំរាមតាមផ្លូវសាធារណៈ ប្រយោជន៍លើស្ទួយបរិស្ថាននៅក្រុងស្ទឹងត្រែង ដើម្បីបញ្ជាប់ស្មារតីពលរដ្ឋឲ្យយល់ដឹងពីការថែរក្សាអនាម័យ ជាពិសេសការវេចខ្ចប់ទុកដាក់សំរាមត្រឹមត្រូវ។
ការទុកដាក់សំរាម និងការវេចខ្ចប់សំរាមឲ្យបានត្រឹមត្រូវគឺជាកត្តាសំខាន់ ដែលអាជ្ញាធរក្រុងស្ទឹងត្រែង និងមន្ត្រីទេសចរណ៍ខែត្រនេះបានលើកឡើងក្នុងទិវាទេសចរណ៍ពិភពលោកនៅទី១៨ ខែតុលា ដែលប្រារព្ធនៅខែត្រស្ទឹងត្រែង ឆ្នាំនេះ។
អាជ្ញាធរក្រុងស្ទឹងត្រែង បញ្ជាក់ថា គោលបំណងនៃយុទ្ធនាការនេះដើម្បីបំផុសស្មារតីពលរដ្ឋឲ្យយល់ពីការថែរក្សាអនាម័យដោយផ្ដើមពីយើងទាំងអស់គ្នា។ ទន្ទឹមនឹងនេះ យុទ្ធនាការនេះ ក្រុមយុវជន ឬសិស្សានុសិស្សគឺជាក្រុមស្នូលយ៉ាងសំខាន់ និងជាគំរូដល់គ្រប់មជ្ឈដ្ឋានទូទៅបំផុសចលនាពលរដ្ឋចូលរួមវេចខ្ចប់សំរាមឲ្យបានត្រឹមត្រូវ ដើម្បីរួមចំណែករក្សាបរិស្ថានស្អាតគ្រប់តំបន់។
អភិបាលរងក្រុងស្ទឹងត្រែង និងជាអនុប្រធានលេខាធិការដ្ឋានសហភាពសម្ព័ន្ធយុវជនកម្ពុជា លោក លី មីនា រំពឹងថា យុទ្ធនាការរើសសំរាមនេះ នឹងជាសារមួយពញ្ញាក់ស្មារតីពលរដ្ឋចូលរួមវេចខ្ចប់ និងទុកដាក់សំរាមត្រឹមត្រូវ។ លោកមើលឃើញថា អាជីវករមួយចំនួននៅមិនទាន់អនុវត្តការទុកដាក់ ឬវេចខ្ចប់សំរាមឲ្យបានត្រឹមត្រូវនោះទេ ក្រោយពីរងគ្រោះអគ្គីភ័យឆេះផ្សារកន្លងមក។
ហេតុនេះអាជ្ញាធរក្រុងតែងតែជំរុញឲ្យពលរដ្ឋទុកដាក់សំរាមនៅទីតាំងដែលអាជ្ញាធរកំណត់។ លោក លី មីនា បន្ថែមថា ការរៀបចំសណ្ដាប់ធ្នាប់ទុកដាក់សំរាម ឬការបន្សល់កាកសំណល់សំរាមជាការទទួលខុសត្រូវមួយចំណែករបស់មន្ត្រីមូលដ្ឋាន ក៏ប៉ុន្តែទម្លាប់មិនទទួលខុសត្រូវរបស់ពលរដ្ឋគឺជាសញ្ញាអវិជ្ជមានជះឥទ្ធិពលមិនល្អដល់បរិស្ថាន និងសង្គម។ លោកថា គ្រប់គ្នាត្រូវទទួលស្គាល់ថា ប្រសិនបើខ្វះការចូលរួមពីពលរដ្ឋគ្រប់មជ្ឈដ្ឋាន ផែនការការគ្រប់គ្រងបញ្ហាអនាម័យ និងសុខភាពក្នុងសង្គមរបស់មន្ត្រីជំនាញមិនទទួលបានជោគជ័យនោះទេ។
តួលេខប៉ាន់ប្រមាណរបស់អាជ្ញាធរក្រុងស្ទឹងត្រែង បង្ហាញថា ប្រជាពលរដ្ឋក្រុងស្ទឹងត្រែង បញ្ចេញចោលកាកសំណល់ និងសំរាមជាង ៣០តោនក្នុងមួយថ្ងៃៗ។
ឆ្លើយតបការលើកឡើងរបស់អាជ្ញាធរពាក់ព័ន្ធបញ្ហាសំរាម និស្សិតដែលចូលរួមយុទ្ធនាការរើសសំរាមគឺកញ្ញា យ៉ុង ភ័ក្រា ទទួលស្គាល់ដែរថា ពលរដ្ឋមួយចំនួនមិនចាប់អារម្មណ៍ការទុកដាក់សំរាមត្រឹមត្រូវ ដោយអាជីវករខ្លះបោះចោលសំរាមតាមផ្លូវសាធារណៈយ៉ាងអនាធិបតេយ្យ បើទោះបីជាអាជ្ញាធរមូលដ្ឋានបានលើកស្លាកសញ្ញាហាមមិនឲ្យចោលសំរាមក្តី។ បញ្ហានេះទាមទារឲ្យអាជ្ញាធរពាក់ព័ន្ធរកមធ្យោបាយធ្វើយ៉ាងណា កែប្រែឥរិយាបថពួកគេឲ្យបញ្ឈប់ការបោះចោលសំរាមគ្មានសណ្ដាប់ធ្នាប់។
កញ្ញាបន្តថា ក្រុមយុវជនចង់ឃើញពលរដ្ឋទូទៅចេះស្រឡាញ់បរិស្ថាន ដោយការយកចិត្តទុកដាក់វេចខ្ចប់សំរាមឲ្យបានល្អ ដើម្បីក្លាយទីកន្លែងរស់នៅប្រកបដោយសោភ័ណភាព ដែលជាផ្នែកមួយទាក់ទាញភ្ញៀវទេសចររកប្រាក់ចំណូលមិនចេះរីងស្ងួត៖ «គោលបំណងសំខាន់ចង់ផ្លាស់ប្ដូរផ្នត់គំនិតរបស់ពលរដ្ឋទៅលើការទុកដាក់សំរាម ព្រោះអីរាល់ថ្ងៃហ្នឹងគាត់នៅទុកដាក់សំរាមអត់ទាន់ មិនទាន់បានល្អទេ មិនត្រឹមតែមិនទាន់បានល្អ គឺវាអត់ល្អសោះ។ ចង់ឲ្យគាត់ផ្លាស់ប្ដូរផ្នត់គំនិតទុកដាក់សំរាមតាមទីកន្លែងត្រឹមត្រូវ»។
អាជីវកររស់នៅក្រុងស្ទឹងត្រែង ដែលចូលរួមទិវានេះ កញ្ញា ឈុំ កន្និការ ទទួលស្គាល់ដែរថា ទីតាំងលក់ដូររបស់អាជីវករ គឺជាប្រភពបន្សល់កាកសំណល់សំរាមនៅតាមទីសាធារណៈ ដែលទាមទារឲ្យមានការយកចិត្តទុកដាក់វេចខ្ចប់ឲ្យបានត្រឹមត្រូវ។ កញ្ញាបន្ថែមថា ការកែប្រែឥរិយាបថបញ្ឈប់ការបោះចោលសំរាមនៅគ្រប់ទីកន្លែង គឺជាកត្តាសំខាន់ដែលអាជីវករគ្រប់រូប ក៏ដូចជាពលរដ្ឋនៅខែត្រស្ទឹងត្រែង ត្រូវប្រកាន់យក និងអនុវត្តឲ្យមានប្រសិទ្ធភាពដើម្បីរួមចំណែកធ្វើឲ្យបរិស្ថានទូទាំងខែត្របានស្រស់ស្អាត។ លើសពីនេះទៀត ការចូលរួមរបស់ប្រជាពលរដ្ឋ មន្ត្រីរាជការ អាជ្ញាធរ និងអង្គការសង្គមស៊ីវិលគ្រប់មជ្ឈដ្ឋាន មិនត្រឹមតែធ្វើឲ្យប្រទេសជាតិមានភាពស្រស់ស្អាតនោះទេ បញ្ហានេះវាក៏បញ្ជាក់ពីភាពថ្លៃថ្នូររបស់ពលរដ្ឋដែរ៖ «ខ្ញុំគិតថា ចង់អំពាវនាវឲ្យពួកអាជីវករទាំងអស់ហ្នឹង គាត់ចូលរួមការពារបរិស្ថាន ឬទុកដាក់ខ្ចប់សំរាមឲ្យបានត្រឹមត្រូវ ដើម្បីការពារបរិស្ថានក៏ដូចជាភ្ញៀវទេសចរ»។
ប្រធានមន្ទីរទេសចរណ៍ខែត្រស្ទឹងត្រែង លោក អ៊ន់ ប៉ោសឿន មានប្រសាសន៍ថា ទិវាទេសចរណ៍ពិភពលោកឆ្នាំនេះមានសារសំខាន់រួមចំណែកបង្កើនចំណេះដឹងដល់ពលរដ្ឋស្ដីពីបញ្ហាបរិស្ថាន និងការគ្រប់គ្រងអនាម័យ។ លោកថា អាជ្ញាធរខែត្របានជំរុញឲ្យមានការបង្កើត យុទ្ធនាការគ្រប់គ្រងសំរាម និងបង្កើតអនុស្សរណៈយោគយល់គ្នា គ្រប់ស្ថាប័នទាំងរដ្ឋ និងឯកជន ធ្វើយ៉ាងណាចូលរួមរើសសំរាមក្នុងក្រុងស្ទឹងត្រែង មួយខែម្ដង ដើម្បីដាស់ស្មារតីពលរដ្ឋ និងក្រុមអាជីវករនានាឲ្យផ្ដោតការយកចិត្តទុកដាក់ធ្វើអនាម័យសម្អាតសំរាមនៅក្បែរទីកន្លែងលក់ដូររបស់ខ្លួន ដើម្បីរួមចំណែកថែរក្សាបរិស្ថានស្អាត។ លោកបញ្ជាក់ថា ចាប់តាំងពីក្រសួងទេសចរណ៍ដាក់ចេញនូវចលនាប្រឡងប្រណាំងទីក្រុងស្អាតកន្លងមក ឃើញថាការចូលរួមពីពលរដ្ឋទុកដាក់សំរាមបានប្រសើរជាងមុន។
លោកថា បញ្ហាកង្វះទុងសំរាមគ្មានដេប៉ូដាក់សំរាមគ្រប់គ្រាន់ និងការដឹកជញ្ជូនកាកសំណល់ទៅទីលានសំរាមមិនបានគ្រប់គ្រាន់តាមចំនួនសំរាមកំណត់ ក៏ជាកត្តាសំខាន់នាំឲ្យការគ្រប់គ្រងសំរាមមិនបានប្រសើរច្រើនដែរ។ តែយ៉ាងណាលោកថា សកម្មភាពចូលរួមរើសសំរាមរបស់ពលរដ្ឋមានលក្ខណៈប្រសើរជាងមុន៖ «គឺយើងនឹងធ្វើការអប់រំដោយផ្ទាល់ទៅតាមផ្ទះប្រជាពលរដ្ឋឲ្យគាត់មានជាធុងសំរាម ដើម្បីធ្វើការវេចខ្ចប់ឲ្យបានត្រឹមត្រូវ។ នេះជាសកម្មភាពរបស់មន្ទីរដែលមានការចូលរួមសកម្មភាពហ្នឹង។ យើងនឹងបន្តនៅចលនាផ្សព្វផ្សាយ និងយុទ្ធនាការ ដើម្បីធ្វើម៉េចការប្រមូលសំរាម និងការបញ្ញាក់នៅអារម្មណ៍ដើម្បីឲ្យពលរដ្ឋចូលរួមទាំងអស់គ្នា។ អ៊ីចឹងសំរាមដែរស្អាតគឺកើតចេញពីការចូលរួមពីយើងទាំងអស់គ្នា»។
កន្លងទៅអភិបាលខែត្រស្ទឹងត្រែង លោក ម៉ុម សារឿន មិនត្រឹមតែជំរុញឲ្យអាជ្ញាធរមូលដ្ឋាន និងពលរដ្ឋឲ្យយកចិត្តទុកដាក់បញ្ហាសំរាមប៉ុណ្ណោះទេ លោកធ្លាប់ជំរុញឲ្យពលរដ្ឋចូលរួមការពារបរិស្ថានធម្មជាតិ មានព្រៃឈើ និងសត្វព្រៃ ក៏ជាកត្តាសំខាន់រួមចំណែកធ្វើឲ្យខែត្រស្ទឹងត្រែង ស្រស់ស្អាត និងសម្បូរទៅដោយបរិស្ថានធម្មជាតិ៕
No comments:
Post a Comment