ដោយ រដ្ឋា វិសាល
2016-10-08
គណបក្សប្រជាធិបតេយ្យមូលដ្ឋាន បើកសមាជនៅឃុំប៉ក់ញ៉ៃ ស្រុកអូរយ៉ាដាវ ខេត្តរតនគិរី ដើម្បីបោះឆ្នោតជ្រើសរើសថ្នាក់ដឹកនាំបក្សនៅមូលដ្ឋាននេះលើកដំបូង នៅថ្ងៃទី២៤ ខែកញ្ញា ឆ្នាំ២០១៦។ RFA/Ratha Visal
គណបក្សប្រជាធិបតេយ្យមូលដ្ឋានគ្រោងបើកសមាជលើកទីពីរ នៅខេត្តរតនគិរី ដើម្បីបោះឆ្នោតជ្រើសរើសសមាសភាពដឹកនាំគណៈកម្មការប្រតិបត្តិគណបក្សប្រចាំឃុំចំនួនពីរទៀតនៅស្រុកអូរយ៉ាដាវ។ សមាជនេះធ្វើឡើងក៏ដើម្បីអនុវត្តតាមគោលនយោបាយគណបក្សដែលសម្រិតសម្រាំងបេក្ខភាពដឹកនាំនៅមូលដ្ឋានជាបុគ្គលមានសមត្ថភាព និងបម្រើប្រជារាស្ត្រពិតប្រាកដដើម្បីត្រៀមឈរឈ្មោះបោះឆ្នោតដឹកនាំក្រុមប្រឹក្សាឃុំសង្កាត់ ឆ្នាំ២០១៧ ខាងមុខនេះ។
មន្ត្រីជាន់ខ្ពស់គណបក្សប្រជាធិបតេយ្យមូលដ្ឋានឲ្យដឹងថា សមាជជ្រើសរើសថ្នាក់ដឹកនាំមូលដ្ឋាននៅខេត្តរតនគិរី នឹងប្រព្រឹត្តទៅនៅចុងខែតុលា ខាងមុខនេះ ដើម្បីបោះឆ្នោតជ្រើសជ្រើសគណៈកម្មការប្រតិបត្តិឃុំចំនួនពីរបន្ថែមទៀត នៅស្រុកអូរយ៉ាដាវ និងជ្រើសរើសគណៈកម្មការប្រតិបត្តិថ្នាក់ខេត្តផងដែរ។
អ្នកនាំពាក្យ និងជាអគ្គលេខាធិការគណបក្សប្រជាធិបតេយ្យមូលដ្ឋាន លោក សំ អ៊ិន ឲ្យដឹងនៅថ្ងៃទី៧ ខែតុលា ថា សកម្មជនបក្សនៅស្រុកអូរយ៉ាដាវ បានជ្រើសរើសបេក្ខភាពត្រៀមឈរឈ្មោះបោះឆ្នោតដឹកនាំនៅឃុំយ៉ាទុង និងឃុំបរខាំ ដើម្បីបង្កើតគណៈកម្មការប្រតិបត្តិឃុំទាំងពីរ។ លោកបន្តថា គោលនយោបាយគណបក្សប្រជាធិបតេយ្យមូលដ្ឋាន គឺជ្រើសរើសថ្នាក់ដឹកនាំដែលប្រជាពលរដ្ឋនៅមូលដ្ឋានជាអ្នកជ្រើសរើសផ្ទាល់ដើម្បីបំពេញការងារតាមឆន្ទៈ និងតម្រូវការរបស់ប្រជាពលរដ្ឋជាក់ស្ដែង៖ «យើងចង់បង្ហាញពីគំរូមួយដែលផ្លាស់ប្ដូរពីក្រោមមកលើហ្នឹង អាចបោះឆ្នោតរើសមេដឹកនាំទទួលខុសត្រូវមានសមត្ថភាព មានសីលធម៌ល្អ គាត់ដឹកនាំឃុំសង្កាត់បានល្អ»។
កាលពីខែកញ្ញា គណបក្សប្រជាធិបតេយ្យមូលដ្ឋាន បើកសមាជនៅឃុំប៉ក់ញ៉ៃ ស្រុកអូរយ៉ាដាវ និងបោះឆ្នោតជ្រើសរើសថ្នាក់ដឹកនាំបក្សនៅមូលដ្ឋាននេះលើកដំបូងដើម្បីត្រៀមចូលរួមប្រកួតប្រជែងបោះឆ្នោតក្រុមប្រឹក្សាឃុំសង្កាត់ ឆ្នាំ២០១៧។
ប្រធានគណៈកម្មការប្រតិបត្តិគណបក្សប្រជាធិបតេយ្យមូលដ្ឋាន ឃុំប៉ក់ញ៉ៃ លោក រមាស់ ស្វាន់ កត់សំគាល់ថា បញ្ហាដីធ្លី និងបញ្ហាធនធានធម្មជាតិនៅតែជាកង្វល់របស់ម្ចាស់ឆ្នោតនៅក្នុងឃុំដាច់ស្រយាលមួយនេះ បើទោះបីជាគណបក្សជាប់ឆ្នោតធ្លាប់បានសន្យាថា នឹងបញ្ឈប់មិនឲ្យមានផលប៉ះពាល់ប្រជាពលរដ្ឋយ៉ាងណាក្តី។
លោកថា ប្រជាពលរដ្ឋនៅឃុំចំនួនពីរបន្ថែមទៀតក្នុងស្រុកអូរយ៉ាដាវ បានស្ម័គ្រចិត្តចូលរួមជាសមាជិកគណបក្សប្រជាធិបតេយ្យមូលដ្ឋានដើម្បីធ្វើឲ្យមានការផ្លាស់ប្ដូរបញ្ហាអសកម្មដែលពលរដ្ឋចង់បាន៖ «គណបក្សមុនគេអត់ផ្លាស់ប្ដូរទេ អត់ប្រែទេ នៅតែដដែលៗ។គណបក្សមូលដ្ឋានបក្សប្រែ បក្សប្ដូរ»។
តាមការគ្រោងទុកគណបក្សប្រជាធិបតេយ្យមូលដ្ឋាន នឹងរៀបចំសមាជបង្កើតគណៈកម្មការប្រតិបត្តិថ្នាក់ឃុំសង្កាត់ឲ្យបាន ១០០ឃុំ មុនការបោះឆ្នោតជ្រើសរើសក្រុមប្រឹក្សាឃុំសង្កាត់ ឆ្នាំ២០១៧។ គណបក្សនេះប្ដេជ្ញាថា នឹងខិតខំធ្វើឲ្យប្រជាពលរដ្ឋមានជំនឿ និងបោះឆ្នោតជូនបេក្ខភាពគណបក្សនេះជាប់ឆ្នោតប្រធានក្រុមប្រឹក្សាឃុំសង្កាត់ឲ្យបាន២០។
មន្ត្រីសម្របសម្រួលសមាគមការពារសិទ្ធិមនុស្សអាដហុក (ADHOC) ខេត្តរតនគិរី លោក ឆាយ ធី កត់សំគាល់ថា ប្រជាពលរដ្ឋស្រុកអូរយ៉ាដាវ មួយចំនួនជាអ្នកគាំទ្រគណបក្ស សម រង្ស៊ី ឬគណបក្សសង្គ្រោះជាតិ ក៏ប៉ុន្តែការសម្រេចចិត្តចូលរួមជាមួយគណបក្សប្រជាធិបតេយ្យមូលដ្ឋាន គឺជាជម្រើសថ្មីរបស់ពលរដ្ឋនៅតំបន់ព្រំដែនដែលកំពុងមានកង្វល់ពីបញ្ហាដីធ្លី ព្រៃឈើ។
លោកថា គណបក្សប្រជាធិបតេយ្យមូលដ្ឋានគឺជាគណបក្សថ្មីមួយដែលកើតចេញពីការផ្ដួចផ្ដើមរបស់មន្ត្រីអង្គការសង្គមស៊ីវិលភាគច្រើនធ្លាប់បានបំពេញការងារជាមួយពលរដ្ឋនៅមូលដ្ឋាន ហេតុនេះថ្នាក់ដឹកនាំគណបក្សថ្មីនេះត្រូវបង្ហាញឆន្ទៈដោះស្រាយកង្វល់ពលរដ្ឋពិតប្រាកដទើបប្រជាពលរដ្ឋបោះឆ្នោតឲ្យនៅអាណត្តិបោះឆ្នោតឃុំសង្កាត់ខាងមុខនេះ៖ «គាត់ងាកមកគាំទ្របក្សមូលដ្ឋានវិញ យើងគិតថា គាត់អាចសង្ឃឹមថា បក្សមូលដ្ឋានជួយគាត់ទៅថ្ងៃអនាគត»។
គណបក្សប្រជាធិបតេយ្យមូលដ្ឋាន បង្កើតឡើងតាំងពីឆ្នាំ២០១៥ រហូតបច្ចុប្បន្នគណបក្សនេះបានធ្វើសមាជជ្រើសរើសថ្នាក់ដឹកនាំនៅមូលដ្ឋានបាន ១៦ឃុំ នៅក្នុងខេត្តក្រុងចំនួន៧៕
No comments:
Post a Comment