ដោយ ថា កិត្យា
2017-02-08
លោកនាយករដ្ឋមន្ត្រី ហ៊ុន សែន ក្នុងពិធីខួបលើកទី៦៥ នៃការបង្កើតគណបក្សប្រជាជនកម្ពុជា នាទីស្នាក់ការកណ្ដាលបក្សខណ្ឌចំការមន រាជធានីភ្នំពេញ នៅព្រឹកថ្ងៃទី២៨ ខែមិថុនា ឆ្នាំ២០១៦។ RFA/Brach Chev
លោកនាយករដ្ឋមន្ត្រី ហ៊ុន សែន អំពាវនាវឲ្យគ្រឹះស្ថានមីក្រូហិរញ្ញវត្ថុទាំងអស់ ត្រូវបញ្ជាក់ថា ខ្លួនឯងជាវិស័យឯកជន មិនមែនជារបស់រដ្ឋទេ ហើយអំពាវនាវឲ្យប្រជាពលរដ្ឋត្រូវពិនិត្យលទ្ធភាព មុននឹងខ្ចីលុយពីមីក្រូហិរញ្ញវត្ថុ។ រីឯអ្នកសេដ្ឋកិច្ចថាការអំពាវនាវរបស់រដ្ឋាភិបាល ជារឿងត្រឹមត្រូវ ប៉ុន្តែជំរុញឲ្យរដ្ឋាភិបាលបង្កើតការងារក្នុងស្រុកឲ្យបានច្រើន ដើម្បីជួយពលរដ្ឋ។
លោកនាយករដ្ឋមន្ត្រី ហ៊ុន សែន ព្រមានថា ប្រសិនបើគ្រឹះស្ថានមីក្រូហិរញ្ញវត្ថុណាមួយនៅតែមិនអប់រំអ្នកខ្ចីប្រាក់ឲ្យយល់ច្បាស់ពីរឿងបំណុលរបស់ឯកជន ហើយនៅតែបន្តធ្វើឲ្យប្រជាពលរដ្ឋយល់ច្រឡំថា ពួកគាត់ជាប់ជំពាក់បំណុលរបស់រដ្ឋនោះ ត្រូវបិទចោលតែម្តង។ លោកថា រដ្ឋគ្មានសិទ្ធិឲ្យប្រជាពលរដ្ឋខ្ចីប្រាក់នោះទេ។
ទន្ទឹមគ្នានេះ លោកនាយករដ្ឋមន្ត្រីក៏អំពាវនាវដល់ប្រជាពលរដ្ឋ សូមប្រុងប្រយ័ត្នចំពោះការខ្ចីលុយពីមីក្រូហិរញ្ញវត្ថុ បើមិនមានលទ្ធភាពទេ សូមកុំខ្ចី ជាពិសេសការខ្ចីយកទៅប្រើប្រាស់ខុសគោលដៅ។
ការប្រកាសរបស់លោកនាយករដ្ឋមន្ត្រី ហ៊ុន សែន នេះ ធ្វើឡើងក្នុងពិធីបញ្ចុះសីមាព្រះវិហារវត្តព្រែកប្រា ក្នុងខណ្ឌច្បារអំពៅ នៅព្រឹកថ្ងៃទី៨ ខែកុម្ភៈ៖ «ឥឡូវដាក់ ជា ចាន់តូ ត្រូវធ្វើរឿងហ្នឹង ហើយតាមគ្រឹះស្ថានទាំងអស់ ទាំងសាខា ទីស្នាក់ការធំរបស់គាត់ ក៏ត្រូវដាក់គឺជាគ្រឹះស្ថានមីក្រូហិរញ្ញវត្ថុឈ្មោះ "ក" ជាគ្រឹះស្ថានឯកជន មិនមែនរបស់រដ្ឋ រួចហើយត្រូវអប់រំបុគ្គលិកឲ្យនិយាយភាសាមុនគេថា នេះជាផ្នែកឯកជន មិនមែនរបស់រដ្ឋ។ បើមិននិយាយអាហ្នឹងទេ គឺចាំបង្ខំត្រូវបិទ»។
លោក ហ៊ុន សែន ក៏អំពាវនាវឲ្យគ្រឹះស្ថានមីក្រូហិរញ្ញវត្ថុយោគយល់ពន្យារការសង ដោយមិនយកការប្រាក់នៅដំណាក់កាលដែលប្រជាពលរដ្ឋកំពុងជួបការលំបាក ដូចជាជួបគ្រោះរាំងស្ងួត និងគ្រោះទឹកជំនន់ ជាដើម។
ប្រធានអគ្គនាយកធនាគារអេស៊ីលីដា (ACLEDA Bank) លោក អ៊ិន ចាន់នី មានប្រសាសន៍ថា ជាធម្មតា អ្នកខ្ចីគាត់ដឹងច្បាស់ថា អ្នកណាជាម្ចាស់បំណុល ព្រោះមានកិច្ចសន្យាត្រឹមត្រូវ និងចូលមកដល់គ្រឹះស្ថានផ្តល់កម្ចីនោះតែម្តង។ ទោះជាយ៉ាងណា លោកថានឹងពន្យល់ដល់ពលរដ្ឋបន្ថែមទៀត៖ «អនុសាសន៍របស់សម្ដេចជាការត្រឹមត្រូវហើយ ឮចឹងយើងក៏ខ្វាយខ្វល់ដែរ ព្រោះខ្លាចពលរដ្ឋថាជំពាក់លុយរដ្ឋ ហើយខ្លាចគាត់មិនសងយើង»។
រីឯអ្នកសិក្សាស្រាវជ្រាវការអភិវឌ្ឍសង្គម លោកបណ្ឌិត មាស នី មានប្រសាសន៍ថា រឿងពលរដ្ឋយល់ច្រឡំថាពួកគាត់ជំពាក់បំណុលរដ្ឋនោះ មិនមែនជាកំហុសរបស់គ្រឹះស្ថានមីក្រូហិរញ្ញវត្ថុនោះទេ ព្រោះស្ថាប័ននីមួយៗតែងប្រាប់ឈ្មោះទៅអតិថិជនដើម្បីបានឈ្មោះល្បី ប៉ុន្តែពលរដ្ឋទៅវិញទេដែលនៅតែចម្លងភាសាមកពីរបប ប៉ុល ពត ព្រោះ ប៉ុល ពត ក៏ប្រើពាក្យអង្គការ។ បន្ថែមពីនេះ លោកបណ្ឌិត មាស នី យល់ថា ការលើកឡើងរបស់រដ្ឋាភិបាលនៅពេលនេះ គឺបង្ហាញពីការបារម្ភអំពីស្ថានភាពនៃប្រាក់កម្ចីរបស់ពលរដ្ឋកាន់តែមានលក្ខណៈធ្ងន់ធ្ងរ៖ «បើយើងនិយាយពីប្រាក់កម្ចី យើងខ្ញុំថាធ្ងន់ធ្ងរណាស់។ ខ្ញុំស្តាប់ទៅមិនតិចជាង ៨០ភាគរយ ឬអាចឈានដល់ ១០០ភាគរយ គឺខ្ចីប្រាក់គ្រប់គ្នាទាំងអស់ ហើយត្រូវនឹងពេលដែលមានវិបត្តិអត់មានទីផ្សារផលិតផលផង ធ្វើឲ្យការខ្ចីប្រាក់នេះពិបាក ជាពិសេសឆ្នាំនេះពិបាកសង»។
លោក ហ៊ុន សែន ក៏បានបញ្ជាឲ្យសមត្ថកិច្ចចាប់ខ្លួនអ្នកនយោបាយណាដែលដើរឃោសនាប្រាប់ប្រជាពលរដ្ឋនៅតាមមូលដ្ឋានថា បើខ្លួនឈ្នះឆ្នោត ខ្លួននឹងលុបបំណុលរបស់ពួកគេដែលជំពាក់គ្រឹះស្ថានមីក្រូហិរញ្ញវត្ថុ។
ទាក់ទិនបញ្ហាបំណុលពលរដ្ឋនេះដែរ សាស្ត្រាចារ្យផ្នែកសេដ្ឋកិច្ច លោកបណ្ឌិត តេង ដឺលុច មានប្រសាសន៍ថា ដើម្បីធ្វើឲ្យកម្រិតជីវភាពពលរដ្ឋរីកចម្រើន និងកាត់បន្ថយការជំពាក់បំណុលនោះ រដ្ឋាភិបាលត្រូវពង្រឹងការបង្កើតការងារ និងជំរុញឲ្យអ្នកវិនិយោគទាំងជាតិ និងអន្តរជាតិ បង្កើតការងារក្នុងស្រុក ដើម្បីផ្តល់ឱកាសការងារជូនពលរដ្ឋដែលមានប្រាក់បៀវត្សជានិរន្តរភាព៕
No comments:
Post a Comment