ដោយ ហ៊ុំ ចំរើន
2017-04-19
មណ្ឌលសុខភាពកកោះ ស្ថិតក្នុងស្រុកមោងឬស្សី ខេត្តបាត់ដំបង។ រូបថតថ្ងៃទី១៩ ខែមេសា ឆ្នាំ២០១៧។ RFA/Hum Chamroeun
RFA/Hum Chamroeun
ប្រជាពលរដ្ឋនៅស្រុកមោងឬស្សី ខេត្តបាត់ដំបង សោកស្ដាយជាខ្លាំងនៅពេលដែលទាហានជើងទឹករបស់អាមេរិក ផ្ដាច់ជំនួយអភិវឌ្ឍន៍សំណង់អគារមណ្ឌលសុខភាពកកោះ ដើម្បីសម្រួលដល់ការព្យាបាលជំងឺរបស់ពួកគាត់។ កន្លងទៅទាហានជើងទឹករបស់អាមេរិក បានសាងសង់បង្គន់ថ្មីមួយកន្លែងនៅក្នុងមណ្ឌលសុខភាពនេះ។ ពលរដ្ឋ និងប្រធានមណ្ឌលសុខភាពកកោះ ចង់បានការអភិវឌ្ឍនៅក្នុងមណ្ឌលសុខភាពនេះបន្តទៀត។
ប្រជាពលរដ្ឋនៅស្រុកមោងឬស្សី ភាគច្រើនលើកឡើងថា មណ្ឌលសុខភាពកកោះ ជាទីកន្លែងសំខាន់សម្រាប់ព្យាបាលជំងឺរបស់ពួកគាត់ ជាពិសេសស្ត្រីសម្រាលកូន និងជំងឺកុមារ។
ពលរដ្ឋម្នាក់រស់នៅភូមិកកោះ ឃុំកកោះ ស្រុកមោងឬស្សី លោកស្រី មាន រុំចង់ ឲ្យអាស៊ីសេរី ដឹង ពេលចេញពីពិនិត្យផ្ទៃពោះនៅមណ្ឌលសុខភាពកកោះ នៅថ្ងៃទី១៩ ខែមេសា ថា លោកស្រីបានមណ្ឌលសុខភាពនេះគ្រាន់ព្យាបាលជំងឺប្រចាំថ្ងៃ ពីព្រោះនៅជិតផ្ទះហើយព្យាបាលអស់ថវិកាតិច។
ស្ត្រីពពោះវ័យ ២៣ឆ្នាំរូបនេះ អះអាងថា លោកស្រីសប្បាយចិត្តនៅពេលឃើញទាហានជើងទឹកអាមេរិក ជួយសង់បង្គន់អនាម័យក្នុងមណ្ឌលសុខភាពនេះ៖ «ខ្ញុំមានការសោកស្ដាយយ៉ាងខ្លាំង ព្រោះផ្ទះខ្ញុំនៅ ហើយអត់មានថវិកាទៅមើលជំងឺឆ្ងាយទេ។ បើសិនជាមានគេមកជួយសង់អគារពេទ្យនៅជិតនេះ យើងអាចស្រួលបានច្រើនបើថា គេអត់បានជួយត្រូវព្យាបាលឆ្ងាយជួបបញ្ហាជីវភាពកាន់តែខ្លាំង»។
នៅក្នុងមណ្ឌលសុខភាពមួយនេះ នៅពេលព្រឹកឃើញមានពលរដ្ឋជាច្រើននាក់ចេញចូលមិនដាច់ ដោយអ្នកខ្លះមកពិនិត្យផ្ទៃពោះ និងខ្លះទៀតឲ្យគ្រូពេទ្យព្យាបាលជំងឺប្រចាំកាយរបស់ពួកគាត់។
ក្រុមពលរដ្ឋដែលទៅជួបគ្រូពេទ្យឲ្យព្យាបាលជំងឺនៅមណ្ឌលសុខភាពកកោះ កាលពីព្រឹកថ្ងៃទី១៩ ខែមេសា ថ្លែងថា ពួកគាត់ពឹងផ្អែកទាំងស្រុងដើម្បីព្យាបាលជំងឺនៅក្នុងមណ្ឌលសុខភាពមួយនេះ។
អ្នកភូមិសម្ដែងអារម្មណ៍សោកស្ដាយជាខ្លាំងពេលដែលដឹងថា ទាហានជើងទឹករបស់សហរដ្ឋអាមេរិក ផ្ដាច់ជំនួយសាងសង់អគារនៅមណ្ឌលសុខភាពនេះ៖ «ដើម្បីឲ្យប្រជាពលរដ្ឋក្រីក្រមកពីទីជិតឆ្ងាយមកព្យាបាលមណ្ឌលសុខភាពនេះ ដូចជាខ្ញុំជាដើម មកព្យាបាលតែមណ្ឌលសុខភាពនេះទេ។ ខ្ញុំចង់ឲ្យគេជួយបន្តទៀត។ ខ្ញុំសោកស្ដាយខ្លាំងពេលគេឈប់ជួយ ព្រោះពួកខ្ញុំនៅឆ្ងាយពីទីរួមខេត្ត។ ខ្ញុំមានភាពកក់ក្ដៅបាននៅជិតមន្ទីរពេទ្យ ព្រោះយើងឈឺថ្កាត់អីបានគ្រូពេទ្យជួយសង្គ្រោះជីវិតទាន់ពេល»។
កាលពីខែឧសភា ឆ្នាំ២០១៥ ទាហានជើងទឹករបស់សហរដ្ឋអាមេរិក មួយក្រុមបានសង់បង្គន់អនាម័យមួយខ្នងឲ្យមណ្ឌលសុខភាពកកោះ មាន ៣បន្ទប់ និងមានបន្ទប់លាងដៃមួយទទឹង ៣ម៉ែត្រ និងបណ្ដោយជាង ៧ម៉ែត្រ។ បង្គន់មួយនេះចំណាយពេលសាងសង់ជាង ២ខែ អស់ថវិកាជាង ២ម៉ឺន ៩ពាន់ដុល្លារអាមេរិក (២៩.៣៨២)។
ប្រធានមណ្ឌលសុខភាពកកោះ អ្នកស្រី វាន់ គឹមអ៊ន មានប្រសាសន៍ថា ចាប់ពីមានបង្គន់ថ្មីមក ធ្វើឲ្យប្រជាពលរដ្ឋ និងបុគ្គលិកពេទ្យមានបង្គន់ប្រើងាយស្រួលជាងមុន។ អ្នកស្រីចង់បានអគារថ្មីមួយខ្នងទៀត និងអណ្ដូងទឹកស្អាតមួយ ដើម្បីឲ្យពលរដ្ឋបានប្រើការ និងបុគ្គលិកស្នាក់នៅព្យាបាលអ្នកជំងឺ៖ «អ៊ីចឹងទេ បើសិនជាអាមេរិកឈប់ជួយ បានន័យថាមានការប៉ះពាល់ដល់ប្រជាពលរដ្ឋហើយ ព្រោះគោលបំណងខ្ញុំចង់ជួយសង់អគារបន្ថែមទៀត ដើម្បីឲ្យប្រជាពលរដ្ឋមកព្យាបាលជំងឺកាន់តែច្រើន ជាពិសេសគឺស្ត្រី និងកុមារ»។
អ្នកស្រី វាន់ គឹមអ៊ន បានដាក់សំណើទៅទាហានជើងទឹករបស់អាមេរិក រួចហើយ ដើម្បីឲ្យជួយសង់អគារ និងអណ្ដូងទឹកស្អាត ក៏ប៉ុន្តែមិនទាន់ទទួលបានចម្លើយនៅឡើយ។
កាលពីពេលថ្មីៗនេះ ទាហានជើងទឹករបស់អាមេរិក បានផ្ដាច់ជំនួយនៅក្នុងមណ្ឌលសុខភាពនេះ និងនៅកន្លែងផ្សេងទៀតនៅកម្ពុជា។ ការសម្រេចចិត្តផ្អាកកម្មវិធីជំនួយមនុស្សធម៌កងវិស្វកម្មចល័តអាមេរិកឈ្មោះ «ឃ្មុំសមុទ្ទ» នេះ ប្រហែលដោយសាររដ្ឋាភិបាលកម្ពុជា មានទំនាក់ទំនងយោធាជាមួយប្រទេសចិន កាន់តែស្និទ្ធស្នាល។ ជាក់ស្ដែងកាលពីចុងឆ្នាំ២០១៦ កន្លងទៅនេះ ប្រទេសកម្ពុជា និងប្រទេសចិន ទើបតែបានបិទបញ្ចប់សមយុទ្ធយោធារួមគ្នាទ្រង់ទ្រាយធំមួយឈ្មោះថា «នាគមាស» ដែលមានរយៈពេលដល់ទៅ ៩ថ្ងៃ។
មណ្ឌលសុខភាពឃុំកកោះ មានទីតាំងជាប់ផ្លូវជាតិលេខ៥ ជាតំបន់ដាច់ស្រយាលស្ថិតក្នុងស្រុកមោងឬស្សី និងមានចម្ងាយប្រមាណ ៤០គីឡូម៉ែត្រពីទីរួមខេត្តបាត់ដំបង។
របាយការណ៍ប្រធានមណ្ឌលសុខភាពកកោះ បង្ហាញថា នៅក្នុងឃុំនេះ មាន ៨ភូមិ និងពលរដ្ឋរស់នៅជាង ១ម៉ឺន ៤ពាន់នាក់ (១៤.៨៦៩) គឺស្មើនឹងជាង ៣ពាន់គ្រួសារ (៣.១៥៩)៕
1 comment:
Hun Sen does not care about the poor and sick, he is paranoia about the US-Funded Regime-Change Plot.
Post a Comment