25 មេសា 2017
ហ៊ុល រស្មី
រូបឯកសារ៖ លោក កឹម សុខា ប្រធានគណបក្សសង្គ្រោះជាតិ កាលពីថ្ងៃទី៣០ ខែមីនា ឆ្នាំ២០១៧។ (ហ៊ាន សុជាតា/VOA)
គណបក្សសង្គ្រោះជាតិ រក្សាទុកអនុប្រធានគណបក្សចំនួនបីនាក់ដែលក្រសួងមហាផ្ទៃ មិនព្រមទទួលស្គាល់។ ការរក្សាទុកអនុប្រធានគណបក្សទាំងបីនាក់នេះ កើតមានឡើង ក្រោយការធ្វើវិសោធនកម្មប្រការ៤៧ថ្មី នៃលក្ខន្តិកៈរបស់គណបក្សសង្គ្រោះជាតិ។ អ្នកនាំពាក្យក្រសួងមហាផ្ទៃ មិនទាន់អាចបញ្ជាក់បានថា តើក្រសួងនឹងទទួលស្គាល់ការកែសម្រួលលក្ខន្តិកៈរបស់គណបក្សប្រឆាំងនេះឬយ៉ាងណានោះឡើយទេ។
ភ្នំពេញ —
សមាជវិសាមញ្ញរបស់គណបក្សសង្គ្រោះជាតិដែលធ្វើឡើងនៅព្រឹកថ្ងៃអង្គារនេះ មិនទាន់សម្រេចផ្លាស់ប្ដូរអនុប្រធានគណបក្សចំនួនបីនាក់របស់ខ្លួន ដែលក្រសួងមហាផ្ទៃ បានច្រានចោល ដោយគណបក្សបានធ្វើវិសោធនកម្មលើប្រការ៤៧ថ្មី នៃលក្ខន្តិកៈរបស់គណបក្ស។
តាមរយៈការធ្វើវិសោធនកម្មនេះ អង្គសមាជវិសាមញ្ញ បានយល់ព្រមលុបចោលការកំណត់ដែលថា អនុប្រធានគណបក្សយ៉ាងតិចណាស់មួយរូបនឹងត្រូវជ្រើសរើសក្នុងរយៈពេល ៣០ថ្ងៃ ក្រោយប្រធានគណបក្សលាលែងពីមុខតំណែង។
ថ្លែងទៅកាន់សមាជិក និងអ្នកគាំទ្រគណបក្សរាប់រយនាក់នៅទីស្នាក់ការកណ្ដាលគណបក្សសង្គ្រោះជាតិ លោក អេង ឆៃអ៊ាង អនុប្រធានគណបក្សសង្គ្រោះជាតិមានប្រសាសន៍ថា៖
«យើងលុបចោលរយៈពេលនេះ កុំឲ្យគេទើសទៀត កុំឲ្យគេថា ខ្វះថ្ងៃ ឬលើសថ្ងៃ អញ្ចឹងសុំឲ្យអង្គសមាជជ្រាបប៉ុណ្ណឹង»។
លោក អេង ឆៃអ៊ាង អនុប្រធានគណបក្សសង្គ្រោះជាតិដែលមិនទាន់ត្រូវបានទទួលស្គាល់ដោយក្រសួងមហាផ្ទៃ លើកឡើងថា ការជ្រើសរើសអនុប្រធានគណបក្ស នឹងធ្វើឡើងតាមរយៈគណៈកម្មការនាយក។
លោកថា តាមខ្លឹមសារប្រការ៤៧ថ្មីដែលត្រូវបានធ្វើវិសោធនកម្ម គណៈកម្មការនាយករបស់គណបក្ស នឹងជ្រើសរើសអនុប្រធានយ៉ាងហោចណាស់មួយរូបពីសមាជិករបស់គណបក្សដើម្បីជួយការងាររបស់ប្រធានគណបក្ស ដោយផ្អែកលើសំឡេងភាគច្រើនដាច់ខាត ៥០ភាគរយបូកមួយ។
លោក អេង ឆៃអ៊ាង អនុប្រធានគណបក្សសង្គ្រោះជាតិ លើកដៃបោះឆ្នោតគាំទ្រការធ្វើវិសោធនកម្មលក្ខន្តិកៈនៃគណបក្សប្រឆាំង ក្នុងការជ្រើសរើសអនុប្រធានគណបក្សប្រឆាំងកាលពីថ្ងៃទី ២៥ ខែ មេសា ឆ្នាំ ២០១៧។ (ហ៊ុល រស្មី/VOA)
ទោះជាយ៉ាងណា លោកប្រាប់អ្នកសារព័ត៌មាន ក្រោយសមាជវិសាមញ្ញនោះថា គណបក្សមិនទាន់សម្រេចថា នឹងត្រូវផ្លាស់ប្ដូរអនុប្រធានគណបក្សចំនួនបីរូបដែលត្រូវបានជ្រើសរើសកាលពីថ្ងៃទី២ ខែមីនា ឬយ៉ាងណានោះឡើយ ព្រោះត្រូវរង់ចាំមើលជំហររបស់ក្រសួងមហាផ្ទៃចំពោះការធ្វើវិសោធនកម្មប្រការ៤៧ថ្មីនៃលក្ខន្តិកៈរបស់គណបក្ស។
កាលពីដើមខែមេសានេះ ក្រសួងមហាផ្ទៃបានច្រានចោលអនុប្រធានគណបក្សទាំងបីរួមមាន លោក ប៉ុល ហំម លោកស្រី មូរ សុខហួរ និងលោក អេង ឆៃអ៊ាង ដោយការជ្រើសតាំងរបស់ពួកគេហួសរយៈពេល៣០ថ្ងៃ គិតចាប់ពីថ្ងៃដែលលោក សម រង្ស៊ី បានលាលែងពីប្រធានគណបក្សសង្គ្រោះជាតិ។
លោក សម រង្ស៊ី បានលាលែងពីប្រធានគណបក្សសង្គ្រោះជាតិ កាលពីថ្ងៃទី១១ ខែកុម្ភៈ ដោយហេតុបារម្ភពីការរំលាយគណបក្សប្រឆាំង ទៅតាមច្បាប់ស្ដីពីគណបក្សនយោបាយដែលត្រូវបានគេធ្វើវិសោធនកម្ម ហើយដែលគេជឿថា មានបំណងរំលាយគណបក្សនយោបាយដែលមានមេដឹកនាំប្រព្រឹត្តទោសកំហុសធ្ងន់ធ្ងរ។
លោកនាយឧត្ដមសេនីយ៍ ខៀវ សុភ័គ អ្នកនាំពាក្យក្រសួងមហាផ្ទៃ សុំមិនធ្វើការអធិប្បាយនារសៀលថ្ងៃអង្គារនេះ ទាក់ទិនការកែសម្រួលខ្លឹមសារប្រការ៤៧ថ្មីនៃលក្ខន្តិកៈរបស់គណបក្សសង្គ្រោះជាតិ ដោយសារតែក្រសួងមិនទាន់ទទួលបានលិខិតពីគណបក្សសង្គ្រោះជាតិដែលលើកឡើងអំពីការកែសម្រួលនេះ។
បញ្ហាចម្រូងចម្រាសពីសមាសភាពថ្នាក់ដឹកនាំថ្មីរបស់គណបក្សសង្គ្រោះជាតិ កើតមានឡើង ក្រោយពេលគណបក្សបក្សប្រឆាំង រៀបចំសមាជវិសាមញ្ញមួយកាលពីថ្ងៃទី២ ខែមីនា ដើម្បីជ្រើសរើសមេដឹកនាំបក្ស បន្ទាប់ពីលោក សម រង្ស៊ី បានលាលែងពីតំណែងជាប្រធានគណបក្សភ្លាមៗ មុនពេលសភាដែលមានតែតំណាងរាស្ត្រគណបក្សប្រជាជនកម្ពុជាបោះឆ្នោតអនុម័តសេចក្ដីស្នើវិសោធនកម្មច្បាប់ស្ដីពីគណបក្សនយោបាយ។
លោក មាស នី អ្នកសិក្សាស្រាវជ្រាវកិច្ចអភិវឌ្ឍសង្គម ថ្លែងប្រាប់ VOA នៅថ្ងៃអង្គារនេះថា ការឆ្លើយតបគណបក្សប្រឆាំងទៅនឹងការទាមទាររបស់ក្រសួងមហាផ្ទៃ ពាក់ព័ន្ធនឹងការកែសម្រួលលក្ខន្តិកៈរបស់គណបក្សប្រឆាំងក្នុងការរៀបចំប្រព័ន្ធដឹកនាំបក្ស គឺជាយន្តការទំនាក់ទំនងបច្ចេកទេសដ៏ល្អមួយ។ ក៏ប៉ុន្តែ លោកមិនទាន់អាចសន្និដ្ឋានបានថា បញ្ហាចម្រូងចម្រាសនេះ នឹងបញ្ចប់ទៅនោះឡើយ ក្រោយការធ្វើសមាជវិសាមញ្ញលើកទីពីររបស់គណបក្សប្រឆាំង។
«បើសិនជានៅមានការទាមទារអីផ្សេងទៀត ដែលចម្លែកទៀតអាហ្នឹង វាចូលរឿងនយោបាយ ប៉ុន្តែមកដល់ពេលនេះ អ្វីដែលតាមខ្ញុំយល់ គឺនៅក្នុងលក្ខខណ្ឌបច្ចេកទេស បានន័យថា តម្រូវទៅតាម អ្វីដែលជាក្រឹត្យក្រមនៃលក្ខន្តិកៈ»។
សមាជវិសាមញ្ញលើកទីពីររបស់គណបក្សសង្គ្រោះជាតិ ធ្វើឡើង នៅចំពេលដែលក្រុមសកម្មជនសមាជិក និងមន្ត្រីរបស់គណបក្សប្រឆាំងចំនួនយ៉ាងហោចណាស់១៦នាក់កំពុងស្ថិតក្នុងពន្ធនាគារក្នុងសំណុំរឿងផ្សេងៗគ្នាពាក់ព័ន្ធនឹងការបង្កអំពើហិង្សា និង ការសើរើបញ្ហាព្រំដែនរវាងប្រទេសកម្ពុជា និងវៀតណាម។
លោក កឹម សុខា ប្រធានគណបក្សសង្គ្រោះជាតិ ប្រាប់ក្រុមអ្នកគាំទ្រគណបក្សប្រឆាំងថា សង្គ្រាមនឹងមិនអាចផ្ទុះបានទេ នៅពេលគណបក្សប្រឆាំងឈ្នាះការបោះឆ្នោត នៅទីស្នាក់ការគណបក្សកាលពីថ្ងៃទី២៥ ខែមេសា ឆ្នាំ២០១៧។ (ហ៊ុល រស្មី/VOA)
លោក កឹម សុខា ប្រធានគណបក្សសង្គ្រោះជាតិ បានប្រាប់ក្រុមអ្នកគាំទ្រគណបក្សប្រឆាំងដែលចូលរួម ក្នុងសមាជវិសាមញ្ញនាថ្ងៃនេះថា គណបក្សត្រូវបន្តដំណើរទៅមុខទៀត ទោះជាជួបឧបសគ្គយ៉ាងណាក្តី។
លោកបញ្ជាក់ជាថ្មីថា ប្រសិនបើគណបក្សប្រឆាំងឈ្នះការបោះឆ្នោតនាពេលខាងមុខនោះ នោះសង្គ្រាមនឹងមិនអាចផ្ទុះឡើងបានឡើយ ដោយហេតុមន្ត្រីនៃគណបក្សប្រឆាំងពុំធ្លាប់វាយប្រយុទ្ធក្នុងសមរភូមិ និងមិនមានប្រភពចេញពីចលនាបដិវត្តន៍ណាមួយ។
«យើងមិនមែនជាអ្នកមានប្រភព មកពីអ្នកធ្វើសង្គ្រាមទេ ហើយយើងក៏មិនមែនមានប្រភពមកពីអ្នកធ្វើបដិវត្តន៍ដែរ។ គណបក្សសង្គ្រោះជាតិ មិនមែនគណបក្សបដិវត្តន៍នោះទេ»។
លោក កឹម សុខា អះអាងថា ការរឹបអូសដីធ្លីពីអ្នកមានមកឲ្យអ្នកក្រ ក៏នឹងមិនអាចកើតឡើងផងដែរ នៅពេលគណបក្សប្រឆាំងឈ្នះការបោះឆ្នោតដឹកនាំប្រទេស។
យ៉ាងណាក៏ដោយ លោក សុខ ឥសាន អ្នកនាំពាក្យគណបក្សប្រជាជនកម្ពុជារបស់លោកនាយករដ្ឋមន្ត្រី ហ៊ុន សែន បានបញ្ជាក់ថា គណបក្សប្រឆាំងនឹងមិនមានវាសនាដឹកនាំប្រទេសនោះទេ ព្រោះគណបក្សនេះមិនអាចឈ្នះការបោះឆ្នោតនាពេលខាងមុខបានទេ ខណៈដែលសំឡេងគាំទ្ររបស់គណបក្សជំទាស់មួយនេះ បានបែកខ្ញែកជាបន្តបន្ទាប់ក្រោយការបោះឆ្នោតឆ្នាំ២០១៣៕
No comments:
Post a Comment