24 ឧសភា 2017
ហ៊ុល រស្មី
voa
រូបឯកសារ៖ ដើមឈើដែលត្រូវបានលួចកាត់នៅក្នុងស្រុកអណ្តូងមាស ខេត្តរតនគិរី ហើយត្រូវបានឃាត់ទុកនៅក្នុងព្រៃ ដោយជនជាតិដើមភាគតិចដែលរស់នៅភូមិក្បែរនោះ នៅថ្ងៃទី២ ខែធ្នូ ឆ្នាំ២០១៥។ (នូវ ពៅលក្ខិណា/VOA)
អាជ្ញាធរខេត្តកំពង់ឆ្នាំងបានព្យាយាមមិនឆ្លើយតបទាក់ទិននិងករណីបាញ់រះនេះទេ។
ភ្នំពេញ —
ជនអនាមិកបានបើកការបាញ់ប្រហារទៅលើទីស្នាក់ការសង្កាត់រដ្ឋបាលព្រៃឈើមួយកន្លែងនៅខេត្តកំពង់ឆ្នាំងកាលពីយប់ថ្ងៃអង្គារ។ ការបាញ់ប្រហារនេះ បានធ្វើឱ្យមន្ត្រីរដ្ឋបាលព្រៃឈើក្នុងខេត្តនោះម្នាក់ ស្លាប់នៅនឹងកន្លែង និងមនុស្សបីនាក់ផ្សេងទៀតរងរបួស។ ក្រុមអាជ្ញាធរបដិសេធមិនផ្ដល់ព័ត៌មានលម្អិត ពាក់ព័ន្ធនឹងការបាញ់ប្រហារនេះទេ។ ប៉ុន្តែ មន្ត្រីសិទ្ធិមនុស្សថ្លែងថា ការគ្រប់គ្រងអាវុធ នៅមិនទាន់ប្រសិទ្ធភាពនៅឡើយនៅក្នុងខេត្តភាគកណ្ដាលនៃប្រទេសកម្ពុជានេះ។
មន្ត្រីរដ្ឋបាលព្រៃឈើក្រាំងស្គារម្នាក់គឺលោក សឹង ហាត់ បានស្លាប់ភ្លាមៗ ដោយការបាញ់រះទៅលើទីស្នាក់ការសង្កាត់រដ្ឋបាលព្រៃឈើក្រាំងស្គារ ក្នុងស្រុកទឹកផុស ខេត្តកំពង់ឆ្នាំង។ នេះបើតាមការបញ្ជាក់ពីមន្ត្រីខណ្ឌរដ្ឋបាលព្រៃឈើ និងអ្នកឃ្លាំមើលស្ថានភាពសិទ្ធិមនុស្សប្រចាំខេត្ត។
យ៉ាងហោចណាស់មានពលរដ្ឋពីរនាក់ និងមន្ត្រីអាវុធហត្ថម្នាក់ផ្សេងទៀត បានរងរបួសនៅក្នុងការបាញ់រះនោះ ដែលបានកើតឡើងកាលពីយប់ថ្ងៃអង្គារ នៅពេលដែលលោក សឹង ហាត់ កំពុងស្ថិតក្នុងទីស្នាក់ការរបស់លោកស្ថិតឃុំក្រាំងស្គារនៃស្រុកទឹកផុសនោះ។
លោក ថោង វណ្ណារ៉ាវុទ្ឍី នាយខណ្ឌរដ្ឋបាលព្រៃឈើខេត្តកំពង់ឆ្នាំង ថ្លែងប្រាប់ VOA នារសៀលថ្ងៃពុធនេះថា លោក សឹង ហាត់ ត្រូវបានគេបាញ់កាលពីយប់ម្សិលមិញ ប៉ុន្តែលោកមិនអាចបញ្ជាក់ពីមូលហេតុនៅពីក្រោយការវាយប្រហារនោះទេ។
«ខ្ញុំអត់ដឹងទេបាទ ខ្ញុំអត់នៅព្រឹត្តិការណ៍ហ្នឹង ខ្ញុំអត់នៅហ្នឹងផង»។
លោក ថោង វណ្ណារ៉ាវុទ្ឍី បានបន្ថែមថា អាជ្ញាធរមានសមត្ថកិច្ចខេត្តកំពុងស៊ើបអង្កេតរកមូលហេតុនៃការបាញ់រះនេះ ដែលបណ្ដាលឲ្យស្លាប់ លោក សឹង ហាត់ និងធ្វើឲ្យរបួសមន្ត្រីអាវុធហត្ថនិងពលរដ្ឋនោះ។
យ៉ាងណាក៏ដោយ អាជ្ញាធរខេត្តកំពង់ឆ្នាំង បានព្យាយាមមិនឆ្លើយតបទាក់ទិននិងករណីបាញ់រះនេះទេ។
លោក ម៉េង ហាក់ អភិបាលស្រុកទឹកផុស ក៏មិនបានផ្ដល់សេចក្ដីអធិប្បាយ ពាក់ព័ន្ធនឹងការវាយប្រហារនេះ ដោយលោកមានប្រសាសន៍យ៉ាងដូច្នេះថា៖
«ការស៊ើបអង្កេត ខ្ញុំឆ្លើយអត់បានទេបង។ កំពុងស៊ើបអង្កេតបង អរគុណបាទ»។
ស្រដៀងគ្នានោះដែរ លោក ឡុច វណ្ណារ៉ា ស្នងការនគរបាលខេត្តកំពង់ឆ្នាំង បដិសេធមិនផ្ដល់សេចក្ដីអធិប្បាយ ដោយលោកបញ្ជាក់ថា លោកជាប់ប្រជុំ។
តាមសេចក្ដីរាយការណ៍របស់អង្គភាពព័ត៌មាន Freshnews ដែលត្រូវគេដឹងថាស្និទ្ធនឹងរដ្ឋាភិបាល បានឲ្យដឹងថា លោក សឹង ហាត់ ត្រូវបានបាញ់ស្លាប់ដោយបុរសម្នាក់ស្លៀកឯកសណ្ឋានយោធាប៉ារ៉ា។ អ្នកវាយប្រហារដែលមិនទាន់ ត្រូវបានបញ្ជាក់អត្តសញ្ញាណនេះ បានបាញ់រះចំនួនជាង១០គ្រាប់។
សេចក្ដីរាយការណ៍នោះ ក៏បានឲ្យដឹងផងដែរថា កម្លាំងមានសមត្ថកិច្ច បានហៅមនុស្សប្រាំនាក់មកសួរនាំ ក្នុងនោះមានមន្ត្រីនគរបាលពីរនាក់ និងមន្ត្រីអាវុធហត្ថបីនាក់ តែចម្លើយរបស់ពួកគេមិនទាន់ត្រូវបានកម្លាំងមានសមត្ថកិច្ចរាយការណ៍ឲ្យដឹងនោះទេ។ អ្នករងគ្រោះទាំងបីនាក់ រូមមាន ឈ្មោះ អ៊ុក ណាត់ ជាមន្រ្តីអាវុធហត្ថ លូ គឹមលន និងសារ៉ាត់ ជាប្រជាពលរដ្ឋ។
VOA ព្យាយាមសុំសេចក្ដីអធិប្បាយពីលោក អេង ហ៊ី អ្នកនាំពាក្យកងរាជអាវុធហត្ថជាតិ ប៉ុន្តែមិនទាន់អាចទាក់ទងបាននៅថ្ងៃពុធនេះ។
លោក គង់ ចន្ទមុន្នី អ្នកសម្របសម្រួលសិទ្ធិមនុស្សនៃអង្គការការពារសិទ្ធិមនុស្សលីកាដូប្រចាំខេត្តកំពង់ឆ្នាំ ថ្លែងប្រាប់ VOA ថា ករណីបាញ់រះដ៏គួរឱ្យសង្ស័យនេះ ពុំធ្លាប់កើតមាននៅក្នុងខេត្តនោះទេ ដោយមានតែករណីនៃការដេញចាប់រវាងកម្លាំងមានសមត្ថកិច្ច ពាក់ព័ន្ធនឹងការស្ទាក់ចាប់ឈើ។
លោកឲ្យដឹងបន្តថា ការបាញ់រះបង្ហាញថា មន្ត្រីរដ្ឋាភិបាលមិនមានគោលការណ៍គ្រប់គ្រងអាវុធត្រឹមត្រូវ ដែលនាំដល់ការកើតមានបញ្ហាអសន្តិសុខភូមិឃុំ។
«ព្រោះយើងអត់បានព័ត៌មានអង្កេត អញ្ចឹងខ្ញុំគិតថា វាមានអសន្តិសុខ អាចជាគំនុំឬក៏ស្អីចឹង ទាក់ទងនឹងអាការរកស៊ី ឬក៏ម៉េចចឹង ព្រោះវាថានៅមានប្រើប្រាស់អាវុធ នេះជាកាតព្វកិច្ចរបស់រដ្ឋ សម្រាប់ធ្វើយ៉ាងណា ការប្រើប្រាស់អាវុធហ្នឹងឲ្យមានច្បាប់ទម្លាប់អីត្រឹមត្រូវ»។
លោក គង់ ចន្ទមុន្នី បានបន្ថែមថា ដោយសាររឿងបាញ់ប្រហារនេះ មិនជាប់ទាក់ទងនឹងការរំលោភសិទ្ធិមនុស្ស ការស៊ើបអង្កេតទៅលើរឿងនេះ នឹងមិនត្រូវបានធ្វើឡើងដោយអង្គការការពារសិទ្ធិមនុស្សរបស់លោកនោះទេ៕
1 comment:
Ah Kwack Hun Sen is really Kwack. No doubt about it.
Post a Comment