ដោយ ឡេង ម៉ាលី
2017-06-08
រដ្ឋមន្ត្រីក្រសួងបរិស្ថាន លោក សាយ សំអាល់ (ឈរខាងឆ្វេង) អ្នកច្បាប់ និងអ្នកធ្វើការពាក់ព័ន្ធបរិស្ថាន និងធនធានធម្មជាតិ ជួបពិគ្រោះយោបល់គ្នាលើសេចក្ដីព្រាងលើកទី៨ នៃក្រមបរិស្ថាន និងធនធានធម្មជាតិនៅកម្ពុជា នៅថ្ងៃទី៨ ខែមិថុនា ឆ្នាំ២០១៧។
RFA/Leng Maly
មន្ត្រីក្រសួងបរិស្ថាន អ្នកច្បាប់ ចៅក្រម និងអ្នកធ្វើការពាក់ព័ន្ធនឹងកិច្ចការពារបរិស្ថាន និងធនធានធម្មជាតិ ជួបពិគ្រោះយោបល់គ្នានៅថ្ងៃទី៨ មិថុនា លើសេចក្ដីព្រាងលើកទី៨ នៃក្រមបរិស្ថាន និងធនធានធម្មជាតិនៅកម្ពុជា។
រដ្ឋមន្ត្រីក្រសួងបរិស្ថាន លោក សាយ សំអាល់ ថ្លែងថា ការតាក់តែងសេចក្ដីព្រាងក្រមបរិស្ថាន និងធនធានធម្មជាតិ គឺជាផ្នែកមួយនៃការធ្វើទំនើបកម្មរបស់ក្រសួងបរិស្ថាន ដើម្បីការពារមត៌កសម្រាប់មនុស្សជំនាន់ក្រោយរស់នៅដោយសុខសាន្ត៖ «ខ្ញុំចង់ឲ្យច្បាប់នេះរក្សាបាននូវភាពសុខដុមរមនារបស់ប្រជាជនកម្ពុជា ជាពិសេសតាមបណ្ដាទីប្រជុំជនផ្សេងៗ។ ដូច្នេះ ខ្ញុំសុំលើកថា លទ្ធផលការបោះឆ្នោតកាលពីពីរបីថ្ងៃមុននេះ គឺបញ្ជាក់យ៉ាងច្បាស់អំពីបំណងរបស់ប្រជាជនយើងនៅតាមឃុំរបស់គាត់។ អ៊ីចឹងយើងត្រូវក្នុងច្បាប់នេះ ឋាមពលយ៉ាងម៉េចដែលសម្រាប់ឲ្យកម្ពុជា បន្តនិរន្តរភាពបាន មិនប៉ះពាល់ដល់ប្រព័ន្ធអេកូឡូស៊ីរបស់យើង មិនប៉ះពាល់ទៅដល់គុណភាពខ្យល់ ទឹក ដីរបស់យើង»។
លោកមានប្រសាសន៍ដែរថា ច្បាប់នេះត្រូវបានវាយតម្លៃថា មិនអាចធ្វើទៅបានចប់ឆាប់ ក៏ប៉ុន្តែពេលនេះ សេចក្ដីព្រាងបានឈានចូលដល់ដំណាក់កាលទី៨ ហើយ ហើយសិក្ខាសាលាពិគ្រោះយោបល់ក៏ចូលដល់លើកទី៤ ដែរ។
កិច្ចពិគ្រោះយោបល់លើសេចក្ដីព្រាងក្រមបរិស្ថាន និងធនធានធម្មជាតិ នៅថ្ងៃទី៨ មិថុនា គឺជាសិក្ខាសាលាលើកទី៤ ដើម្បីផ្លាស់ប្ដូរយោបល់រវាងមេធាវី ចៅក្រម អ្នកតំណាងពីវិស័យច្បាប់ និងយុត្តិធម៌។
ប្រធានគណៈមេធាវីនៃព្រះរាជាណាចក្រកម្ពុជា លោក សួន វិសាល មានប្រសាសន៍ថា ការចូលរួមរបស់មេធាវីនៅក្នុងសេចក្ដីព្រាងក្រមបរិស្ថាន និងធនធានធម្មជាតិនេះ មានសារសំខាន់ដែលជួយធ្វើឲ្យច្បាប់នេះបានល្អ និងជួយឲ្យមេធាវីបំពេញការងារបានល្អដែរក្នុងបញ្ហាបរិស្ថាន៖ «ការអនុវត្តជាក់ស្ដែងមានបញ្ហាជាច្រើនទាក់ទងទៅនឹងជីវិតប្រចាំថ្ងៃរបស់ប្រជាពលរដ្ឋ ទាក់ទងនឹងសំរាម ឬភាពក្រខ្វក់មួយចំនួន ដែលកើតឡើងតាមរោងចក្រ ឬកន្លែងផ្សេងៗទៀត ឬទាក់ទងការរំខានផ្សេងៗដែលប្រជាពលរដ្ឋរស់នៅផ្ទះជិតខាងហ្នឹង យើងគិតថាមានការរំខានច្រើន។ នៅពេលច្បាប់នេះចេញទៅ យើងគិតថាសម្រួលប្រជាពលរដ្ឋ ក៏ដូចជាបរិស្ថានរបស់យើង ការរស់នៅ និងសុខភាពរបស់យើងក៏បានល្អដែរ»។
ប្រធានសាលាឧទ្ធរណ៍ លោក យូ ប៊ុនឡេង ថ្លែងថា សេចក្ដីព្រាងក្រមបរិស្ថាន និងធនធានធម្មជាតិ មានសារសំខាន់សម្រាប់ការអភិវឌ្ឍ និងនិរន្តរភាពសង្គមកម្ពុជា ហើយបញ្ហាបរិស្ថាន គឺជាការជាប់ពាក់ព័ន្ធនឹងមនុស្សគ្រប់រូប រួមទាំងចៅក្រមផង ដែលត្រូវចូលរួមក្នុងសេចក្ដីព្រាងក្រមនេះ៖ «ប៉ុន្តែចំពោះចៅក្រមវិញ វាចាំបាច់បំផុត យើងត្រូវតែជ្រើសរើសចៅក្រម ហើយបណ្ដុះបណ្ដាលឲ្យមានចំណេះដឹង អាហ្នឹង។ ពេលណាដែលមានរឿងបរិស្ថានមកហ្នឹង គឺយើងត្រូវប្រគល់ឲ្យចៅក្រមដែលមានជំនាញហ្នឹង ពីព្រោះរឿងខ្លះត្រូវធ្វើប្រញាប់។ រឿងខ្លះដែលធ្វើហើយ ដែលប៉ះពាល់ផលប្រយោជន៍ដទៃទៀតនៅក្នុងហ្នឹង បើគេមិនយល់ទេ អាចនាំឲ្យមានភ័ន្តច្រឡំ។ ហេតុដូច្នេះហើយ ចៅក្រមត្រូវតែគិតគូរឲ្យបានម៉ត់ចត់មែនទែននៅក្នុងការដោះស្រាយហ្នឹង រួមផ្សំជាមួយស្ថាប័នផ្សេងទៀតដែលមានតួនាទីរៀងៗខ្លួនក៏ពិតមែន ប៉ុន្តែតួនាទីរៀងខ្លួនហ្នឹង ត្រូវតែប្រព្រឹត្តទៅដោយមានលក្ខណៈស៊ីសង្វាក់គ្នា ទើបអាចអនុវត្តបាន»។
ក្រមបរិស្ថាន និងធនធានធម្មជាតិនេះមានកម្រាស់ជាង ៤០០ទំព័រ ១១គន្ថី និង ១២៣៥មាត្រា។ ច្បាប់នេះ ចាប់ផ្ដើមពីគោលដៅ និងគោលបំណង ការពារបរិស្ថាន ការគ្រប់គ្រងធនធានធម្មជាតិ ការអភិរក្សជីវចម្រុះ ការស្ដារបរិស្ថានឡើងវិញ និងការលើកស្ទួយបរិស្ថាន និងធនធានផ្នែកវប្បធម៌ និងផ្នែកធម្មជាតិនៃបរិស្ថាន។ ច្បាប់នេះ ក៏មានបទបញ្ញត្តិសម្រាប់ការដាក់ទោសទណ្ឌដែរ។
វិសាលភាពនិយមន័យនៃបរិស្ថាននៅក្នុងក្រមបរិស្ថាននេះ គឺជាសមាសធាតុដែលមានជីវិត និងឥតជីវិត ដែលរួមមានលក្ខខណ្ឌរូបសាស្ត្រ ជីវសាស្ត្រ សង្គម ព្រលឹង វប្បធម៌ ដែលរួមបញ្ចូលទាំងដី ខ្យល់ ទឹក រុក្ខជាតិ សត្វ និងភាវរស់ផ្សេងទៀត។
រដ្ឋមន្ត្រីក្រសួងបរិស្ថាន លោក សាយ សំអាល់ ចាត់ទុកថា ក្រមបរិស្ថាន និងធនធានធម្មជាតិ នឹងជាឧបករណ៍មួយសម្រាប់បន្លាចដល់អ្នកធ្វើឲ្យប៉ះពាល់ដល់បរិស្ថាន និងធនធានធម្មជាតិ។ លោកថា ទោះជាពេលនេះមិនទាន់មានច្បាប់ ប៉ុន្តែថ្ងៃក្រោយ ការបំផ្លាញបរិស្ថាន និងធនធានធម្មជាតិ នឹងត្រូវមានទោស។ ច្បាប់នេះក៏ជាការគិតគូរចំពោះការវិនិយោគនានាដែរ។
លោក សាយ សំអាល់ ថ្លែងថា កិច្ចពិគ្រោះយោបល់ជាមួយអ្នកច្បាប់នៅពេលនេះ គឺជាការសម្អាតសេចក្ដីព្រាងនៃក្រមបរិស្ថាន និងធនធានធម្មជាតិ ឲ្យបានគ្រប់ជ្រុងជ្រោយ មុននឹងដាក់ជូនរដ្ឋសភាពិនិត្យ និងអនុម័តនៅពេលខាងមុខ៕
No comments:
Post a Comment