Friday 27 April 2018
រដ្ឋាភិបាលដាណឺម៉ាកកំពុងអន្តរាគមន៍ទប់ស្កាត់ការប៉ុនប៉ងបញ្ជូនលោក សម សេរី មកកម្ពុជា
ដោយ តាំង សារ៉ាដា
2018-04-26
rfa
លោក សម សេរី (រូបកណ្ដាល) ប្រធានចលនារណសិរ្សរំដោះជាតិខ្មែរ។
Photo courtesy of Cambodian National Police
ក្រុមសិទ្ធិមនុស្សអន្តរជាតិឱ្យដឹងថា រដ្ឋាភិបាលប្រទេសដាណឺមាក (Denmark) កំពុងស្វែងរកកិច្ចអន្តរាគមន៍ ដើម្បីទប់ស្កាត់ ការប៉ុនប៉ងបញ្ជូនពលរដ្ឋខ្មែរ ដែលរស់នៅដាណឺម៉ាក និងជាមេដឹកនាំចលនាម្នាក់ ដែលរដ្ឋាភិបាលក្រុងភ្នំពេញចោទថា ជាមេភេរវករ ទៅកាន់ប្រទេសកម្ពុជា។
ក្រុមសិទ្ធិមនុស្សឱ្យដឹងថា ស្ថានទូតប្រទេសដាណឺម៉ាក ក្នុងទីក្រុងបាងកក កំពុងខ្នះខ្នែងដើម្បីរារាំងអាជ្ញាធរថៃមិនឱ្យបញ្ជូនខ្លួនលោក សម សេរី រស់នៅដាណឺម៉ាក ដើមកំណើតខ្មែរ និងជាប្រធានចលនារណសិរ្សរំដោះជាតិខ្មែរ ដែលរបបក្រុងភ្នំពេញស្វែងរកចាប់ខ្លួន ជាយូរមកនោះទៅកម្ពុជាវិញ។
អនុប្រធានអង្គការឃ្លាំមើលសិទ្ធិមនុស្សអន្តរជាតិ យូមែន រ៉ៃត៍ វ៉ច្ឆ ប្រចាំតំបន់អាស៊ី (Human Rights Watch) លោក ហ្វីល រ៉ូប៊ឺតសុន (Phil Robertson) បានប្រាប់អាស៊ីសេរី តាមទូរស័ព្ទថា ក្រុមមន្ត្រីទូតរបស់ប្រទេសដាណឺម៉ាកកំពុង យកចិត្តដាក់ក្នុងការផ្តល់ជំនួយផ្នែកច្បាប់ដល់លោក សម សេរី៖ «តាមអ្វីដែលខ្ញុំដឹង គឺថារដ្ឋាភិបាលប្រទេសដាណឺម៉ាកចាត់ទុកបញ្ហានេះជា កិច្ចការខាងផ្នែកកុងស៊ុល ហើយពួកគេនឹងចុះទៅជួបលោក សម សេរី ដល់មន្ទីរឃុំឃាំងក្នុងទីក្រុងបាងកក និងផ្ដល់ជំនួយផ្នែកច្បាប់។ ជាងនេះទៅទៀតពួកគេនឹងអន្តរាគមន៍ទៅរដ្ឋាភិបាលថៃ ធ្វើយ៉ាងណា កុំឱ្យបញ្ជូនលោក សម សេរី ទៅប្រទេសកម្ពុជាឱ្យសោះ ប៉ុន្តែឱ្យប្រាកដថារដ្ឋាភិបាលថៃត្រូវបញ្ជូន លោក សម សេរី ទៅកាន់ប្រទេសដាណឺម៉ាកវិញ»។
កាសែតក្នុងស្រុកបានដកស្រង់សម្ដីលោក ខៀវ សុភ័ក អ្នកនាំពាក្យក្រសួងមហាផ្ទៃចុះផ្សាយថាសមត្ថកិច្ចកម្ពុជា កំពុងទាក់ទងទៅអាជ្ញាធរថៃ ដើម្បីចាប់បញ្ជូនលោក សម សេរី មកកម្ពុជាវិញ។
ប៉ុន្តែមនុស្សជំនិតរបស់លោក សម សេរី បានប្រាប់អាស៊ីសេរីតាមទូរស័ព្ទថា ភ្នាក់ងារអង្គការសហប្រជាជាតិ និងរដ្ឋាភិបាលប្រទេសដាណឺម៉ាក កំពុងជួយអន្តរាគមន៍យកលោក សម សេរី ចេញពីប្រទេសថៃ។
កាលពីឆ្នាំ២០១៦ តុលាការនៃរបបក្រុងភ្នំពេញបានកាត់កំបាំងមុខ ឱ្យលោក សម សេរី ជាប់គុកចំនួន៩ឆ្នាំ ពីបទប៉ុនប៉ងធ្វើការវាយប្រហារ មកលើរដ្ឋាភិបាលកម្ពុជា។ ជាងនេះទៅទៀត លោក ហ៊ុន សែន ធ្លាប់ចោទប្រកាន់លោក សម សេរី ថា ជាជនក្បត់ជាតិ។
ទោះជាយ៉ាងណាក៏ដោយ លោក ហ្វីល រ៉ូប៊ឺតសុន អះអាងថា ករណីលោក សម សេរី ជាបញ្ហាអន្តោប្រវេសន៍ ហើយអាជ្ញាធរថៃត្រូវតែបញ្ជូនគាត់ទៅកាន់ប្រទេសដាណឺម៉ាកវិញ ហើយគ្មានលក្ខខ័ណ្ឌណាមួយដែល ត្រូវបញ្ជូនគាត់ទៅកាន់ប្រទេសកម្ពុជានោះឡើយ។ លោកបន្តថា លោក សម សេរី បានមករស់នៅ ក្នុងប្រទេសដាណឺម៉ាក ក្នុងនាមជា ជនភៀសខ្លួន ហើយឋានៈជា ជនភៀសខ្លួនរបស់លោក នៅមានសុពលភាពនៅឡើយ។
លោកបន្តថា ប្រសិនបើរដ្ឋាភិបាលថៃចាប់បញ្ជូនខ្លួនលោក សម សេរី ទៅកាន់ប្រទេសកម្ពុជាវិញ នោះ ប្រទេសនឹងមានឈ្មោះអាក្រក់ ខាងការធ្វើបាបដល់ក្រុមជនភៀសខ្លួនមិនខាន។
សមត្ថកិច្ចថៃកាលពីថ្ងៃទី២៥មេសា បានឃាត់ខ្លួន ប្រធានចលនារណសិរ្សរំដោះជាតិខ្មែរ លោក សម សេរី ដែលកំពុងមានវត្តមាននៅប្រទេសថៃ ខណៈលោកកំពុងសុំបន្តសុពលភាព ទិដ្ឋាការស្នាក់នៅ ក្នុងប្រទេសថៃ។ ការចាប់ខ្លួននេះធ្វើឡើងក្រោយពីលោក ហ៊ុន សែន បានចោទប្រកាន់មេដឹកនាំចលនារណសិរ្ស រំដោះជាតិខ្មែររូបនេះថា មានបំណងដាក់គ្រាប់បែកបំផ្ទុះ នៅម្ដុំវត្តភ្នំ និងក្នុងខេត្តសៀមរាប កាលពីអំឡុងពេលបុណ្យចូលឆ្នាំកន្លងទៅ៕
Subscribe to:
Post Comments (Atom)
No comments:
Post a Comment