ដោយ មួង ណារ៉េត
2018-06-20
តំណាងរាស្ត្រអូស្ត្រាលី ពីខាងគណបក្សពលករ លោក ម៉ាក បាត់លើរ៍ (Mark Butler)។
Photo courtesy of Mark Butler's facebook
តំណាងរាស្ត្រអូស្ត្រាលី ស្នើរដ្ឋាភិបាលអូស្ត្រាលី ចាត់ការសមាគមខ្មែរទាំងឡាយណា ដែលបង្កការគំរាមកំហែង ដល់ពលរដ្ឋខ្មែរអូស្ត្រាលី។ ការថ្លែងបែបនេះ ធ្វើឡើងស្របពេលដែល សមាគមខ្មែរនៅអូស្ត្រាលី មួយចំនួនត្រូវបានរងការរិះគន់ ថាបង្កើតឡើង ដើម្បីបម្រើនយោបាយបក្សកាន់អំណាច និង បង្កការភ័យខ្លាចដល់សិទិ្ធសេរីភាពរបស់ពលរដ្ឋខ្មែរ ទាំងនៅកម្ពុជា និងនៅអូស្ត្រាលី។
តំណាងរាស្ត្រអូស្ត្រាលី ពីខាងគណបក្សប្រឆាំងលោក ម៉ាក បាត់លើរ៍ (Mark Butler) ស្នើឲ្យរដ្ឋាភិបាលអូស្ត្រាលីពិនិត្យ របបលោក ហ៊ុន សែន ដែលកំពុងសាបព្រោះការភ័យខ្លាច នៅគ្រប់ទិសទី ដោយចាប់ផ្ដើមពីស្រុកខ្មែរ ដូចជាការចាប់ខ្លួនប្រធានគណបក្សសង្គ្រោះជាតិលោក កឹម សុខា បណ្ដេញអង្គការសង្គមស៊ីវិលអន្តរជាតិ ប្រព័ន្ធផ្សព្វផ្សាយឯករាជ្យ ចាប់អ្នកថតភាពយន្តឯកសារជនជាតិអូស្ត្រាលី លោក ជេម រីឃិតសិន (James Ricketson) ដាក់ពន្ធនាគារ និងប្រព្រឹត្តអំពើគំរាមកំហែង ដោយមានគោលបំណង និងចេតនាគិតទុកជាមុន ជាច្រើនផ្សេងទៀត តាមលំនាំនៃរបបផ្ដាច់ការ៖ «ទាំងអស់នេះ មិនត្រឹមតែជាការបង្កការភ័យខ្លាច ដល់ប្រជាពលរដ្ឋខ្មែរនៅកម្ពុជាប៉ុណ្ណោះទេ ប៉ុន្តែវាបង្កឲ្យការភ័យខ្លាច ដល់សហគមន៍ខ្មែរនៅប្រទេសអូស្ត្រាលីផងដែរ។ ជាលទ្ធផលនៃគោលបំណង និង ចេតនានៃរបបផ្ដាច់ការនេះ ធ្វើឲ្យការភ័យខ្លាច និងបង្ក្រាបពីសំណាក់របបផ្ដាច់ការរបស់លោក ហ៊ុន សែន កំពុងតែលងបន្លាចពលរដ្ឋខ្មែរគ្រប់ទិសទី រួមទាំងពលរដ្ឋខ្មែរនៅប្រទេសអូស្ត្រាលីនេះផង គឺមិនខុសអ្វីពីស្រមោលខ្មៅ អន្ទោលតាមប្រាណនោះឡើយ»។
ជុំវិញការសាបព្រោះការភ័យខ្លាច និងគំរាមកំហែង ដែលមិនអាចអត់ឱនបាននេះ លោក ម៉ាក បាត់លើរ៍ លើកឡើងអំពីសហគមន៍ខ្មែរ ដែលបង្កើតគ្រាន់តែជាឡប់ឡែ ដើម្បីបិទបាំងសកម្មភាពបម្រើនយោបាយបក្សកាន់អំណាច។ លោកបន្ថែមថា សហគមន៍ខ្មែរនៅទីក្រុងអាដឺឡែត បានរៀបរាប់ប្រាប់លោក អំពីការភ័យខ្លាចរបស់ពួកគាត់ ជុំវិញការបង្កប់ភ្នាក់ងារសម្ងាត់របស់គណបក្សប្រជាជនកម្ពុជា និងមនុស្សដែលជាបក្សពួករបស់លោក ហ៊ុន សែន នៅក្នុងប្រទេសអូស្ត្រាលីផ្ទាល់តែម្ដង រួមទាំងនៅក្នុងភូមិកំណើតរបស់លោក គឺនៅទីក្រុង អាដឺឡែតផង។ ពលរដ្ឋខ្មែរជាច្រើន បានសម្ដែងការព្រួយបារម្ភ អំពីចលនារបស់សមាគមវប្បធម៌កម្ពុជា (Cambodian Cultural Association) ដែលបង្កើតនៅខែ មីនា ឆ្នាំ២០១៧៖ «ទោះបីជាច្បាប់អូស្ត្រាលី អនុញ្ញាតឲ្យពលរដ្ឋ គ្រប់និន្នាការនយោបាយ អនុវត្តសិទ្ធិសេរីភាពក្នុងការបញ្ចេញមតិ និងលើកស្ទួយវប្បធម៌របស់ខ្លួនយ៉ាងណាក្តី បើតាមរបាយការណ៍របស់សហគមន៍ខ្មែរ ដែលខ្ញុំបានទទួល បង្ហាញថា សមាគមវប្បធម៌កម្ពុជា នេះគឺគ្រាន់តែជាអង្គការសម្បក ដើម្បីបម្រើលោក ហ៊ុន សែន ប៉ុណ្ណោះ។ សមាគមនេះ មិនដែលចូលរួមក្នុងពិធីវប្បធម៌អ្វីមួយនៅអូស្ត្រាលី ហើយថែមទាំងគ្មានគេហទំព័រនៅលើអ៊ីនធឺណិតនោះដែរ។ មិនតែប៉ុណ្ណោះ សមាគមនេះមានទំព័រហ្វេសប៊ុកដែរ ប៉ុន្តែ តាំងពីខែមករា ឆ្នាំ ២០១៧ រហូតមកដល់ឥឡូវ ឃើញមានបង្ហោះព័ត៌មានចំនួនប្រាំដងប៉ុណ្ណោះ។ ផ្ទុយទៅវិញ ក្រុមនេះ ទំនងជាផ្ដោតខ្លាំងទៅលើ ការគំរាមកំហែង និងសម្លុតបំភ័យពលរដ្ឋខ្មែរនៅក្នុងសហគមន៍ទៅវិញ។ មេដឹកនាំនៃក្រុមនេះ ត្រូវបានគេរាយការណ៍ថា មានទំនាក់ទំនងជិតស្និទ្ធជាមួយលោក ហ៊ុន សែន និង ធ្វើដំណើរចេញចូលប្រទេសកម្ពុជាញឹកញាប់»។
មិនតែប៉ុណ្ណោះលោកលើកឡើង បន្តទៀតថា ការបង្ហោះរូបភាពកាំភ្លើង និង រូបថតនៅកន្លែងទាហាន ជាមួយតំណាងបក្សកាន់អំណាច និងសមាជិកក្រុមគ្រួសាររបស់លោក ហ៊ុន សែន ផង ដែលផ្សព្វផ្សាយតាមបណ្ដាញផ្សព្វផ្សាយសង្គម គឺសុទ្ធតែរូបភាពគំរាមកំហែង។
ជាងនេះទៅទៀត សមាជិកគ្រួសាររបស់លោក ហ៊ុន សែន បានមករស់នៅតំបន់ប៉ែកខាងជើងក្រុងអាដឺឡែត ហើយបានរៀបចំពិធីទទួលស្វាគមន៍លោក ហ៊ុន ម៉ាណែត ដែលជាកូនប្រុសច្បងរបស់លោក ហ៊ុន សែន។ លោក ម៉ាក បាត់លើរ៍ អះអាងថា សហគមន៍ខ្មែរនៅអូស្ត្រាលី ក៏បានប្រាប់លោក ឲ្យដឹងទៀតថា ការចូលជាសមាជិកនៃសមាគមនេះ គឺធ្វើឡើងតាមរយៈសំណូកសូកប៉ាន់ និង ការគំរាមកំហែង និងបំភ័យដល់សមាជិកក្រុមគ្រួសារពលរដ្ឋខ្មែរអូស្ត្រាលី ដែលកំពុងរស់នៅស្រុកខ្មែរឯណោះ។ ឥឡូវនេះ ពលរដ្ឋខ្មែរនៅទីនេះ ជាច្រើនកំពុងរស់នៅក្នុងស្ថានភាពភ័យខ្លាច ដោយសារតែសមាគមនេះ៖ «ពួកគេលែងហ៊ានទៅលេងស្រុកខ្មែរ ព្រោះខ្លាចមនុស្សរបស់សមាគមនេះ រាយការណ៍ប្រាប់របបលោក ហ៊ុន សែន ឲ្យចាំចាប់ខ្លួនពួកគាត់ ឬចាប់ខ្លួនសមាជិកគ្រួសារពួកគាត់។ ការភ័យខ្លាចនេះ គឺពិតជាមានប្រាកដមែន ព្រោះតាមរយៈការថ្លែងគំរាមរបស់លោក ហ៊ុន សែន ជាសាធារណៈ នៅពេលកន្លងទៅនេះ ដែលលោក ហ៊ុន សែន បានគម្រាមតាមវាយដល់ផ្ទះ អ្នកណាហ៊ានតវ៉ាប្រឆាំងវត្តមានគាត់នៅប្រជុំកំពូលអាស៊ាន-អូស្ត្រាលី កាលពីខែមីនា ឆ្នាំនេះ។ ខ្ញុំបានជួបពលរដ្ឋខ្មែរដែលអង់អាចក្លាហានជាច្រើននាក់ ដែលបានចូលរួមធ្វើបាតុកម្ម តវ៉ាប្រឆាំងនឹងវត្តមានរបស់លោក ហ៊ុន សែន។ ឥឡូវពួកគាត់ ចាប់ផ្ដើមព្រួយបារម្ភ ថាមិនដឹងនឹងមានអ្វីកើតឡើងចំពោះពួកគាត់ បើពួកគាត់ទៅលេងស្រុកខ្មែរនៅថ្ងៃខាងមុខ។ អ្វីជាការបង្កការភ័យខ្លាច ឲ្យកាន់តែច្បាស់ទៀតនោះ គឺមនុស្សរបស់លោក ហ៊ុន សែន តាមដានមើលសកម្មភាពតវ៉ារបស់គាត់ គ្រប់ពេលនៅប្រទេសអូស្ត្រាលី ពេលកំពុងតវ៉ានោះ»។
លោកបន្តទៀតថា លោក ហ៊ុន សែន បានធ្វើឲ្យប្រជាធិបតេយ្យគាំងដំណើរការហើយ និងបង្ក្រាបរាល់ការតវ៉ាស្របច្បាប់ នៅស្រុកខ្មែរ។ សកម្មជន និងមន្ត្រីបក្សប្រឆាំងជាច្រើន ត្រូវរបបលោក ហ៊ុន សែន ចាប់ដាក់គុក ដូចជាលោក កឹម សុខា ជាដើម។ ចំណែកអ្នកឯទៀត ត្រូវបង្ខំចិត្តនិរទេសខ្លួន ទៅនៅប្រទេសក្រៅ ក្នុងនោះមានលោក សម រង្ស៊ី និងមេដឹកនាំ និងសមាជិកសភាគណបក្សសង្គ្រោះជាតិ ជាច្រើនផ្សេងទៀត។ ដោយសារតែការគំរាមកំហែងដល់អាយុជីវិត ពីរបបលោក ហ៊ុន សែន ទើបភរិយាលោក កឹម ឡី និង កូនៗ សុំសិទ្ធិជ្រកកោនផ្នែកនយោបាយ នៅប្រទេសអូស្ត្រាលី។
ដោយសារតែមូលហេតុទាំងនេះ ទើបលោក ម៉ាក បាត់លើរ៍ ស្នើប្រទេសអូស្ត្រាលី ត្រូវតែចាត់វិធានការ ដើម្បីបង្ហាញការបន្តយកចិត្តទុកដាក់ ការពារស្មារតីនៃកិច្ចព្រមព្រៀងសន្តិភាពទីក្រុងប៉ារីស៖ «សំខាន់ជាងនេះទៅទៀត យើងត្រូវនាំគ្នាការពារសេចក្ដីសុខសាន្តរបស់ពលរដ្ឋអូស្ត្រាលី។ រាល់ជនជាតិអូស្ត្រាលី ត្រូវតែទទួលបានការធានា ថាពួកគាត់រស់នៅក្នុងស្ថានភាព ដែលមានសន្តិសុខ សុវត្ថិភាព និងមិនរងការសម្លុតបំភ័យ គំរាមកំហែង ទោះក្នុងរូបភាពណា ក៏ដោយ។ ពួកគាត់មិនត្រូវ រស់នៅក្នុងស្ថានភាព ដូចរស់ក្រោមនឹមនៃរបបផ្ដាច់ការរបស់លោក ហ៊ុន សែន នោះឡើយ»។
អាស៊ីសេរី មិនអាចសុំការបំភ្លឺពីសមាគមវប្បធម៍កម្ពុជា រដ្ឋអូស្ត្រាលីខាងត្បូង នោះបាននៅឡើយទេ នៅថ្ងៃទី១៩ ខែមិថុនានេះ។
អាស៊ីសេរី ក៏មិនទាន់អាចទាក់ទងសុំការបំភ្លឺពីអ្នកនាំពាក្យរបបលោក ហ៊ុន សែន និងអ្នកនាំពាក្យគណបក្សកាន់អំណាចបាននៅឡើយដែរ។
តែទោះជាយ៉ាងនេះក្តី កាលពីខែ មីនា កន្លងទៅនេះ សមាគមវប្បធម៌កម្ពុជា រដ្ឋអូស្ត្រាលីខាងត្បូងនេះ គឺស្ថិតក្នុងចំណោមសមាគមខ្មែរចំនួន ០៧ ដែលបានចេញសេចក្ដីថ្លែងការណ៍ ស្វាគមន៍វត្តមានរបស់លោក ហ៊ុន សែន ដែលទៅចូលរួមក្នុងកិច្ចប្រជុំកំពូលអាស៊ាន-អូស្ត្រាលី ស្របពេលដែលពលរដ្ឋខ្មែរជាច្រើន នាំគ្នាធ្វើបាតុកម្មតវ៉ាយ៉ាងផុលផុស ចំពោះវត្តមាននាយករដ្ឋមន្ត្រីខ្មែររូបនេះ។
សមាគមប្រាំដែលបង្កើតនៅអូស្ត្រាលីនេះ កាលពីដើមខែធ្នូ ឆ្នាំ២០១៧ ក៏បានចេញមុខប្រកាសគាំទ្រយ៉ាងពេញទំហឹង នូវការរម្លាយគណបក្សសង្គ្រោះជាតិ ផងដែរ៕
No comments:
Post a Comment