ដោយ សេក បណ្ឌិត
2018-12-16
លោក គឹម សុខ (ឆ្វេង) អ្នកឃ្លាំមើលសង្គម និងនយោបាយ និងលោកនាយករដ្ឋមន្ត្រី ហ៊ុន សែន (ស្ដាំ)។ RFA
RFA
មេដឹកនាំរបបក្រុងភ្នំពេញអះអាងជាថ្មីទៀតថា របបរបស់លោកនឹងមិនអនុញ្ញាតឱ្យមានមូលដ្ឋានទ័ពបរទេសនៅលើទឹកដីកម្ពុជាឡើយ និងបានស្នើឱ្យអន្តរជាតិបញ្ឈប់ការចោទប្រកាន់របបរបស់លោកពាក់ព័ន្ធនឹងរឿងនេះតទៅទៀត។ អ្នកវិភាគអះអាងថា ដោយសាររឿងមូលដ្ឋានទ័ពចិននេះ ប៉ះពាល់ដល់សន្តិសុខតំបន់ ដែលជាការគំរាមកំហែងដល់អំណាចរបស់លោក ហ៊ុន សែន ទើបលោកបដិសេធរឿងនេះម្ដងហើយម្ដងទៀត។
បុរសខ្លាំងនៅកម្ពុជា លោក ហ៊ុន សែន ច្រានចោលជាថ្មីទៀតចំពោះព័ត៌មានដែលថា អាចនឹងមានការកកើតមូលដ្ឋានទ័ពជើងទឹករបស់ចិននៅកម្ពុជា។ លោកអះអាងថា កម្ពុជាគ្មានការចាំបាច់ណាមួយដែលត្រូវការវត្តមានកងទ័ពប្រទេសដទៃនៅលើទឹកដីរបស់ខ្លួនឡើយ ហើយរដ្ឋធម្មនុញ្ញដែលជាច្បាប់កំពូលរបស់ជាតិ ក៏មិនអនុញ្ញាតឱ្យមានមូលដ្ឋានទ័ពបរទេសនៅលើទឹកដីរបស់កម្ពុជានោះដែរ។ លោកបន្តថា ការចោទប្រកាន់របបរបស់លោកថា កំពុងរៀបចំមូលដ្ឋានទ័ពជើងទឹករបស់ចិននោះ គឺជារឿងអយុត្តិធម៌ និងបានជំរុញឱ្យអន្តរជាតិ ប្រើប្រាស់បច្ចេកវិទ្យាទំនើប ដើម្បីពិនិត្យមើលថា តើករណីនេះពិតជាកើតមានមែន ឬមួយក៏យ៉ាងណានោះ។
លោក ហ៊ុន សែន ថ្លែងបែបនេះកាលពីថ្ងៃទី១៥ ធ្នូ ក្នុងពិធីបុណ្យសមុទ្រនៅឯខេត្តកោះកុង ទីដែលមានការសង្ស័យថា ចិនកំពុងស្ថាបនាកំពង់ផែទឹកជ្រៅដែលអាចឱ្យនាវាចម្បាំងរបស់ចិនអាចចូលសំចតបាន។ «»
លោកបានស្នើឱ្យអន្តរជាតិ ជាពិសេសសហរដ្ឋអាមេរិក បញ្ឈប់ការចោទប្រកាន់របបរបស់លោកតទៅទៀតពាក់ព័ន្ធនឹងការបង្កើតមូលដ្ឋានទ័ពជើងទឹករបស់ចិននៅលើទឹកដីកម្ពុជានេះ។
កាលពីខែវិច្ឆិកាកន្លងទៅ អនុប្រធានាធិបតីសហរដ្ឋអាមេរិក លោក Mike Pence បានសរសេរលិខិតផ្លូវការមួយច្បាប់ទៅលោក ហ៊ុន សែន ប្រាប់អំពីកង្វល់ចម្បងបំផុតនៃមូលដ្ឋានយោធាចិននៅកម្ពុជានេះ និងព្រមានថាបើមានរឿងបែបនេះកើតឡើងមែននោះ វានឹងធ្វើឲ្យប៉ះពាល់យ៉ាងធ្ងន់ធ្ងរដល់ទំនាក់ទំនងទ្វេភាគីរវាងប្រទេសទាំងពីរ។ ចំណែក កាសែត ឌឹ អេស៊ា ថាមស៍ (The Asia Times) វិញ បានចេញផ្សាយអត្ថបទមួយ មានចំណងជើងថា កម្ពុជាអាចក្លាយជាចំណុចស្នូលនៃសង្គ្រាមត្រជាក់ថ្មី ដោយសារតែការងាករេខ្លាំងពេកទៅរកប្រទេសចិនកុម្មុយនិស្ត។ អត្ថបទនេះ បានរៀបរាប់អំពីលទ្ធភាពនៃការកកើតមូលដ្ឋានទ័ពជើងទឹករបស់ចិនក្នុងខេត្តកោះកុង តាមរយៈដីសម្បទានសេដ្ឋកិច្ចរបស់ក្រុមហ៊ុនចិន UDG ទំហំជាង ៤ម៉ឺន ៥ពាន់ហិកតារ រយៈពេល ៩៩ឆ្នាំ ដើម្បីឲ្យចិនសាងសង់កំពង់ផែសមុទ្រទឹកជ្រៅ ដែលអាចឲ្យកប៉ាល់ចម្បាំងចិនចូលចតបាន។
អ្នកវិភាគនយោបាយលោក គឹម សុខ ថ្លែងថា តម្រុយនៃការកកើតមូលដ្ឋានទ័ពជើងទឹករបស់ចិននៅកម្ពុជានេះ ប៉ះពាល់ដល់សន្តិសុខតំបន់ទាំងមូល ទើបប្រទេសមួយចំនួន ពិសេសសហរដ្ឋអាមេរិក ចេញមុខឈឺឆ្អាលរឿងនេះ។ លោកបន្តថា ប្រតិកម្មរបស់អន្តរជាតិ គឺជាការគំរាមកំហែងដល់អំណាចរបស់លោក ហ៊ុន សែន ហេតុដូចនេះទើបលោកចេញមុខបដិសេធម្តងហើយម្ដងទៀតបែបនេះ។ លោកជំរុញឱ្យរបបនេះ លាតត្រដាងព័ត៌មានទាំងឡាយពាក់ព័ន្ធនឹងគម្រោងវិនិយោគខ្នាតធំរបស់ចិននៅកម្ពុជា និងអនុញ្ញាតឱ្យមានការធ្វើអធិការកិច្ចដោយឯករាជ្យពីអ្នកជំនាញអន្តរជាតិ ដើម្បីធានាថា ពិតជាមិនមានការស្ថាបនាមូលដ្ឋានទ័ពរបស់ចិននៅលើទឹកដីកម្ពុជាមែន។ «»
អ្នកវិភាគរូបនេះ ជំរុញឱ្យពលរដ្ឋខ្មែរនាំគ្នាតាមដានករណីនេះឱ្យបានដិតដល់ ព្រោះរឿងនេះមិនត្រឹមតែប៉ះពាល់ដល់អំណាចរបស់លោក ហ៊ុន សែន តែមួយមុខនោះទេ ប៉ុន្តែបើធ្ងន់ធ្ងរវាអាចនឹងប៉ះពាល់ដល់សន្តិសុខ និងផលប្រយោជន៍របស់ជាតិទាំងមូល៕
No comments:
Post a Comment