ស្ថានីយទូរទស្សន៍ CNC
ដោយ ហេង រស្មី
2018-12-21
rfa
លោក ហ៊ុន សែន ពេលជួបពលរដ្ឋ និងនិស្សិតខ្មែរនៅទីក្រុងហ្សឺណែវ ប្រទេសស្វីស ថ្ងៃទី២៣ ខែតុលា ឆ្នាំ ២០១៨។
មេដឹកនាំរបបលោក ហ៊ុន សែន បានបង្ហាញអំណាចរបស់លោកតាមរយៈសារបែកធ្លាយមួយថា លោកមានឥទ្ធិពលលើកលោក គិត ម៉េង អ្នកជំនួញដ៏ធំមួយនៅកម្ពុជាដោយបញ្ជាឲ្យដកហូតមុខតំណែងលោកអគ្គនាយកទូរទស្សន៍ CNC។ លោកថា បើមិនធ្វើតាមបញ្ជាលោកទេ កុំថាឡើយព្រះមហាក្សត្រ ក៏មិនអាចការពារបានដែរ។ អ្នកវិភាគបានលើកឡើងថា លោក ហ៊ុន សែន គឺជាឪតុលាការ។
មេដឹកនាំរបបក្រុងភ្នំពេញបានចេញបញ្ជាផ្ទាល់មាត់យ៉ាងម៉ឺងម៉ាត់ដល់លោក គិត ម៉េង ឲ្យដកហូតមុខតំណែងលោក អ៊ុក វរ៉ា ចេញពីអគ្គនាយកទូរទស្សន៍ CNC ជាមួយនឹងការគំរាមធ្ងន់ៗ ថា បើមិនអនុវត្តតាមបទបញ្ជាលោកទេ នោះគ្រប់មុខជំនួញទាំងប៉ុន្មានរបស់មហាសេដ្ឋី ដែលមានប្រាក់រាប់លាននៅកម្ពុជារូបនេះនឹងមានផលប៉ះពាល់។
នៅក្នុងសារបែកធ្លាយតាមរយៈបណ្តាញសង្គមបានឲ្យដឹងថា លោក អ៊ុក វរ៉ា មិនអាចឈរជើងកាន់តូនាទីនៅក្នុងស្ថានីយទូរទស្សន៍ CNC តទៅទៀតទេ គឺដោយសារតែលោករកឃើញថា បានប្រព្រឹត្តកំហុសជាមួយបុគ្គលិកក្រោមបង្គាប់ ហើយលោកបានប្រៀបធៀបកំហុសនេះទៅនឹងស្នាមរបួសដែលមានជម្រៅជ្រៅមិនអាចព្យាបាលបាន៖ «ត្រូវយល់ឲ្យបានច្បាស់អ្វីដែលលោកបានធ្វើលោកមិនអាចនៅបានតទៅទៀតទេ វាបានចេញបញ្ហាប៉ុណ្ណឹងទៅហើយ។ លោកមិនអាចនៅបានតទៅទៀតដោយសារតែបុគ្គលិកគេស្អប់លោកតែម្តង»។
សារបែកធ្លាយមានរយៈពេលជិត ១៥នាទី ដែលបានបង្ហាញពីការអន្តរាគមន៏របស់លោក ហ៊ុន សែន ទាំងយប់នេះបានកើតមានឡើងក្រោយពីលោក អ៊ុក វរ៉ា អគ្គនាយកទូរទស្សន៍ CNC មានគម្រោងបញ្ឃប់បុគ្គលិកចំនួន ៣២នាក់យ៉ាងអាថ៌កំបាំងដោយមិនបានបញ្ជាក់ពីហេតុផលពិតប្រាកដ។
នៅក្នុងចំណោមបុគ្គលិកទាំងនោះមានស្រ្តីមានផ្ទៃពោះម្នាក់ ត្រូវបានគេសង្ស័យថា ជាប់នឹងសាច់ញាតិរបស់លោក ហ៊ុន សែន ដែលបានបណ្តាលឲ្យលោកខឹងសម្បារបញ្ជាយ៉ាងដាច់ណាត់ដល់លោក គិត ម៉េង ឲ្យបញ្ឃប់តួនាទីនេះជាបន្ទាន់។
លោក ហ៊ុន សែន បាននិយាយដោយបង្ខំឲ្យលោក អ៊ុក វរ៉ា ត្រូវតែចាកចេញជាបន្ទាន់ បើមិនដូច្នេះទេលោក គិត ម៉េង ក៏មិនរួចខ្លួនដែរអាចនឹងក្លាយជាសត្រូវជាមួយលោក។
លោកបានព្រមានថា រាល់មុខជំនួញទាំងអស់លោក គិត ម៉េង ទាំងអស់នៅក្នុងកណ្តាប់ដៃលោក៖ «កុំរឹងរួស! បើសិនជាលោកនៅតែរឹងរួសទាមទារនៅកន្លែងហ្នឹងតទៅទៀតលោកមិនមានអនាគតទេកុំថាឡើយ លោកជាក្មួយលោកជំទាវមាន សំ អន ហើយធ្លាប់ជាអតិតបុគ្គលិកទូរទស្សន៍បាយ័នទោះអីលោកជាអ្វីក៏ដោយ ខ្ញុំសូមបញ្ជាក់លោកដកខ្លួនចេញសិនដំណើរនៅវែងឆ្ងាយលោកកែខ្លួនលោកអាចវិលត្រឡប់ទៅវិញ នៅពេលណាប្រសិនបើគេអាចទទួលយកបាន»។
អគ្គនាយកទូរទស្សន៏ CNC លោក អ៊ុក វរ៉ា មិនអាចស្នើសុំ ដើម្បីសេចក្ដីអត្ថាធិប្បាយបំភ្លឺបានទេទាក់ទិននឹងបទបញ្ជារបស់លោក ហ៊ុន សែន។
ចំណែកម្ចាស់ភាគហ៊ុនទូរទស្សន៍ CNC វិញ លោក គិត ម៉េង បានបដិសេធមិនធ្វើអត្ថាធិប្បាយ៖ «ខ្ញុំជាប់ប្រជុំបន្តិចសុំទោសបាទ»។
សម្លេងបែកធ្លាយរបស់លោក ហ៊ុន សែន នេះបានលាតត្រដាងពីចរិករបស់មេដឹកនាំផ្តាច់ការ ដែលបានប្រព្រឹត្តរំលោភលើច្បាប់ និងមិនបានអនុវត្តតាមបែបបទរដ្ឋបាលនៅក្នុងស្ថាប័ននីមួយៗ។
អ្នកវិភាគឯករាជ្យលោក គឹម សុខ បានបញ្ជាក់ថា សារបែកធ្លាយនេះបង្ហាញថា លោក ហ៊ុន សែន គឺជាឪតុលាការ៖ «បញ្ជាក់ថា លោក ហ៊ុន សែន គឺជាឪតុលាការក្នុងប្រទេសកម្ពុជាពីព្រោះលោកបញ្ជាក់ថា ជាឪស្តេចម៉ែស្តេចក៏គាត់ចាត់ការដែរ ហើយតាមរដ្ឋធម្មនុញ្ញស្តេចត្រូវធានាការពាររដ្ឋធម្មនុញ្ញជាច្បាប់កំពូលរបស់ជាតិ»។
ស្ថានីយទូរទស្សន៏ CNC មានទីតាំងតាមបណ្តោយផ្លូវជាតិលេខ៥ សង្កាត់គីឡូម៉ែត្រលេខ៦ ខណ្ឌប្ញស្សីកែវក្រុងភ្នំពេញ។ ស្ថានីយនេះ មានម្ចាស់ភាគហ៊ុន គឺលោក គិត ម៉េង ដែលជាអ្នកមានទ្រព្យសម្បត្តិស្ដុកស្ដម្ភម្នាក់ក្នុងប្រទេសកម្ពុជា ហើយក៏សង្ស័យថា ធ្លាប់មានរឿងអាស្រូវរត់ពន្ធគ្រឿងញៀនជាមួយលោក ហ៊ុន តូ ក្មួយលោក ហ៊ុន សែន ផងដែរ។
លោក គិត ម៉េង ជាញឹកញាប់ត្រូវបានគេមើលឃើញថា លោកបានដើរអែបជាមួយលោក ហ៊ុន សែន ពេលចេញដំណើរទៅក្រៅប្រទេសនឹងលំហែកាយនៅថ្ងៃឈប់សម្រាកម្តងៗ។ លោក ហ៊ុន សែន បាននិយាយនៅក្នុងសារបែកធ្លាយនោះថា ស្ថានីយទូរទស្សន៍បាយ័ន្តនឹងស្ថានីយទូរទស្សន៍ CNC លោកជាអ្នកឧបត្ថមថវិកាទាំងអស់៖ «គឺបុគ្គលិកទូរទស្សន៍ CNC ទាំងអស់នេះហើយ ដែលបានទទួលការគាំទ្រពីខ្ញុំ និងភរិយារបស់ខ្ញុំច្រើនជាងគេទាំងអស់។ បាយ័ន្តបានតិចតួចណាស់ ក៏ប៉ុន្តែបុគ្គលិកនៅទូរទស្សន៍ CNC CTN ដែលខ្ញុំគិតថា មួយចំនួនណានោះមិនទាំងអស់ទេ គឺទទួលប្រាក់ឧបត្តមតាមវិធីបុណ្យទាននានា គឺខ្ញុំយកចិត្តទុកដាក់អំពីបញ្ហានេះ»។
លោក ហ៊ុន សែន បានព្រមានថា បើលោក អ៊ុក វរ៉ា នៅតែរឹងទទឹងកុំថា លោកមានអ្នកណាជាខ្នងបង្អែកប៉ុណ្ណាអ្នកណាក៏លោកមិនញញើតដែរ ដោយរួមទាំងព្រះមហាក្សត្រ៖ «ជាមួយខ្ញុំកុំនិយាយឲ្យសោះឪស្តេចម៉ែស្តេច ក៏ខ្ញុំដាក់ដែរ កុំនិយាយបញ្ហាកូនអ្នកធំក្មួយអ្នកធំ ការយោគយល់អត់ទេ»។
ស្ថានីយទូរទស្សន៍ CNC បានបើកសម្ភោធជាច្រើនឆ្នាំមកហើយ។ ក៏ប៉ុន្តែនេះជាលើទីមួយហើយដែលលោក ហ៊ុន សែន បានអន្តរាគមន៍រឿងរដ្ឋបាល។ លោក ហ៊ុន សែន បានព្រមានថា បើមិនដកហូតដំណែងលោក អ៊ុក ប៉ូរ៉ា ទេនឹងមានបាតុកម្មប្រឆាំង ហើយលោក គិត ម៉េង នឹងក្លាយជាសត្រូវជាមួយលោក៕
No comments:
Post a Comment