ដោយលោក មាន ឫទ្ធិ
2019-07-12
rfa
គំនូរប្លង់ប្រលានយន្តហោះអន្តរជាតិខេត្តសៀមរាបថ្មី។
រូបភាពពី sasac.gov.cn|China Daily
របបក្រុងភ្នំពេញបានអនុញ្ញាតឲ្យក្រុមហ៊ុនចិនឈ្មោះ Shanxi Mechanization Construction Group ធ្វើការសាងសង់បរិវេណហោះហើរនៅព្រលានយន្តហោះអន្តរជាតិថ្មីនៅខេត្តសៀមរាប។ ការអនុញ្ញាតនេះ គឺបន្ទាប់ពីក្រុមហ៊ុនចិនមួយនេះ ទើបបានឈ្នះការដេញថ្លៃដើម្បីទទួលសាងសង់បរិវេណហោះហើរនៃព្រលានយន្តហោះថ្មីនេះ ក្នុងទឹកប្រាក់ ២៩០ លានយ័ន ស្មើនឹងជាង ៤២ លានដុល្លារអាមេរិក។ នេះបើយោងតាមការផ្សាយរបស់សារព័ត៌មានចិន China Daily កាលពីថ្ងៃទី ០៨ កក្កដា។ សារព័ត៌មាននេះ ឲ្យដឹងថា ព្រលានយន្តហោះថ្មីនេះ មានចម្ងាយ ៥១ គីឡូម៉ែត្រពីទីប្រជុំជនខេត្តសៀមរាប និង ៤០ គីឡូម៉ែត្រពីតំបន់រមណីយដ្ឋានអង្គរ។ ព្រលានយន្តហោះនេះ នឹងត្រូវសាងសង់លើផ្ទៃដីសរុប ៧០០ ហិកតា ក្រោមទឹកប្រាក់សរុបជិត ១ ពាន់លានដុល្លារ។
អាស៊ីសេរីនៅមិនទាន់អាចសុំការបញ្ជាក់ពីមន្ត្រីរបបក្រុងភ្នំពេញ និងមន្ត្រីអាកាសចរណ៍ស៊ីវិល អំពីតម្លាភាពនៃការដេញថ្លៃការសាងសង់បរិវេណព្រលានយន្តហោះថ្មីនេះបាននៅឡើយទេ។ ក៏ប៉ុន្តែ កន្លងមក របបនេះតែងរក្សាការសម្ងាត់ និងកម្របង្ហាញតម្លាភាពជុំវិញការដេញថ្លៃលើគម្រោងសាងសង់ហេដ្ឋារចនាសម្ព័ន្ធធំៗនោះទេ។ ក្រុមហ៊ុនចិន តែងឈ្នះការដេញថ្លៃរាល់គម្រោងសំខាន់ៗទាំងនោះ ដែលជាផ្នែកមួយនៃគម្រោងការប្រចាំសតវត្ស «គំនិតផ្តួចផ្តើម ខ្សែក្រវ៉ាត់ និងផ្លូវ» របស់មហាយក្សចិន។ ក្នុងនោះ រួមមានគម្រោងសាងសង់ព្រលានយន្តភ្នំពេញថ្មីនៅខេត្តកណ្តាលក្នុងទឹកប្រាក់ជាង ១ ពាន់ ៥ រយលានដុល្លារអាមេរិក ព្រលានយន្តហោះកោះកុង ក្នុងតម្លៃជាង ៣៥០ លានដុល្លារអាមេរិកជាដើម។ ក្រុមអ្នកជំនាញកិច្ចការបរទេសធ្លាប់ព្រលានថា ចិនអាចបម្លែងព្រលានយន្តខេត្តកោះកុង ឲ្យបម្រើវិស័យយោធារបស់ខ្លួននាពេលអនាគត។ ក៏ប៉ុន្តែ ក្រុងភ្នំពេញតែងបដិសេធព័ត៌មានទាំងនេះ និងថា ផ្អែកតាមរដ្ឋធម្មនុញ្ញ កម្ពុជា មិនអនុញ្ញាតឲ្យមានមូលដ្ឋានយោធាបរទេសនោះឡើយ៕
No comments:
Post a Comment