ដោយ វ៉ែន សុមេធ
2019-10-03
លោក សម រង្ស៊ី និងលោក ហូ វ៉ាន់ (កណ្ដាល) អ្នកគាំទ្រគណបក្សសង្គ្រោះជាតិ ចាប់ផ្ដើមលើកដៃជាសញ្ញា យុទ្ធនាការ ម្រាមដៃ ៩ នៅថ្ងៃទី២៣ ខែកញ្ញា ឆ្នាំ២០១៩។
រូប៖ ហ្វេសប៊ុកលោក ហូ វ៉ាន់
មេដឹកនាំរបបក្រុងភ្នំពេញ លោក ហ៊ុន សែន ចេញបញ្ជាឱ្យកងកម្លាំងទាំងអស់ ត្រៀមខ្លួនចាំបង្ក្រាបអ្នកចាំទទួល និងអ្នកហែហមលោក សម រង្ស៊ី វិលចូលកម្ពុជា នៅថ្ងៃទី៩ វិច្ឆិកា ខាងមុខ។ មេដឹកនាំចលនាគណបក្សប្រឆាំង អះអាងថា លោកនៅតែរក្សាជំហរហែហម ប្រធានស្ដីទីបក្សប្រឆាំងវិលចូលស្រុកវិញតាមកាលកំណត់។
លោក ហ៊ុន សែន អះអាងថា លោកមានកងកម្លាំងច្រើនលើសពីចំនួនអ្នកចាំទទួល និងអ្នកហែហម លោក សម រង្ស៊ី ទៅទៀត។ លោកថា លោកមានលទ្ធភាពគ្រប់គ្រាន់ក្នុងការបង្ក្រាបអ្នកគាំទ្រលោក សម រង្ស៊ី ដែលលោកចាត់ទុកថា ជាអ្នករួមគំនិតក្បត់ជាតិ ចង់ផ្ដួលរបបរបស់លោក។ លោក ហ៊ុន សែន ពន្យុះឱ្យលោក សម រង្ស៊ី វិលចូលស្រុកតាមកាលកំណត់ ប៉ុន្តែលោកព្រមានថា អ្នកចូលរួមយុទ្ធនាការ ៩វិច្ឆិកា ជាមួយលោក សម រង្ស៊ី ទោះក្រោមរូបភាពបែបណា គឺនឹងត្រូវមានទោស៖ «អ្នកណាចូលរួមក្នុងយុទ្ធនាការបំផ្លាញប្រទេសបំផ្លាញសន្តិភាព នៅថ្ងៃទី០៩ វិច្ឆិកា អ្នកហ្នឹងនឹងត្រូវមានទោស ហើយរឿងនេះ ក្រសួងយុត្តិធម៌គេបានប្រកាសរួចហើយ។ ស្ថាប័ននានាគេបានត្រៀមបម្រុងហើយ។ កងទ័ពរបស់អ្នកឯងនៅឯណា ស្អីឯណា? អ្នកឯងកុំបង្វែរទិស កុំបង្វែរទិស អំពីថា ដល់ពេលលឺគេប្រតិកម្មរឿងលុយចិញ្ចឹមកងទ័ពកម្លាំងប្រដាប់អាវុធ ឥឡូវបង្វែរទិសទៅ People Power ទៅអំណាចប្រជាជនឯណាឯណោះ។ គេប្រតិកម្មរឿងឯងប្រមាថស្ដេចទាមទារឱ្យស្ដេចដាក់រាជ្យ ទៅជាមករំដោះស្ដេចអាហ្នឹងអត់ទេ អត់ទេ។ បទចោទអ្នកឯងនៅជាប់អាលើឯណោះ។ និយាយគ្នាឱ្យច្បាស់។ នេះមិនមែនជាសិទ្ធិបញ្ចេញមតិទេណា ជាការផ្ដួលរំលំរដ្ឋ ជាការដូររបប ជាការដូររបប អ្វីក៏វាងាយម្ល៉េះ! មនុស្សរាប់លាននាក់ កម្លាំងប្រដាប់អាវុធ ចាំតែលើកឡើងថ្ងៃទី០៩ វិច្ឆិកា បានអញ្ជើញមក បើសិនជាក្បាលមិនប៉ាតដែកទេ ឱ្យមក»។
លោក ហ៊ុន សែន ថ្លែងបែបនេះនៅក្នុងពិធីចែកសញ្ញាប័ត្រដល់និស្សិតនៃវិទ្យាស្ថានឯកជនមួយ នៅរាជធានីភ្នំពេញ នៅព្រឹកថ្ងៃទី២ តុលា។ ស្របពេល លោក ហ៊ុន សែន ចេញសារព្រមានបែបនេះ អាជ្ញាធរ និងតុលាការរបបក្រុងភ្នំពេញ កំពុងបង្កើនសកម្មភាពចាប់ចង ចោទប្រកាន់ លើសកម្មជនបក្សប្រឆាំងនៅតាមមូលដ្ឋានជាបន្តបន្ទាប់។ អាជ្ញាធរ និងតុលាការរបប លោក ហ៊ុន សែន ចោទសកម្មជនបក្សប្រឆាំងទាំងនោះ ថា បានចូលរួមផែនការផ្ដួលរំលំរដ្ឋាភិបាលជាមួយលោក សម រង្ស៊ី។
គិតត្រឹមថ្ងៃទី២ តុលា មានសកម្មជនបក្សប្រឆាំង ៣០នាក់ហើយដែលកំពុងជាប់ឃុំក្នុងពន្ធនាគារ ស្របពេលសកម្មជនជាង១៦០ នាក់ផ្សេងទៀត ត្រូវបានកោះហៅឱ្យឡើងតុលាការ និងបំភ្លឺនៅប៉ូលិសប៉ុស្តិ៍ ហើយនិងមានសកម្មជនបក្សប្រឆាំងម្នាក់ ស្លាប់ក្នុងពន្ធនាគារខេត្តកំពង់ចាម។ ចំណែកឯសកម្មជនបក្សប្រឆាំងច្រើននាក់ទៀត កំពុងគេចខ្លួន ពីផ្ទះសម្បែង ដោយសារភ័យខ្លាចការធ្វើទុក្ខបុកម្នេញពីអាជ្ញាធររបបក្រុងភ្នំពេញ។
ក្រោយពេលរងការបង្ក្រាបឥតស្រាកស្រាន្ត មន្ត្រីគណបក្សប្រឆាំង បានជំរុញឱ្យពលរដ្ឋ បង្កើតយុទ្ធនាការលើកម្រាមដៃ៩ ជាសញ្ញា គាំទ្រដំណើរវិលចូលស្រុករបស់ លោក សម រង្ស៊ី នៅថ្ងៃទី០៩ វិច្ឆិកា។ លោក ហ៊ុន សែន ក៏បានបញ្ជាឱ្យចាប់អ្នកចូលរួមយុទ្ធនាការលើកម្រាមដៃ៩ នេះទៀត ដោយ លោកហៅថា ជាយុទ្ធនាការគាំទ្រផែនការផ្ដួលរំលំរបបលោក។ លោក ណែនាំថា បើពលរដ្ឋណាចង់ចូលរួមក្នុងយុទ្ធនាការម្រាមដៃ៩នេះ ត្រូវកាត់ម្រាម ១ចោលទៅ បើចិត្តសឿង៖ «អ្នកណាក៏ដោយ ដែលធ្វើយុទ្ធនាការនឹងត្រូវបទចោទតាមក្រមព្រហ្មទណ្ឌ តាមច្បាប់ថ្មី ស្អី ឧបឃាតនោះ។ អ៊ីចឹង កុំឱ្យសោះណា អាយុទ្ធនាការម្រាម៩។ បើចង់ធ្វើយុទ្ធនាការម្រាម៩ កាត់ម្រាម១ក្រវាត់ចោលទៅ អាហ្នឹង បានវាក្លាហាន។ មនុស្សគេកើតមកម្រាម១០ ឯងម្រាម៩។ មើលអាម្រាម៩ហ្នឹង ដាក់វា អាម្រាម៩ហ្នឹងមើល»។
ប្រធានចលនាសង្គ្រោះជាតិនៅជប៉ុន លោក ហៃ វណ្ណា និយាយថា ការព្រមានរបស់ លោក ហ៊ុន សែន នឹងធ្វើឱ្យពលរដ្ឋ និងពលករខ្មែរនៅជប៉ុន ពុះកញ្ជ្រោលចង់អមដំណើរលោក សម រង្ស៊ី វិលចូលស្រុកបន្ថែមទៀត។ លោកជឿថា កងកម្លាំងទាហាន និងប៉ូលិស នឹងមិនស្ដាប់បញ្ជាលោក ហ៊ុន សែន ឱ្យបាញ់បង្ក្រាបលើពលរដ្ឋខ្មែរឡើយ ព្រោះ លោក ហ៊ុន សែន ជានាយករដ្ឋមន្ត្រីខុសច្បាប់។ សកម្មជនបក្សប្រឆាំងនៅប្រទេសជប៉ុនរូបនេះ យល់ថា ពលរដ្ឋខ្មែរនឹងងើបតវ៉ា នៅថ្ងៃទី៩ វិច្ឆិកា ដោយសារពួកគេ កំពុងខឹងសម្បារ របបលោក ហ៊ុន សែន ធ្វើទុក្ខបុកម្នេញលើពួកគេនិងក្រុមគ្រួសារ កាន់តែខ្លាំង នៅមួយរយៈពេលចុងក្រោយនេះ៖ «មនុស្សដែលមិនពេញចិត្តគាត់ហ្នឹង វាកើនឡើងកាន់តែខ្លាំងឡើងៗ។ ជាពិសេសនៅក្នុងរយៈពេលចុងក្រោយនេះ គាត់បានធ្វើឱ្យប្រជាពលរដ្ឋមានកំហឹងកាន់តែខ្លាំងទៅលើរូបគាត់ ទោះបីជាប្រជាពលរដ្ឋគាត់មិនមានសកម្មភាព ប៉ូលិស ទាហាន មិនមានសកម្មភាពនៅពេលហ្នឹងតែពេលដែលការធ្វើមាតុភូមិនិវត្តន៍របស់គណៈប្រតិភូគណបក្សសង្គ្រោះជាតិ ប្រជាពលរដ្ឋខ្មែរនៅឯនាយសមុទ្រ ដែលនឹងវិលត្រឡប់ជាមួយលោកប្រធាន សម រង្ស៊ី ហ្នឹង គឺប៉ូលិសទាហានលែងស្ដាប់បញ្ជាហើយ។ អ៊ីចឹងគាត់មិនអាចបញ្ជាប៉ូលិសទាហានបានបន្តទៅទៀតទេ។ រឹតតែធ្វើឱ្យពួកយើងជាប្រជាពលរដ្ឋខ្មែរ កំពុងតែរស់នៅប្រទេសសេរីរឹតតែពុះកញ្ជ្រោលក្នុងការវិលត្រលប់ទៅជាមួយលោកប្រធានស្ដីទី សម រង្ស៊ី ពីព្រោះយើងបានស្ទង់មតិទៅ លោក ហ៊ុន សែន កំពុងភ័យបារម្ភយ៉ាងខ្លាំង អំពីមាតុភូមិនិវត្តន៍នេះ»។
ប្រធានស្ដីទីគណបក្សសង្គ្រោះជាតិ លោក សម រង្ស៊ី បានបង្កើនវោហារសាស្ត្ររាល់ថ្ងៃ ដោយអំពាវនាវឱ្យកងកម្លាំងប្រដាប់អាវុធ កុំស្ដាប់បញ្ជាមេយោធា ជាជនផ្ដាច់ការ។ លោក សម រង្ស៊ី បានអំពាវនាវឱ្យកងទាហាន និងប៉ូលិស បង្វែរចុងកាណុងភ្ជង់ ឬបាញ់ លោក ហ៊ុន សែន វិញ បើសិនជាលោក ហ៊ុន សែន បញ្ជាឱ្យពួកគេ បាញ់បង្ក្រាបពលរដ្ឋស្លូតត្រង់ នៅថ្ងៃទី៩ វិច្ឆិកា។
បច្ចុប្បន្ន គណបក្សសង្គ្រោះជាតិ កំពុងបង្កើតមូលនិធិពិសេស ដើម្បីផ្ដល់ថវិកាឧបត្ថម្ភដល់កងកម្លាំងប្រដាប់អាវុធស្នេហាជាតិ ដែលចេញមុខមកការពារប្រជាពលរដ្ឋខ្មែរ អមដំណើរ លោក សម រង្ស៊ី ធ្វើមាតុភូមិនិវត្តន៍។ លោក សម រង្ស៊ី សរសេរក្នុងបណ្ដាញសង្គមហ្វេសប៊ុក (facebook) កាលពីថ្ងៃទី០១ តុលា ថា ពលរដ្ឋខ្មែរនៅទីក្រុងម៉ុងត្រេអាល (Montreal) ប្រទេសកាណាដា (Canada) ច្រើនកុះករ គាំទ្រដំណើរមាតុភូមិនិវត្តន៍របស់លោក នៅថ្ងៃទី០៩ វិច្ឆិកា។
អ្នកសិក្សាស្រាវជ្រាវការអភិវឌ្ឍសង្គម បណ្ឌិត មាស នី មិនហ៊ានថ្លែងថា កងកម្លាំង និងពលរដ្ឋខ្មែរចំនួនប៉ុន្មាននឹងគាំទ្រ ហែហមលោក សម រង្ស៊ី នៅថ្ងៃទី៩ វិច្ឆិកាឡើយ ដោយលោកថា វាអាស្រ័យលើកំហឹងរបស់ពលរដ្ឋ ចំពោះរដ្ឋាភិបាល។ ប៉ុន្តែ លោកបណ្ឌិតសង្កេតឃើញថា រដ្ឋាភិបាលបង្កើនចំណាត់ការធ្វើទុក្ខបុកម្នេញ ចាប់ចង និងបំភិតបំភ័យ ដែលជាសញ្ញាបង្ហាញថា រដ្ឋាភិបាលកំពុងព្រួយបារម្ភខ្លាំង ពីគម្រោងវិលត្រលប់ចូលស្រុករបស់លោក សម រង្ស៊ី។
លោកបណ្ឌិត មាស នី យល់ថា យុទ្ធសាស្ត្រចុងក្រោយនេះ គឺរដ្ឋាភិបាល ចង់ធ្វើដូចកាលទសវត្សរ៍៩០ គឺចង់គំរាមកំហែងពលរដ្ឋឱ្យភ័យខ្លាច មិនហ៊ានទាក់ទងជាមួយសកម្មជនគណបក្សប្រឆាំង។ លោកថា យុទ្ធសាស្ត្រនេះ មិនមែនធ្វើឱ្យពលរដ្ឋភ័យតែជាមួយគណបក្សសង្គ្រោះជាតិទេ គឺភ័យជាមួយគ្រប់គណបក្សណា ដែលមានសមត្ថភាពក្លាយជាបក្សប្រឆាំងនៅថ្ងៃមុខ៖ «ខ្ញុំគិតថា បើតាមវិធានការដែលធ្វើជាបន្តបន្ទាប់នេះ ខ្ញុំគិតថា ការប៉ាន់ប្រមាណទៅ រដ្ឋាភិបាលគាត់អាចស្មានថា សម រង្ស៊ី ហ្នឹង មកច្រើនជាងអត់មក បានជាមានវិធានការជាបន្តបន្ទាប់ច្រើនទៅៗ។ បានន័យធ្វើឱ្យខ្លាចរអានៅក្នុងការទំនាក់ទំនងបក្សប្រឆាំង មិនថាគណបក្សសង្គ្រោះជាតិនៅថ្ងៃខាងមុខទោះបីគណបក្សណាក៏ដោយ។ សមត្ថកិច្ចកាលជំនាន់នោះការជួប (គ្នា) សុទ្ធតែលួចជួប លួចអ្វីអ៊ីចឹងទៅណា ទោះបីជាក្នុងលក្ខខណ្ឌស្ថានភាពនយោបាយធម្មតាក៏ក្នុងនោះមានការរួញរា នៅក្នុងការចូលរួមជាមួយគណបក្សប្រឆាំង នៅក្នុងទសវត្សរ៍ឆ្នាំ១៩៩០»។
ទន្ទឹមនឹងការគំរាមពលរដ្ឋនោះ លោកនាយករដ្ឋមន្ត្រី ហ៊ុន សែន បានជំរុញឱ្យសកម្មជនបក្សប្រឆាំង សារភាព ពីផែនការវិលចូលស្រុករបស់ លោក សម រង្ស៊ី ដើម្បីទទួលបានការលើកលែងទោសពីលោក។ លោក ហ៊ុន សែន ផ្ដាំឱ្យអ្នកនៅក្នុងស្រុកទាំងអស់ កុំព្រហើន ជាមួយរបបលោក ដោយសារ លោកបានចាត់ទុកថា ផែនការវិលចូលស្រុករបស់ លោក សម រង្ស៊ី ជាសកម្មភាពរដ្ឋប្រហារ។ ប៉ុន្តែ លោក សម រង្ស៊ី វិញ អះអាងថា លោកនឹងដឹកនាំអ្នកគាំទ្របក្សប្រឆាំងវិលចូលស្រុក ដើម្បីរកដំណោះស្រាយនយោបាយ បញ្ចប់វិបត្តិជាតិកំពុងប្រេះឆា បែកបាក់គ្នា៕
No comments:
Post a Comment