ដោយ មួង ណារ៉េត
2020-10-24
ស្ថានភាពទឹកជំនន់ នៅខេត្តបាត់ដំបង កាលពីថ្ងៃទី៩ ខែតុលា ឆ្នាំ២០២០។
រូបរដ្ឋបាលខេត្តបាត់ដំបង
អ្នកវិភាគ និងមន្ត្រីសង្គមស៊ីវិលថា ការគ្រប់គ្រងគ្រោះទឹកជំនន់នៅកម្ពុជាហាក់នៅមានចន្លោះប្រហោងច្រើន ខណៈចំនួនមនុស្សស្លាប់ដោយសារគ្រោះទឹកជំនន់កើនឡើងដល់ ៣៩នាក់។ ពួកគេ ស្នើឲ្យរដ្ឋាភិបាលបង្កើនការសកម្មភាពទប់ស្កាត់ឲ្យបានមាំទាំជាងមុន ដើម្បីការពារប្រជាពលរដ្ឋ។
ប្រធានអង្គការសម្ព័ន្ធគណនេយ្យភាពសង្គមកម្ពុជាលោក សន ជ័យ ឲ្យអាស៊ីសេរីដឹងថា កម្ពុជានៅមានចន្លោះប្រហោងច្រើន ក្នុងការគ្រប់គ្រង និងជូនដំណឹងដល់ប្រជាពលរដ្ឋអំពីគ្រោះទឹកជំនន់ ដែលជាហេតុបណ្ដាលឲ្យពលរដ្ឋរងគ្រោះធ្ងន់ធ្ងរ និងបាត់បង់ដល់អាយុជីវិតជាច្រើននាក់បែបនេះ។រីឯការផ្ដល់ជំនួយសង្គ្រោះវិញ លោកបន្តថា អាជ្ញាធរនៅមានភាពឆកល្វែងច្រើនដែរ ដោយសារតែភពមិនប្រក្រតី និងការមើលរំលងជនរងគ្រោះ។ លោកស្នើថា កម្ពុជាគួរតែមានប្រព័ន្ធនៃការត្រៀមបម្រុងជាមុន អំពីរបៀបនៃការចាត់ចែងជំនួយ ដើម្បីឲ្យមានភាពច្បាស់លាស់ជាងនេះ និងចៀសវាងការរើសអើងគ្នា៖ «ហើយការប្រាស្រ័យទាក់ទងផ្សេងៗ ជាពិសេសយន្តការបង្ការនេះ វាត្រូវតែបានធ្វើឡើងឲ្យបានម៉ត់ចត់ជាងនេះ រវាងប្រទេសមួយទៅប្រទេសមួយ ជាពិសេសប្រទេសដែលធ្លាប់មានបទពិសោធន៍ ដែលពលរដ្ឋរងគ្រោះនោះ»។
ទោះជាយ៉ាងនេះក្ដី អ្នកនាំពាក្យគណៈកម្មការគ្រប់គ្រងគ្រោះមហន្តរាយរបស់របបក្រុងភ្នំពេញ លោក ឃុន សុខា ថា ជំនួយមនុស្សធម៌ ដែលមានអំណោយផ្សេងៗនោះ គឺចែកជូនពលរដ្ឋគ្រប់ៗគ្នា ដោយមិនមានការរើសអើងនយោបាយ និងការប្រព្រឹត្តអំពើពុករលួយអ្វីនោះទេ៖ «ជំនួយមនុស្សធម៌មួយ អ្នកថាម៉េចខ្ញុំមិនដឹងទេ ប៉ុន្តែខ្ញុំធ្វើការផ្នែកគ្រោះមហន្តរាយនេះ ម្ភៃឆ្នាំហើយ ខ្ញុំអនុវត្តការងារនេះច្រើនហើយ គឺយើងអត់ដែលប៉ះពាល់ មន្ត្រីណាក៏ដោយគឺអត់មានអ្នកទៅប៉ះពាល់ពុករលួយរឿងលុយជំនួយមនុស្សធម៌នេះបានទេ»។
បើតាមទិន្នន័យរបស់គណៈកម្មាធិការជាតិគ្រប់គ្រងគ្រោះមហន្តរាយ ឲ្យដឹងថាប្រជាពលរដ្ឋខ្មែរ ប្រមាណកន្លះលាននាក់ (៤៨ ម៉ឺន)នាក់ នៅតាមបណ្ដាខេត្តក្រុងចំនួន ១៩ រងផលប៉ះពាល់ និងត្រូវជម្លៀស ជាង ៤ម៉ឺន ៦ ពាន់នាក់។
លោកនាយករដ្ឋមន្ត្រី ហ៊ុន សែន (ឆ្វេង) ប្រគល់អំណោយដល់ពលរដ្ឋរងគ្រោះទឹកជំនន់ នាក្រុងប៉ោយប៉ែត នៅថ្ងៃទី២២ ខែតុលា ឆ្នាំ២០២០។ រូបពីហ្វេសប៊ុកលោក ហ៊ុន សែន
ទោះបីលោកនាយករដ្ឋមន្ត្រី ហ៊ុន សែន បានបង្ហាញមុខ ចុះចែកអំណោយថតផ្សាយតាមទូរទស្សន៍ព្រោងព្រាត ក៏ប្រជាពលរដ្ឋជាច្រើនត្អូញត្អែរ ថាពួកគាត់មិនបានទទួលជំនួយអ្វីសោះ។ លោក វន់ ពៅ តំណាងកម្មករសេដ្ឋកិច្ចក្រៅប្រព័ន្ធនៅភ្នំពេញ ដែលរងគ្រោះផ្ទួនៗ ដោយសារវិបត្តិជំងឺកូវីដ-១៩ ផង និងទឹកជំនន់ផងនោះ ថា កម្មករដូចជាអ្នករើសអេតចាយ កម្មករសំណង់ អ្នករត់ម៉ូតូកង់បី និងម៉ូតូឌុបជាដើម រងគ្រោះរាប់រយនាក់ ហើយមិនបានជំនួយសង្គ្រោះបន្ទាន់អ្វីទាំងអស់៖ «អ៊ីចឹងបើនិយាយពីរឿងរើសអេតចាយវិញ គឺហ្សេរ៉ូ (សូន្យ) តែម្ដង។ យើងឃើញថា សម័យកូវីដ-១៩ លក់កំប៉ុងអេតចាយ លក់របស់របរអ្វីមិនដាច់ គេមិនទិញ ហើយឥឡូវគ្រោះទឹកជំនន់ទៀត វារឹតតែធ្ងន់ធ្ងរ មិនដឹងជាទៅរើសអេតចាយនៅឯណា ស្នាក់នៅឯណា ហ្នឹងចំណុចទីមួយ ចំណុចទីពីរយើងក្រឡេកទៅមើលអ្នករត់រ៉ឺម៉ក និងអ្នករត់ម៉ូតូឌុប គឺពួកគាត់រងគ្រោះធ្ងន់ធ្ងរខ្លាំងមែនទែន មានន័យថាត្រួតលើត្រួតបីដងឯណោះ។ ទីមួយគឺបញ្ហាកូវីដ-១៩ ទីពីរបញ្ហាគ្រោះទឹកជំនន់ ខូចខាតសម្ភារៈ ទីបីខូចខាតរ៉ឺម៉កគាត់ដែលជាស្រែសម្រាប់ចិញ្ចឹមជីវិតក្នុងគ្រួសារគាត់ ត្រូវបានខូចខាត មិនអាចប្រកបមុខរបរអាជីវកម្មបាន»។
លោក វន់ ពៅ ដង្ហោយរកជំនួយពីរដ្ឋាភិបាល និងអ្នកពាក់ព័ន្ធទាំងអស់ ឲ្យជួយពួកគាត់ជាបន្ទាន់ ដើម្បីដោះស្រាយជីវភាព ក្នុងស្ថានភាពដ៏លំបាកលំបិននេះ៖ «ខ្ញុំសូមអំពាវនាវដល់រដ្ឋាភិបាល ដែលអ្នកទទួលខុសត្រូវលើគោលនយោបាយកិច្ចគាំពារសង្គម សូមមេត្តាផ្ដល់ការយកចិត្តទុកដាក់ជូនទៅយើងខ្ញុំ ដែលជាកម្មករក្រៅប្រព័ន្ធ នៅក្នុងស្ថានភាពទឹកជំនន់ ដែលកំពុងតែញាំញីជីវិត និងជីវភាពរបស់ពួកយើងផង។ ជាងនេះទៅទៀត សូមអំពាវនាវទៅដល់ម្ចាស់ជំនួយ ឬសប្បុរសជនទាំងអស់ សូមមេត្តាជួយពួកយើងជាបន្ទាន់ ដែលកំពុងដង្ហោយហៅរកការជួយសង្គ្រោះហើយ»។
ប្រធានសមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធ លោក វន់ ពៅ ក្នុងពេលផ្ដល់បទសម្ភាសន៍នៅការិយាល័យរបស់លោក បន្ទាប់ពីលោកទៅបំភ្លឺនៅប៉ុស្តិ៍រដ្ឋបាលខណ្ឌទឹកថ្លា នៅថ្ងៃទី១១ ខែឧសភា ឆ្នាំ២០១៦។ Photo: RFA
អ្នកស្រាវជ្រាវខាងការអភិវឌ្ឍសង្គម លោក បណ្ឌិត មាស នី មានប្រសាសន៍ថា បញ្ហាមួយចំណែកនៃទឹកជំនន់នៅទីក្រុងភ្នំពេញ គឺបណ្តាលមកពីការលុបបឹង ហើយពុំមាននរណាមានឥទ្ធិពលដែលអាចបញ្ឈប់ដំណើរការរបស់រដ្ឋាភិបាលបាននោះទេ ក្នុងគម្រោងអភិវឌ្ឍន៍ដោយការលុបបឹងជាបន្តបន្ទាប់នេះ។
ប៉ុន្តែលោកស្នើឲ្យរដ្ឋាភិបាល គួរត្រៀមវិធីបង្ការគ្រោះទឹកជំនន់ និងត្រូវត្រៀមលក្ខណៈជាមុន ក្នុងករណីមានអាសន្ន ដែលរួមមានទាំងថវិកា ប្រព័ន្ធនៃការជួយសង្គ្រោះ ធនធានមនុស្សសម្រាប់ជួយសង្គ្រោះក្នុងកាលៈទេសៈដែលមានគ្រោះទឹកជំនន់ធំជាថ្មី រៀបចំប្រព័ន្ធទឹក ដើម្បីបញ្ចៀសទឹកជំនន់ និងថវិកាសម្រាប់ស្តារឡើងវិញ៖ «ជាធម្មតាក្នុងកាលៈទេសៈដែលមានគ្រោះអាសន្នហ្នឹង គឺការខ្វះខាតនូវទិន្នន័យច្បាស់លាស់ពីស្ថានភាពប្រជាសាស្ត្រ។ បានន័យថា ចំនួនប្រជាជន ឬទីតាំងរបស់ភូមិ និងលំនៅឋាន នេះជារឿងសំខាន់ បើខ្វះទិន្នន័យបែបនេះ ការជួយសង្គ្រោះមិនអាចមានប្រសិទ្ធភាពខ្ពស់ទេ ហើយតំបន់ណាដែលមិនបានហ្នឹង ក៏វាចេះតែអត់តទៅទៀត»។
រីឯ ប្រធានមជ្ឈមណ្ឌលប្រជាពលរដ្ឋ ដើម្បីអភិវឌ្ឍន៍ និងសន្តិភាពលោក យង់ គីមអេង ថា កត្តាដែលបណ្ដាលឲ្យពលរដ្ឋជួបគ្រោះទឹកជំនន់នេះ បណ្ដាលមកពីការធ្វេសប្រហែសរបស់ប្រជាពលរដ្ឋផង និងអាជ្ញាធរផង ដែលមិនបានផ្ដល់ព័ត៌មានឲ្យបានច្បាស់លាស់ជូនដល់ប្រជាពលរដ្ឋ ឬការប៉ាន់ប្រមាណហានិភ័យនេះ មិនគ្រប់ជ្រុងជ្រោយ។ លោកបន្តថា អាជ្ញាធរគួរត្រៀមលក្ខណៈចំពោះឆ្នាំក្រោយៗទៀត ចំពោះបញ្ហាទឹកជំនន់នេះដែលបានគំរាមកំហែងដល់ប្រទេសកម្ពុជា៖ «ព្រោះបញ្ហានេះ វាជាមេរៀនមួយសម្រាប់ប្រជាពលរដ្ឋ និងអាជ្ញាធរ ក្នុងការត្រៀមលក្ខណៈសម្រាប់ឆ្នាំក្រោយៗទៀត។ បញ្ហាទឹកជំនន់នេះ ជាកត្តាគំរាមកំហែងសម្រាប់ប្រទេសកម្ពុជា នៅតំបន់លិចលង់ ជាហានិភ័យ»។
អ្នកនាំពាក្យគណៈកម្មាធិការជាតិគ្រប់គ្រងគ្រោះមហន្តរាយ លោក ឃុន សុខា ប្រាប់អាស៊ីសេរីកាលពីថ្ងៃទី២៣ ខែ តុលា ថា ទឹកជំនន់បានចាប់ផ្ដើមស្របបន្តិចនៅក្នុងខេត្តបាត់ដំបង និងខេត្តបន្ទាយមានជ័យ ប៉ុន្តែ មិនទាន់ឆ្លងផុតពីគ្រោះទឹកជំនន់នៅឡើយ «ទឹកវាចាប់ផ្ដើមធូរស្រាលហើយ ប៉ុន្តែនៅតំបន់មួយចំនួន មិនទាន់ឆ្លងផុតពីហានិភ័យទេ»។
គិតត្រឹមថ្ងៃទី២៣ ខែតុលា នេះ ទឹកជំនន់នៅទូទាំងប្រទេស បានធ្វើឲ្យលំនៅឋាន ជាង១សែន ខ្នង រងផលប៉ះពាល់ ដំណាំស្រូវប្រមាណ ជាង២សែន ៣ម៉ឺន ហិកតារ ក៏ប៉ះពាល់ ឯដំណាំជាង ១សែន ៣ម៉ឺនហិកតារ និងផ្លូវជាតិ និងផ្លូវទីរួមខេត្ត ប្រមាណជាង ៤០០គីឡូម៉ែត្រ បានខូចខាតទាំងស្រុង។
លោក ហ៊ុន សែន ធ្លាប់អះអាងថា របបរបស់លោក មានប្រាក់បម្រុងរាប់ពាន់លានដុល្លារ សម្រាប់ដោះស្រាយគ្រាអាសន្ន ដូចបញ្ហាជំងឺកូវីដ-១៩ និងទឹកជំនន់នេះជាដើម។ ប៉ុន្តែ ឲ្យតែមានគ្រោះអាសន្ន របបលោកចាប់ផ្ដើមពឹងលើជំនួយសប្បុរសពីមន្ត្រីគ្រាក់ៗ និងឧកញ៉ា ទៅវិញ ដែលប្រការនេះ ធ្វើឲ្យរបបនេះ រងការរិះគន់ ថាមិនមានថវិកាបម្រុងឯណា ដូចការអះអាងនោះទេ ប៉ុន្តែ ធ្វើនយោបាយប្រជាភិថុតិ៕
1 comment:
By looking at Ah Runteas Banh Hun Sen's face made me so furious. This is the face of the worst evil in the world at this time.
Post a Comment