ដោយ សុជីវី
2020-11-08
ព្រះមហាក្សត្រ ព្រះករុណា ព្រះបាទសម្ដេច នរោត្ដម សីហមុនី យាងចូលរួមទិវាបុណ្យខួបឯករាជ្យជាតិលើកទី៦៣ នាវិមានឯករាជ្យ រាជធានីភ្នំពេញ នៅថ្ងៃទី៩ ខែវិច្ឆិកា ឆ្នាំ២០១៦។
RFA
មន្ត្រីគណបក្សសង្គ្រោះជាតិ និងយុវជន មើលឃើញដូចៗគ្នាថា របបលោក ហ៊ុន សែន ដឹកនាំប្រទេសកម្ពុជា ឲ្យស្ថិតក្រោមអាណានិគមបែបថ្មីពីប្រទេសជិតខាង និងប្រទេសចិន។ ការលើកឡើងនេះ ស្របពេលដែលកម្ពុជា នឹងប្រារព្ធពិធីបុណ្យឯករាជ្យជាតិលើកទី៦៧ នៅថ្ងៃទី៩ វិច្ឆិកា ស្អែកនេះ។ មន្ត្រីនាំពាក្យគណបក្សកាន់អំណាច ឆ្លើយតបថា អ្នកដែលមើលឃើញកម្ពុជាថា គ្មានឯករាជ្យភាពពេញលេញនោះ គឺជាការចោទប្រកាន់ដោយគ្មានមូលដ្ឋាន និងខ្វះការយល់ដឹង។
មន្ត្រីគណបក្សប្រឆាំង និងយុវជន នៅតែកោតសរសើរអតីតព្រះមហាវីរៈក្សត្រ ព្រះបរមរតនកោដ្ឋ នរោត្តម សីហនុ ដែលបានទាមទារឯករាជ្យពីអាណានិគមបារាំង នៅឆ្នាំ១៩៥៣ ប៉ុន្តែពួកគេយល់ថា កម្ពុជាបច្ចុប្បន្នក្រោមការដឹកនាំរបស់លោក ហ៊ុន សែន គឺនៅមិនទាន់មានឯករាជ្យភាព និងអធិតេយ្យភាពពេញលេញនោះទេ។
តំណាងរាស្ត្រ និងជាប្រធានគណៈកម្មការកិច្ចការព្រំដែននិងអន្តោប្រវេសន៍នៃគណបក្សសង្គ្រោះជាតិ លោក អ៊ុំ សំអាន មានប្រសាសន៍ថា លោកចូលរួមអបអរសាទរចំពោះការប្រារព្ធទិវាបុណ្យឯករាជ្យជាតិ ដែលកម្ពុជាទទួលបានឯករាជ្យពេញបរិបូរពីបារាំង ឆ្នាំ១៩៥៣ ប៉ុន្តែលោកសោកស្តាយដែលរបប លោក ហ៊ុន សែន បច្ចុប្បន្ន ដឹកនាំប្រទេសកម្ពុជា ឲ្យស្ថិតក្រោមឥទ្ធិពលឬអាណានិគមបែបថ្មីពីប្រទេសវៀតណាម និងប្រទេសចិន៖ «ឯករាជ្យយើងមិនពេញលេញនោះទេ ដោយសារលោក ហ៊ុន សែន យកចិន និងយួនជាចៅហ្វាយ ដូច្នេះឯករាជ្យរបស់យើងស្ថិតនៅលើចិននិងយួនជាអ្នកកំណត់ទេ សព្វថ្ងៃនេះ។ យើងមើលទៅលើផ្នែកសេដ្ឋកិច្ច គឺពឹងទៅលើសេដ្ឋកិច្ចចិននិងយួន បើមើលទៅលើឯករាជ្យនយោបាយ ក៏ពឹងទៅលើចិននិងយួនដែរ ហើយពីបូរណភាពទឹកដីវិញ យួនបានរំលោភឈ្លានពានទឹកដីរបស់យើង យួនបានបោះតង់នៅលើទឹកដីយើងហើយធ្វើសំណង់រឹងទៀតហ្នឹង ខាងរដ្ឋាភិបាលលោក ហ៊ុន សែន អត់មានតវ៉ាជាមួយយួនអីបន្តិច។
លោក អ៊ុំ សំអាន បន្តថា ដើម្បីឲ្យកម្ពុជា មានឯករាជ្យភាព និងអធិតេយ្យភាពពេញលេញនោះ គឺរបប លោក ហ៊ុន សែន ត្រូវឈប់រណបចិន និងវៀតណាម ហើយត្រូវពង្រឹង និងរក្សាឯករាជ្យភាពទាំងផ្នែកសេដ្ឋកិច្ច នយោបាយ និងយោធា៖ «បើសិនជាទាំងផ្នែកសេដ្ឋកិច្ច យោធា និងនយោបាយ នៅតែពឹងផ្អែកទៅលើចិនលើយួនទេ កម្ពុជាយើងអត់មានឯករាជ្យភាពទេ។ យើងដឹងហើយថា របប លោកហ៊ុន សែន ពឹងផ្អែកទៅលើចិននិងយួនទាំងផ្នែកសេដ្ឋកិច្ច យោធា។ ផ្នែកបណ្ដុះបណ្ដាលយោធានេះ ក៏មានចិនយួនជាអ្នកបណ្ដាល ហើយផ្ដល់សម្ភារៈយោធាឲ្យទៀត។ នយោបាយ ដូចគ្នាដែរ ។លោក ហ៊ុន សែន យករបបកុម្មុយនិស្តមកអនុវត្តនៅកម្ពុជា ដោយមិនគោរពសិទ្ធិមនុស្សនិងប្រជាធិបតេយ្យ»។
រីឯប្រធានសមាគមសម្ព័ន្ធនិស្សិតបញ្ញវន្តខ្មែរ លោក មួង សូនី ថ្លែងថា ដរាបណាប្រទេសកម្ពុជា នៅតែមានកម្លាំងយោធានិងសេដ្ឋកិច្ចទន់ខ្សោយ និងគ្មានការឯកភាពជាតិ សាមគ្គីជាតិជាធ្លុងមួយទេ គឺមិនអាចមានឯករាជ្យភាព និងអធិបតេយ្យភាពជាតិពេញលេញបានទេ។ លោក មើលឃើញថា បច្ចុប្បន្ននេះ មិនមែនតែប្រទេសមហាអំណាចធំៗនោះទេ សូម្បីតែប្រទេសជិតខាងកម្ពុជា មានវៀតណាមជាដើម ក៏បានទាញកម្ពុជាឲ្យស្ថិតនៅក្រោមឥទ្ធិពលរបស់ពួកគេដែរ៖ «បើសិនយើងអត់មានឯកភាពជាតិគ្នាជាធ្លុងមួយទេ គឺអ្នកនយោបាយយើងចេះតែលម្អៀងទៅរកប្រទេសនេះប្រទេសនោះ ដើម្បីការពារអំណាចរបស់ខ្លួនហ្នឹង វានឹងធ្វើឲ្យប្រទេសយើងបាត់បង់ឯករាជ្យភាពហើយ ព្រោះមិនអាចមានឯករាជ្យភាពបានទេ ព្រោះយើងយកប្រទេសទៅយកអំណាចខ្លួនឯង។ ដើម្បីឲ្យប្រទេសយើងមានឯករាជ្យភាព នោះ លុះត្រាតែកម្ពុជាយើងមានការរីកចម្រើនផ្នែកសេដ្ឋកិច្ច និងយោធា»។
ស្រដៀងគ្នានេះ ប្រធានផ្នែកកម្មវិធីនៃសមាគមបណ្ដាញយុវជនកម្ពុជា (CYN) លោក ស ម៉ូរី ថ្លែងថា ទោះបីជាកម្ពុជា មានរដ្ឋធម្មនុញ្ញ និងកិច្ចព្រមព្រៀងសន្តិភាពទីក្រុងប៉ារីស ដែលធានាអំពីឯករាជ្យភាព អធិបតេយ្យភាពជាតិ និងបូរណភាពទឹកដី ហើយប្រទេសជិតខាង រួមទាំងប្រទេសមហាអំណាចធំៗ ជាប្រទេសហត្ថលេខីនៃកិច្ចព្រមព្រៀងនេះក្តី ក៏លោកសង្កេតឃើញថា ប្រទេសមហាអំណាចិន និងប្រទេសវៀតណាម រួមទាំងរដ្ឋាភិបាលកម្ពុជាខ្លួនឯង នៅមិនទាន់បានគោរព និងអនុវត្តតាមរដ្ឋធម្មនុញ្ញ និងកិច្ចព្រមព្រៀងជាលក្ខណៈអន្តរជាតិនេះនៅឡើយទេ។ លោក ស ម៉ូរី កត់សម្គាល់ថា រយៈពេលចុងក្រោយនេះ មហាអំណាចចិន បានបង្ហាញឥទ្ធិពលកាន់តែខ្លាំងក្នុងនយោបាយកម្ពុជា ដូចជាចិនចេញមុខការពាររដ្ឋាភិបាលកម្ពុជាគ្រប់បែបយ៉ាង ទាំងការបង្ក្រាបលើសំឡេងប្រឆាំង ទាំងការរំលោភសិទ្ធិមនុស្ស ហើយចិនក៏បានក្លាយជាម្ចាស់បំណុលដ៏ធំរបស់កម្ពុជាផងដែរ។ យុវជនរូបនេះ ព្រួយបារម្ភថា ករណីនេះ នឹងធ្វើឲ្យប៉ះពាល់ដល់ឯករាជ្យភាពនិងអធិបតេយ្យភាពជាតិកម្ពុជា៖ «កម្ពុជា ជាប្រទេសតូចប្រជាជនតិចហើយសេដ្ឋនិងយោធាខ្សោយ មិនអាចប្រកួតប្រជែងជាមួយប្រទេសជិតខាង ក៏ដូចជាប្រទេសមហាអំណាចបានទេ។ អ្វីដែលជា អាវក្រោះសម្រាប់ការពារអធិបតេយ្យភាពជាតិ និងបូរណភាពដែនដីកម្ពុជាបាន គឺកម្ពុជាខ្លួនឯង ពង្រឹងការអនុវត្តតាមគោលការណ៍ដែលមានចែងក្នុងរដ្ឋធម្មនុញ្ញ និងជំរុញឲ្យអនុវត្ត តាមស្មារតីកិច្ចព្រមព្រៀងសន្តិភាពទីក្រុងប៉ារីស ឲ្យបានល្អប្រសើរព្រោះប្រទេសជិតខាងរួមទាំងមហាអំណាចជាប្រទេសហត្ថលេខីនៃកិច្ចព្រមព្រៀងទីក្រុងប៉ារីសដែរ ដូច្នេះប្រទេសទាំងនេះ មាន កាតព្វកិច្ចគោរពតាមចំពោះច្បាប់អន្តរជាតិនេះ ហើយចំណុចទី៣ កម្ពុជា គួរតែមានតុល្យភាពក្នុងការទំនាក់ទំនងការបរទេសជាមួយមហាអំណាចទាំងអស់»។
ផ្ទុយពីការយល់ឃើញទាំងនេះ អ្នកនាំពាក្យគណបក្សប្រជាជនកម្ពុជាលោក សុខ ឥសាន ថ្លែងថា កម្ពុជា មានឯកភាពជាតិ និងឯករាជ្យភាពជាតិពេញលេញ ក្រោមម្លប់ដ៏ត្រជាក់របស់ព្រះមហាក្សត្រ ក្រោមដំបូលរដ្ឋធម្មនុញ្ញ ហើយប្រជាពលរដ្ឋភាគច្រើនរស់នៅដោយភាពសំបូរសប្បាយក្រោមការដឹកនាំរបស់លោកនាយករដ្ឋមន្ត្រី ហ៊ុន សែន។ លោកបញ្ជាក់ថា ការរស់នៅនិរទេសខ្លួននៅក្រៅប្រទេសរបស់អ្នកនយោបាយប្រឆាំងមួយចំនួន មិនអាចចាត់ទុកថា ជាការបែកបាក់ឯកភាពជាតិនោះទេ៖ «ចោទប្រកាន់ដោយគ្មានគោលការណ៍ដោយគ្មានមូលដ្ឋានច្បាស់លាស់ទេ។ ពីមុនមកពីទសវត្សរ៍ឆ្នាំ៧០ និងឆ្នាំ៨០ គេចោទថា វៀតណាមយកដីខ្មែរអស់រលីងហើយ ហើយបើយកដីខ្មែរអ៊ីចឹង ខ្មែរ១៦លាននាក់មានដីឯណានៅ? ខ្ញុំជាខ្មែរម្នាក់ដែរផ្ទះនៅភ្នំពេញ ខ្ញុំមានដីណានៅបើភ្នំពេញវៀតណាមយកអស់ហើយ ។ឥឡូវទន្ទឹមនឹងវៀតណាមយកអស់នេះ ចិនមកយក អស់ទៀត ហើយសួរថាមានដីឯណាឲ្យចិននៅបើវៀតណាមយកអស់ហើយ។ យើងគិតតែប៉ុណ្ណឹងដឹងហើយ ដូច្នេះយើងគិតថា នេះគ្រាន់តែជាវោហារសាស្ត្រនយោបាយរបស់ក្រុមប្រឆាំងតែប៉ុណ្ណឹងទេ»។
លោក សុខ ឥសាន ឲ្យដឹងដែរថា ឆ្នាំនេះរដ្ឋាភិបាល នឹងធ្វើពិធីបុណ្យឯករាជ្យជាតិ នៅថ្ងៃទី៩ វិច្ឆិកា នៅវិមានឯករាជ្យដូចរាល់ឆ្នាំដែរ ដែលមានការយាងចូលរួមពីព្រះមហាក្សត្រ មន្ត្រីរដ្ឋាភិបាល និងអ្នកមុខអ្នកការ រួមទាំងប្រជាពលរដ្ឋ និងសិស្សានុសិស្សរាប់រយនាក់ផងដែរ ប៉ុន្តែនឹងមិនមានវត្តមានលោកនាយករដ្ឋមន្ត្រីហ៊ុន សែន នោះទេ ដោយសារលោក កំពុងជាប់រវល់ធ្វើចត្តាឡឺស័ក ដើម្បីបញ្ជាក់ថា តើលោកមានឆ្លងជំងឺកូវីដ១៩ ឬអត់។
ទាក់ទងនឹងទិវាឯករាជ្យជាតិនេះដែរ អ្នកវិភាគនយោបាយជើងចាស់ បណ្ឌិត ឡៅ ម៉ុងហៃ មិនបកស្រាយថា កម្ពុជាបច្ចុប្បន្ននេះ មានឯករាជ្យជាតិពេញលេញឬអត់នោះទេ ប៉ុន្តែលោកចោទសួរថា តើកម្ពុជា នឹងឈានទៅរស់នៅក្រោមរបបការពាររបស់ចិនឬយ៉ាងណា? ។ បណ្ឌិត ឡៅ ម៉ុងហៃ លើកឧទារហណ៍ថា កាលពីមុនខ្មែរបានស្នើសុំឲ្យបារាំងមកជួយការពារពីសៀម និងវៀតណាម ហើយបច្ចុប្បន្ននេះ ចិនបានដាក់ខ្លួនមកជួយការពារ និងអភិវឌ្ឍកម្ពុជា។ លោក សង្កេតឃើញថា តំបន់ឆ្នេរសមុទ្រខ្មែរ កំពុងក្លាយដូចជានៅទឹកដីហុងកុង ឬម៉ាកាវ ក្រោមការគ្រប់គ្រងរបស់ចិនបណ្តើៗហើយ។ លោក បន្តថា នៅតំបន់ឆ្នេរសមុទ្រខ្មែរ ដែលរដ្ឋាភិបាលកម្ពុជា ឲ្យចិនមករកស៊ីនោះ គឺជនជាតិខ្មែរបានក្លាជាជនជាតិភាគតិច ចំណែកនៅតំបន់សម្បទានតារាសាគរ និងបទុមសាគរក្នុងខេត្តកោះកុងនោះ ក៏ក្រុមហ៊ុនចិន បណ្តេញជនជាតិខ្មែរចេញដែរ៕
No comments:
Post a Comment