ដោយ មាន ឫទ្ធិ
2021-08-23
ប្រជាពលរដ្ឋ និងអាជីវករ ៧៤តូប នៅថ្ងៃទី២០ ខែសីហា ឆ្នាំ២០២១ នាំគ្នាលើកបដាតវ៉ាការចាក់ដីលុបសមុទ្រ និងសុំអភិបាលខេត្តកែបឱ្យបកស្រាយពីគម្រោងអភិវឌ្ឍន៍ នៅទល់មុខសាលាខេត្តកែប ចំណុចឆ្នេរជ្រោយដូង ស្ថិតក្នុងភូមិកែប សង្កាត់កែប ខេត្តកែប។
រូប៖ ពលរដ្ឋផ្ដល់ឱ្យ
អាជីវករលក់ដូរនៅតំបន់ឆ្នេរជិត ១រយគ្រួសារ បានលើកគ្នាតវ៉ាជិត ១ខែមកហើយ ដើម្បីទាមទារឱ្យអាជ្ញាធរខេត្តកែបបញ្ឈប់ការចាក់ដីលុបសមុទ្របញ្ចៀសការបំផ្លាញបរិស្ថានឆ្នេរសមុទ្របង្កឱ្យប៉ះពាល់ទីតាំងលក់ដូររបស់ពួកគាត់។
ក្រុមអាជីវករព្រួយបារម្ភថា សកម្មភាពចាក់ដីលុបឆ្នេរសមុទ្រទ្រង់ទ្រាយធំនេះ នឹងប៉ះពាល់ប្រភពចំណូលដ៏សំខាន់របស់ពលរដ្ឋម្ចាស់ស្រុក ហើយអ្នកដែលទទួលប្រយោជន៍ គឺឈ្មួញជនជាតិចិន និងក្រុមអ្នកមានអំណាច។
ពលរដ្ឋរស់នៅក្រុងកែប និងអាជីវករ ៧៤គ្រួសារដែលកំពុងលក់ដូរ នៅតំបន់ឆ្នេរជ្រោយដូងសង្កាត់កែប ក្រុងកែប ឱ្យនៅថ្ងៃទី២៣ សីហាថា ឆ្នេរសមុទ្រ ដែលមានខ្សាច់សក្បុស ដ៏ស្រស់ស្អាត ទាក់ទាញភ្ញៀវទេសចរនៅចំណុចទល់មុខសាលាខេត្តកែប ត្រូវក្រុមអ្នកមានអំណាច ជនជាតិចិន ឃុបឃិតជាមួយអាជ្ញាធរ ចាក់ដីបំពានចូលផ្ទៃទឹក ៩០ម៉ែត្រ និងបណ្ដោយ ៣០០ម៉ែត្រ។ ពួកគាត់សង្កេតថា គម្រោងអភិវឌ្ឍន៍ខ្នាតធំនេះ នៅមិនទាន់ឃើញ អាជ្ញាធរធ្វើអនុបយោគនៅឡើយទេ។
ពលរដ្ឋម្នាក់សុំមិនបញ្ចេញឈ្មោះព្រោះបារម្ភពីសុវត្ថិភាព ជាអ្នកលក់ដូរនៅតំបន់ឆ្នេរជ្រោយដូង ប្រាប់វិទ្យុអាស៊ីសេរី កាលពីថ្ងៃទី២៣ សីហាថា ការចាក់ដីលុបឆ្នេរសមុទ្រកន្លងមកនេះ អាជ្ញាធរខេត្តកែប មិនបានផ្តល់ដំណឹងជូនពួកគាត់នៅឡើយទេ។ លោកស្រីបន្តថា គម្រោងអភិវឌ្ឍនេះ ហាក់បិទបាំងព័ត៌មាន ព្រោះពលរដ្ឋនៅមូលដ្ឋានមិនត្រូវបានអាជ្ញាធរអនុញ្ញាតឱ្យចូលរួមសម្រេចចិត្តលើបញ្ហានេះនៅឡើយទេ៖ «
ស្ត្រីដដែលបន្ថែមថា ពួកគាត់លក់ដូរនៅតំបន់ឆ្នេរនោះជាង ៣០ឆ្នាំមកហើយ ប្រសិនបើអាជ្ញាធរបណ្ដេញចេញ ក្រោមរូបភាពអភិវឌ្ឍន៍នេះ នឹងធ្វើឱ្យប៉ះពាល់ជីវភាព និងមុខរបរពួកគាត់ធ្ងន់ធ្ងរ ព្រោះទីនោះ គឺជាឆ្នាំងបាយរបស់ពួកគាត់៖ «
ចំណែកអាជីវករម្នាក់ទៀតឈ្មោះ ថេង ស្រីពៅ ឱ្យដឹងយ៉ាងខ្លីថា គម្រោងអភិវឌ្ឍន៍នេះ អាជ្ញាធរប្រាប់ពួកគាត់ថា នឹងមិនរុះរើតូបលក់ដូរ ពួកគាត់នោះទេ៖ «
វិទ្យុអាស៊ីសេរីមិនទាន់សុំការបកស្រាយលម្អិតជុំវិញរឿងនេះពីអភិបាលខេត្តកែប លោក សោម ពិសិដ្ឋ និងអ្នកនាំពាក្យក្រសួងបរិស្ថានលោក នេត្រ ភក្ត្រា បាននៅឡើយ ព្រោះទូរស័ព្ទហៅចូលតែគ្មានអ្នកទទួល នៅថ្ងៃទី២២ និង ២៣ សីហា។
ប៉ុន្តែអភិបាលខេត្តកែប លោក សោម ពិសិដ្ឋ បានចុះជួបតំណាងអាជីវកម្ម ៦នាក់ កាលពីថ្ងៃទី២០ សីហា ដើម្បីបង្ហាញផែនការវិនិយោគ និងដោះស្រាយបញ្ហាប្រឈមនានា។ អភិបាលខេត្តរូបនេះ បានថ្លែងប្រាប់ក្រុមអាជីវកម្មនៅចំពោះមុខថា គម្រោងអភិវឌ្ឍន៍នេះ គឺអាជ្ញាធរនឹងមិនរុះរើតូបលក់ដូររបស់អាជីវករ ៧៤តូបនោះទេ។
តំបន់ឆ្នេរជ្រោយដូងទល់មុខសាលាខេត្តកែប ជាទីតាំងមាត់ឆ្នេរដ៏មានសក្ដានុពលវិស័យទេសចរណ៍ ទេសភាពស្រស់ត្រកាល មានដើមដូងទ្រេតជាជួរ ទាក់ទាញអារម្មណ៍ភ្ញៀវទេសចរជាតិ និងអន្តរជាតិ មុជទឹកលំហែកាយ។ អ្នកភូមិព្រួយចិត្តថា ឆ្នេរសមុទ្រដ៏ស្អាតទាំងនេះនឹងបាត់រូបរាងនៅថ្ងៃអនាគត។
អ្នកភូមិថា ថ្មភ្នំ និងដីក្រហម ដែលគេចាក់លុបឆ្នេរសមុទ្រនេះ កាយចេញពីចង្កេះភ្នំនៅតំបន់ឧទ្យានជាតិអភិរក្សក្រុងកែប និងតំបន់ភ្នំវល្លិ ដែលជារមណីយដ្ឋាន ធនធានព្រៃឈើដ៏ល្បីល្បាញ ក៏កំពុងប្រឈមការគំរាមកំហែង បាត់រូបរាង ក្រោមរូបភាពអភិវឌ្ឍន៍ឆ្នេរនេះដែរ ។
ក្រុមយុវជនដែលតាមដានរឿងនេះ មានមន្ទិលច្រើន ចំពោះការចាក់លុបឆ្នេរសមុទ្រ ខណៈអាជ្ញាធរនៅព្យាយាមលាក់បាំងព័ត៌មាន។ ពួកគេសង្កេតឃើញថា អាជ្ញាធរនៅមិនទាន់បង្ហាញ របាយការណ៍វាយតម្លៃផលប៉ះពាល់បរិស្ថាន (EIA) ជាសាធារណៈនៅឡើយទេ។ លើសពីនេះ នៅថ្ងៃខាងមុខ តំបន់នោះអាចនឹងក្លាយជាតំបន់អគារវិនិយោគរបស់ក្រុមហ៊ុនឯកជន និងក្រុមហ៊ុនចិន។
សមាជិកបណ្ដាញយុវជនកម្ពុជា (CYN) លោក ម៉ា ចិត្រា ថ្លែងថា អាជ្ញាធរខេត្តកែប គួរតែគិតពីផលប៉ះពាល់ដល់ជីវភាពប្រជាសហគមន៍មូលដ្ឋានជាអាទិភាព មុននឹងសម្រេចចិត្តអភិវឌ្ឍន៍តំបន់ឆ្នេរសមុទ្រ ព្រោះគម្រោងនេះ ចាំបាច់ត្រូវមានការចូលរួមពីពលរដ្ឋ និងអ្នកពាក់ព័ន្ធ ធ្វើយ៉ាងណាឱ្យមានតម្លាភាព និងគណនីភាព៖ «
រដ្ឋបាលខេត្តកែបបានបង្ហោះសារ តាមបណ្ដាញសង្គមហ្វេសប៊ុកផ្លូវការរបស់ខ្លួន កាលពី ២៧ កក្កដា កន្លងទៅថា គម្រោងពង្រីកឆ្នេរនេះ មានគោលបំណងពង្រីកតំបន់កម្សាន្ត ពង្រីកសក្ដានុពល សម្រាប់ទាក់ទាញភ្ញៀវទេសចរមកលេងកម្សាន្តឱ្យកាន់តែច្រើនជាងមុន។ អាជ្ញាធរថា ការអភិវឌ្ឍនេះ ពុំបានធ្វើការរុះរើតូបលក់ដូររបស់អាជីវករ ដែលប្រកបអាជីវកម្មនៅតំបន់នេះឡើយ។ លើសពីនេះអាជ្ញាធរខេត្តកែប ព្រមានថា នឹងចាត់ការការរិះគន់ទាំងឡាយពីសំណាក់ប្រជាពលរដ្ឋ និងអ្នកកាសែតថា ជាការ ដែលបង្កឱ្យមានភាពរាំងស្ទះក្នុងដំណើរការអភិវឌ្ឍន៍នេះ។
កាលពីថ្ងៃទី២១ សីហា អភិបាលខេត្តកែប លោក សោម ពិសិដ្ឋ និងរដ្ឋលេខាធិការទីស្ដីការគណៈរដ្ឋមន្ត្រី លោក ដួង តារា បានបកស្រាយប្រាប់តំណាងអាជីវករនៅចំពោះមុខថា អាជីវករទាំងអស់បានឯកភាព ជាមួយអាជ្ញាធរមូលដ្ឋាន ក្នុងគម្រោងរៀបចំខឿនពង្រីកច្រាំងសមុទ្រនេះហើយ។ ប៉ុន្តែក្រោយមក ប្រជាពលរដ្ឋប្រតិកម្មភ្លាមៗ ដោយពួកគាត់អះអាងថា ការលើកឡើងនេះជារឿងមិនពិត ព្រោះពួកគាត់មិនបានព្រមព្រៀងជាមួយអាជ្ញាធរមូលដ្ឋានថា អាជីវករនឹងរុះរើកន្លែងប្រកបអាជីវកម្មដោយគ្មានការតវ៉ា ប្រសិនបើមានគម្រោងអភិវឌ្ឍជាបន្តបន្ទាប់ទៅថ្ងៃខាងមុខនោះទេ ។
ជុំវិញរឿងនេះ អ្នកសម្របសម្រួលសមាគមអាដហុដ (ADHOC) ប្រចាំខេត្តកែប លោក យន់ ផល្លី យល់ថា អាជ្ញាធរមូលដ្ឋាន និងមន្ទីរពាក់ព័ន្ធ ខ្វះការផ្សព្វផ្សាយព័ត៌មានពីគម្រោងអភិវឌ្ឍឱ្យទូលំទូលាយជាសាធារណៈ ទើបប្រជាពលរដ្ឋមានមន្ទិល តែងតែលើកគ្នាតវ៉ាជាបន្តបន្ទាប់។ លោកបន្តថា អាជ្ញាធរមូលដ្ឋានគួរតែជួបពិភាក្សាជាមួយប្រជាពលរដ្ឋ ពន្យល់ពីគម្រោងអភិវឌ្ឍន៍ឱ្យបានល្អិតល្អន់ ជៀសវាងធ្វើឱ្យពួកគាត់មានការព្រួយបារម្ភ៖ «
ប្រជាពលរដ្ឋប្រកាន់គោលជំហរថា ប្រសិនបើអាជ្ញាធរនៅតែបន្តចាក់ដីលុបឆ្នេរ ដោយគ្មានការបកស្រាយលម្អិត ពួកគាត់នៅតែបន្តស្រែកទាមទាររកដំណោះស្រាយ លាតត្រដាងរឿងអយុត្តិធម៌គ្មានទីបញ្ចប់។ ពួកគាត់ចាត់ទុកទីតាំងតំបន់ឆ្នេរជ្រោយដូងជាអាយុជីវិតរបស់ពួកគាត់ ព្រោះជាង ៣ទសវត្សរ៍មកហើយ។
ទន្ទឹមគ្នានេះ ប្រជាពលរដ្ឋ និងក្រុមអ្នកការពារបរិស្ថានព្រួយបារម្ភថា ទៅថ្ងៃអនាគតទីក្រុងកែប នឹងអាចប្រែក្លាយដូចជាទីក្រុងកំពង់សោម ស្របពេលដែល អ្នកវិនិយោគិនចិនស្នើសុំការវិនិយោគនៅខេត្តនេះជាបន្តបន្ទាប់។ លើសពីនេះ ពួកគេស្ដាយស្រណោះធនធានព្រៃ និងដីតំបន់ភ្នំឧទ្យានជាតិ ភ្នំកែប និងភ្នំវល្លិ ត្រូវគេបំផ្លិចបំផ្លាញធ្វើអាជីវកម្ម ដើម្បីយកថ្ម និងអាចម៍ដីលក់ឱ្យក្រុមហ៊ុនឯកជនក្រោមហេតុផលអភិវឌ្ឍន៍៕
3 comments:
Ah Yuon's slave Hun Sen needs to destroy everything that Cambodia has before he goes to hell.
Why not send Hun Sen to Hell before he destroy Cambodia? The future depends on it.
To send Ah Norouk Hun Sen to hell before he destroys Cambodia completely, we need some brave Khmer people who are willing to sacrifice their lives for Cambodia to mount a mass peaceful protest demanding for the Rong Chhun's release and the CNRP's reinstatement.
Start from these 2 issues and let their outcome unfold naturally. Unlike Myanmar, Cambodia had the 1991 Paris Peace Accord. We have to wake it up.
Post a Comment