ដោយ មាន ឫទ្ធិ
2021-08-01 rfa
មេដឹកនាំគណបក្សកាន់អំណាច និងបក្សប្រឆាំង។
RFA/Tin Zakariya
អ្នកវិភាគនយោបាយ និងមន្ត្រីសង្គមស៊ីវិលមើលឃើញថា គណបក្សប្រជាជនកម្ពុជា កំពុងទទួលបានផលចំណេញផ្នែកនយោបាយពីការបង្កើតបក្សថ្មីជាបន្តបន្ទាប់របស់អតីតមន្ត្រីគណបក្សសង្គ្រោះជាតិ។ តំណាងគណបក្សប្រជាជនកម្ពុជា ចាត់ទុកថា នេះជាការលាបពណ៌ ប៉ុន្តែទទួលស្គាល់ថា គណបក្សនេះមិនចង់ឱ្យបក្សដទៃទៀតរឹងមាំឡើយ។
ការបង្កើតគណបក្សថ្មីជាច្រើនពីសំណាក់អតីតមន្ត្រីជាន់ខ្ពស់បក្សសង្គ្រោះជាតិនោះ ហាក់កំពុងតែជួយដល់គណបក្សប្រជាជនកម្ពុជារបស់លោក ហ៊ុន សែន ឱ្យបន្តក្តោបក្តាប់អំណាចតទៅមុខទៀត។
សាស្ត្រាចារ្យខាងវិទ្យាសាស្ត្រនយោបាយ លោក ឯម សុវណ្ណារ៉ា មានប្រសាសន៍ថា ចរន្តបើកបក្សថ្មីនេះបង្ហាញពីការបែកបាក់ផ្ទៃក្នុង និងអាចបន្ថយឥទ្ធិពលគណបក្សសង្គ្រោះជាតិ។ លោកបន្តថា ការសុំសិទ្ធិធ្វើនយោបាយ និងបង្កើតបក្សថ្មីបែបនេះ ក៏មានន័យថា អតីតមន្ត្រីបក្សប្រឆាំងទាំងនោះទទួលស្គាល់សាលដីការំលាយបក្សសង្គ្រោះជាតិដែរ។ លោកសង្កត់ធ្ងន់ថា ការបែកបាក់គ្នារបស់បក្សប្រឆាំង គឺជាកត្តាជោគជ័យរបស់គណបក្សកាន់អំណាច៖ «បើគណបក្សសង្គ្រោះជាតិនៅតែប្រឈមនឹងការបែកបាក់គ្នា វាជួយកម្លាំងចលករឱ្យគណបក្សកាន់អំណាចលែងមានក្តីបារម្ភ លែងមានការភ័យព្រួយអំពីប្រជាប្រិយភាពរបស់គណបក្សប្រឆាំងក្នុងការដណ្តើមយកអំណាចរបស់ខ្លួននៅថ្ងៃអនាគត»។
ស្រដៀងគ្នានេះ អគ្គលេខាធិការសហព័ន្ធនិស្សិតបញ្ញវន្តកម្ពុជា លោក គៀន ពន្លក មើលឃើញថា ការបង្កើតបក្សថ្មីជាច្រើនពីសំណាក់អតីតមន្ត្រីបក្សសង្គ្រោះជាតិនេះ គឺជាការដើរចូលស៊ងនយោបាយរបស់បក្សកាន់អំណាច។ លោកជឿថា គណបក្សកាន់អំណាចនឹងមានលេសប្រាប់ទៅសហគមន៍ជាតិ និងអន្តរជាតិថា កម្ពុជាមានលទ្ធិប្រជាធិបតេយ្យ ពីព្រោះមានគណបក្សចូលរួមប្រកួតប្រជែងច្រើននៅក្នុងការបោះឆ្នោត៖ «ការដែលបង្កើតគណបក្សនយោបាយថ្មីនេះ ខ្ញុំគិតថា គឺជារឿងផលប្រយោជន៍ឯកជនច្រើនជាងផលប្រយោជន៍រួម ហើយជាការដើរចូលក្នុងអន្ទាក់នយោបាយនៃការបំបែកគណបក្សសង្គ្រោះជាតិ។ មួយទៀត គឺជាការបំភ័ន្តភ្នែកទៅដល់អន្តរជាតិថា ប្រទេសកម្ពុជាមានបក្សច្រើនក្នុងការបោះឆ្នោត តែធាតុពិតគឺជាការលម្អសួនប្រជាធិបតេយ្យទេ»។
ក្រុមអ្នកតាមដានស្ថានការណ៍នយោបាយវាយតម្លៃបែបនេះ បន្ទាប់ពីអតីតមន្ត្រីគណបក្សសង្គ្រោះជាតិបានស្នើសុំសិទ្ធិធ្វើនយោបាយ និងបង្កើតគណបក្សថ្មីជាបន្តបន្ទាប់។ គិតត្រឹមដើមខែសីហានេះ មានគណបក្សនយោបាយចំនួន ៦ត្រូវបានបង្កើតឡើងដោយអតីតមន្ត្រីជាន់ខ្ពស់គណបក្សសង្គ្រោះជាតិដែលបានសុំសិទ្ធិនយោបាយពីលោក ហ៊ុន សែន។
គណបក្សទាំង ៦នោះ រួមមាន «គណបក្សឆន្ទៈខ្មែរ»របស់ក្រុមលោក គង់ គាំ «គណបក្សខ្មែរស្រឡាញ់ជាតិ»របស់ក្រុមលោក ជីវ កត្តា «គណបក្សខ្មែរអភិរក្សនិយម»របស់ក្រុមលោក រៀល ខេមរិន្ទ្រ «គណបក្សកែទម្រង់កម្ពុជា» របស់ក្រុមលោក ប៉ុល ហំ និងលោក អ៊ូ ច័ន្ទរ័ត្ន «គណបក្សបេះដូងជាតិ»របស់ក្រុមលោក សៀម ភ្លុក និងចុងក្រោយគឺ«គណបក្សកម្ពុជានិយម» របស់ក្រុមលោក យ៉ែម បុញ្ញឫទ្ធិ។ គណបក្សទាំង ៦នេះ មានខ្លះបានបំពេញលក្ខខណ្ឌគ្រប់គ្រាន់នៅក្រសួងមហាផ្ទៃរួចហើយ និងខ្លះទៀតកំពុងដំណើរការនីតិវិធីដើម្បីក្លាយជាបក្សនយោបាយពេញលេញ។
ស្ថាបនិកគណបក្សកម្ពុជានិយម និងជាអតីតមន្ត្រីជាន់ខ្ពស់ដ៏សំខាន់មួយរូបនៃគណបក្សសង្គ្រោះជាតិ គឺលោក យ៉ែម បុញ្ញឫទ្ធិ បានបកស្រាយថា មូលហេតុដែលលោកបង្កើតបក្សថ្មីនេះ គឺដើម្បីរួមចំណែកស្តារប្រជាធិបតេយ្យនៅកម្ពុជាឡើងវិញ។ លោកបញ្ជាក់ថា ការបង្កើតបក្សថ្មីដើម្បីប្រជែងការបោះឆ្នោត គឺជាទស្សនវិស័យវែងឆ្ងាយ៖ «អ្វីៗសុទ្ធតែមានចំណុចចាប់ផ្តើម។ ការរៀបចំចងក្រងសកម្មជនដែលចូលរួមតស៊ូជាយូរលង់មកហើយ ព្រោះលោកស្រឡាញ់ប្រជាធិបតេយ្យ សេរីភាព ចង់ឱ្យមានយុត្តិធម៌សង្គម ចង់ឱ្យមានការគោរពសិទ្ធិមនុស្សនៅតាមមូលដ្ឋាន ត្រូវការចងក្រងកម្លាំង ហើយចាប់ផ្តើមបន្តដំណើរទៅមុខទៀត។ យើងមិនត្រូវទុកលំហប្រជាធិបតេយ្យមូលដ្ឋានចោលទទេអ៊ីចឹងនោះទេ»។
ទោះជាយ៉ាងណាក៏ដោយ ក្រុមអ្នកសង្កេតការណ៍ជឿជាក់ថា គណបក្សថ្មីៗដែលបានបង្កើតឡើងទាំងនេះនឹងមិនទទួលបានការគាំទ្រពីពលរដ្ឋនោះទេ ប្រសិនបើគ្មានការប្រកាសគាំទ្រពីប្រមុខដឹកនាំបក្សសង្គ្រោះជាតិទាំងពីររូប គឺលោក សម រង្ស៊ី និងលោក កឹម សុខា។ ជាមួយគ្នានេះ ពលរដ្ឋ និងសកម្មជនបក្សប្រឆាំងមួយចំនួន អាចនឹងថ្កោលទោសការបង្កើតបក្សថ្មីនេះថា ជាការជាន់ឈ្លីឆន្ទៈ និងការលះបង់របស់ពួកគាត់ថែមទៀត។
ប៉ុន្តែការបង្កើតបក្សថ្មីជាបន្តបន្ទាប់ដោយក្រុមមន្ត្រីជាន់ខ្ពស់បក្សសង្គ្រោះជាតិនេះ ទទួលបានការសាទរពីគណបក្សកាន់អំណាច។
មន្ត្រីជាន់ខ្ពស់ និងជាអ្នកនាំពាក្យគណបក្សប្រជាជនកម្ពុជា លោក សុខ ឥសាន ថ្លែងថា ការបង្កើតបក្សថ្មីកាន់តែច្រើននេះបង្ហាញថា កម្ពុជាមានលំហនយោបាយពេញលេញ។ ចំពោះមតិដែលថាការបើកបក្សថ្មីនេះជាការជួយដល់បក្សកាន់អំណាចនោះ លោក សុខ ឥសាន ចាត់ទុកថា នេះជាការលាបពណ៌។ ប៉ុន្តែក្នុងពេលជាមួយគ្នា លោកអះអាងថា គណបក្សប្រជាជនកម្ពុជាមិនចង់ឱ្យគណបក្សដទៃទៀតរឹងមាំនោះទេ៖ «វាជារឿងធម្មតាដែលគណបក្សប្រកួតប្រជែងនៅក្នុងសង្គមប្រជាធិបតេយ្យសេរី គ្មានគណបក្សណាមួយចង់ឱ្យដៃគូរបស់ខ្លួនខ្លាំងនោះទេ»។
ទំនងជាដោយសារហេតុផលនេះហើយ ទើបរបបក្រុងភ្នំពេញចាប់ផ្តើមរឹតត្បិតការសុំសិទ្ធិធ្វើនយោបាយ របស់មន្ត្រីគណបក្សប្រឆាំងមួយចំនួន។
លោកនាយករដ្ឋមន្ត្រី ហ៊ុន សែន ប្រកាសនៅថ្ងៃទី១ សីហាថា មន្ត្រីបក្សប្រឆាំងរូបណាដែលធ្វើឱ្យលោកទាស់ចិត្ត លោកនឹងមិនផ្តល់សិទ្ធិនយោបាយឱ្យពួកគេវិញនោះទេ ទោះបីជាមានសំណើពីរដ្ឋមន្ត្រីក្រសួងមហាផ្ទៃក៏ដោយ៖ «ទោះបីរដ្ឋមន្ត្រីមហាផ្ទៃថាអាហ្នឹងមិនដែលប្រព្រឹត្តខុស ប៉ុន្តែយើងព្យាករណ៍ដឹងថា អាហ្នឹងមុខតែមកដើម្បីបំផ្លាញហើយ មិនឱ្យសិទ្ធិហ្អែងទេ។ បើខ្ញុំមិនចុះហត្ថលេខាស្នើទៅព្រះមហាក្សត្រ ព្រះមហាក្សត្រក៏ទ្រង់មិនឡាយព្រះហស្ថលេខាឱ្យសិទ្ធិអ្នកឯងដែរ»។
មន្ត្រីជាន់ខ្ពស់បក្សសង្គ្រោះជាតិពីររូបដែលលោក ហ៊ុន សែន មិនយល់ព្រមផ្តល់សិទ្ធិនយោបាយតាមការស្នើសុំនោះ គឺលោកមេធាវី ជូង ជូងី និងលោក ញឹម គឹមញ៉ុល។ លោកទាំងពីរជាសមាជិកគណៈកម្មាធិការនាយកនៃគណបក្សសង្គ្រោះជាតិ កូតាខាងលោក សម រង្ស៊ី។
អ្នកជំនាញខាងវិទ្យាសាស្ត្រនយោបាយ លោក ឯម សុវណ្ណារ៉ា យល់ថា ការមិនផ្តល់សិទ្ធិនយោបាយដល់មន្ត្រីបក្សប្រឆាំងនេះ អាចមកពីមេបក្សកាន់អំណាចព្រួយបារម្ភពីការចងសម្ពន្ធភាពគ្នាឡើងវិញនៃក្រុមមន្ត្រី និងគណបក្សនយោបាយថ្មីដែលបែកចេញពីគណបក្សសង្គ្រោះជាតិ។
ជុំវិញការបង្កើតបក្សថ្មីជាបន្តបន្ទាប់នេះ អនុប្រធានគណបក្សសង្គ្រោះជាតិ លោក អេង ឆៃអ៊ាង មានប្រសាសន៍ថា នេះជាសិទ្ធិរបស់បុគ្គល។ លោកថា បញ្ហានេះនឹងមិនប៉ះពាល់ដល់ប្រជាប្រិយភាពរបស់គណបក្សសង្គ្រោះជាតិនោះទេ។ លោកបញ្ជាក់ថា គណបក្សសង្គ្រោះជាតិនៅតែតស៊ូតទៅមុខទៀត ទាំងមធ្យោបាយការទូត និងសកម្មភាពនៅក្នុងប្រទេស ដើម្បីស្តារលទ្ធិប្រជាធិបតេយ្យនៅកម្ពុជាឡើងវិញ៖ «បើយើង(បក្សថ្មី)ថា យើងចង់បន្ត យើងចង់ពង្រឹងប្រជាធិបតេយ្យ យើងត្រូវមានសេចក្តីក្លាហាន ហ៊ានតស៊ូមតិ ហ៊ានតតាំងជាមួយនឹងអំណាចផ្ដាច់ការទៅ។ អាហ្នឹងក្រែងសង្ឃឹមថា ប្រជាពលរដ្ឋយល់ខ្លះ ប៉ុន្តែបើយើងទៅធ្វើអ្វីដោយស្ងៀមស្ងាត់ គ្រាន់តែលម្អលោក ហ៊ុន សែន រង្វាន់ពីប្រជាពលរដ្ឋគឺការថ្កោលទោសហ្នឹងឯង»។
លោក អេង ឆៃអ៊ាង គូសបញ្ជាក់ទៀតថា គេមិនអាចយកគណបក្សសង្គ្រោះជាតិទៅប្រៀបធៀបនឹងគណបក្សហ៊្វុនស៊ិនប៉ិច (FUNCINPEC) ដែលបាត់បង់ការគាំទ្រពីពលរដ្ឋនោះបានទេ ពីព្រោះតែជំហរនយោបាយខុសគ្នា។ លោកពន្យល់ថា ថ្នាក់ដឹកនាំគណបក្សសង្គ្រោះជាតិមានជំហរនយោបាយរឹងមាំ និងការប្តេជ្ញាចិត្តខ្ពស់ក្នុងការការពារឆន្ទៈរបស់ពលរដ្ឋ ដូច្នេះពលរដ្ឋនៅតែជឿជាក់លើគណបក្សនេះ ទោះជាមានមន្ត្រីខ្លះចេញទៅបង្កើតបក្សនយោបាយថ្មីក៏ដោយ។
ក្រុមអ្នកតាមដានស្ថានការណ៍នយោបាយក៏ឯកភាពនឹងចំណុចនេះដែរ ព្រោះតម្លៃនយោបាយរបស់ថ្នាក់ដឹកនាំកំពូលនៃគណបក្សសង្គ្រោះជាតិមិនទាន់បាត់បង់ទៅណាឡើយ ជាពិសេសស្មារតីសង្គ្រោះជាតិនៅតែដក់ជាប់ក្នុងចិត្តពលរដ្ឋភាគច្រើន ដែលចង់បានការផ្លាស់ប្តូរនៅកម្ពុជា។
ក្រុមអ្នកតាមដានស្ថានការណ៍ជឿជាក់ថា ស្មារតីគាំទ្រសង្គ្រោះជាតិអាចនឹងលេចឡើងគ្រប់ពេល ប្រសិនបើលោក សម រង្ស៊ី និងលោក កឹម សុខា មិនបែកបាក់គ្នា ហើយមានឱកាសពេញលេញចូលប្រឡូកក្នុងឆាកនយោបាយឡើងវិញ។ ប៉ុន្តែជាមួយគ្នានេះ ពួកគេបញ្ជាក់ថា ថ្នាក់ដឹកនាំបក្សប្រឆាំងទាំងពីររូប ក៏ត្រូវពង្រឹងសាមគ្គីផ្ទៃក្នុងបក្ស និងបង្កើនសកម្មភាពឱ្យបានខ្លាំងក្លាផងដែរ ជាពិសេសការស្វះស្វែងរកកិច្ចអន្តរាគមន៍ពីសហគមន៍អន្តរជាតិដើម្បីដោះស្រាយវិបត្តិនយោបាយ និងស្តារលទ្ធិប្រជាធិបតេយ្យនៅកម្ពុជាឡើងវិញ៕
1 comment:
The good thing is that Khmer people are not stupid to follow those assholes who just created the new party.
Ah Yem Torl Panha Rith, Ah Son Chhay, Ah Cannibal Ou Chan Roth, etc must be hanged for their act of treason.
Post a Comment