ដោយ ជី វិតា
2021-08-09 rfa
រូប៖ ពលរដ្ឋផ្ដល់ឱ្យ
វិវាទដីធ្លីនៅព្រះលានយន្តហោះថ្មី នៅក្នុងស្រុកកណ្ដាលស្ទឹង ខេត្តកណ្ដាល ឈានដល់ប្រើអំពើហិង្សាដាក់គ្នាមួយប្រាវ រវាងក្រុមសន្តិសុខក្រុមហ៊ុន OCIC និងប្រជាពលរដ្ឋ នៅទីតាំងដីមានជម្លោះ ដោយបង្កឲ្យភាគីទាំងសងខាងរងរបួសស្រាលរៀងៗ ខ្លួន។ មន្ត្រីសង្គមស៊ីវិលស្នើដល់អាជ្ញាធរ និងក្រសួងពាក់ព័ន្ធពន្លឿនដំណោះស្រាយសមរម្យជូនពលរដ្ឋ ដែលរងផលប៉ះពាល់ពីការអភិវឌ្ឍន៍ ដើម្បីបញ្ចប់ជម្លោះដីធ្លីដ៏រ៉ារ៉ៃមួយនេះ។
អំពើហិង្សានេះ គឺផ្ដើមចេញពីខាងក្រុមហ៊ុនប្រើគ្រឿងចក្រទៅឈូសឆាយព្រែក និងដីស្រែអ្នកភូមិ នៅត្រង់ចំណុចលូមុខ៤ ក្នុងភូមិកំពង់តាឡុង ឃុំបឹងខ្យាង ខណៈដែលបញ្ហានេះ អាជ្ញាធរនៅមិនទាន់ដោះស្រាយចប់សព្វគ្រប់នៅឡើយ។
ពលរដ្ឋម្នាក់ដែលបាត់បង់ដីស្រែក្នុងវិវាទនេះ លោក ឃៀង សុខមាន ប្រាប់វិទ្យុអាស៊ីសេរី នៅថ្ងៃទី៩ សីហាថា ប្រជាពលរដ្ឋនាំគ្នាទៅហាមឃាត់ក្រុមសន្តិសុខមានគ្នាជាង ៣០នាក់ កុំឲ្យប្រើគ្រឿងចក្រឈូសឆាយដីស្រែពួកគាត់ តែពួកគេមិនព្រមបញ្ឈប់សកម្មភាព រហូតដល់ប៉ះពាក្យសំដី និងបង្កជាហិង្សាដាក់គ្នាទៅវិញទៅមក។
លោកបញ្ជាក់ថា ប្រជាពលរដ្ឋមិនជំទាស់នឹងការអភិវឌ្ឍន៍របស់ក្រុមហ៊ុនទេ ប៉ុន្តែស្នើឲ្យអាជ្ញាធរ និងក្រុមហ៊ុនគិតគូរផ្ដល់សំណងដីធ្លីសមរម្យឲ្យពលរដ្ឋជាមុនសិន មុននឹងបន្តការសាងសង់ ឬឈូសឆាយដីស្រែរបស់ពួកគាត់៖ «ប្រជាពលរដ្ឋគាត់អត់បានអ្វីទេ ចង់បានតែតម្លៃទីផ្សារមួយឲ្យគាត់សមរម្យមក។ ហើយទី២ សុំពន្លឿនការដោះស្រាយ និងទី៣ បើមិនទាន់មានការដោះស្រាយ សុំឲ្យមានការឈូសឆាយទៅលើដីរបស់ពួកគាត់។ មាន៣ចំណុចហ្នឹង ដែលចង់ឲ្យអាជ្ញាធរ ក៏ដូចជាថ្នាក់លើហ្នឹង ជួយគិតគូរត្រង់ចំណុចហ្នឹង។ អ្វីដែលជាការសំណូមពររបស់ប្រជាពលរដ្ឋ » ។
វិទ្យុអាស៊ីសេរីព្យាយាមសុំការឆ្លើយតបរឿងនេះ ពីតំណាងក្រុមហ៊ុន អូ.ស៊ី.អាយ.ស៊ី (OCIC) លោក ជូ កុកសាយ ប៉ុន្តែលោកប្រាប់ថា ជាប់រវល់ប្រជុំ មិនអាចនិយាយបានទេ។
វិទ្យុអាស៊ីសេរី មិនអាចសុំការបំភ្លឺរឿងនេះ ពីអធិការនគរបាលស្រុក កណ្ដាលស្ទឹង លោក ឡេង សុខរុន និងអភិបាលស្រុកកណ្ដាលស្ទឹង លោក អ៊ូច សៅវឿន បានទេ ដោយហៅទូរស័ព្ទចូល តែពុំមានអ្នកទទួល។
ចំណែកអភិបាលខេត្តកណ្ដាល លោក គង់ សោភ័ណ្ឌ មិនអាចធ្វើអត្ថាធិប្បាយរឿងនេះ បានទេ ដោយលោកអះអាងថា មិនទាន់ក្ដាប់រឿងនេះ ច្បាស់នៅឡើយ។
ទាក់ទងនឹងរឿងនេះ អ្នកសម្របសម្រួលគម្រោងធុរកិច្ច និងសិទ្ធិមនុស្សនៃមជ្ឈមណ្ឌលសិទ្ធិមនុស្សកម្ពុជា លោក វណ្ណ សូផាត មានប្រសាសន៍ថា អាជ្ញាធរមិនគួរបណ្ដែតបណ្ដោយឲ្យបញ្ហាដីធ្លីដ៏រ៉ាំរ៉ៃជាងច្រើនឆ្នាំមកនេះ នៅទ្រឹង ហើយបង្កទៅអំពើហិង្សាបែបនេះឡើយ។លោក យល់ថា ភាគីក្រុមហ៊ុន និងអាជ្ញាធរខេត្ត គួរពន្លឿនដំណោះស្រាយជូនពលរដ្ឋនូវតម្លៃដីធ្លីណាមួយដែលភាគីទាំងសងខាងព្រមព្រៀងគ្នា ដើម្បីបញ្ចប់ជម្លោះ ដោយផ្អែកតាមច្បាប់រដ្ឋដែលមានស្រាប់។
លោកស្នើសុំកុំឲ្យមានប្រើប្រព័ន្ធតុលាការដាក់គំនាបបំបាក់ស្មារតីមកលើពលរដ្ឋដែលធ្វើឲ្យបញ្ហានេះមិនអាចបញ្ចប់បានទេ៖ «មេរៀនដែលយើងធ្លាប់ជួបកន្លងមក នៅពេលណាដែលមិនមានដោះស្រាយ គឺតែងតែជួបអំពើហិង្សាអ៊ីចឹងហើយ។ សួរថាបន្ទោសប្រជាពលរដ្ឋ បន្ទោសមិនបានទេ។ គាត់គ្រាន់តែប្រើប្រាស់សិទ្ធិក្នុងការទាមទារឲ្យមានការដោះស្រាយ ព្រោះហ្នឹងជាទ្រព្យសម្បត្តិរបស់គាត់ ជាទ្រព្យឯកជនរបស់គាត់ ព្រោះកាលដែលរដ្ឋដោះស្រាយមិនបានសមស្របទៅហ្នឹងសំណងសមរម្យ ឬក៏ដោះដូរដីសមរម្យដែលគាត់មិនអាចទទួលយកបាន ធ្វើម៉េចគាត់នឹងព្រម។ វាតែងតែមានការប៉ះទង្គិចហើយ។ ប៉ុន្តែយើងបារម្ភថា នឹងមានការចោទប្រកាន់តាមផ្លូវតុលាការទៀត ចំពោះប្រជាពលរដ្ឋ ក្នុងការប៉ះទង្គិចគ្នានេះ»។
ជម្លោះដីធ្លីរវាងក្រុមហ៊ុន អូ.ស៊ី.អាយ.ស៊ី (OCIC) របស់ឧកញ៉ា ពុង ឃាវសែ ជាមួយនឹងប្រជាពលរដ្ឋសរុប ៣៣០រយគ្រួសារ នៅស្រុកកណ្ដាលស្ទឹង ខេត្តកណ្ដាល អូសបន្លាយជាង ៣ឆ្នាំមកហើយ ដោយពលរដ្ឋមិនព្រមទទួលយកសំណងដែលអាជ្ញាធរផ្ដល់ឲ្យចន្លោះពី ៣ដុល្លារទៅ ៨ដុល្លារ ក្នុងដី ១ម៉ែត្រការ៉េ។
ក្រុមហ៊ុនសាជីវកម្មវិនិយោគក្រៅប្រទេសកម្ពុជា ហៅកាត់អូ.ស៊ី.អាយ.ស៊ី (OCIC) របស់ លោក ពុង ឃាវសែ ដែលជាអ្នកជំនួញស្និទ្ធនឹងលោកនាយករដ្ឋមន្ត្រី ហ៊ុន សែន ទទួលបានសិទ្ធិសាងសង់ព្រះលានយន្តហោះខ្នាតអន្តរជាតិមួយនៅទីនោះ។ តាមគម្រោង ក្រុមហ៊ុននឹងសាងសង់រួចរាល់នៅ ឆ្នាំ២០២៣។ ព្រះលានយន្តហោះថ្មីនេះ វិនិយោគក្នុងទឹកប្រាក់ប្រមាណ ១.៥០០លានដុល្លារ លើផ្ទៃដី ២.៦០០ហិកតារ។
ប្រជាពលរដ្ឋដែលរងផលប៉ះពាល់ពីគម្រោងនេះ ស្នើសុំលោកនាយករដ្ឋមន្ត្រី ហ៊ុន សែន ដោះស្រាយបញ្ចប់ជម្លោះដីធ្លីនេះ។ ពលរដ្ឋបញ្ជាក់ថា ពួកគាត់នឹងចេញតវ៉ាជាថ្មីទៀតរហូតដល់មានដំណោះស្រាយសមរម្យដែលអាចទទួលយកបាន៕
No comments:
Post a Comment