ដោយ ម៉ៅ សុធានី
2021-11-13
រដ្ឋមន្ត្រីក្រសួងមហាផ្ទៃ លោក ស ខេង។
រូបពីហ្វេសប៊ុកស ខេង
ស្ថាបនិកគណបក្សបេះដូងជាតិអះអាងថា ការដែលក្រសួងមហាផ្ទៃសម្រេចមិនចុះបញ្ជីឱ្យគណបក្សរបស់លោក ក្រោមហេតុផលកំហុសឆ្គងស្នាមមេដៃរបស់អ្នកគាំទ្រគឺជាការអនុវត្តខុសនីតិវិធីច្បាប់ស្តីពីគណបក្សនយោបាយ។ ប៉ុន្តែមន្ត្រីជាន់ខ្ពស់ក្រសួងមហាផ្ទៃអះអាងថា ក្រសួងបានអនុវត្តត្រឹមត្រូវតាមច្បាប់ ដោយគ្មានការរើសអើងនិន្នាការនយោបាយណាមួយឡើយ។
គណបក្សបេះដូងជាតិចាត់ទុកទង្វើរបស់ក្រសួងមហាផ្ទៃថា ជាការធ្វើទុក្ខបុកម្នេញ និងបំភិតបំភ័យលើគណបក្សនយោបាយដែលមាននិន្នាការផ្ទុយ។
ស្ថាបនិកគណបក្សបេះដូងជាតិ លោក សៀម ភ្លុក ថ្លែងប្រាប់អាស៊ីសេរីនៅថ្ងៃទី ១២វិច្ឆិកា ថា របាយការណ៍ដែលក្រសួងមហាផ្ទៃផ្ញើជូនលោកនាយករដ្ឋមន្ត្រី ហ៊ុន សែន ហើយបែកធ្លាយតាមបណ្ដាញសង្គមកន្លងមក មិនមែនជាសេចក្តីសម្រេចរបស់ក្រសួងមហាផ្ទៃនោះទេ ពីព្រោះរហូតមកដល់ពេលនេះលោកមិនទាន់ទទួលសេចក្តីសម្រេចរបស់ក្រសួងនៅឡើយដែរ។ យ៉ាងណាក្តី លោកសោកស្តាយចំពោះក្រសួងមហាផ្ទៃដែលមិនបានអនុវត្តតួនាទីតាមនីតិវិធីច្បាប់ ដែលធ្វើការងារលើសពីសមត្ថភាពរបស់ខ្លួន ដើម្បីយកលេសបដិសេធមិនចុះបញ្ជីឱ្យគណបក្សបេះដូងជាតិ។ លោក សៀម ភ្លុក ថ្លែងថា ការដែលក្រសួងមិនព្រមចុះបញ្ជីឱ្យគណបក្សបេះដូងជាតិ ហើយថែមទាំងចង់ប្ដឹងលោកទៅតុលាការទៀតនោះ គឺធ្វើទុក្ខបុកម្នេញលើគណបក្សនយោបាយ និងសកម្មជនណាដែលមាននិន្នាការផ្ទុយ ឬមិនធ្វើតាមការណែនាំគណបក្សកាន់អំណាច៖ «យើងមានទឡ្ហីករណ៍មានអំណះអំណាងសម្រាប់តទល់បាន ដោយសារស្នាមមេដៃវាខូចខាត មិនប៉ះពាល់ដល់ប្រយោជន៍សង្គម ឬបុគ្គលណាទេ អាហ្នឹងគ្រាន់តែដាក់ពាក្យសុំចុះបញ្ជីហើយបើកន្លែងណាមិនច្បាស់ក្រសួងត្រូវបដិសេធឱ្យយើងបំពេញឡើងវិញ ហើយមកបង្វែរសំណុំរឿងចុះបញ្ជីទៅជាទោសព្រហ្មទណ្ឌវិញ វាអត់មានពិភពលោកហ្នឹង ច្បាប់ស្រុកខ្មែរហ្នឹងក៏អត់មានដែរ»។
ប្រតិកម្មនេះ ធ្វើឡើងបន្ទាប់ពីរដ្ឋមន្ត្រីក្រសួងមហាផ្ទៃលោក ស ខេង បានផ្ញើរបាយការណ៍ពាក់ព័ន្ធការចុះបញ្ជីរបស់គណបក្សបេះដូងជាតិទៅលោកនាយករដ្ឋមន្ត្រី ហ៊ុន សែន កាលពីថ្ងៃទី៨ វិច្ឆិកា ដោយចោទថា ស្នាមមេដៃបុគ្គល២០នាក់ខុសពីស្នាមមេដៃក្នុងអត្តសញ្ញាណប័ណ្ណ និង២០នាក់ទៀតផ្ដិតលើឈ្មោះបុគ្គល៥៤នាក់ ហើយបុគ្គល៧៤នាក់មានភាពមិនប្រក្រតី ឬក្លែងស្នាមមេដៃ។ ក្រសួងមហាផ្ទៃចោទប្រកាន់ទៀតថា ស្នាមមេដៃបុគ្គលជិត ៣រយ (២៨៧) នាក់ខូចគុណភាព មិនអាចធ្វើកោសល្យវិច័យបាន រួមទាំងស្នាមមេដៃមិនប្រក្រតីធ្ងន់ធ្ងរចំនួន៥នាក់ផ្តិតលើឈ្មោះបុគ្គលចំនួន២១នាក់ទៀត។
អ្នកនាំពាក្យក្រសួងមហាផ្ទៃ លោក ខៀវ សុភ័គ ប្រាប់វិទ្យុអាស៊ីសេរីបន្ថែមថា ក្រសួងមហាផ្ទៃបានសម្រេចមិនចុះបញ្ជីឱ្យគណបក្សបេះដូងជាតិនោះទេ ដោយសារស្ថាបនិកគណបក្សនេះមិនបានអនុវត្តតាមការណែនាំរបស់ក្រសួង។ លោកថ្លែងទៀតថា ក្រសួងបានសម្រេចយកស្នាមមេដៃរបស់សមាជិកគណបក្សនោះទៅធ្វើកោសល្យវិច័យ ដោយរកឃើញភាពប្រក្រតីមួយចំនួន ដែលលោកយល់ថា គណបក្សបេះដូងជាតិមានចេតនាទុច្ចរិត។ លោក ខៀវ សុភ័គ បញ្ជាក់ថា ក្រសួងនឹងប្តឹងស្ថាបនិកគណបក្សបេះដូងជាតិទៅតុលាការ និងចាត់វិធានការផ្លូវច្បាប់ចំពោះបុគ្គលក្លែងបន្លំស្នាមមេដៃផងដែរ៖ «មិនរើសអើងអីទេធ្វើនយោបាយសូមឱ្យស្មោះត្រង់ យុត្តិធម៌សុំតែប៉ុណ្ណឹងទេ កុំលេងបន្លំដល់គេមិនចុះឈ្មោះឱ្យតាំងទៅអែបអបប្រទេសមួយចំនួនទៅអង្វរឱ្យអន្តរជាតិជួយ ឥឡូវសុំឱ្យអន្តរជាតិទាំងអស់កុំជួយអីទុកតតាំងផ្លូវច្បាប់»។
ទោះជាយ៉ាងណា លោក សៀម ភ្លុក បញ្ជាក់ថា តាមច្បាប់ប្រសិនបើក្រសួងរកឃើញកំហុសឆ្គងលើស្នាមមេដៃ ក្រសួងមានសិទ្ធិត្រឹមបដិសេធ និងតម្រូវឱ្យគណបក្សនយោបាយបំពេញលក្ខខណ្ឌប៉ុណ្ណោះ ប៉ុន្តែគ្មាននីតិវិធីណាប្តឹងទៅតុលាការនោះទេ។ លោកបញ្ជាក់ទៀតថា គណបក្សបេះដូងជាតិមិនបារម្ភចំពោះការចោទប្រកាន់របស់ក្រសួងមហាផ្ទៃឡើយ ពីព្រោះលោកមានអំណះអំណាងគ្រប់គ្រាន់ដើម្បីតតាំងក្តីនៅតុលាការ។
ជុំវិញរឿងនេះ មន្ត្រីជាន់ខ្ពស់ផ្នែកអង្កេត និងតស៊ូមតិនៃអង្គការខុមហ្រែ្វល (Comfrel) លោក កន សាវាង្ស មានប្រសាសន៍ថា គណបក្សនយោបាយណាដែលបក្សកាន់អំណាចមើលឃើញថា មានមេដឹកនាំបក្សប្រឆាំងនៅពីក្រោយ គណបក្សនោះទំនងពិបាកក្នុងការធ្វើស្នើចុះបញ្ជីគណបក្សនៅក្រសួងមហាផ្ទៃ។ លោកបញ្ជាក់ថា ច្បាប់ពុំមានចែងអំពីអ្នកគាំទ្រគណបក្សនយោបាយដែលក្រសួងមហាផ្ទៃរកឃើញករណីក្លែងបន្លំស្នាមមេដៃ ហើយអាជ្ញាធរត្រូវប្តឹងពួកគាត់ទៅតុលាការនោះទេ។ លោកបញ្ជាក់ថា រូបភាពបែបនេះហាក់បង្ហាញអំពីការរើសអើងនិន្នាការ ខណៈគណបក្សនយោបាយផ្សេងទៀតក្រសួងអនុញ្ញាតឱ្យចុះបញ្ជីបានឆាប់រហ័ស។ លោកបន្ថែមថា ក្រុមអង្គការសង្គមស៊ីវិលទាមទារឱ្យអាជ្ញាធរបើកលំហសេរី ដោយឈរលើគោលការណ៍ស្មើភាពគ្នា និងត្រូវពិនិត្យជុំវិញរឿងនេះឡើងវិញ៖ «តើអ្វីបញ្ជាក់យកមកប្រាប់គណបក្សនយោបាយដែលសុំចុះបញ្ជីហ្នឹងឱ្យគាត់កែតម្រូវឬទេ មានពេលវេលាទុកឱ្យឬទេ អាហ្នឹងគឺជាចំណុចសំខាន់ក្នុងនីតិវិធី អ៊ីចឹងនីតិវិធីបែបហ្នឹងបាទ ហើយមិនមានចែងច្បាស់ថា តើមិនគ្រប់ជ្រុងជ្រោយត្រូវប្តឹងទៅតុលាការអី វាអត់មានបានលើកឡើងរឿងហ្នឹងទេ គ្រាន់តែបដិសេធមិនចុះបញ្ជី ហើយមានការប្តឹងនីតិវិធីហ្នឹងបន្ត»។
លោក សៀម ភ្លុក ឱ្យដឹងថាសប្តាហ៍ក្រោយនេះ លោកនឹងជួបជាមួយតំណាងស្ថានទូតប្រទេសប្រជាធិបតេយ្យ ដើម្បីការស្វះស្វែងរកអន្តរាគមន៍ជុំវិញការរឹតត្បិតរបស់ក្រសួងមហាផ្ទៃនេះ៕
No comments:
Post a Comment