ដោយ ខែ សុណង
2022-03-01
លោក សុន ឆ័យ អតីតតំណាងរាស្ត្រគណបក្សសង្គ្រោះជាតិ។
រូប៖ RFA
តំណាងរាស្ត្រគណបក្សសង្គ្រោះជាតិ លោក សុន ឆ័យ បានប្រាប់វិទ្យុអាស៊ីសេរីនៅមុនការផ្សាយនេះបន្តិចថា លោកចូលជាមួយគណបក្សភ្លើងទៀនពេលនេះ គឺមិនមែនជាការដេករងចាំទេ ប៉ុន្តែលោកបានធ្វើកិច្ចការងារជាច្រើន។ លោកមើលឃើញថា គណបក្សនេះមានគោលនយោបាយប្រជាធិបតេយ្យស្រដៀងគ្នានឹងគណបក្សសង្គ្រោះជាតិ ហើយលោកក៏ធ្លាប់ជាសមាជិករបស់គណបក្សភ្លើងទៀន ពីមុនផង ដែលលោកគិតថា នេះគឺជាពេលវេលាសមស្របដើម្បីផ្ដល់ក្ដីសង្ឃឹមដល់អ្នកស្រលាញ់ប្រជាធិបតេយ្យ បន្តលើកស្ទួយលទ្ធិប្រជាធិបតេយ្យ និងការពារប្រជាពលរដ្ឋ៖ «នេះជាពេលវេលាមួយសមស្រប ព្រោះយើងយល់ថាត្រូវតែបន្តការងាររបស់យើង ដូច្នេះទោះមានឧបសគ្គធ្ងន់ធ្ងរប៉ុណ្ណាក៏ដោយ ក្នុងកាលៈទេសៈដែលយើងអាចបន្តការងារយើងបានខ្ញុំថាការចូលរួមនៅពេលនេះវាសមស្របយ៉ាងហោចណាស់ក៏ជួយដល់ពលរដ្ឋយើងដែលលោកធ្លាប់ទទួលបានការគាំទ្រនៅតាមមូលដ្ឋានឲ្យលោកបានត្រឡប់មកបំពេញតួនាទីរបស់លោកវិញ»។
លោក សុន ឆ័យ គឺអ្នកតំណាងរាស្ត្រមណ្ឌលភ្នំពេញ ជាប្រធានក្រុមអ្នកតំណាងរាស្ត្រ និងជាសមាជិកគណៈកម្មាធិការអចិន្ត្រៃយ៍នៃគណបក្សសង្គ្រោះជាតិ។ លោក សុន ឆ័យ ជាមន្ត្រីជាន់ខ្ពស់គណបក្សសង្គ្រោះជាតិមួយរូបក្នុងចំណោម ១១៨រូប ដែលត្រូវបានតុលាការដកហូតសិទ្ធិមិនឱ្យធ្វើនយោបាយរយៈពេល ៥ឆ្នាំ ក្រោយតុលាការកំពូលរំលាយគណបក្សប្រឆាំងដ៏ធំនេះ កាលពីខែវិច្ឆិកា ឆ្នាំ ២០១៧ តាមបណ្ដឹងរបស់ក្រសួងមហាផ្ទៃ។
កាលពីថ្ងៃទី៣ ខែកញ្ញា ឆ្នាំ២០២០ ព្រះមហាក្សត្រ បានត្រាស់បង្គាប់ផ្ដល់នីតិសម្បទា ឬផ្ដល់សិទ្ធិធ្វើនយោបាយដល់លោក សុន ឆ័យ ឡើងវិញ តាមការស្នើសុំរបស់លោកនាយករដ្ឋមន្ត្រី ហ៊ុន សែន ក្រោយពីលោកបានដាក់លិខិតស្នើសុំទៅក្រសួងមហាផ្ទៃ៕
No comments:
Post a Comment