ដោយ មួង ណារ៉េត
2022-04-08
សាលាដំបូងខេត្តកំពង់ចាម។
RFA
សកម្មជនពីរនាក់ នៅខេត្តកំពង់ចាម ថា តុលាការកោះហៅពួកគាត់ ក្រោយឈរឈ្មោះឲ្យគណបក្សភ្លើងទៀន។ ពួកគាត់ចាត់ទុកដីកាតុលាការនៅពេលនេះ ថាជាការធ្វើទុក្ខបុកម្នេញផ្នែកនយោបាយ។
បេក្ខជនក្រុមប្រឹក្សាឃុំឲ្យគណបក្សភ្លើងទៀន នៅឃុំផ្ទះកណ្តាល ស្រុកស្រីសន្ធរ ខេត្តកំពង់ចាម គឺលោក វ៉ាន់ ម៉ាច និងលោក ពៅ ខន ប្រាប់វិទ្យុអាស៊ីសេរីថា តុលាការខេត្តកំពង់ចាមបានចេញដីកាឲ្យពួកលោកចូលខ្លួនទៅបំភ្លឺនៅតុលាការនេះ ពីបទញុះញង់ឲ្យប្រព្រឹត្តបទឧក្រិដ្ឋជាអាទិ៍ ពាក់ព័ន្ធទៅនឹងរឿងចាស់កាលពីឆ្នាំ២០១៩ នោះ។
ពួកគេជាអតីតសកម្មជនគណបក្សសង្គ្រោះជាតិ ដែលធ្លាប់ភៀសខ្លួនទៅក្រៅប្រទេស អស់ជាងមួយខែ កាលពីខែ វិច្ឆិកា ដោយសារតែអាជ្ញាធរតាមធ្វើទុក្ខបុកម្នេញ រឿងព្រឹត្តិការណ៍ ៩ វិច្ឆិកា ឆ្នាំ ២០១៩នោះ ដែលជាគម្រោងមាតុភូមិនិវត្តន៍របស់ប្រធានស្តីគណបក្សសង្គ្រោះជាតិលោក សម រង្ស៊ី។
ប៉ុន្តែ ពួកលោកទាំងពីរ បានត្រឡប់មកស្រុកខ្មែរវិញ កាលពីចុងឆ្នាំ ២០១៩ ក្រោយលោកនាយករដ្ឋមន្ត្រី ប្រកាសថាមិនតាមរករឿងពួកគាត់។ ពួកគាត់មកនៅប្រកបរបរចិញ្ចឹមជីវិត ដូចធម្មតា បានជាងពីរឆ្នាំមកហើយ។
លោក វ៉ាន់ ម៉ាច ឆ្ងល់ថាហេតុអ្វីបានជាទើបតែពេលនេះ នៅពេលដែលដឹងថាលោកឈរឈ្មោះជាបេក្ខជនក្រុមប្រឹក្សាឃុំ ទើបតុលាការចេញដីបង្គាប់ឲ្យចូលខ្លួន។ ទោះជាយ៉ាងនេះក្ដី លោកអះអាងថា មន្ត្រីប៉ូលិសឃុំឈ្មោះ សាក់ និស្ស័យ ដែលយកដីកាមកប្រគល់ជូនលោកនោះ ប្រាប់លោកថាបើលោកកុំចូលបក្សភ្លើងទៀន តែចូលបក្សកាន់អំណាចវិញ គឺអាចរួចខ្លួន និងបានប្រាក់ខែថែមទៀតផង។ រឿងនេះរឹតតែធ្វើឲ្យលោក វ៉ាន់ ម៉ាច ឆ្ងល់កាន់តែខ្លាំង៖ «បើចោទថាយើងមានទោស តុលាការកោះហៅ ចុះបើចូលទៅ [បក្សកាន់អំណាច] ម៉េចបានជារួចខ្លួនទៅវិញ? ខ្ញុំចង់ឆ្ងល់អ៊ីចឹង! កន្លងមកខ្ញុំចំណាំថាឲ្យតែដែលគេចោទថាក្បត់ជាតិអីហ្នឹង ក្រោយចូលទៅស្រាប់តែរួចខ្លួន។ ខ្ញុំអត់យល់! ខ្ញុំឆ្ងល់បញ្ហាហ្នឹង! អ្នកមានទោស ដែលចូលទៅបែរជារួចខ្លួនទៅវិញ?»។
ឆ្លើយតបទៅនឹងបញ្ហានេះ ប៉ូលិសឃុំផ្ទះកណ្តាល អះអាងប្រាប់វិទ្យុអាស៊ីសេរី កាលពីថ្ងៃទី៧ ខែ មេសា ថាលោកពិតជាបានយកដីការបស់តុលាការខេត្តកំពង់ចាម ទៅប្រគល់ផ្ទាល់ដៃដល់លោក វ៉ាន់ ម៉ាច មែន ប៉ុន្តែ លោកថា លោកមិនបាននិយាយដូចអ្វីដែលលោក វ៉ាន់ ម៉ាច លើកឡើងនោះឡើយ។ លោក សាក់ និស្ស័យ ថា លោកបានបំពេញត្រឹមតួនាទីក្នុងនាមជាប៉ូលិស ដែលត្រូវយកដីកាទៅភាគីពាក់ព័ន្ធតែប៉ុណ្ណោះ៖ «ការងារហ្នឹងខ្ញុំអត់ដឹងរឿងអ្វីនោះដែរ ប៉ុន្តែតុលាការគាត់ចេញដីកាហើយ! ដូច្នេះតួនាទីខ្ញុំគ្រាន់តែថា តុលាការចេញដីកាមកឲ្យប៉ុស្តិ៍ ដូច្នេះប៉ុស្តិ៍ គ្រាន់តែជូនដំណឹងទៅគាត់ ឲ្យគាត់ទទួលចុងសន្លឹកដីកាហ្នឹងទេ»។
កាលពីខែវិច្ឆិកា ឆ្នាំ២០១៩ ក្រោយតុលាការកម្ពុជា បានចេញដីកាតាមចាប់ខ្លួនសកម្មជន និងមន្ត្រីគណបក្សសង្គ្រោះជាតិជាច្រើន ដោយសារតែសារគាំទ្រដំណើរវិលត្រឡប់ទៅកម្ពុជាវិញរបស់លោក សម រង្ស៊ី នោះ មានសកម្មជនបក្សប្រឆាំងជាច្រើន បានរត់ភៀសខ្លួនទៅស្រុកថៃ ឬប្រទេសម៉ាឡេស៊ី។
ប៉ុន្តែ ជាងមួយខែក្រោយមកលោក ហ៊ុន សែន បានប្រកាសឲ្យពួកគេចូលមកវិញ ដោយហាមធ្វើទុក្ខបុកម្នេញពួកគាត់៖ «ក្នុងនាមខ្ញុំព្រះករុណាខ្ញុំជាប្រធាននីតិប្រតិបត្តិ ខ្ញុំព្រះករុណាខ្ញុំអំពាវនាវឲ្យមនុស្សទាំងអស់ដែលកំពុងរត់គេចខ្លួន ត្រឡប់មកភូមិកំណើតវិញ។ កុំលាក់ខ្លួននៅកន្លែងនេះ លាក់ខ្លួននៅកន្លែងនោះតទៅទៀត។ ហើយអាជ្ញាធរមូលដ្ឋាន កងកម្លាំងប្រដាប់អាវុធ និយាយរួមកម្លាំងមានសមត្ថកិច្ចដែលអនុវត្តច្បាប់ ជាពិសេសនគរបាល និងអាវុធហត្ថ ក៏ដូចជាមន្ត្រីនៅមូលដ្ឋានទាំងអស់ កុំធ្វើអីឲ្យសោះ! ឲ្យគេមកផ្ទះយ៉ាងស្រួល! រាប់អានគ្នាទៅ។ ធ្វើការជាមួយគ្នាទៅ»។
ប៉ុន្តែ ក្រោយសកម្មជនទាំងនោះ ស្ម័គ្រចិត្តចូលគណបក្សភ្លើងទៀន ដើម្បីចូលរួមប្រកួតការបោះឆ្នោតក្រុមប្រឹក្សាឃុំសង្កាត់នៅ ខែមិថុនា ខាងមុខនេះ ស្រាប់តែតុលាការគាស់កកាយសំណុំរឿងចាស់របស់ពួកគាត់ជាបន្តបន្ទាប់។
មន្ត្រីឃ្លាំមើលសិទ្ធិមនុស្សចាត់ទុកទង្វើបែបនេះ ថា ជាការធ្វើទុក្ខបុកម្នេញផ្នែកនយោបាយ។ នាយកប្រតិបត្តិអង្គការសម្ពន្ធភាពការពារសិទ្ធិមនុស្ស (CHRAC) លោក រស់ សុដ្ឋា ថាទង្វើបែបនេះ គឺផ្ទុយទៅនឹងសាររបស់លោកនាយករដ្ឋមន្ត្រី ហ៊ុន សែន និងរដ្ឋមន្ត្រីក្រសួងមហាផ្ទៃលោក ស ខេង ដែលសុទ្ធតែអះអាង ថាឲ្យអាជ្ញាធរមូលដ្ឋាន កុំធ្វើទុក្ខបុកម្នេញសកម្មជនគណបក្សប្រឆាំង។ លោកថាការធ្វើទុក្ខបុកម្នេញសកម្មជនគណបក្សភ្លើងទៀននេះ ហាក់បង្ហាញឲ្យឃើញថាគណបក្សកាន់អំណាច ខ្លាចឥទ្ធិពលបក្សនេះ៖ «ដូចខ្លាចឥទ្ធិពលគណបក្សភ្លើងទៀនយ៉ាងម៉េចទេ? ខ្ញុំពិនិត្យមើលទៅ ឃើញដូចជាខ្លាចឥទ្ធិពលគណបក្សភ្លើងទៀន។ ដូច្នេះហើយបានជាបញ្ហារឿងរឹតត្បិតហ្នឹង ចេះតែមានជាបន្តបន្ទាប់បែបនេះ»។
លោក រស់ សុដ្ឋា ចាត់ទុកទង្វើរបស់អាជ្ញាធរបែបនេះ ថា ជាការរំលោភសិទ្ធិនយោបាយរបស់ពលរដ្ឋ ដែលឈរឈ្មោះឲ្យគណបក្សនយោបាយ ដែលខ្លួនស្រលាញ់ពេញចិត្ត។ លោកបន្ថែមថា បើស្ថានភាពរឹតត្បិតសិទ្ធិសេរីភាព និងការធ្វើទុក្ខបុកម្នេញលើសកម្មជនបក្សប្រឆាំង នៅតែបន្តកើតមានបែបនេះ នឹងធ្វើឲ្យពលរដ្ឋទូទៅកាន់តែមានមន្ទិលលើបរិយាកាសនយោបាយ នៅមុនការបោះឆ្នោត ដែលអាចនាំឲ្យការបោះឆ្នោតខាងមុខ នឹងមិនអាចប្រព្រឹត្តទៅដោយសេរី ត្រឹមត្រូវ និងយុត្តិធម៌បាននោះឡើយ។
វិទ្យុអាស៊ីសេរី មិនទាន់អាចសុំការបំភ្លឺ ពីប្រធានអង្គភាពអ្នកនាំពាក្យរដ្ឋាភិបាលលោក ហ៊ុន សែន គឺលោក ផៃ ស៊ីផាន បាននៅឡើយទេ កាលពីថ្ងៃទី៧ ខែមេសា។
ការបោះឆ្នោតក្រុមប្រឹក្សាឃុំសង្កាត់នៅថ្ងៃទី ០៥ ខែ មិថុនា ខាងមុខនេះ មានគណបក្សនយោបាយចំនួន ១៧ បានដាក់បេក្ខជនដើម្បីត្រៀមចូលរួមការបោះឆ្នោតនោះ។ នៅក្នុងគណបក្សភ្លើងទៀន រៀបបេក្ខជនបានប្រដំប្រសងនឹងគណបក្សកាន់អំណាច គឺរៀបបានជាង ១៦០០ ឃុំសង្កាត់នៅទូទាំងប្រទេស។ គណបក្សភ្លើងទៀនដែលប្តូរឈ្មោះពីគណបក្សសម រង្ស៊ី នេះ រងការធ្វើទុក្ខបុកម្នេញច្រើនជាងគេ ពីអាជ្ញាធរមូលដ្ឋាន ក្នុងចំណោមគណបក្សនយោបាយទាំងអស់៕
1 comment:
Thank You peace for having a free and fair election. Killing and incarcerating people are part of the free and fair election in Cambodia.
Post a Comment