ដោយ យន់ សាមៀន
2022-04-06
លោក ហ៊ុន សែន សម្ពោធដាក់ឱ្យប្រើប្រាស់រចនាសម្ព័ន្ធ ផ្លូវ៣៨ខ្សែក្នុងក្រុងសៀមរាប ខេត្តសៀមរាប កាលពីថ្ងៃទី៤ ខែមេសា ឆ្នាំ២០២២។
រូប៖ ហ្វេសប៊ុក SMP
តំណាងគណបក្សកាន់អំណាចឱ្យដឹងថា ការដែលលោកនាយករដ្ឋមន្ត្រី ហ៊ុន សែន ចុះទៅមូលដ្ឋានញឹកញាប់ដើម្បីសម្ពោធសមិទ្ធផលនានានោះ គឺដើម្បីផលប្រយោជន៍ផ្នែកនយោបាយ។ អ្នកវិភាគ និងមន្ត្រីអង្គការសង្គមស៊ីវិលផ្នែកកិច្ចការបោះឆ្នោតរិះគន់ថា ករណីនេះជាការបំពានច្បាប់។
ប្រមុខរដ្ឋាភិបាលឯកបក្ស និងជាប្រធានគណបក្សប្រជាជនកម្ពុជាលោក ហ៊ុន សែន បានចុះទៅសម្ពោធសមិទ្ធផល និងហេដ្ឋារចនាសម្ព័ន្ធនានាជាបន្តបន្ទាប់ ស្របពេលការបោះឆ្នោតកាន់តែខិតជិតមកដល់។ សកម្មភាពបែបនេះត្រូវបានតំណាងគណបក្សប្រជាជនកម្ពុជាទម្លាយថា គឺដើម្បីផលប្រយោជន៍ផ្នែកនយោបាយ។
មន្ត្រីជាន់ខ្ពស់ និងជាអ្នកនាំពាក្យគណបក្សកាន់អំណាចលោក សុខ ឥសាន ប្រាប់វិទ្យុអាស៊ីសេរីនៅថ្ងៃទី៦ ខែមេសាថា លោកនាយករដ្ឋមន្ត្រី ហ៊ុន សែន ចុះទៅសម្ពោធសមិទ្ធផលនានាកាន់តែញឹកញាប់នៅមុនការបោះឆ្នោតនេះ ដើម្បីឱ្យពលរដ្ឋមើលឃើញពីគុណសម្បត្តិដឹកនាំរបស់គណបក្សប្រជាជនកម្ពុជា។ លោកបញ្ជាក់ថា នេះជាការប្រមូលផលប្រយោជន៍ផ្នែកនយោបាយ ដើម្បីឱ្យគណបក្សប្រជាជនកម្ពុជាឈ្នះឆ្នោតបន្តទៀត៖ «កេងចំណេញមានន័យថា វាមានគំនិតមិនល្អ។ មានតែគណបក្សប្រឆាំងទេដែលកេងចំណេញ។ គណបក្សប្រជាជនដែលជាបក្សកាន់អំណាច អត់កេងទេ គឺយកចំណេញតែម្ដង ព្រោះធ្វើពិត បានសមិទ្ធផលពិត ហើយសម្ដេចប្រធានគណបក្សក៏ដូចជានាយករដ្ឋមន្ត្រី ដើរទៅសម្ពោធតាមមូលដ្ឋាននានាទូទាំងប្រទេសហ្នឹង គឺយកសមិទ្ធផលពិតមកបង្ហាញប្រជាជន»។
រយៈពេលជាងមួយខែចុងក្រោយនេះ លោក ហ៊ុន សែន បានចុះទៅសម្ពោធ និងពិនិត្យសមិទ្ធផលនានា យ៉ាងហោចណាស់ចំនួន ១២ ទីតាំងផ្សេងគ្នា ជាមួយនឹងការថ្លែងសុន្ទរកថាជាច្រើនម៉ោង។ ក្នុងវេទិកាទាំងនោះ លោកតែងតែរំឭកពីគុណបំណាច់ និងលើកសរសើរចំពោះការដឹកនាំរបស់គណបក្សប្រជាជនកម្ពុជា។ ពេលខ្លះលោកថែមទាំងបានអំពាវនាវឱ្យពលរដ្ឋបន្តបោះឆ្នោតគាំទ្រគណបក្សរបស់លោកទៀតផង។
លោក សុខ ឥសាន ថ្លែងការពារសកម្មភាពរបស់លោក ហ៊ុន សែន នេះថា មិនបានរំលោភតួនាទី ឬបំពានលើច្បាប់ណាមួយឡើយ លើកលែងតែក្នុងអំឡុងពេលឃោសនារកសំឡេងឆ្នោត។ ម្យ៉ាងវិញទៀត លោកថា តួនាទីជានាយករដ្ឋមន្ត្រី និងប្រធានគណបក្សមិនអាចញែកដាច់ពីគ្នានោះទេ។
ទោះជាយ៉ាងណា អ្នកជំនាញផ្នែកកិច្ចការបោះឆ្នោតច្រានចោលការបកស្រាយទាំងនេះ។
អ្នកសម្របសម្រួលផ្នែកអង្កេត និងតស៊ូមតិនៃអង្គការខុមហ្វ្រែល (COMFREL) លោក កន សាវាង្ស សោកស្ដាយដែលមន្ត្រីជាន់ខ្ពស់គណបក្សកាន់អំណាចបកស្រាយរឿងនេះដោយមិនផ្អែកលើទិដ្ឋភាពច្បាប់។ លោកពន្យល់ថា ការប្រើប្រាស់វេទិកាសម្ពោធសមិទ្ធផលនានាដើម្បីលើកសរសើរ ឬឃោសនាឱ្យគណបក្សរបស់ខ្លួនបែបនេះ ជាករណីបំពានច្បាប់៖ «មិនគួរណាដែលមន្ត្រីរាជការ ហើយជាអ្នកនយោបាយ យើងបកស្រាយដោយមិនគិតពីច្បាប់ដែលមានទេ។ អាហ្នឹងគួរតែយកច្បាប់ជាធំ ហើយពិនិត្យមើលឡើងវិញ។ បើមិនអ៊ីចឹងទេ គណបក្សតូចៗដែលអត់មានតួនាទីហ្នឹង គ្នាមានលទ្ធភាពឯណាទៅប្រកួតប្រជែង។ បើយើងមានតួនាទី យើងមានលទ្ធភាព ហើយយើងយកអាហ្នឹងទៅប្រើប្រាស់ជាប្រយោជន៍សម្រាប់គណបក្សខ្លួនហើយហ្នឹង អ៊ីចឹងអាហ្នឹងហើយគេហៅថា ការកេងចំណេញផ្នែកនយោបាយនោះ»។
ស្រដៀងគ្នានេះដែរ អ្នកសិក្សាផ្នែកច្បាប់លោក វ៉ន ចាន់ឡូត ថ្លែងថា ការចុះទៅសម្ពោធសមិទ្ធផលនានានេះ គឺជាទម្លាប់ដដែលៗរបស់ថ្នាក់ដឹកនាំគណបក្សប្រជាជនកម្ពុជា ដើម្បីទាក់ទាញការគាំទ្រពីប្រជាពលរដ្ឋនៅមុនការបោះឆ្នោត។ លោករិះគន់ថា ករណីនេះ ក្រៅពីខ្ជះខ្ជាយពេលវេលា និងថវិកាជាតិហើយនោះ វាក៏ប្រាស់ចាកពីបញ្ញត្តិច្បាប់ដែរ៖ «នៅពេលដែលយើងប្រើប្រាស់ពេលវេលាទៅសម្ពោធ ឬក៏ចូលរួមកម្មវិធីដែលវាមិនសូវសំខាន់ ឬក៏វាដូចជាមិនសំខាន់សោះក្នុងនាមជាអ្នកដឹកនាំកំពូលដែលត្រូវចូលរួមហ្នឹង ខ្ញុំមើលឃើញថា ទីមួយវាជាការចំណាយថវិកាជាតិខ្ជះខ្ជាយ។ ទីពីរការយកពេលវេលា ការងាររបស់រដ្ឋរបស់ជាតិ ឬក៏ប្រយោជន៍សាធារណៈ ដើម្បីកេងចំណេញដល់ផលប្រយោជន៍នយោបាយ វាជាការរំលោភបំពានទៅដល់ការប្រកួតប្រជែងការបោះឆ្នោតដោយសេរី យុត្តិធម៌ និងត្រឹមត្រូវ»។
ច្បាប់បោះឆ្នោត និងច្បាប់សហលក្ខន្តិកៈមន្ត្រីរាជការស៊ីវិល បានហាមឃាត់ មិនឲ្យមន្ត្រីសាធារណៈ ដូចជានាយករដ្ឋមន្ត្រីជាដើម ប្រើប្រាស់តួនាទីរបស់រដ្ឋ ដើម្បីកេងចំណេញប្រយោជន៍បក្សរបស់ខ្លួននោះឡើយ។ មាត្រា ៨០ នៃច្បាប់បោះឆ្នោតជ្រើសតាំងតំណាងរាស្ត្រ បានហាមប្រើប្រាស់ថវិកា សម្ភារៈ មធ្យោបាយដឹកជញ្ជូន ដែលជាសម្បត្តិរដ្ឋ ដើម្បីធ្វើសកម្មភាពឃោសនាបោះឆ្នោត ឲ្យគណបក្សនយោបាយណាមួយ ឬបេក្ខជនណាម្នាក់។
ការបោះឆ្នោតក្រុមប្រឹក្សាឃុំសង្កាត់អាណត្តិទី៥ នេះ នឹងប្រព្រឹត្តទៅនៅថ្ងៃទី៥ ខែមិថុនា ខាងមុខ។ ស្របពេលដែលលោក ហ៊ុន សែន និងមន្ត្រីគណបក្សប្រជាជនកម្ពុជាអាចធ្វើសកម្មភាពនយោបាយបានដោយសេរី សកម្មជនគណបក្សនយោបាយមួយចំនួនបែរជាកំពុងរងការធ្វើទុក្ខបុកម្នេញឥតឈប់ឈរពីសំណាក់អាជ្ញាធរ ក្រោមរូបភាពជាការចាប់ខ្លួន ការចោទប្រកាន់ និងការលុបឈ្មោះចេញពីបញ្ជីឈរឈ្មោះបោះឆ្នោតទៅវិញ៕
No comments:
Post a Comment