ដោយ ម៉ៅ សុធានី
2023.04.30
រដ្ឋមន្ត្រីក្រសួងព័ត៌មាន លោក ខៀវ កាញារីទ្ធ។
រូប៖ ហ្វេសប៊ុកក្រសួងព័ត៌មាន
មន្ត្រីគណបក្សភ្លើងទៀនលើកឡើងថា នៅកម្ពុជាបច្ចុប្បន្ននេះគ្មានសិទ្ធិសេរីភាពខាងការបញ្ចេញមតិនោះទេ ។ ការលើកឡើងនេះបន្ទាប់ពីប្រមុខដឹកនាំក្រសួងព័ត៌មាន ថ្លែងក្នុងកិច្ចពិភាក្សាជាមួយតំណាងក្រុមហ៊ុនទីកតុក ( Tik Tok ) ប្រទេសឡាវ (Laos) និង ប្រទេសមីយ៉ាន់ម៉ា (Myanmar) ថាកម្ពុជាពុំមានការរឹតត្បិតសេរីភាពក្នុងការបញ្ចេញមតិឡើយ។
មន្ត្រីបក្សភ្លើងទៀនរិះគន់ថាការណ៍ដែល រដ្ឋមន្ត្រីក្រសួងព័ត៌មាន លោក ខៀវ កាញារីទ្ធ អួតសរសើរថា កម្ពុជាបើកលំហសិទ្ធិសេរីភាពនោះហាក់ប្រាសចាកពីការពិត ពីព្រោះមន្ត្រីបក្សភ្លើងទៀន និងសកម្មជនសង្គម ត្រូវបានអាជ្ញាធរក្រុងភ្នំពេញធ្វើទុក្ខបុកម្នេញតាមប្រព័ន្ធតុលាការ និងចាប់ដាក់ពន្ធនាគារជាច្រើននាក់ គ្រាន់តែពួកគេប្រើប្រាស់សិទ្ធិស្របតាមរដ្ឋធម្មនុញ្ញ។
អ្នកនាំពាក្យគណបក្សភ្លើងទៀន លោក គីមសួរ ភីរិទ្ធ ប្រាប់វិទ្យុអាស៊ីសេរី នៅថ្ងៃទី២៩ មេសា ថា សិទ្ធិសេរីភាពក្នុងការបញ្ចេញមតិដែល លោក ខៀវ កាញារីទ្ធ លើកឡើងទំនងអាចជាសិទ្ធិនៅក្នុងបណ្ដាញសង្គម និយាយអំពីស្រាបៀ ឬអាចជាសិទ្ធិជួបជុំក្នុងការប្រគំតន្ត្រីជាដើម ។ ប៉ុន្តែលោកថា បើការសម្ដែងមតិ បង្ហាញពីការពិត និងរិះគន់ពីបញ្ហាសង្គម ដើម្បីឱ្យមានការស្ថាបនា បែរជាចាប់ដាក់ពន្ធនាគារ ហើយអ្នកមួយចំនួនទៀតជាប់ពាក្យបណ្ដឹងនៅតុលាការទៅវិញ។
លោក គីមសួរ ភីរិទ្ធ៖ «អំពាវនាវឱ្យមានការបើកលំហសេរីភាពក្នុងការបញ្ចេញមតិជាពិសេសការរិះគន់ប្រកបដោយស្ថាបនា ហើយអ្នករិះគន់ក៏សុំដែរ ថារិះគន់ប្រកបដោយស្ថាបនាយើងរិះគន់គេឱ្យមានការពិត និងដែរត្រូវគេរិះគន់ ក៏ដូចជាអ្នកដែលរិះគន់គេ យើងត្រូវបង្កើតវប្បធម៌ថ្មីគឺការជជែកគ្នាដោយការគោរព ហើយឆ្ពោះទៅរកការធ្វើកិច្ចការជាមួយគ្នា ដែលកើតឱ្យមានវប្បធម៌មួយថ្មីសម្រាប់មនុស្សជំនាន់ក្រោយៗទៀត គឺវប្បធម៌អត់ឱនគ្នា យោគយល់គ្នា ហើយធ្វើការជាមួយគ្នាប្រកបដោយការគោរពគ្នាទៅវិញទៅមក»។
ប្រតិកម្មរបស់មន្ត្រីបក្សភ្លើងនេះគឺបន្ទាប់ពី លោក ខៀវ កាញារីទ្ធ ថ្លែងក្នុងកិច្ចពិភាក្សាជាមួយតំណាងក្រុមហ៊ុនទីកតុក ប្រទេសឡាវ (Laos) និង ប្រទេសមីយ៉ាន់ម៉ា (Myanmar) កាលពីថ្ងៃទី២៨ មេសា ថាកម្ពុជាពុំមានការរឹតត្បិតសេរីភាពក្នុងការបញ្ចេញមតិនោះទេ ។ គោលបំណងនៃកិច្ចពិភាក្សានេះគឺដើម្បីបង្កើនកិច្ចសហប្រតិបត្តិការ និងចូលរួមធ្វើឱ្យលំហូរមាតិកាព័ត៌មាននៅលើបណ្ដាញទំនាក់ទំនងសង្គមទីកតុក មានសុវត្ថិភាពមាតិកា និងការទទួលខុសត្រូវក្នុងសង្គម។ លើសពីនេះ លោក ខៀវ កាញារីទ្ធ ក៏គ្រោងរៀបចំសិក្ខាសាលាស្ដីពីការប្រើប្រាស់ Tik Tok ប្រកបដោយសុវត្ថិភាព និង បង្រៀនវគ្គបណ្ដុះបណ្ដាលដល់អង្គភាពជំនាញពាក់ព័ន្ធនឹងការប្រើប្រាស់បណ្ដាញសង្គម Tik Tok នៅខែឧសភា ខាងមុខ។
ជុំវិញរឿងនេះប្រធានសមាគមការពារសិទ្ធិមនុស្សអាដហុក (Adhoc) លោក នី សុខា មានប្រសាសន៍ថា ការលើកឡើងរបស់ លោក ខៀវ កាញារីទ្ធ មិនឆ្លុះបញ្ចាំងពីការអនុវត្តសិទ្ធិមនុស្សនៅកម្ពុជានោះទេ ពីព្រោះបើកម្ពុជាមានសិទ្ធិសេរីភាពពិតប្រាកដ មិនមែនប្រទេសលោកសេរី ដកប្រព័ន្ធអនុគ្រោះពន្ធ EBA២០% និងមិនបន្ត ប្រព័ន្ធអនុគ្រោះពន្ធ GSP នោះទេ។ លោកបន្តថា មិនមែនគ្រប់ការបញ្ចេញមតិនៅក្នុងបណ្ដេញសង្គមទាំងអស់សុទ្ធតែបង្ហាញថាកម្ពុជាមានសិទ្ធិសេរីភាពនោះទេ ហើយរដ្ឋាភិបាលគួរតែទទួលយកមតិស្រប និងមតិផ្ទុយដើម្បីកែតម្រូវចំណុចខ្វះខាតឱ្យកាន់តែប្រសើរ។
លោក នី សុខា៖ «រដ្ឋាភិបាលគួរតែហ៊ានទទួលការពិត ឬក៏ទទួលយកនៅអនុសាសន៍របស់អង្គការសហប្រជាជាតិរបស់សហគមន៍អន្តរជាតិ ជាពិសេសសហគមន៍អឺរ៉ុបក៏ដូចជាសហរដ្ឋអាមេរិក ប្រទេសប្រកាន់ប្រជាធិបតេយ្យមួយចំនួនដើម្បីយកមកពិចារណាថ្លឹងថ្លែង និងធ្វើការដោះស្រាយជាជាងយើងធ្វើការបដិសេធរបាយការណ៍ ក៏ដូចជាការរកឃើញរបស់គេ ហើយយើងមិនព្រមធ្វើការដោះស្រាយ អាហ្នឹងវារឿងមួយរដ្ឋាភិបាលយើងមិនអាចដោះស្រាយទាក់ទង នឹងបញ្ហាសិទ្ធិមនុស្សបានទេ»។
កន្លងទៅ រដ្ឋាភិបាល លោក ហ៊ុន សែន បានប្រើប្រព័ន្ធតុលាការ ជាឧបករណ៍ដើម្បីបង្ក្រាប ចាប់ខ្លួនថ្នាក់ដឹកនាំ និងចាប់ខ្លួនមន្ត្រីគណបក្សភ្លើងទៀនជាបន្តបន្ទាប់។ ក្រៅពីចាប់មន្ត្រីបក្សភ្លើងទៀន៣នាក់ដាក់ពន្ធនាគារដែលរួមមានប្រធានគណៈកម្មាធិការប្រតិបត្តិគណបក្សភ្លើងទៀន ខេត្តកំពង់ចាម លោក តូច ថឹង ប្រធានចលនាយុវជនគណបក្សភ្លើងទៀន លោក ខឿន វីរ៉ាត់ ព្រមទាំងអនុប្រធានចលនាស្ត្រី អ្នកស្រី នូ សុទ្ធារី។ ថ្មីៗនេះ ក៏បានតុលាការចោទ លោក ថាច់ សេដ្ឋា អនុប្រធានគណបក្សភ្លើងទៀន ពីបទញុះញង់បន្ថែមពីលើការចេញសែកអត់ប្រាក់ ដែលពលរដ្ឋ មួយចំនួនរិះគន់ ថាមានចរិតនយោបាយ។ លើសពីនេះ នៅមានសកម្មជនសហជីព កញ្ញា ឈឹម ស៊ីថរ សកម្មជនសង្គម កញ្ញា សេង ធារី និងសកម្មជនជាង៧០នាក់ទៀតត្រូវបានតុលាការចាប់ដាក់ពន្ធនាគារទាំងអយុត្តិធម៌ ដោយសារតែពួកគេប្រើប្រាស់សិទ្ធិដើម្បីទាមទារសិទ្ធិសេរីភាពដោយស្របតាមរដ្ឋធម្មនុញ្ញ តែប៉ុណ្ណោះ។ ការរំលោភសិទ្ធិមនុស្សធ្ងន់ធ្ងរបែបនេះហើយដែលធ្វើឱ្យសហរដ្ឋអាមេរិក សហភាពអឺរ៉ុប និងអ្នកជំនាញអង្គការសហប្រជាជាតិចេញសេចក្ដីថ្លែងការណ៍ថ្កោលទោស និងដាក់ទណ្ឌកម្មផ្នែកសេដ្ឋកិច្ចលើកម្ពុជាកាន់តែខ្លាំង៕
1 comment:
This sex maniac Khiev Kanharith was unlawfully declared that the CPP was the winner in the 3013 general election.
This crook has been on this Information Minister post as long as Ah thank you peace Hun Sen.
Post a Comment