Khmer Circle:
We have heard similair rhetoric before about taking tough measures against illegal loggings; in fact, since Rannariddh was Funcinpec Co-PM in the early 1990s. Since most - if not all - these trucks have to go through border check-points somewhere along the frontier with Vietnam, is it that difficult to stop the culprits there and prosecute them legally rather than wasting arms and manpower that way?
$$$
ដោយ នៅ វណ្ណារិន
2023.04.28
សកម្មភាពអាជ្ញាធរមានសមត្ថកិច្ចចុះបង្ក្រាបបទល្មើសព្រៃឈើ ចន្លោះពីថ្ងៃទី២៦-២៨ មេសា ២០២៣។
រូប៖ ហ្វេសប៊ុកGRK News
លោក សៅ សុខា មេប៉េអិមលើផ្ទៃប្រទេស បញ្ជាឱ្យកម្លាំងចុះចាប់ ឬបាញ់កម្ទេច ក្រុមអ្នកកាង ឬក្រុមមន្ត្រីរត់ការបើកឱ្យមានបទល្មើសព្រៃឈើនៅព្រៃឡង់ ប្រសិនបើពួកគេប្រើអាវុធបាញ់តដៃនឹងសមត្ថកិច្ច។ លោកថា ការបំផ្លិចបំផ្លាញព្រៃឈើនៅតែបន្តកើតមាន ដោយសារអាជ្ញាធរថ្នាក់ខេត្តអសកម្ម និងប្រព្រឹត្តអំពើពុករលួយជាប្រព័ន្ធ។ សកម្មជនព្រៃឈើយល់ឃើញថា សំដីរបស់លោក សៅ សុខា នឹងគ្មានប្រសិទ្ធភាពនោះទេ ពីព្រោះលោកធ្លាប់សន្យាស្រដៀងគ្នានេះ តែគ្មានអ្នកអនុវត្ត។
សកម្មជននៅតែគ្មានជំនឿថា ការចេញបញ្ជាជាថ្មីពីមេបញ្ជាការកងរាជអាវុធហត្ថលើផ្ទៃប្រទេស និងជាប្រធានគណៈកម្មការជាតិទប់ស្កាត់ និងបង្ក្រាបបទល្មើសធនធានធម្មជាតិលោក សៅ សុខា មិនអាចការពារព្រៃឈើឡើយ ព្រោះកន្លងមក មេប៉េអិមរូបនេះ ក៏ធ្លាប់បានប្រកាសដាក់ទាំងជីវិតដើម្បីការពារព្រៃឈើ ប៉ុន្តែក្រោយមក ព្រៃឈើនៅតែរងការវិនាសធ្ងន់ធ្ងរដដែល។
អ្នកនាំពាក្យកងរាជអាវុធហត្ថលើផ្ទៃប្រទេសលោក អេង ហ៊ី ប្រាប់អាស៊ីសេរីនៅថ្ងៃទី២៧ មេសា ថា បន្ទាប់ពីទទួលបានព័ត៌មានពាក់ព័ន្ធនឹងបទល្មើសព្រៃឈើក្នុងតំបន់ព្រៃឡង់ភ្លាម កាលពីយប់ថ្ងៃទី ២៤ មេសា លោក សៅ សុខា បានបញ្ជាឱ្យកងអន្តរាគមន៍ថ្នាក់ជាតិចំនួន ១៥ក្រុម បំពាក់កាំភ្លើងគ្រប់ដៃរួមទាំងបេ៤០ ចុះទៅបង្ក្រាប និងឃាត់បានជនល្មើសជាច្រើននាក់។ លោកបន្តថា គិតមកដល់ពេលនេះ កងកម្លាំងរឹបអូសបានឈើជាង៧៣ម៉ែត្រគីប ឈើហ៊ុបមិនទាន់វាស់វែងចំនួន ៤រថយន្ត រថយន្តសណ្ដោង ៧គ្រឿង គោយន្តកន្ត្រៃ១៣គ្រឿង ម៉ូតូមួយគ្រឿង និងឃាត់ខ្លួនជនល្មើសបាន ១៤នាក់ប្រគល់ទៅឱ្យមន្ត្រីរដ្ឋបាលព្រៃឈើចាត់វិធានការតាមនីតិវិធី។ លោកថា បច្ចុប្បន្នមន្ត្រីជំនាញកំពុងបន្តសាកសួរជនល្មើសទាំង ១៤នាក់នោះ ដើម្បីស្វែងរកមេខ្លោងនៅពីក្រោយ។
លោក អេង ហ៊ី៖ «យើងឃើញថា ភាគច្រើនសុទ្ធតែជាអ្នកប្រព្រឹត្ត ហើយក្នុងអ្នកដែលប្រព្រឹត្តនេះ យើងកំពុងសួរនាំបន្តទៀត តើមានអ្នកណាកាង អ្នកណានៅពីក្រោយ»។
ការលើកឡើងពីអ្នកនាំពាក្យរូបនេះធ្វើឡើង បន្ទាប់ពីសារសំឡេងមួយរបស់លោក សៅ សុខា ត្រូវបានផ្សព្វផ្សាយតាមបណ្ដាញសង្គមហ្វេសប៊ុកកាលពីថ្ងៃទី២៦ មេសា។ លោក សៅ សុខា បានបញ្ជាឱ្យកងកម្លាំងនៅមជ្ឈមណ្ឌលហ្វឹកហ្វឺនកងរាជអាវុធហត្ថភ្នំជម្រាយ ចំនួន១៥០នាក់ បែងចែកជា ១៥ក្រុម ដោយមួយក្រុមត្រូវមានបេ៤០ មួយដើម និងត្រូវបំពាក់ដោយកាំភ្លើងគ្រប់ដៃ ចុះទៅឡោមព័ទ្ធចាប់ខ្លួន ឬអាចបាញ់កម្ទេចចោលតែម្ដង ប្រសិនបើមានការបាញ់តដៃ ពីសំណាក់ក្រុមអ្នកកាង ឬមន្ត្រីរត់ការបើកឱ្យមានបទល្មើសព្រៃឈើនៅតំបន់ព្រៃឡង់ ជាពិសេសស្ថិតនៅក្នុងខេត្តក្រចេះ ដោយមិនចាំបាច់ប្រាប់ដំណឹងទៅអភិបាលខេត្ត ឬអភិបាលស្រុកណាឡើយ ព្រោះលោកថា ពួកគេជាមន្ត្រីអត់បានការ និងមិនដែលខ្វល់ការបំផ្លិចបំផ្លាញព្រៃឈើឡើយ។
លោក សៅ សុខា៖ «ឥឡូវបើអាស្រុកវាមិនធ្វើ អាខេត្តវាមិនធ្វើ យើងធ្វើ មិនបាច់ហៅពីណាទៅច្រើនទេ អាវុធហត្ថទៅធ្វើ ហើយបើមានកាំភ្លើងតដៃបាញ់គ្នាទេ បាញ់តែម្ដងទៅ មិនបាច់និយាយច្រើនទេ យកបេទៅតែម្ដង បំពាក់១០ដើមតែម្ដង បើថាវាបាញ់ត បាញ់វាតែម្ដង បាញ់កម្ទេចក្រវាត់ចោល។ ស្អីក៏វាសម្បើមម្ល៉េះហា៎ មកដល់ម៉ោងហ្នឹង នៅបំផ្លិចបំផ្លាញ មិនឮនាយករដ្ឋមន្ត្រីបញ្ជាយ៉ាងម៉េចទេអី ហើយអាមន្ត្រីអស់ហ្នឹង គឺដេកងាប់អស់តែម្ដង»។
លោក សៅ សុខា ក៏ព្រមានដកស័ក្ដិចេញពីស្មាក្រុមមន្ត្រីកងរាជអាវុធហត្ថ ប្រសិនបើពួកគេមិនអាចតាមចាប់ខ្លួនក្រុមមន្ត្រីក្បាលរឹង ឬក្រុមជើងកាងបទល្មើសព្រៃឈើ ខណៈលោកបញ្ជាក់ថា ក្រុមទាំងនោះ កំពុងឆ្លៀតឱកាសដែលរដ្ឋាភិបាលជាប់ដៃរៀបចំប្រកួតកីឡាស៊ីហ្គេម និងរៀបចំការបោះឆ្នោតជាតិខាងមុខនេះ លួចចូលកាប់បំផ្លាញព្រៃឈើ ហើយអាចដឹកចេញពីព្រៃឡង់យ៉ាងរំភើយ ឆ្លងកាត់មុខទីស្នាក់ការមន្ត្រីបរិស្ថាន និងស្នាក់ការមន្ត្រីរដ្ឋបាលព្រៃឈើ។ លោកយល់ឃើញថា ការបណ្ដែតបណ្ដោយការដឹកជញ្ជូនឈើចេញពីព្រៃបែបនេះ ដោយសារក្រុមមន្ត្រីជំនាញទាំងនោះ គប់គិតគ្នាប្រព្រឹត្តអំពើពុករលួយ។
កាលពីពេលថ្មីៗនេះ ក្រុមសកម្មជន និងក្រុមបណ្ដាញសហគមន៍ព្រៃឡង់បានលើកឡើងថា បទល្មើសព្រៃឈើបានកើតឡើងយ៉ាងសកម្ម ដោយសារគ្មានមន្ត្រីចុះបង្ក្រាប ដែលអាចធ្វើឱ្យព្រៃដ៏ធំមួយនេះ វិនាសបាត់បង់ទាំងស្រុងក្នុងរយៈពេលប៉ុន្មានឆ្នាំទៀតដ៏ខ្លីខាងមុខ។ ក្រុមសកម្មជនបញ្ជាក់ថា ដើមឈើធំៗ ក្នុងតំបន់ការពារ ត្រូវបានអារផ្ដួលរួចដឹកតាមម៉ូតូ គោយន្ត និងរថយន្តធំៗ លក់ទៅឱ្យក្រុមហ៊ុនរកស៊ីឈើ ដូចជាក្រុមហ៊ុន ស៊ីង បាយអូថេក (Think Biotech (Cambodia) Co., Ltd.) នៅខេត្តក្រចេះ និងក្រុមហ៊ុនវៀតណាម ភីអ៊ិនធី (PNT Co., Ltd.) នៅក្នុងខេត្តព្រះវិហារ។
មន្ត្រីសម្របសម្រួលគម្រោងនៃសមាគមបណ្ដាញយុវជនកម្ពុជា (CYN) និងអ្នកស្រាវជ្រាវបទល្មើសព្រៃឈើលោក អូត ឡាទីន ចាត់ទុកចំណាត់ការរបស់មេប៉េអិមលើផ្ទៃប្រទេសនៅពេលនេះ ថាជារឿងចម្លែក និងមិនស៊ីចង្វាក់គ្នានឹងការលើកឡើងពីមន្ត្រីក្រសួងបរិស្ថាន ដែលតែងដោះសាគេចវេះមិនទទួលខុសត្រូវ នៅពេលសកម្មជន ឬប្រជាពលរដ្ឋ នាំគ្នាផ្សព្វផ្សាយពីបទល្មើសព្រៃឈើកើតឡើង ដូចអ្វីដែលមេប៉េអិមបានលើកឡើងនៅពេលនេះ។
លោកបន្តថា កាលពីឆ្នាំ២០១៩ ក៏មានការប្រកាសចុះបង្ក្រាបដូចគ្នានេះដែរ និងបានឃាត់អ្នកកាងបទល្មើសព្រៃឈើ និងឧកញ៉ាមួយចំនួន រួមទាំងការដុតបំផ្លាញរថយន្តដឹកឈើ ប៉ុន្តែវិធានការក្ដៅនៅពេលនោះ អនុវត្តបានត្រឹមរយៈពេលខ្លី ហើយចាប់ពីឆ្នាំ២០១៩ដដែល ក៏បានស្ងប់ស្ងាត់ទៅវិញ រហូតបណ្ដាលឱ្យមានបទល្មើសព្រៃឈើកើតឡើងយ៉ាងគគ្រឹកគគ្រេងឡើងរហូតមកដល់ពេលនេះ។ លោក អូត ឡាទីន យល់ឃើញថា ការប្រកាសរបស់លោក សៅ សុខា នៅពេលនេះ ហាក់ដូចជាការបង្កើតព្រឹត្តិការណ៍ ទាក់ទាញប្រជាប្រិយនៅមុនការបោះឆ្នោត ដែលវាមិនបង្ហាញពីឆន្ទៈពិតប្រាកដក្នុងការអនុវត្តច្បាប់ឱ្យម៉ឺងម៉ាត់ឡើយ។
លោក អូត ឡាទីន៖ «វាហាក់បីដូចជាចម្លែក នៅសុខៗ ស្រាប់តែគាត់ចេញមកធ្វើការប្រតិកម្ម ហើយគាត់លើកឡើងដូចអ្វីដែលពួកយើងតែងធ្វើការផ្សព្វផ្សាយ។ អ៊ីចឹង! បានខ្ញុំយល់ឃើញថា ពេលខ្លះការបង្ក្រាបបទល្មើសនៅក្នុងស្ថានភាពដូចនេះ វាទំនងជាជាប់ពាក់ព័ន្ធនឹងការបំពេញចិត្តប្រជាពលរដ្ឋ នៅមុនរដូវកាលបោះឆ្នោតក៏ថាបាន អានេះគ្រាន់តែជាការយល់ឃើញរបស់ខ្ញុំ»។
សកម្មជនការពារព្រៃឈើរូបនេះយល់ឃើញថា ដើម្បីបង្ហាញឆន្ទៈពិតប្រាកដ រដ្ឋាភិបាលត្រូវបើកចំហឱ្យពលរដ្ឋ និងសកម្មជន អាចចូលរួមការពារព្រៃឈើឡើង ខណៈបច្ចុប្បន្នកំពុងត្រូវបានរឹតត្បិតពីក្រសួងបរិស្ថាន។ លើសពីនេះ លោក អូត ឡាទីន លើកឡើងថា អាជ្ញាធរថ្នាក់ជាតិត្រូវចេញអន្តរាគមន៍ជាបន្ទាន់ នៅពេលមានសេចក្ដីរាយការណ៍ពីបទល្មើសព្រៃឈើពីក្រុមសកម្មជនឬប្រជាពលរដ្ឋ ខណៈលោកបញ្ជាក់ថា អ្នកដែលអាចកាងឱ្យមានបទល្មើសព្រៃឈើកើតឡើងយ៉ាងសេរីនៅពេលនេះ មិនមែនជាបុគ្គលធម្មតាឡើយ សុទ្ធតែជាអ្នកមានអំណាច និងជាប់ពាក់ព័ន្ធនឹងមន្ត្រីក្រសួងបរិស្ថាន។
ជុំវិញរឿងនេះ វិទ្យុអាស៊ីសេរី មិនអាចសុំការបំភ្លឺពីអ្នកនាំពាក្យក្រសួងបរិស្ថានលោក នេត្រ ភក្ត្រា និងអ្នកនាំពាក្យក្រសួងកសិកម្ម រុក្ខាប្រមាញ់ និងនេសាទ កញ្ញា អ៊ឹម រចនា បានទេ នៅថ្ងៃទី២៧មេសា នេះ។
លោក អេង ហ៊ី បន្តថា លោក សៅ សុខា ក៏ដាក់ចេញផែនការច្បាស់លាស់បន្ថែមទៀត ដោយតម្រូវឱ្យបណ្ដារាជធានីខេត្តមានតំបន់ការពារនិងអភិរក្សព្រៃឈើ ត្រូវរៀបចំកងកម្លាំងត្រៀមនៅតាមគោលដៅមួយចំនួន ដែលអាចមានបទល្មើសកើតឡើង ហើយត្រូវអន្តរាគមន៍ភ្លាមៗ នៅពេលទទួលបានព័ត៌មាន ឬបញ្ជាពីថ្នាក់លើ។ លោកសង្ឃឹមថា ការដាក់ចេញផែនការនេះ នឹងអាចធ្វើឱ្យបទល្មើសព្រៃឈើចុះថយ។
ទោះជាយ៉ាងណាក៏ដោយ កន្លងមក លោក ហ៊ុន សែន ធ្លាប់បានប្រកាសកាត់កក្រវាត់ចោល ប្រសិនបើលោកមិនអាចទប់ស្កាត់ការបំផ្លាញព្រៃឈើ និងក្រោយមកទៀត លោកក៏បានបញ្ជាឱ្យបាញ់គ្រាប់រ៉ុកកែតពីឧទ្ធម្ភាគចក្រកម្ទេចក្រុមជនល្មើសកាប់ព្រៃឈើជាដើម ហើយកាលពីឆ្នាំ២០១៩ លោក សៅ សុខា ក៏ធ្លាប់បានប្រកាសដាក់ជីវិតរបស់លោកដែរ ប៉ុន្តែព្រៃឈើនៅតែត្រូវបានគេមើលឃើញថា បន្តបាត់បង់ដោយគ្មានការទប់ស្កាត់មកដល់ពេលនេះ៕
2 comments:
Applying the draconian measure against these perpetrators and stop fooling people.
I bet they painted the logs with stealth bomber coat of arm so at the border the inspectors could not see the logs as the trucks roll through. Now that is very stealthy of disguised.
Post a Comment