2023.04.09
យុវជនបក្សភ្លើងទៀន ២នាក់ត្រូវបានជនមិនស្គាល់មុខគំរាមសម្លាប់ និងព្រួតគ្នាដេញវាយនឹងដំបងដែកបណ្តាលឱ្យរងរបួសធ្ងន់ជាបន្តបន្ទាប់នៅរាជធានីភ្នំពេញ។ ជនរងគ្រោះចាត់ទុកករណីហិង្សានេះថា ជាការគំរាមកំហែងផ្នែកនយោបាយនៅមុនការបោះឆ្នោតថ្នាក់ជាតិខាងមុខនេះ។ មន្ត្រីសង្គមស៊ីវិលថ្កោលទោស និងជំរុញឱ្យសមត្ថកិច្ចវែកមុខក្រុមជនដៃដល់យកមកកាត់ទោសតាមច្បាប់ ដើម្បីផ្តល់យុត្តិធម៌ដល់ជនរងគ្រោះ និងស្រាយមន្ទិលសង្ស័យរបស់មហាជនទាក់ទងរឿងនយោបាយជាដើម។
ថ្នាក់ដឹកនាំចលនាយុវជនគណបក្សភ្លើងទៀនថ្នាក់ជាតិពីរនាក់ ចាត់ទុកអំពើហិង្សានេះថា ជាការប៉ុនប៉ងសម្លាប់ និងការធ្វើទុក្ខបុកម្នេញផ្នែកនយោបាយ ដើម្បីបំបាក់ស្មារតីចំពោះយុវជន និងប្រជាពលរដ្ឋដែលចូលរួមសកម្មភាពជាមួយបក្សភ្លើងទៀន នៅមុនការបោះឆ្នោតជ្រើសតាំងតំណាងរាស្ត្រនៅខែកក្កដាខាងមុខ។
ជនរងគ្រោះ និងជាសមាជិកចលនាយុវជនគណបក្សភ្លើងទៀនថ្នាក់ជាតិលោក គាត សុខចាន់ ប្រាប់វិទ្យុអាស៊ីសេរីថា ក្រោយពេលលោកចូលរួមលើបដាទាមទារឱ្យដោះលែងអ្នកទោសនយោបាយកាលពីល្ងាចថ្ងៃទី៧ ខែមេសា លុះព្រឹកឡើងលោកត្រូវជនមិនស្គាល់មុខវ័យចន្លោះ២០ទៅ៣០ឆ្នាំ មានគ្នា៤នាក់ ជិះម៉ូតូ២គ្រឿង ពាក់មួក និងម៉ាសព្រួតគ្នាវាយលោកនៅចំណុចមុខវត្តតាភេម សង្កាត់កំបូល រាជធានីភ្នំពេញនៅវេលាម៉ោង ៨ព្រឹកថ្ងៃទី០៨ ខែមេសា។ លោកថាជនដៃដល់ទាំងនោះប្រដាប់ដោយដែករលាស់ឆ្មក់វាយត្រូវលោកជិតដប់ដំបងបណ្តាលឱ្យដៃសងខាង ខ្នង ស្មា និងក្បាលរងរបួសខ្ទាំសាច់ដុំ និងឆ្អឹងធ្ងន់ធ្ងរ។ បច្ចុប្បន្នលោកកំពុងសម្រាកព្យាបាលនៅក្នុងមន្ទីរពេទ្យរដ្ឋដែលត្រូវការតាមដានអាការៈពីគ្រូពេទ្យបន្តទៀត ខណៈជីវភាពគ្រួសាររបស់លោកខ្វះខាតខ្លាំង។
លោក គាត សុខចាន់៖ «បច្ចុប្បន្នដៃរបស់ខ្ញុំកំពុងឈឺកាន់តែខ្លាំងដោយដៃខាងឆ្វេងហ្នឹងគឺគេវាយខ្លាំងបណ្តាលឱ្យលើកមិនរួចទេ ហើយខ្នងចាប់ផ្តើមឈឺបន្តិចៗ ចំណែកដៃស្តាំយើងអាចលើកបានតិចៗ។ ក្នុងនាមខ្ញុំជាជនរងគ្រោះខ្ញុំចង់ឱ្យសមត្ថកិច្ចគ្រប់លំដាប់ថ្នាក់ចាប់បុគ្គលដែលបង្កគ្រោះថ្នាក់ទៅដាក់ពន្ធនាគារឱ្យបាន ខ្ញុំចង់ឃើញសមត្ថកិច្ចអនុវត្តច្បាប់ទាំងអស់ហ្នឹងឱ្យបានល្អប្រសើរដើម្បីជាប្រយោជន៍ និងសេចក្តីសុខ សុវត្ថិភាពដល់យុវជន ព្រមទាំងប្រជាពលរដ្ឋទូទាំងប្រទេសកម្ពុជាឱ្យបានគ្រប់ៗគ្នា»។
ស្រដៀងគ្នានេះដែរ ជនរងគ្រោះម្នាក់ទៀត និងជាប្រធានស្តីទីចលនាយុវជនគណបក្សភ្លើងទៀនថ្នាក់ជាតិលោក ថន ចាន់ថា រៀបរាប់ថា ជនមិនស្គាល់អត្តសញ្ញាណពីរនាក់បើកបរម៉ូតូ ១គ្រឿងបានវាយលោកមួយដែករលាស់ពេញទំហឹងត្រូវស្មា នៅម្តុំបុរីសំណង់លំនៅឋានវាលស្បូវ ស្ថិតនៅសង្កាត់វាលស្បូវ ខណ្ឌច្បារអំពៅ នៅវេលាម៉ោង៧ព្រឹក កាលពីថ្ងៃទី០៦ ខែមេសា។ លោកបន្តថា មុនពេលជនល្មើសទាំងពីរជិះម៉ូតូគេចខ្លួននោះ ពួកគេបានយកដុំថ្មទម្ងន់ជាង១គីឡូក្រាមដេញតាមគប់បំបែកកញ្ចក់ឡានរបស់លោក ហើយថែមទាំងចង្អុលមុខ និងគំរាមសម្លាប់លោកទៀតផង។
លោក ថន ចាន់ថា៖ «កន្លងមកខ្ញុំអត់ដែលមានទំនាស់ជាមួយអ្នកណាទេ និយាយរួមទៅខ្ញុំជាមនុស្សមិនសូវនិយាយច្រើន តែចូលចិត្តរាប់អានអ្នកដទៃឱ្យតែឈ្លោះអីខ្ញុំដើរចេញហើយ។ ខ្ញុំយល់ថាអំពើហិង្សាមកលើរូបខ្ញុំហ្នឹង ជាការគំរាមកំហែង បំភិតបំភ័យផ្នែកនយោបាយ ដោយសារគេមើលឃើញថា ខ្ញុំជាថ្នាក់ដឹកនាំរបស់យុវជនបក្សភ្លើងទៀនផង ហើយយើងមានសកម្មភាពសកម្ម យើងតែងមានមុខនៅតាមមូលដ្ឋានចុះពង្រឹង បង្រៀនយុវជននៅតាមបណ្តាខេត្តផង»។
ក្រោយពីកើតហេតុភ្លាមៗជនរងគ្រោះទាំងពីរបានដាក់ពាក្យបណ្តឹងនៅប៉ុស្តិ៍នគរបាលរដ្ឋបាលសង្កាត់កំបូល និងប៉ុស្តិ៍នគរបាលរដ្ឋបាលសង្កាត់វាលស្បូវដែរ តែរហូតដល់ម៉ោងផ្សាយនេះសមត្ថកិច្ចនៅមិនទាន់ចាប់ខ្លួនជនដៃដល់ណាម្នាក់នៅឡើយទេ។
វិទ្យុអាស៊ីសេរីមិនអាចទាក់ទងអ្នកនាំពាក្យស្នងការដ្ឋាននគរបាលរាជធានីភ្នំពេញលោក សាន សុខសីហា និងនាយប៉ុស្តិ៍នគរបាលរដ្ឋបាលសង្កាត់កំបូលលោក ភិន ភាព ដើម្បីបកស្រាយជុំវិញហេតុការណ៍នេះបានទេ នៅថ្ងៃទី៨ ខែមេសា។ ចំណែកនាយប៉ុស្តិ៍នគរបាលរដ្ឋបាលសង្កាត់វាលស្បូវលោក ឆេង ចាន់ដារ៉ា ប្រាប់ថា លោកជាប់រវល់។
ទោះយ៉ាងណាជនរងគ្រោះអះអាងថា ពួកគាត់មិនមានជំនឿថា សមត្ថកិច្ចអាចផ្តល់យុត្តិធម៌បានឡើយ ព្រោះកន្លងមកបើទោះជាពួកគាត់ ព្យាយាមសហការជាមួយអាជ្ញាធរមានសមត្ថកិច្ចយ៉ាងណាក្តី តែជាក់ស្តែងមកទល់ពេលនេះ គ្មានករណីណាមួយដែលត្រូវបានអាជ្ញាធរបង្ហាញលទ្ធផលស៊ើបអង្កេតគួរឲ្យទុកចិត្ត ដើម្បីផ្តល់ទំនុកចិត្ត និងបញ្ចៀសការចោទប្រកាន់លើអាជ្ញាធរពាក់ព័ន្ធរឿងនយោបាយបានទេ។
ជុំវិញរឿងនេះ ប្រធានសមាគមការពារសិទ្ធិមនុស្សអាដហុដ (Adhoc) លោក នី សុខា កត់ស្គាល់ថារដូវកាលបោះឆ្នោតម្តងៗតែងកើតមាននូវអំពើហិង្សា ការវាយប្រហារលើសកម្មជនបក្សប្រឆាំង ជាពិសេសបក្សភ្លើងទៀនជាសកម្មជាហូរហែដែលបង្កបរិយាកាសនយោបាយមិនល្អនៅមុនការបោះឆ្នោត។ ទន្ទឹមនឹងនេះលោកបញ្ជាក់ថា ការបង្កហិង្សាបែបនេះជាបទល្មើសព្រហ្មទណ្ឌមិនអាចលើកលែង ឬបណ្តោយឱ្យជនប្រព្រឹត្តនៅក្រៅសំណាញ់ច្បាប់ឡើយ។
លោក នី សុខា៖ «បើសិនជាយើង(សមត្ថកិច្ច) មិនអាចរកជនប្រព្រឹត្ត ឬជនដៃដល់យកមកផ្ដន្ទាទោសបានទេ នោះបញ្ហាមន្ទិលសង្ស័យកាន់តែមានកម្រិតខ្ពស់ទៅៗ ព្រោះអ្នកដែលរងរបួសដោយសារគេវាយសុទ្ធតែជាសកម្មជនបក្សប្រឆាំង ដែលសកម្មៗទៀតផង និងធ្វើឱ្យមហាជនកាន់តែអស់ជំនឿខ្លាំងឡើងៗទៅ លើចំណាត់ការរបស់អាជ្ញាធរមានសមត្ថកិច្ច ហើយវាមិនស្របទៅនឹងអ្វីដែលយើងថា ប្រទេសយើងមានសន្តិភាព មានសុវត្ថិភាព មានសន្តិសុខ ភូមិឃុំមានសុវត្ថិភាពផ្សេងៗហាក់មិនអាចការពារ ធានានូវសុវត្ថិភាពជូនប្រជាពលរដ្ឋទូទៅបាន ជាពិសេសប្រជាពលរដ្ឋដែលមាននិន្នាការមិនស្របនឹងរដ្ឋាភិបាល»។
គិតមកដល់ពេលនេះ មានសកម្មជនសង្គម និងគណបក្សនយោបាយប្រមាណ ៥០នាក់ហើយ ដែលត្រូវជនមិនស្គាល់មុខបង្កហិង្សាបណ្តាលឲ្យរបួសធ្ងន់ធ្ងរ ហើយជនរងគ្រោះខ្លះបានស្លាប់ និងធ្លាក់ខ្លួនពិការអស់មួយជីវិត។ ករណីទាំងនោះច្រើនមានលក្ខណៈប្រហាក់ប្រហែលគ្នា គឺជនដៃដល់ជិះម៉ូតូពាក់មួកសុវត្ថិភាពព្រួតវាយ ឬលួចវាយជនរងគ្រោះពីក្រោយខ្នង ឬដេញធាក់ម៉ូតូផ្តួល ឬគប់ដុំថ្មចូលក្នុងផ្ទះ ហើយភាគច្រើនបំផុតអាជ្ញាធរមិនបានចាប់ខ្លួនជនដៃដល់យកមកផ្ដន្ទាទោសនោះទេ។ ជនរងគ្រោះខ្លះមិនត្រឹមតែមិនទទួលបានយុត្តិធម៌នោះទេ តែថែមទាំងត្រូវបានជនល្មើសលួចវាយប្រហារផ្ទួនៗគ្នាពីរលើក ហើយអ្នកខ្លះទៀត ថែមទាំងត្រូវបានអាជ្ញាធររបស់លោក ហ៊ុន សែន ចាប់ឃុំខ្លួនដាក់ក្នុងពន្ធនាគារទៀតផង។
ក្រុមអង្គការជាតិ និងអន្តរជាតិ រួមទាំងអង្គការសហប្រជាជាតិផង ព្រួយបារម្ភជាខ្លាំង ចំពោះអំពើហិង្សាលើសកម្មជនសង្គម និងសកម្មជននយោបាយជាញឹកញាប់នេះ។ ពួកគេចាត់ទុក ករណីទាំងនេះថា ជាការធ្វើទុក្ខបុកម្នេញលើអ្នកការពារសិទ្ធិមនុស្ស និងនយោបាយដែលត្រូវតែបញ្ឈប់ជាបន្ទាន់៕
1 comment:
Thank You peace for allowing the bad people to hurt the innocent people at will, without repercussion.
Post a Comment