ដោយ យាង សុជាមេត្តា rfa
2015-09-16
***
School of Vice:
The perennial persecution and discrimination of indigenous ethnic
minorities in Vietnam is a bleeding reality that is not going to come to
an end any time soon so long as Vietnam continues to deny even their
status and very existence as ethnic groups and, the rest of the world
keeps turning a blind eye to their plight.
***
អង្គការ ខ្មែរក្រោមនៅកម្ពុជា ស្នើឲ្យរដ្ឋាភិបាល និងអាជ្ញាធរខ្មែរ កុំឲ្យចាប់បញ្ជូនខ្មែរក្រោមនៅកម្ពុជា ត្រឡប់ទៅទឹកដីកំណើតកម្ពុជាក្រោមវិញ បើពួកគាត់ពុំទាន់មានលិខិតស្នាមរស់នៅនៅកម្ពុជា ត្រឹមត្រូវនៅឡើយ។ ការអំពាវនាវនេះ ដោយសារអង្គការខ្មែរក្រោមមើលឃើញថា អាជ្ញាធរខ្មែរមួយចំនួននៅចាត់ទុកខ្មែរក្រោម ថាជាជនជាតិវៀតណាម នៅឡើយ បើទោះជាច្បាប់កម្ពុជា បានធានាពីសញ្ជាតិខ្មែររបស់ខ្មែរក្រោមជាខ្មែរតែមួយក៏ដោយ។
អង្គការ សមាគមខ្មែរកម្ពុជាក្រោម ប៉ាន់ប្រមាណថា ពលរដ្ឋខ្មែរក្រោមដែលកំពុងរស់នៅលើទឹកដីនៃប្រទេសកម្ពុជា មានប្រហែល ១លាននាក់ ហើយប្រមាណ ៨លាននាក់ផ្សេងទៀត កំពុងរស់នៅលើទឹកដីកម្ពុជាក្រោមសព្វថ្ងៃ។
ខ្មែរក្រោម បាតុកម្មសង្គ្រោះជាតិ ៦១០ ព្រះសង្ឃ និងខ្មែរកម្ពុជាក្រោម ចូលរួមបាតុកម្មរបស់គណបក្សសង្គ្រោះជាតិ នាទីលានប្រជាធិបតេយ្យ កាលពីថ្ងៃទី២៤ ខែតុលា ឆ្នាំ២០១៣។ |
អង្គការ សមាគមខ្មែរកម្ពុជាក្រោម ប៉ាន់ប្រមាណដែរថា ក្នុងចំណោមពលរដ្ឋខ្មែរក្រោមដែលកំពុងរស់នៅកម្ពុជា សព្វថ្ងៃ ពលរដ្ឋប្រមាណ ៧០% មានលិខិតស្នាមរស់នៅត្រឹមត្រូវ ខណៈដែលខ្មែរក្រោមប្រមាណ ៣០% ទៀត គ្មានលិខិតស្នាមត្រឹមត្រូវឡើយ។ ការដែលមានខ្មែរក្រោមមួយចំនួន មិនទាន់មានលិខិតស្នាមរស់នៅត្រឹមត្រូវនេះហើយ ទើបធ្វើឲ្យអង្គការខ្មែរក្រោមនៅកម្ពុជា មានការបារម្ភ ស្របពេលដែលអាជ្ញាធរខ្មែរកំពុងចាត់វិធានការចាប់បញ្ជូនខ្លួនជន អន្តោប្រវេសន៍បរទេស ចេញពីប្រទេសកម្ពុជា ក្នុងនោះអាចមានខ្មែរក្រោមផងដែរ ដោយសារពួកគេមួយចំនួន និយាយភាសាខ្មែរមិនសូវច្បាស់ ដែលអាជ្ញាធរខ្មែរអាចនឹងច្រឡំថាជាជនជាតិវៀតណាម។
នាយក កម្មវិធីនៃសមាគមខ្មែរកម្ពុជាក្រោម ដើម្បីសិទ្ធិមនុស្ស និងអភិវឌ្ឍន៍ លោក សឺន ជុំជួន មានប្រសាសន៍ថា បញ្ហាប្រឈមធំបំផុតរបស់ខ្មែរក្រោមនៅកម្ពុជា គឺបញ្ហាអត្តសញ្ញាណនៃជនជាតិខ្មែររបស់ពួកគេ ពិសេសគឺខ្មែរក្រោមដែលទើបតែឡើងមករស់នៅក្នុងប្រទេសកម្ពុជា ក្នុងពេលថ្មីៗ។
នៅកម្ពុជាក្រោម ពលរដ្ឋខ្មែរទាំងអស់សុទ្ធតែប្រើប្រាស់អត្តសញ្ញាណប័ណ្ណសញ្ជាតិវៀតណាម។ ពួកគេក៏កាន់លិខិតឆ្លងដែនវៀតណាម ដែរ នៅពេលពួកគេធ្វើដំណើរឡើងមកប្រទេសកម្ពុជា។ ត្រង់ចំណុចនេះហើយ ដែលអាជ្ញាធរខ្មែរចាត់ទុកពួកគេថាជាជនជាតិវៀតណាម ហើយកន្លងមក ក៏ធ្លាប់ចាប់បញ្ជូនពួកគេត្រឡប់ទៅកាន់កម្ពុជាក្រោម វិញដែរ។
របាយការណ៍ អគ្គនាយកដ្ឋានជនអន្តោប្រវេសន៍ ឲ្យដឹងថា គិតត្រឹម ៨ខែចុងឆ្នាំ២០១៤ ជនអន្តោប្រវេសន៍ពុំមានលិខិតត្រឹមត្រូវជិត ២ពាន់នាក់ (១.៨០០នាក់) ក្នុងនោះជនជាតិវៀតណាម ១.៥០០នាក់ ត្រូវបានបណ្ដេញចេញពីកម្ពុជា។ នៅដើមឆ្នាំ២០១៥ វិញ អគ្គនាយកដ្ឋានជនអន្តោប្រវេសន៍ បានបណ្ដេញជនបរទេសខុសច្បាប់ ១.២០០នាក់បន្ថែមទៀត ក្នុងនោះពី ៩៥% ទៅ ៩៨% ជាជនជាតិវៀតណាម។ របាយការណ៍បន្តថា ក្រៅពីនេះវិញ មានជនជាតិវៀតណាម ប្រមាណពី ២០% ទៅ ៣០% នៅតែបន្តឆ្លងដែនចូលមកកម្ពុជា ដោយខុសច្បាប់ តាមរយៈប៉ុស្តិ៍ព្រំដែន និងច្រករបៀង។
លោក សឺន ជុំជួន បញ្ជាក់ថា បើទោះជាពលរដ្ឋខ្មែរក្រោមកាន់អត្តសញ្ញាណប័ណ្ណសញ្ជាតិ ឬលិខិតឆ្លងដែនវៀតណាម ក៏ដោយ ប៉ុន្តែនៅក្នុងអត្តសញ្ញាណប័ណ្ណ ឬលិខិតឆ្លងដែននោះបញ្ជាក់យ៉ាងច្បាស់ថា ខ្មែរក្រោមជាជនជាតិខ្មែរ ឬមានដើមកំណើតជាខ្មែរ។ ដូច្នេះ លោកថាវាមិនពិបាកសម្រាប់អាជ្ញាធរខ្មែរក្នុងការកំណត់ថា តើនរណាជាខ្មែរក្រោម ឬនរណាជាជនជាតិវៀតណាម នោះទេ? យ៉ាងណាក៏ដោយ លោក សឺន ជុំជួន ថាមានអាជ្ញាធរខ្មែរមួយចំនួននៅតែចាត់ទុកខ្មែរក្រោមជាជនជាតិ វៀតណាម នៅឡើយ បើទោះជាច្បាប់បានធានាពីអត្តសញ្ញាណជនជាតិខ្មែររបស់ពួកគេក៏ដោយ៖ «ខ្ញុំគិតថា ក្រសួងមហាផ្ទៃ ដែលមានសម្ដេច ស ខេង ជាប្រមុខគួរចេញជាលិខិត ឬសារាចរមួយឲ្យច្បាស់លាស់ ដើម្បីធ្វើយ៉ាងណាណែនាំដល់អាជ្ញាធរមូលដ្ឋានដែលជាអ្នកអនុវត្ត ផ្ទាល់ច្បាប់អន្តោប្រវេសន៍ ធ្វើយ៉ាងណាឲ្យមានការទទួលស្គាល់បងប្អូនខ្មែរក្រោម ដើម្បីជៀសវាងកុំឲ្យមានការភាន់ច្រឡំ ហើយមានការចាប់បញ្ជូនទៅកម្ពុជាក្រោមវិញ»។
លោក សឺន ជុំជួន មានប្រសាសន៍ថា ក្រៅពីបញ្ហាអត្តសញ្ញាណកម្មខ្មែរក្រោមនៅកម្ពុជា មួយចំនួន ក៏នៅមានបញ្ហាក្នុងការកាន់កាប់ដីធ្លីផងដែរ ដោយសារពួកគេគ្មានលិខិតស្នាមត្រឹមត្រូវ បើទោះជាពួកគេមករស់នៅកម្ពុជា យូរមកហើយក្តី។
ច្បាប់ សញ្ជាតិខ្មែរឆ្នាំ១៩៩៦ ចែងថា ត្រូវបានជាសញ្ជាតិខ្មែរ ទោះបីកើតនៅទីណាក៏ដោយ ឲ្យតែមានឪពុក ឬម្តាយមានសញ្ជាតិខ្មែរ។
វិទ្យុ អាស៊ីសេរី មិនអាចទាក់ទងអ្នកនាំពាក្យក្រសួងមហាផ្ទៃ លោក ខៀវ សុភ័គ ដើម្បីឆ្លើយតបនឹងការបារម្ភរបស់អង្គការខ្មែរក្រោមបានទេ នៅថ្ងៃទី១២ កញ្ញា។
ទោះជាយ៉ាងណា អ្នកនាំពាក្យរដ្ឋាភិបាល និងជារដ្ឋមន្ត្រីក្រសួងព័ត៌មាន លោក ខៀវ កាញារីទ្ធ។ លោកមានប្រសាសន៍កាលពីចុងខែសីហា ក្នុងជំនួបជាមួយគណៈកម្មាធិការសម្របសម្រួលខ្មែរកម្ពុជាក្រោម ហើយដែលត្រូវបានបណ្ដាញសារព័ត៌មាន អាកាប៉េ (AKP) ដកស្រង់សម្ដីចុះផ្សាយ។ លោក ខៀវ កាញារីទ្ធ ឲ្យដឹងនៅពេលនោះថា ប្រមុខរដ្ឋាភិបាលកម្ពុជា លោកនាយករដ្ឋមន្ត្រី ហ៊ុន សែន មិនដែលបោះបង់ពលរដ្ឋខ្មែរក្រោមចោលនោះទេ ហើយលោកតែងជួយគាំទ្រ និងជំរុញឲ្យពលរដ្ឋខ្មែរនៅកម្ពុជាក្រោម មានសាមគ្គីគ្នា និងបំពេញកិច្ចការ មានតួនាទី ព្រមទាំងមានឋានៈក្នុងជួររដ្ឋាភិបាល ដើម្បីជួយការពារពលរដ្ឋខ្មែរក្រោមឲ្យបានសុខសប្បាយ និងរីកចម្រើនទៅមុខ។
ការថ្លែងរបស់ លោក ខៀវ កាញារីទ្ធ បែបនេះ ធ្វើឡើងបន្ទាប់ពីគណៈកម្មាធិការសម្របសម្រួលខ្មែរកម្ពុជាក្រោម បានស្នើឲ្យរដ្ឋាភិបាលកម្ពុជា ជាពិសេសអាជ្ញាធរដែនដី ទទួលស្គាល់ខ្មែរក្រោមដែលរស់នៅក្នុងប្រទេសកម្ពុជា និងជួយចេញលិខិតស្នាម ដូចជាប័ណ្ណស្នាក់នៅ ប័ណ្ណគ្រួសារ និងអត្តសញ្ញាណប័ណ្ណសញ្ជាតិខ្មែរឲ្យខ្មែរក្រោម ជាដើម។
ការ លើកឡើងរបស់ លោក ខៀវ កាញារីទ្ធ នូវសម្ដីរបស់ លោក ហ៊ុន សែន នេះ ត្រូវបាន លោក សឺន ជុំជួន សាទរ។ យ៉ាងណា លោក សឺន ជុំជួន ស្នើឲ្យអាជ្ញាធរមូលដ្ឋាន គួរអនុវត្តទៅតាមប្រសាសន៍របស់ លោក ហ៊ុន សែន ឲ្យសមទៅនឹងការយកចិត្តទុកដាក់របស់លោក ទៅដល់ខ្មែរក្រោម៖ «យើងមើលឃើញថា អាជ្ញាធរខ្មែរមួយចំនួនគាត់នៅតែចាត់ទុកខ្មែរមកពីកម្ពុជាក្រោម ថាជាខ្មែរទេ គាត់នៅតែចាត់ទុកថាជាជនជាតិវៀតណាម ទៅវិញ នេះជាចំណុចពិបាកមួយសម្រាប់ខ្មែរក្រោមនៅកម្ពុជា»។
របាយការណ៍ ស្រាវជ្រាវរបស់ក្រុមស្រាវជ្រាវសន្តិភាព នៃអង្គការក្រុមការងារដើម្បីដោះស្រាយទំនាស់ កាលពីខែមីនា ឆ្នាំ២០១៥ បង្ហាញថា ពលរដ្ឋខ្មែរនៅកម្ពុជាក្រោម រស់នៅមានភាពតែលតោល គ្មានសិទ្ធិសេរីភាព គ្មានទីពឹងពាក់ រស់នៅដោយការភ័យខ្លាច និងអស់សង្ឃឹម។ កន្លងមក គេក៏ធ្លាប់ឮខ្មែរក្រោមរអ៊ូរទាំផងដែរថា ពេលនៅកម្ពុជាក្រោម វៀតណាម ហៅពួកគេថាខ្មែរ ដល់ពេលមកដល់កម្ពុជា ខ្មែរបែរជាហៅពួកគេថាវៀតណាម ទៅវិញ។
ទាក់ទងនឹងរឿង ពលរដ្ឋខ្មែរក្រោមនេះដែរ ព្រះរាជសេចក្តីថ្លែងការណ៍របស់អតីតព្រះមហាក្សត្រខ្មែរ សម្ដេចព្រះនរោត្តម សីហនុ ចុះថ្ងៃទី២១ ខែឧសភា ឆ្នាំ២០០៦ សម្ដេចព្រះនរោត្តម សីហនុ ព្រះអង្គមានព្រះរាជបន្ទូលថា នៅក្នុងសម័យសង្គមរាស្ត្រនិយម រដ្ឋាភិបាលបានផ្តល់ជូនជនរួមជាតិខ្មែរដែលមានដើមកំណើតនៅកម្ពុជា ក្រោម ឲ្យទទួលបានយ៉ាងពេញចិត្តពេញថ្លើម នូវរាល់សិទ្ធិដូចពលរដ្ឋខ្មែរនៅកម្ពុជា ទទួលបានពីរដ្ឋាភិបាលនៃរបបសង្គមរាស្ត្រនិយមរបស់ព្រះអង្គអ៊ីចឹង ដែរ។
ព្រះអង្គមានព្រះបន្ទូលបន្ថែមថា ព្រះអង្គគាំទ្រសំណើសុំទាមទារសិទ្ធិរបស់ខ្មែរក្រោមនៅកម្ពុជា ក្នុងការទទួលបាននូវអត្តសញ្ញាណប័ណ្ណ ប័ណ្ណគ្រួសារ ការចុះបញ្ជីអត្រានុកូលដ្ឋាន និងលិខិតឆ្លងដែន ជាដើម៕
No comments:
Post a Comment