 |
អនុប្រធានគណបក្សសង្គ្រោះជាតិ និងជាអនុប្រធានទី១ រដ្ឋសភា លោក កឹម
សុខា (ឆ្វេង) និងឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ លោក ស ខេង
(ស្ដាំ)។
RFA
|
ដោយ ម៉ម មុនីរតន៍
2015-09-16 rfa
អ្នកវិភាគនយោបាយយល់ឃើញថា ប្រសិនបើអ្នកនយោបាយទាំងពីរបក្សបន្តជួបពិគ្រោះយោបល់ដើម្បីរកច្រកចេញពីវិបត្តិនៃការខ្វែងគំនិតគ្នាពីបញ្ហាផែនទី និងព្រំដែននេះ គឺជាយន្តការតែមួយគត់ដែលអាចបញ្ចប់ភាពប្រេះឆានេះបាន។
មន្ត្រីគណបក្សប្រជាជនកម្ពុជា បញ្ជាក់ថា ខ្លួនសាទរចំពោះគំនិតផ្ដួចផ្ដើមរបស់គណបក្សសង្គ្រោះជាតិ ប្រសិនបើគម្រោងនៃការជួបពិភាក្សាគ្នាពិតជាកើតឡើងដូចការគ្រោងទុកមែននោះ។
អ្នកវិភាគលើកឡើងថា ការយកជម្រើសនៃការស្វែងរកលទ្ធភាពជួបពិភាក្សាគ្នា និងការយោគយល់ផ្នែកនយោបាយនេះ គឺស្របពេលអនុប្រធានគណបក្សសង្គ្រោះជាតិ មានគម្រោងណាត់ជួបពិគ្រោះយោបល់ជាមួយគណបក្សគណបក្សប្រជាជនកម្ពុជា ដោយផ្ដោតលើរបៀបវារៈពីការបោះឆ្នោត និងអាចពិភាក្សាដែរអំពីស្ថានភាពនយោបាយក្នុងពេលបច្ចុប្បន្ន នៅសប្ដាហ៍ក្រោយនេះ។
លោក រស់ រ៉ាវុធ សាស្ត្រាចារ្យផ្នែកវិទ្យាសាស្ត្រផ្នែកនយោបាយ ហៅការប្រកាន់ជំហររបស់មេដឹកនាំកំពូលនៃបក្សនយោបាយទាំងពីរនៅពេលនេះ ដើម្បីបើកផ្លូវឲ្យមានការជួបចរចាថា ជាយុទ្ធសាស្ត្រដែលធ្វើឲ្យអ្នកចំណេញគឺប្រជាពលរដ្ឋ។ លើសពីនេះទៀត អាចធ្វើឲ្យនយោបាយផ្ទៃក្នុងមានការឯកភាពគ្នាល្អ ហើយបង្ហាញបរទេសថា កម្ពុជាមានភាពរឹងមាំ។
ម្យ៉ាងវិញទៀត អ្នកនយោបាយអាចនៅតែរក្សាបានកិច្ចព្រមព្រៀងថ្ងៃបញ្ចប់ជម្លោះនយោបាយ ២២ កក្កដា ដែលបក្សទាំងពីរប្រកាន់យកវប្បធម៌សន្ទនាជាធំក្នុងការដោះស្រាយបញ្ហាជាតិនោះ៖ «ជជែកគ្នាតាមនីតិវិធី រកយុទ្ធសាស្ត្រណាសម្រាប់ដោះស្រាយសម្រាប់ជាតិនោះ គឺប្រជាពលរដ្ឋសំដែងការពេញចិត្ត បរទេសមានការភ័យខ្លាចចំពោះប្រទេសកម្ពុជា ឬមានការភ័យខ្លាចចំពោះខ្មែរដែលមានការព្រមព្រៀងគ្នាក្នុងដំណោះស្រាយជាអន្តរជាតិ»។
ជុំវិញជម្លោះផ្ទៃក្នុងនេះ កម្ពុជាធ្លាប់មានពិសោធន៍ម្ដងរួចមកហើយ កាលពី ៣០ឆ្នាំមុន។ អ្នកវិភាគយល់ឃើញថា ដោយសារមានកិច្ចព្រមព្រៀង និងការចរចាជំនួបកំពូលផ្នែកនយោបាយ កាលណោះ គឺកិច្ចព្រមព្រៀងទីក្រុងប៉ារីស ថ្ងៃ២៣ ខែតុលា ឆ្នាំ១៩៩១ ដែលជាដើមចមនាំឲ្យមានសន្តិភាព និងបញ្ចប់ការប្រេះឆាផ្ទៃក្នុងនយោបាយនៅកម្ពុជា រហូតមកដល់ពេលនេះបាន។
អនុប្រធានគណបក្សសង្គ្រោះជាតិ និងជាអនុប្រធានទីមួយនៃរដ្ឋសភាផង លោក កឹម សុខា ឲ្យដឹងនៅថ្ងៃទី១៦ ខែកញ្ញា ថា នៅសប្ដាហ៍ក្រោយនេះ គណបក្សជំទាស់គ្រោងដាក់លិខិតណាត់ជួបគណបក្សកាន់អំណាច ដើម្បីពិនិត្យ និងពិភាក្សាកិច្ចការបន្តទៅមុខទៀត ជាពិសេស អំពីដំណើរការនៃបោះឆ្នោត។
បើទោះជាបែបណា លោក កឹម សុខា ពុំបានឆ្លើយតបណាមួយថា តើគណបក្សសង្រ្គោះជាតិ នឹងលើកពីរបៀបវារៈការចាប់ឃុំសកម្មជនគណបក្សខ្លួន និងស្នើឲ្យមានការដោះលែងចេញពីពន្ធនាគារវិញដែរ ឬយ៉ាងណានោះទេ៖ «ធម្មតាយើងមិនអាចប្រាប់មុនទេ។ កិច្ចការដែលយើងត្រូវជជែកមានច្រើនទៀត។ ទាំងអស់ហ្នឹងសុទ្ធតែពាក់ព័ន្ធរឿងបោះឆ្នោតទាំងអស់»។
បើទោះជាបែបណា ការប្រកាសជំហរដូចនេះរបស់លោក កឹម សុខា នៅបន្ទាប់ពីមេដឹកនាំគណបក្សជំទាស់ បានបង្ហាញភាពស្ងប់ស្ងាត់ក្រោយពីលោក ហ៊ុន សែន ព្រមានចាត់វិធានការដោយមិនយោគយល់តាមផ្លូវច្បាប់ ប្រឆាំងអ្នកដែលហ៊ានរិះគន់ថា រដ្ឋាភិបាលប្រើផែនទីក្លែងក្លាយ និងអ្នកណាដែលព្យាយាមចង់ធ្វើបដិវត្តន៍ពណ៌នោះ គឺត្រូវចាប់ខ្លួននៅនឹងកន្លែង។
បញ្ហានេះ ទាំងលោក សម រង្ស៊ី និង លោក កឹម សុខា ក្រោយត្រឡប់ពីបំពេញទស្សនកិច្ចនៅបរទេសវិញ ក្នុងពេលខុសៗគ្នា បានបង្ហាញជំហរស្ងៀមស្ងាត់។ រលកនយោបាយបក្សប្រឆាំង ដែលមិនកម្រើកអ្វីទាំងអស់នេះ កើតឡើងមួយថ្ងៃប៉ុណ្ណោះ មុនលោក ហ៊ុន សែន ព្រមានធ្ងន់ៗថា នឹងចាប់ដាក់គុកអ្នកដែលនៅតែចចេសរិះគន់អំពីផែនទី និងបញ្ហាព្រំដែនរវាងកម្ពុជា-វៀតណាម ទៀតនោះ។ នេះអាចរាប់បានថា ជាលើកទីមួយហើយ ក្រោយពីត្រឡប់ពីបរទេសវិញ ដែលលោក កឹម សុខា បញ្ជាក់ជំហរស្វែងរកមធ្យោបាយណាត់ជួបមន្ត្រីក្នុងគណបក្សប្រជាជនកម្ពុជា។
ជុំវិញរឿងនេះ លោក សុខ ឥសាន មន្ត្រីនាំពាក្យគណបក្សប្រជាជនកម្ពុជា អះអាងថា គណបក្សដែលគ្រប់គ្រងរដ្ឋាភិបាលនេះ នឹងមិនចង្អៀតចង្អល់ក្នុងការណាត់ជួបឡើយ។ ក្រៅពីនេះ លោកផ្ដល់ជាចម្លើយទៅវិញថា បើជំនួបនយោបាយលើកនេះជាកិច្ចពិគ្រោះយោបល់ធ្វើឡើងដោយស្មោះត្រង់ទៅវិញទៅមកនោះ វាគួរជាកិច្ចពិភាក្សាដែលមិនត្រូវលើកយកពីរឿងព្រហ្មទណ្ឌ ជំនួសឲ្យការអត់អោនផ្នែកនយោបាយឡើយ ទើបចាត់ទុកថា ជាជម្រើសដ៏ប្រសើរ។ យ៉ាងណាលោក សុខ ឥសាន នៅតែចាត់ទុក និងឲ្យតម្លៃការជួបពិគ្រោះយោបល់ថា ជាច្រកចេញផ្នែកនយោបាយតែមួយ ដែលអាចដោះស្រាយបញ្ហាបាន៖ «ខ្ញុំយល់ ថា ការជួបវាប្រសើរជាងការមិនជួប។ កាលណាបានជួប គឺយើងបានពិភាក្សាគ្នា ហើយតែយើងពិភាក្សាគ្នា វាអាចមានការយោគយល់គ្នា»។
អ្នកវិភាគនយោបាយបញ្ជាក់ថា ជាស្តង់ដារសកល ការដោះស្រាយវិវាទទៅបាន មានតែភាគីជម្លោះលើកយកបញ្ហាដាក់លើតុចរចាទេ ទើបអាចបញ្ចប់ជម្លោះបាន៕
No comments:
Post a Comment