ទីកម្សាន្ដដូនម៉ៅពេជ្រនិលក្បែរអតីតបញ្ជរបង់ប្រាក់ទី ២
 |
| ភ្ញៀវទេសចរដើរលេងកម្សាន្ដនៅស្ពានយោលឆ្លងកាត់ស្ទឹងដែលមានទេសភាពគួរឲ្យគយគន់។ ផា លីណា |
ព្រះសីហនុ: សម្រែកចេញពីពោះពោរពេញដោយក្ដីរំភើបរីករាយបានបន្លឺឡើងពេលកៅអីថ្នក់រត់តាមខ្សែរ៉តនាំអ្នកជិះវាសំដៅចូលទឹកយ៉ាងលឿនស្លេវ ទាក់ទាញក្រសែភ្នែកដ៏ភ្ញាក់ផ្អើលពីអ្នកអង្គុយនៅក្យូសជាច្រើនដែលសង់ប្របទឹកស្ទឹងច្រាល។
ខណៈអាហារថ្ងៃ មាន់ដុត ស្ងោរជ្រក់ត្រី និងភ្លាសាច់គោ នៅមិនទាន់ចម្អិនរួចរាល់ ធម្មតា ភ្ញៀវខ្លះជិះទូកទា ទូកត្នោត គយគន់ទេសភាពតាមដងស្ទឹង ហើយអ្នកខ្លះទៀតជិះកន្រ្ដករ៉ត និងថតរូបលេងលើស្ពានយោលឆ្លងកាត់ស្ទឹងក្រោមជំនោរត្រជាក់ល្ហឹមបក់កាត់កេសា។
ចំណោមមុខម្ហូបទាំងអស់ មាន់ដុតមានការពេញនិយមជាងគេ ជាមួយតម្លៃពី ៤ ម៉ឺន ទៅ ៤៥០០០ រៀល អាស្រ័យលើទំហំ។ ក្នុងគោលបំណងផ្ដល់ជាទីកន្លែងសម្រាកលម្ហែសម្រាប់ភ្ញៀវធ្វើដំណើរឆ្លងកាត់ក្រុងព្រះសីហនុ និងរាជធានីភ្នំពេញ រមណីយដ្ឋានដូនម៉ៅពេជ្រនិល ស្ថិតនៅក្នុងភូមិស្ទឹងច្រាល ឃុំស្ទឹងច្រាល ស្រុកកំពង់សិលា ខេត្ដព្រះសីហនុ ក្បែរអតីតបញ្ជរបង់ប្រាក់រថយន្ដទីពីរ មានក្យូសសង់ក្បែរមាត់ស្ទឹង ទូកកម្សាន្ដ គយគន់សួនបន្លែ និងចម្ការម្រេច ព្រមទាំងផ្ដល់សេវាកម្មអាហារកុម្ម៉ង់ឈ្ងុយឆ្ងាញ់ពិសា។
ការកម្សាន្ដដ៏រំជើបរំជួលជាមួយការជិះកន្រ្ដកខ្សែរ៉តដែលនាំភ្ញៀវបោះពួយពីដីគោកចូលក្នុងទឹក។ ផា លីណា
លោក ប៉ែន ប្រសិទ្ធី ម្ចាស់រមណីយដ្ឋានកែច្នៃដែលទើបបើកសម្ពោធបានជាង ១ ឆ្នាំនេះ បានឲ្យដឹងថា៖ «កាលពីទើបសង់ដំបូង យើងមានក្យូសតាមមាត់ស្ទឹងជាច្រើន។ ប៉ុន្ដែនៅពេលទឹកជន់ខ្លាំងនារដូវវស្សា កម្លាំងទឹកបានបោកបក់អស់ ១០ ក្យូស។ ដូច្នេះ សព្វថ្ងៃ ក្យូសដែលអាចដំណើរការបានមានចំនួន ១៦ ក្យូសធំៗ»។
ចំពោះសេវាកម្មទូកកម្សាន្ដ លោក ប្រសិទ្ធី បានប្រាប់ឲ្យដឹងអំពីតម្លៃរបស់វាថា រមណីយដ្ឋានរបស់លោកមានទូកទាសម្រាប់ជួលក្នុងមួយម៉ោង ១ ម៉ឺនរៀល ទូកត្នោត ៥ ពាន់រៀល ព្រមទាំងមានកន្រ្ដកខ្សែរ៉តពីរខ្សែសម្រាប់ភ្ញៀវជិះងូតទឹកលេងដោយឥតគិតថ្លៃថែមទៀតផង។
កាំប្រមាចិញ្ចឹមក្នុងទ្រុង។ ផា លីណា
លោកបានប្រាប់ថា ភ្ញៀវធ្វើដំណើរឆ្លងកាត់ក្រុងព្រះសីហនុ និងភ្នំពេលដែលគ្រាន់តែចង់អង្គុយលេង ឬទទួលទានអាហារផ្ទាល់ខ្លួន ពួកគេអាចជួលតែក្យូសក្នុងតម្លៃ ១៥០០០ រៀល។ លោក ប្រសិទ្ធី បានប្រាប់ទៀតថា៖ «យើងមានសេវាកម្មផ្ទះសំណាក់ចំនួន ៨ បន្ទប់ ដែលមានតម្លៃចាប់ពី ៨ ទៅ ១០ ដុល្លារក្នុងមួយយប់»។
ក្រៅពីសេវាកម្មខាងលើ រមណីយដ្ឋាននៅក្បែរបញ្ជរបង់ប្រាក់ទី ២ នេះ ក៏មានផ្ទៃដីធំល្វឹងល្វើយសម្រាប់ដាំដំណាំផ្គត់ផ្គង់ដល់ភ្ញៀវដែលប្រាថ្នាបន្លែបង្ការសរីរាង្គផងដែរ។ទៅបីយ៉ាងណា ភ្ញៀវដែលហ៊ានចំណាយប្រាក់រាប់ម៉ឺនចំពោះការកុម្ម៉ង់អាហារ ជួលក្យូស ឬជួលទូកកម្សាន្ដ មានការត្អូញត្អែរខ្លះចំពោះការបង់ប្រាក់ចូលតំបន់រមណីយដ្ឋាន៕
No comments:
Post a Comment