ដោយ សាន សែល
2016-02-11 rfa
 |
លោក ញឹក ប៊ុនឆៃ អតីតអនុប្រធានគណបក្សហ៊្វុនស៊ិនប៉ិច ធ្វើសន្និសីទប្រកាសបង្កើតគណបក្សថ្មី នៅថ្ងៃទី៣ ខែកុម្ភៈ ឆ្នាំ២០១៦។ RFA/San Sel |
ក្រសួងមហាផ្ទៃ បដិសេធសញ្ញាសម្គាល់របស់គណបក្សខ្មែររួបរួមជាតិ របស់ លោក ញឹក ប៊ុនឆៃ ដោយស្នើឲ្យផ្លាស់ប្ដូរសញ្ញាសម្គាល់របស់គណបក្សឲ្យស្របទៅតាមច្បាប់កំណត់។
លិខិតរបស់ក្រសួងមហាផ្ទៃ នៅថ្ងៃទី១០ កុម្ភៈ បានសំអាងច្បាប់ស្ដីពីគណបក្សនយោបាយ ត្រង់មាត្រា១១ ក្នុងចំណុចទី១ និងទី៣ បានចែងថា ឈ្មោះជាអក្សរពេញ ជាអក្សរកាត់ និងសញ្ញាសម្គាល់របស់គណបក្សនយោបាយ ត្រូវតែខុសគ្នាពីគណបក្សនយោបាយផ្សេងទៀត។
ករណីនេះ សញ្ញាសម្គាល់របស់គណបក្សខ្មែររួបរួមជាតិ ដែលត្រូវបានដាក់បង្ហាញកន្លងមក ស្រដៀងទៅនឹងសញ្ញាសម្គាល់របស់គណបក្សហ៊្វុនស៊ិនប៉ិច ទាំងពណ៌ និងសញ្ញា ខុសតែឈ្មោះគណបក្សប៉ុណ្ណោះ។
លោក ញឹក ប៊ុនឆៃ តំណាងស្ថាបនិកគណបក្សខ្មែររួបរួមជាតិ ថ្លែងថា ក្រុមរបស់លោកកំពុងរចនាបង្កើតសញ្ញាសម្គាល់ថ្មី ដែលបញ្ជាក់អត្ថន័យគាំទ្ររាជានិយម និងប្រជាធិបតេយ្យ។ លោកបញ្ជាក់ថា គណបក្សរបស់លោកនឹងបញ្ជូនសញ្ញាសម្គាល់ថ្មីជូនក្រសួងមហាផ្ទៃ ពិនិត្យឡើងវិញ នៅព្រឹកថ្ងៃទី១២ កុម្ភៈ៖ «ទាក់ទងរឿងពណ៌ដែរ។ ពណ៌ស្វាយ ពណ៌លឿង តំណាងឲ្យរាជានិយម សីហនុ និយម។ វាសម្គាល់ដោយពណ៌នេះឯង។ ការគិតគូរម៉ត់ចត់ដែលអាចបង្ហាញថា យើងដាក់ពណ៌ហ្នឹងតំណាងឲ្យអី»។
លោក ញឹក ប៊ុនឆៃ បានដាក់ពាក្យសុំបង្កើតគណបក្សថ្មីមួយឈ្មោះ គណបក្សខ្មែររួបរួមជាតិ កាលពីថ្ងៃទី៣ កុម្ភៈ បន្ទាប់ពីមានភាពមិនចុះសម្រុងជាមួយសម្ដេចក្រុមព្រះ នរោត្តម រណឫទ្ធិ៕
No comments:
Post a Comment