ដោយ ប្រាជ្ញ ចេវ
2016-02-13
លោក កឹម សុខា អនុប្រធានគណបក្សសង្គ្រោះជាតិ ថ្លែងក្នុងវេទិកាសកម្មជនមូលដ្ឋានគណបក្ស នាក្រុងបាត់ដំបង ខេត្តបាត់ដំបង នៅថ្ងៃទី១៣ ខែកុម្ភៈ ឆ្នាំ២០១៦។
RFA/Hum Chamroeun
លោក កឹម សុខា ប្រធានស្ដីទីគណបក្សសង្គ្រោះជាតិ ប្រកាសថា គណបក្សសង្គ្រោះជាតិ មិនអនុញ្ញាតឲ្យកងកម្លាំង និងមន្ត្រីរាជការធ្វើជាក្រុមការងារគណបក្សដើម្បីមកឃោសនាឲ្យគណបក្សនោះទេ។ សង្គមស៊ីវិលធ្វើការងារទាក់ទងរឿងបោះឆ្នោតសាទរ ប៉ុន្តែគណបក្សកាន់អំណាចថា ជំហរបែបនេះ គឺប៉ះពាល់ដល់សិទ្ធិរបស់ពលរដ្ឋក្នុងកិច្ចការនយោបាយ ព្រោះកងកម្លាំង និងមន្ត្រីរាជការក៏ជាពលរដ្ឋដែរ។
គណបក្សសង្គ្រោះជាតិ ប្រកាសថា មិនត្រូវការកងកម្លាំង ឬមន្ត្រីឃោសនាឲ្យខ្លួនទេ ប៉ុន្តែប្រសិនបើអ្នកទាំងនោះស្រលាញ់គណបក្សមួយណា ពួកគេអាចបោះឆ្នោតគាំទ្របាន។ ការលើកឡើងរបស់ប្រមុខគណបក្សប្រឆាំងនៅពេលនេះ ហាក់ចង់ឌឺដងទៅគណបក្សប្រជាជនកម្ពុជា ដែលកំពុងកាន់អំណាចសព្វថ្ងៃ ខណៈគណបក្សមួយនេះ មានសមាជិកនៅក្នុងជួរបក្សដែលមានតួនាទីជាកងកម្លាំង ឬមន្ត្រីរាជការ ដែលជាញឹកញាប់អ្នកទាំងនោះតែងចុះមូលដ្ឋានដើម្បីពង្រឹងបក្ស។
ប្រធានស្ដីទីគណបក្សសង្គ្រោះជាតិ លោក កឹម សុខា ថា គណបក្សសង្គ្រោះជាតិ មិនត្រូវការកងកម្លាំង និងមន្ត្រីរាជការឲ្យបម្រើគណបក្សសង្គ្រោះជាតិទេ។ ប៉ុន្តែលោកទាមទារឲ្យអ្នកទាំងនោះត្រូវធ្វើការដោយអព្យាក្រឹត ឯករាជ្យ ដើម្បីត្រូវបម្រើជាតិ បម្រើពលរដ្ឋ មិនចាំបាច់បម្រើគណបក្សនយោបាយណាមួយ ឬបម្រើគណបក្សសង្គ្រោះជាតិ ឡើយ៖ «សុំឲ្យកងកម្លាំង និងមន្ត្រីរាជការ លោកស្រលាញ់គណបក្សណាទៅបោះឆ្នោតឲ្យគណបក្សនោះទៅ មិនបាច់ឃោសនាឲ្យគណបក្សសង្គ្រោះជាតិ មន្ត្រីរាជការត្រូវអព្យាក្រឹត»។
លោក កឹម សុខា លើកឡើងបែបនេះ ក្នុងវេទិកាសកម្មជនមូលដ្ឋានខេត្តបាត់ដំបង ថ្ងៃទី១៣ ខែកុម្ភៈ។
នាយកប្រតិបត្តិនៃគណៈកម្មាធិការដើម្បីការបោះឆ្នោតដោយសេរី និងយុត្តិធម៌នៅកម្ពុជា ហៅកាត់ថា ខុមហ្វ្រែល (COMFREL) លោក គល់ បញ្ញា យល់ថា ការលើកឡើងបែបនេះ ជាការគោរព្ធច្បាប់ ព្រោះកងកម្លាំង មិនតម្រូវឲ្យធ្វើសកម្មភាពគាំទ្រគណបក្សណាមួយទេ ព្រោះអ្នកទាំងនោះមានតួនាទីរក្សាសន្តិសុខ សន្តិភាព និងជាអ្នកឯករាជ្យ។ ប៉ុន្តែសព្វថ្ងៃនេះ គណបក្សកាន់អំណាចបានយកកងកម្លាំង មន្ត្រីរាជការ ធ្វើការងារឲ្យគណបក្សជាប្រព័ន្ធ៖ «តុលាការឲ្យឯករាជ្យ កងយុទ្ធពលខេមរភូមិន្ទ និងមន្ត្រីតុលាការត្រូវឯករាជ្យ ព្រោះពួកគាត់សំខាន់ណាស់»។
បើទោះមានការលើកឡើងរបស់គណបក្សប្រឆាំង ប៉ុន្តែគេកម្រឃើញកងកម្លាំង ឬមន្ត្រីរាជការហ៊ានចេញមុខមកគាំទ្រ ឬឃោសនាឲ្យគណបក្សសង្គ្រោះជាតិណាស់។ ទោះយ៉ាងនេះក្ដីលោក គល់ បញ្ញា យល់ថា នៅពេលនេះ គណបក្សនយោបាយហ៊ានលើករឿងនេះមកនិយាយជារឿងល្អ។
ចំណែកអ្នកនាំពាក្យគណបក្សប្រជាជនកម្ពុជា លោក សុខ ឥសាន មិនយល់ស្របដូចនេះទេ។ លោក សុខ ឥសាន និយាយថា កងកម្លាំង ឬមន្ត្រីរាជការ ក៏ជាពលរដ្ឋដែរ ដូច្នេះពួកគេមានសិទ្ធិធ្វើសកម្មភាពគាំទ្រគណបក្សនយោបាយណាដែលខ្លួនស្រលាញ់ពេញចិត្ត។ លោកពន្យល់ថា អ្នកទាំងនោះ ធ្វើសកម្មភាពឃោសនាក្រៅម៉ោងស្នូលការងាររបស់រដ្ឋ និងមិនមានឯកសណ្ឋានជាកងកម្លាំងមកបម្រើប្រយោជន៍សម្រាប់ការងារបក្ស៖ «នេះ ជាការឃោសនានយោបាយបំភាន់មតិសាធារណជន ព្រោះថា កងកម្លាំងសុទ្ធតែជាពលរដ្ឋ កន្លងទៅច្បាប់មានចែងហើយ កងទ័ពមានច្បាប់កងទ័ព ប៉ុន្តែជាពលរដ្ឋនៅតែមានដដែល»។
លោក កែម ឡី អ្នកសិក្សាការអភិវឌ្ឍសង្គម មានប្រសាសន៍ថា គោលនយោបាយរបស់គណបក្សនយោបាយដែលជំរុញឲ្យកងកម្លាំង ឬមន្ត្រីរាជការនៅអព្យាក្រឹត ធ្វើឲ្យប្រទេសមានស្ថិរភាព។ លោកថា កន្លងមកនៅពេលបោះឆ្នោតម្តងៗ កងកម្លាំងតែងតែបង្កការព្រួយបារម្ភដល់ពលរដ្ឋ។
កាលពីថ្ងៃទី១៩ ខែតុលា ឆ្នាំ២០១៥ លោកនាយករដ្ឋមន្ត្រី ហ៊ុន សែន ថ្លែងថា មេប៉ូលិស មេទាហាន ឬអភិបាលខេត្ត នឹងប្រឆាំងគណបក្សសង្គ្រោះជាតិ ប្រសិនបើគណបក្សនេះឈ្នះឆ្នោត ហើយមិនគោរពសន្យារឿងរក្សាតួនាទី៖ «ហ៊ានប៉ះពាល់ នេត សាវឿន ប៉ះ ប៉ុល សារឿន ពួកនេះទាញកម្លាំងដាក់ផឹង ហ្អែងសន្យាថា អត់ដកអញ ឥឡូវដកអញ»។
លោក ហ៊ុន សែន ថ្លែងជាសាធារណៈញឹកញាប់ណាស់ថា បើគណបក្សសង្គ្រោះជាតិ ឈ្នះឆ្នោតនឹងមានសង្គ្រាម។ ដូចគ្នានេះដែរ មេទាហានផ្កាយមាស៤ នៃកងយោធពលខេមរភូមិន្ទ លោក ជា តារា ធ្លាប់លើកឡើងថា កងទ័ពជាតិជាកងទ័ពរបស់គណបក្សប្រជាជនកម្ពុជា៕
No comments:
Post a Comment