កញ្ញា ខុម ចាន់តារាទី ប្ដឹងលោក កឹម សុខា និងគូកនទៅតុលាការ
ដោយ យន់ សាមៀន
2016-04-22
កញ្ញា ខុម ចាន់តារាទី ហៅ ស្រីមុំ ក្នុងវេទិកាអ្នកស្ដាប់វិទ្យុអាស៊ីសេរី កាលពីយប់ថ្ងៃទី១១ ខែមីនា ឆ្នាំ២០១៦។
Photo: RFA
កញ្ញា ខុម ចាន់តារាទី ហៅស្រីមុំ ប្តឹងលោក កឹម សុខា ប្រធានទីស្តីគណបក្សសង្គ្រោះជាតិ ទៅសាលាដំបូងរាជធានីភ្នំពេញ ទាមទារឲ្យតុលាការផ្តន្ទាទោសលោក និងគូកនតាមច្បាប់ និងសងប្រាក់សំណងជំងឺចិត្ត បីសែនដុល្លារ (៣០០.០០០)។
ពាក្យបណ្ដឹងចុះថ្ងៃទី២២ ខែមេសា ម្សិលមិញ ដោយមានស្នាមមេដៃរបស់កញ្ញា ខុម ចាន់តារាទី សរសេរថា នាងសុំប្តឹងទាមទារសំណងជំងឺចិត្ត ការខាតបង់ពេលវេលា ការបាត់ការងារ ខាតបង់សេដ្ឋកិច្ចគ្រួសារ និងការខូចខាតកិត្តិយសសេចក្ដីថ្លៃថ្នូររបស់នាងចំនួន ៣សែនដុល្លារ ពីឈ្មោះ កឹម សុខា និងគូកន ព្រមទាំងជនពាក់ព័ន្ធដទៃទៀត។
នាងសរសេរក្នុងពាក្យបណ្ដឹងបន្ថែមទៀតថា នាងបានខូចខាតកិត្តិយសសេចក្ដីថ្លៃថ្នូរយ៉ាងធ្ងន់ធ្ងរ ដោយសារតែលោក កឹម សុខា ដែលបានសន្យាជាច្រើនដូចជា សន្យាផ្ដល់ប្រាក់ ៣.០០០ដុល្លារ សន្យាទិញផ្ទះ និងទិញរបស់របរដែលនាងត្រូវការ ប៉ុន្តែរហូតមកទល់ពេលនេះ លោក កឹម សុខា មិនទាន់បានផ្ដល់តាមការសន្យានៅឡើយទេ។ ពាក្យបណ្ដឹងបន្តថា អំពើរបស់លោក កឹម សុខា នេះ បណ្តាលឲ្យនាងមិនអាចចេញដើរទៅណាមកណាបានដូចពីមុន ដោយសារខ្មាសគេ ជាពិសេសទៅថ្ងៃអនាគតនាងមិនអាចស្វែងរកគូស្រករបាន។
កាលពីថ្ងៃទី១៩ ខែមេសា កញ្ញា ខុម ចាន់តារាទី បានឆ្លើយបំភ្លឺតុលាការករណីសក្ខីកម្មក្លែង និងមានអំពើពេស្យាចារតាមបណ្ដឹងរបស់កញ្ញា ធី សុវណ្ណថា។ កាលនោះ កញ្ញា ខុម ចាន់តារាទី ទាមទារតុលាការឲ្យរកយុត្តិធម៌ ប៉ុន្តែមិនបានបញ្ជាក់ឲ្យលំអិត។ ទោះបីនាងមិនបានបញ្ចេញព័ត៌មានពីការបំភ្លឺនៅតុលាការក៏ដោយ ព្រះរាជអាជ្ញាតុលាការបានអះអាងថា នាងទទួលស្គាល់ខ្សែអាត់សំឡេងស្នេហានឹងលោក កឹម សុខា ថា ជាសំឡេងពិតរបស់នាង។
ក្នុងបណ្តឹងនៅតុលាការកាលពីថ្ងៃទី២២ ខែមេសា កញ្ញា ខុម ចាន់តារាទី សរសេរថា មូលហេតុដែលនាងទើបដាក់បណ្តឹងថ្មីទាមទារសំណងនោះ ដោយសារកាលពីថ្ងៃទី១៩ ខែមេសា នាងមិនទាន់បានទាមទារសំណងរដ្ឋប្បវេណី។ កាលពីថ្ងៃទី២២ ខែមេសា ដែរ សមាគមការពារសិទ្ធិមនុស្សអាដហុក (ADHOC) សម្រេចថា លែងបន្តផ្ដល់មេធាវីការពារឲ្យកញ្ញា ខុម ចាន់តារាទី ទៀតហើយ។ សមាគមនេះបញ្ជាក់ថា មានមូលហេតុពីរ ដែលសមាគមឈប់ផ្តល់ការការពារក្តីឲ្យ។ ទីមួយករណីនេះ មិនមែនជាករណីបរិហារកេរ្តិ៍ វាគ្រាន់តែជារឿងវិវាទធម្មតា រវាងបុគ្គលសាមញ្ញ និងទីពីរ កញ្ញា ខុម ចាន់តារាទី អាចគ្រាន់តែជាសាក្សីតែប៉ុណ្ណោះ។
លោក កឹម សុខា និងគណបក្សសង្គ្រោះជាតិ នៅមិនទាន់ឆ្លើយតបនឹងបណ្តឹងចុងក្រោយនេះទេ៕
No comments:
Post a Comment