ទិដ្ឋភាពកសិករដឹកស្រូវមកដាក់លក់ឲ្យឈ្មួញតាមផ្លូវក្នុងស្រុកថ្មគោល ខេត្តបាត់ដំបងនៅ។ រូបថត ពីហ្វេសប៊ុក
ppp
Thu, 22 September 2016
នៀម ឆេង
បាត់ដំបងៈ បន្ទាប់ពីក្រុមមន្ត្រី និងអ្នកមានទ្រព្យធនមួយចំនួនបានចំណាយប្រាក់ទិញអង្កររាប់តោនក្នុងម្នាក់ៗទៅតាមការអំពាវនាវរបស់លោកនាយករដ្ឋមន្ត្រី ហ៊ុន សែន និងធនាគារអភិវឌ្ឍន៍ជនបទនៅពេលនេះអាចដោះស្រាយវិបត្តិគ្មានទីផ្សារលក់ស្រូវ ស្រូវរបស់ប្រជាកសិករក្នុងខេត្តបាត់ដំបងបានមួយផ្នែកធំហើយបើទោះបីជានៅជួបបញ្ហាការកកស្ទះនៅតាមរោងម៉ាស៊ីនកិនស្រូវក៏ដោយ។
លោក សុប ចាន់ធី កសិករនៅស្រុកសង្កែ ខេត្តបាត់ដំបងដែលបានតវ៉ារឿងតម្លៃស្រូវចុះថោកកាលពីពេលថ្មីៗនេះបានឲ្យដឹងថាលោកបានលក់ស្រូវអស់ជាង ១៦ តោនហើយមកដល់ពេលនេះប៉ុន្តែបានតម្លៃត្រឹមតែ ៧៥ ម៉ឺនរៀលប៉ុណ្ណោះក្នុង ១ តោន។ លោកថាតាំងពីមានអន្តរាគមន៍ពីរដ្ឋាភិបាលមករោងម៉ាស៊ីនកិនស្រូវធំៗបានសន្យាផ្តល់តម្លៃ ៩០ ម៉ឺនរៀលក្នុងមួយតោនសម្រាប់ស្រូវសែនក្រអូប។ ប៉ុន្តែដោយសារកសិករសម្រុកដឹកស្រូវទៅរោងម៉ាស៊ីនកិនស្រូវទាំងនោះធ្វើឲ្យរោងម៉ាស៊ីនកិនស្រូវមិនអាចទទួលយកស្រូវទាំងនោះទាន់ពេលទេ។ លោកថ្លែងថា៖ «៣ ថ្ងៃក្រោយពីមានការប្រកាសអភិបាលស្រុកបានហៅប្រជាពលរដ្ឋទៅប្រជុំនៅសាលាឃុំហើយសន្យាថានឹងរករោងម៉ាស៊ីនកិនស្រូវសម្រាប់កសិករ។ ខ្ញុំខំច្រូតស្រូវទាំងអស់ហើយដឹកទៅរោងម៉ាស៊ីនកាណាឌីយ៉ានៅអូតាគី។ តែទៅដល់ឡានឈ្មួញដឹកចូលពេញអស់ហើយ។ ខ្ញុំត្រូវរង់ចាំ ២ យប់នៅមិនទាន់បានលក់ទៀតហើយស្រូវវាស្អុយខូចគុណភាព។ ពេលនោះអភិបាលស្រុកគាត់ថាឲ្យលក់ឲ្យរោងម៉ាស៊ីនតូចៗតាមភូមិ។ ខ្ញុំក៏ដឹកទៅរោងម៉ាស៊ីនតូចហើយបានតម្លៃតែ ៧៥ ម៉ឺនរៀលហើយថ្លៃឈ្នួលគេយក ៥ ម៉ឺនក្នុងមួយតោន។ អ៊ីចឹងបើប្រៀបធៀបទៅតម្លៃសន្យា ៩០ ម៉ឺនរៀលខ្ញុំខាត ២០ ម៉ឺនក្នុងមួយតោន។ សរុបមកខ្ញុំខាតអស់ប្រហែល ៥០០ ដុល្លារ»។
ពលរដ្ឋក្នុងស្រុកសង្កែម្នាក់ទៀតឈ្នោះ សឿង សុដា បាននិយាយថាអភិបាលខេត្តបានប្រកាសថាពលរដ្ឋត្រូវដឹកស្រូវដោយខ្លួនឯងទៅលក់ឲ្យរោងម៉ាស៊ីនធំៗ។ លោកថាផលលំបាកនៅតែមានដោយសារតែត្រូវរង់ចាំយូរពេលទៅដល់រោងម៉ាស៊ីនស្រូវនោះ។ «ពេលដឹកទៅត្រូវមានលិខិតបញ្ជាក់ពីឃុំហើយអភិបាលស្រុកក៏ទៅជាមួយដែរដើម្បីកុំឲ្យថៅកែទម្លាក់តម្លៃ។ ខ្ញុំលក់បាន ២០ តោនហើយតែមួយតោនបានថ្លៃ ៧០ ម៉ឺនរៀលទេ»។
លោក កៅ ថាច អគ្គនាយក នៃធនាគារអភិវឌ្ឍន៍ជនបទបានថ្លែងថាបញ្ហាប្រឈមគឺដោយសារតែរឿងម៉ាស៊ីនកិនស្រូវធំៗមិនអាចសម្ងួតស្រូវទាន់ពេលវេលាជាហេតុធ្វើឲ្យកសិករដែលដឹកផលិតផលមកត្រូវរង់ចាំតាមលំដាប់លំដោយដែលអាចធ្វើឲ្យគុណភាពស្រូវរបស់ពួកគាត់ធ្លាក់ចុះ។ លោកថ្លែងថា៖ «បញ្ហាដែលយើងគ្រប់គ្រងមិនបានគឺពេលសម្ងួតគឺឡសម្ងួតពេញហើយអ៊ីចឹងទៅយើងអត់បានទិញនៅសល់ស្រូវមួយចំនួនហ្នឹងត្រូវបានឈ្មួញកណ្ដាលវាយទម្លាក់ថ្លៃហើយទិញក្នុងអត្រាមួយទាបប្រហែល ៦,៣ ឬ ៦,៤ បាត»។ លោកបញ្ជាក់ថា៖ «ក្នុងស្រុកមង្គលបុរីមានរោងម៉ាស៊ីនកិនស្រូវប្រហែល ១០ ដែលអាចសម្ងួតស្រូវបានជាង ១២៦០ តោនក្នុងមួយថ្ងៃហើយនៅថ្មគោលមួយថ្ងៃអាចបាន ៤០០ តោនឬ ៦០០ តោនបូកទាំងរោងម៉ាស៊ីនតូចៗហើយនៅបៃតង់បានប្រហែល ៨០០ តោនក្នុងមួយថ្ងៃហើយនៅហ្គោលដិនដូនកែវរ៉ាយស៍របស់កាណាឌីយ៉ាទើបតែចាប់ផ្តើមទិញបាន ២ ថ្ងៃទេសរុបបានជិត ៨០០ តោន»។
អ្នកប្រើប្រាស់បណ្ដាញសង្គមហ្វេសប៊ុកជាច្រើនបានរិះគន់ថាបញ្ហាមួយដែលធ្វើឲ្យតម្លៃអង្ករក្នុងស្រុកមានតម្លៃទាបដោយសារតែមានការនាំចូលអង្ករពីវៀតណាមក្នុងបរិមាណច្រើនជាងអង្ករដែលកម្ពុជាអាចនាំចេញ។ លោក កៅ ថាច ទទួលស្គាល់ថាពិតជាមានការនាំចូលអង្ករពីវៀតណាមមែន។ «រឿងនាំអង្ករចូលពីវៀតណាមហ្នឹងវាមានមែនតាំងពីដើមមកមានរហូតដល់អ្នកខ្លះយកមកលាយអង្ករខ្មែរហើយថាអង្ករបាត់ដំបងក៏មាន។ អ្នកលក់ខ្លះចង់ចំណេញច្រើនលក់អង្ករវៀតណាម»។ លោកបានបន្តទៀតថាដើម្បីបញ្ឈប់ការនាំអង្ករចូលពីវៀតណាមបានពលរដ្ឋខ្មែរត្រូវចូលរួមទិញអង្ករខ្មែរហើយនៅខណៈនេះលោកកំពុងធ្វើយុទ្ធនាការឲ្យពលរដ្ឋទិញអង្ករខ្មែរដែលមានតម្លៃប្រហែល ៣២ ដុល្លារក្នុង ៥០ គីឡូក្រាម៕
No comments:
Post a Comment