កសិករនៅក្នុងសហគមន៍មួយខេត្តកំពង់ធំកំពុងឡើងត្នោត។ ហុង មិនា
ppp
Tue, 13 September 2016
ចេង សុខហ័ង
ភ្នំពេញៈ សមាគមស្ករត្នោតខេត្តកំពង់ស្ពឺបានជ្រើសយកសហករណ៍កសិកម្មដើមត្នោតដើម្បីបន្តការចរចាជាមួយក្រុមហ៊ុន Unilever លើផែនការទិញស្ករត្នោត ២០០០ តោន។ នេះបើយោងតាមលោក សំ សារឿន ប្រធានសមាគមស្ករត្នោតខេត្តកំពង់ស្ពឺ។
លោក សារឿន បន្តថាបន្ទាប់ពីកិច្ចប្រជុំជាមួយក្រុមហ៊ុន Unilever កាលពីសប្ដាហ៍មុនក្រុមហ៊ុននេះបានតម្រូវឲ្យសមាគមជ្រើសរើសតំណាងក្រុមហ៊ុនក្នុងស្រុកដើម្បីចរចាជាមួយក្រុមហ៊ុន Unilever សម្រាប់ការទិញស្ករត្នោត។
លោកបន្ថែមថាសមាគមនេះបានសម្រេចចិត្តយកសហករណ៍កសិកម្មដើមត្នោតខេត្តកំពង់ស្ពឺដើម្បីពិភាក្សាបន្ថែមទៀតជាមួយក្រុមហ៊ុនស្ដីពីផែនការនេះ។
លោកលើកឡើងថា៖ «ក្រុមហ៊ុន Unilever មានបំណងចង់ទិញស្ករត្នោតពីពួកយើងចំនួន ២០០០ តោនក្នុងមួយឆ្នាំប៉ុន្តែពួកគេតម្រូវឲ្យយើងជ្រើសរើសក្រុមតំណាងណាមួយដែលប្រមូលស្ករត្នោត និងធ្វើការងារជាមួយក្រុមហ៊ុននេះ»។
លោកបន្តថា៖ «នៅពេលនេះយើងជ្រើសរើសសហករណ៍កសិកម្មដើមត្នោតខេត្តកំពង់ស្ពឺដើម្បីពិភាក្សាបន្ថែមស្ដីពីផែនការនេះ»។
លោកបញ្ជាក់ថាបច្ចុប្បន្នសមត្ថភាពនៃការផលិតស្ករតោ្នតមានចន្លោះពី ២០០០ តោនដល់ ៣៥០០ តោនក្នុងមួយឆ្នាំហើយសហករណ៍កសិកម្មដើមត្នោតខេត្តកំពង់ស្ពឺនឹងធ្វើការងារជាមួយ comfrel ដែលជាក្រុមហ៊ុនក្នុងស្រុកសម្រាប់ការបង្កើតការវេចខ្ចប់។
លោកបញ្ជាក់ថា៖ «បន្ទាប់មកនឹងពិភាក្សាលើស្ដង់ដារគុណភាព និងតម្លៃ»។
លោក ប្រាក់ សេរីវឌ្ឍន៍ ប្រធានវិទ្យាស្ថានស្រាវជ្រាវ និងអភិវឌ្ឍន៍ជនបទកម្ពុជា (CIRD) បានឲ្យដឹងថានៅពេលនេះខ្លួនកំពុងពិភាក្សាអំពីដំណើរការនេះ។
លោកថ្លែងថា៖ «ក្រុមហ៊ុន Unilever បង្ហាញអំពីបំណងរបស់ពួកគេលើការទិញស្ករត្នោតពីកម្ពុជា។ ពួកគេគ្រោងទិញស្ករត្នោត ២០០០ តោនប៉ុន្តែវាស្ថិតក្នុងការពិភាក្សានៅឡើយទេហើយយើងចាំបាច់ត្រូវចរចាលើតម្លៃ គុណភាព និងស្ដង់ដារ»។
លោកបន្ថែមថាក្រុមហ៊ុន Unilever នឹងបញ្ជូនលក្ខណវិនិច្ឆ័យស្ដង់ដារមកកម្ពុជាសម្រាប់ការសិក្សា។
លោកបន្តថា៖ «យើងចាំបាច់ត្រូវមើលលក្ខណវិនិច្ឆ័យផលិតផលស្ដង់ដារពីពួកគេជាមុនសិន។ ប៉ុន្តែខ្ញុំគិតថាវានឹងមិនត្រូវការពេលវេលា និងពិបាកក្នុងការប្រែក្លាយពីការកែច្នៃស្ករប្រពៃណីទៅជាការកែច្នៃស្ដង់ដារនោះទេដោយសារពួកគេផ្ដោតលើអនាម័យ»។
បើទោះបីយ៉ាងនេះក្តីតំណាងមកពីក្រុមហ៊ុន Unilever បានបដិសេធអត្ថាធិប្បាយលើចំនួននៃការទិញហើយថាអ្វីៗគ្រប់យ៉ាងនៅមិនទាន់ប្រាកដនៅឡើយទេ៕ LA
No comments:
Post a Comment