School of Vice: Xamdaach violates most things under the Cambodian sky!
>>>
ដោយ ទីន ហ្សាការីយ៉ា
2017-02-02
អ្នកឃ្លាំមើលផ្នែកអភិវឌ្ឍន៍សង្គម លោកបណ្ឌិត មាស នី ក្នុងវេទិកាអ្នកស្ដាប់វិទ្យុអាស៊ីសេរី កាលពីថ្ងៃទី១៦ ខែវិច្ឆិកា ឆ្នាំក២០១៥។
Photo: RFA
អ្នកវិភាគ និងអ្នកឃ្លាំមើលការបោះឆ្នោតលើកឡើងថា មេដឹកនាំគណបក្សប្រជាជនកម្ពុជា គួរតែកសាងប្រជាប្រិយភាព និងធ្វើកំណែទម្រង់លុបបំបាត់អំពើអយុត្តិធម៌ទាំងឡាយនៅក្នុងសង្គមវិញ ប្រសើរជាងការចង់កាច់បំបាក់ដៃគូប្រកួតនៅមុនពេលបោះឆ្នោតមកដល់។
អ្នកវិភាគលើកឡើងថា ការប្រកាសរបស់លោកនាយករដ្ឋមន្ត្រី ហ៊ុន សែន ចង់ធ្វើវិសោធនកម្មច្បាប់គណបក្សនយោបាយ ឈានទៅដល់ការរំលាយគណបក្សចោល ប្រសិនប្រធានគណបក្សនោះធ្វើខុសច្បាប់ដូចនៅប្រទេសថៃ នោះ ជាការធ្វើឲ្យប្រជាប្រិយភាពរបស់គណបក្សប្រជាជនកម្ពុជា ធ្លាក់ចុះទៅវិញទេ។
អ្នកវិភាគ និងអ្នកឃ្លាំមើលការបោះឆ្នោតពន្យល់ថា ការដែលលោកនាយករដ្ឋមន្ត្រី ហ៊ុន សែន ជំរុញឲ្យធ្វើវិសោធនកម្មច្បាប់គណបក្សនយោបាយ ដោយបន្ថែមចំណុចអ្នកដែលជាប់ទោសមិនអាចធ្វើជាប្រធានគណបក្ស ឬអាចឈានទៅដល់ការរំលាយគណបក្សនោះចោល ជារឿងរំលោភរដ្ឋធម្មនុញ្ញ។
នាយកប្រតិបត្តិអង្គការខុមហ្វ្រែល (COMFREL) លោក គល់ បញ្ញា មានប្រសាសន៍ថា ប្រទេសកម្ពុជា បានប្រកាន់យករបបប្រជាធិបតេយ្យសេរីពហុបក្ស មិនមែនជាប្រទេសប្រកាន់របបយោធាដូចនៅប្រទេសថៃ ទេ។ លោកបញ្ជាក់ថា នៅប្រទេសថៃ គេបានកែរដ្ឋធម្មនុញ្ញជាប្រទេសគ្រប់គ្រងដោយរបបយោធា តែសម្រាប់កម្ពុជាវិញ រដ្ឋាភិបាលមិនអាចធ្វើវិសោធនកម្មរដ្ឋធម្មនុញ្ញស្ដីពីគណបក្សនយោបាយដោយបន្ថែមដល់ការរំលាយគណបក្ស ឬមិនអាចធ្វើជាប្រធាន អនុប្រធានគណបក្ស ប្រសិនបើមេបក្សមានទោសនោះទេ៖ «មេបក្សមានទោសមានអី? ក្នុងក្របខ័ណ្ឌបក្សផ្សេង ក្នុងរដ្ឋាភិបាលផ្សេង គេដាក់លក្ខខណ្ឌគេដាក់លក្ខខណ្ឌផ្សេង ព្រោះក្នុងច្បាប់គណបក្សនយោបាយមានស្រាប់ហើយ ម្យ៉ាងបើក្នុងពេលធ្វើជានាយករដ្ឋមន្ត្រីផ្សេងដែលគេជ្រើស»។
ការលើកឡើងរបស់លោក គល់ បញ្ញា នេះ នៅក្រោយពេលលោកនាយករដ្ឋមន្ត្រី ហ៊ុន សែន បានប្រកាសជាថ្មីម្ដងទៀត នៅថ្ងៃទី២ ខែកុម្ភៈ ថា នឹងជំរុញឲ្យតំណាងរាស្ត្រគណបក្សកាន់អំណាចធ្វើវិសោធនកម្មច្បាប់បោះឆ្នោត កំណត់ពីអ្នកដែលជាប់ទោសមិនអាចធ្វើជាប្រធាន អនុប្រធានគណបក្ស ឬអាចឈានដល់រំលាយគណបក្សនោះចោលទៀត។
ក្រៅពីលោក ហ៊ុន សែន ជំរុញឲ្យធ្វើវិសោធនកម្មច្បាប់គណបក្សនយោបាយនោះ លោកនាយករដ្ឋមន្ត្រីព្រមានអនុវត្តតាមផ្លូវច្បាប់ចាត់ការមន្ត្រីជាន់ខ្ពស់របស់គណបក្សប្រឆាំងទៀត។ លោក ហ៊ុន សែន ព្រមានលោក សុន ឆ័យ ថា លោកមិនអាចនៅតែបង្កើតវេទិកាជួបអ្នកកាសែត ហើយនិយាយថា មានគម្រោងកោះហៅរដ្ឋមន្ត្រី ៣រូប របស់រដ្ឋាភិបាលមកឆ្លើយបំភ្លឺនៅសភានោះ៖ «អាណាធ្វើខុសធ្ងន់រំលាយបក្សចោលម៉ង ធ្វើឲ្យធ្ងន់ម៉ង ព្រោះកុំឲ្យវាខូចពេក ព្រោះនៅថៃ ប៉ុន្មានឆ្នាំមកនេះ គេរំលាយអស់ប៉ុន្មាននោះ? ឥឡូវបក្សរបស់ថាក់ស៊ីន ចុះថៃរ៉ាក់ថៃ ត្រូវរំលាយ បង្កើតបក្សកម្លាំងប្រជាជនរំលាយទៀត»។
អាស៊ីសេរី មិនអាចទាក់ទងលោក សុន ឆ័យ ដើម្បីសុំការឆ្លើយតបចំពោះបញ្ហានេះបានទេ នៅថ្ងៃទី២ ខែកុម្ភៈ។
ចំពោះការបញ្ចេញប្រតិកម្មរបស់លោកនាយករដ្ឋមន្ត្រី ហ៊ុន សែន នេះ ជាការឆ្លើយតបទៅនឹងលោក សុន ឆ័យ ដែលធ្វើសន្និសីទសារព័ត៌មានកាលពីថ្ងៃទី៣១ ខែមករា ប្រកាសថា តំណាងរាស្ត្របក្សប្រឆាំងនឹងកោះហៅរដ្ឋមន្ត្រីក្រសួងការពារជាតិ រដ្ឋមន្ត្រីក្រសួងកសិកម្ម និងរដ្ឋមន្ត្រីក្រសួងការងារ មកឆ្លើយបំភ្លឺនៅរដ្ឋសភា។ នៅត្រង់ចំណុចនេះ លោក ហ៊ុន សែន បានដាក់លក្ខខណ្ឌពីរមុន នឹងអនុញ្ញាតទៅឆ្លើយបំភ្លឺនៅរដ្ឋសភា គឺទី១ តំណាងរាស្ត្របក្សប្រឆាំងត្រូវតែចូលប្រជុំសភាជារៀងរាល់អង្គប្រជុំ ទី២ មិនត្រូវចេញមកនិយាយជាមួយអ្នកកាសែតថា លទ្ធផលនៃការឆ្លើយបំភ្លឺរបស់រដ្ឋមន្ត្រីនោះថា មិនល្អនោះទេ នៅពេលក្នុងកិច្ចប្រជុំជាមួយគ្នាថាល្អនោះ៖ «ទី១ ផ្ដាំទៅលោក សុន ឆ័យ លោកចង់សាក លោកធ្វើមើល! កុំចង់បង្កើតរដ្ឋក្នុងរដ្ឋ កុំចង់បង្កើតសភាពីរ សភាមួយនៅចាក់អង្រែ សភាមួយនៅឯណេះ កុំយកវេទិកាប្រជុំកាសែតធ្វើរបៀបហ្នឹង បើលោកចិត្តជាកូនប្រុស ក្រោយពេលប្រធានសភាលុបចោលការតែងតាំងឡាយហើយ លោកដើរប្រកាសខ្លួនឯងមើល លោកសាកមើល? ប្រយ័ត្នហា៎! ធ្វើម៉េចក៏ដោយ កុំខុសបទព្រហ្មទណ្ឌជាក់ស្ដែង អាហ្នឹងគេចាប់អត់មានការថយក្រោយទេ»។
នៅស្របពេលលោក ហ៊ុន សែន ប្រកាសមិនអនុញ្ញាតឲ្យរដ្ឋមន្ត្រីទៅបំភ្លឺនៅរដ្ឋសភានេះ អ្នកនាំពាក្យរដ្ឋសភាបានចេញសេចក្ដីប្រកាសមួយភ្លាមៗនៅថ្ងៃទី២ ខែកុម្ភៈ ថា រដ្ឋសភាសម្រេចផ្អាកមិនបញ្ជូនសំណើកោះហៅរដ្ឋមន្ត្រីឲ្យមកឆ្លើយបំភ្លឺចំពោះគណៈកម្មការនានានៃរដ្ឋសភាដែលដឹកនាំដោយគណបក្សក្រៅរដ្ឋាភិបាលជាបណ្ដោះអាសន្នសិន បើសិនជាតំណាងរាស្ត្របក្សប្រឆាំងពុំអនុវត្តការងាររបស់ខ្លួនក្នុងសភាជាប្រក្រតីទេនោះ។
បន្ថែមពីលើបញ្ហានេះ លោក ហ៊ុន សែន ក៏ព្រមានលោកបណ្ឌិត មាស នី អ្នកវិភាគ និងជាអ្នកឃ្លាំមើលផ្នែកអភិវឌ្ឍន៍សង្គមផងដែរ។ លោក ហ៊ុន សែន លើកឡើងថា លោក មាស នី និយាយថា លោកនាយករដ្ឋមន្ត្រីអនុវត្តផ្ទុយពីរដ្ឋធម្មនុញ្ញមាត្រា៩៧ ដែលចែងថា គណៈកម្មការទាំងឡាយរបស់រដ្ឋសភាអាចអញ្ជើញរដ្ឋមន្ត្រីមកបំភ្លឺអំពីបញ្ហាអ្វីមួយដែលពាក់ព័ន្ធនឹងវិស័យដែលទទួលខុសត្រូវរបស់ខ្លួននោះ គឺជាការវិភាគមិនត្រឹមត្រូវ៖ «គេហៅលោកហ្នឹងបណ្ឌិតមែនទែន ឬបណ្ឌិតលេងៗវ៉ី! ស្អីឈ្មោះ មាស នី នេះ គាត់និយាយថា គណៈកម្មការទាំងឡាយរបស់រដ្ឋសភា អាចអញ្ជើញរដ្ឋមន្ត្រីមកបំភ្លឺអំពីបញ្ហាអ្វីមួយដែលពាក់ព័ន្ធនឹងវិស័យដែលទទួលខុសត្រូវរបស់ខ្លួននោះថា លោក មាស នី វិភាគមិនត្រឹមត្រូវ។ ខ្ញុំដឹងរដ្ឋធម្មនុញ្ញ។ ខ្ញុំមិនមែនជាបណ្ឌិតទេ តែខ្ញុំជាឪបណ្ឌិត ព្រោះខ្ញុំមានកូនជាបណ្ឌិតមិនតិចជាងពីរ បើនិយាយថាខ្ញុំជាឪទាហានក៏ត្រូវដែរ ព្រោះខ្ញុំមានកូនបណ្ឌិតទាហាន។ ខ្ញុំជាឪទូរទស្សន៍ក៏ត្រូវដែរ ព្រោះកូនខ្ញុំបើករកស៊ីទូរទស្សន៍»។
ឆ្លើយតបនឹងបញ្ហានេះ លោកបណ្ឌិត មាស នី បញ្ជាក់ថា ជាធម្មតាទេ អ្នកវិភាគអាចវិភាគខុស និងអាចវិភាគត្រូវ។ ចំពោះការគំរាមរូបលោកវិញ លោកថា លោកមិនអាចនិយាយថា ខ្លាច ហើយលោកក៏មិនអាចនិយាយថា មិនខ្លាចដែរ។ ក៏ប៉ុន្តែលោកបញ្ជាក់ថា អាជីពរបស់លោកជាអ្នកវិភាគពីបញ្ហាសង្គមនោះ លោកមិនអាចបោះបង់បោលចោលទេ។ ក្រៅពីនេះទៀត នៅក្នុងបរិបទសង្គមបច្ចុប្បន្ន លោកបណ្ឌិត មាស នី ពន្យល់ថា លោកនាយករដ្ឋមន្ត្រី ត្រូវតែធ្វើកំណែទម្រង់ឲ្យបានស៊ីជម្រៅ និងដោះស្រាយបញ្ហាប្រជាពលរដ្ឋកំពុងជួបប្រទះ ប្រសើរជាងការគំរាម និងចង់ធ្វើវិសោធនកម្មច្បាប់គណបក្សនយោបាយ៖ «បើចង់បានប្រជាប្រិយភាព ទាល់តែជួយប្រព័ន្ធយុត្តិធម៌ហ្នឹង កុំឲ្យវាបំភ្លៃភ្នែកប្រជាជន បើចង់បានឈ្នះ ប្រើប្រព័ន្ធយុត្តិធម៌ដូចបច្ចុប្បន្ន»។
លោកបណ្ឌិត មាស នី សង្កត់ធ្ងន់ថា លទ្ធផលបោះឆ្នោតកាលពីឆ្នាំ២០១៣ ដែលគណបក្សប្រជាជនកម្ពុជា បាត់សំឡេងគាំទ្រ ឬបាត់អាសនៈក្នុងសភានោះ គឺជារង្វាស់មួយដ៏សំខាន់របស់គណបក្សកាន់អំណាច ដែលជំរុញឲ្យរដ្ឋាភិបាលចង់ធ្វើវិសោធនកម្មច្បាប់គណបក្សនយោបាយ តាំងពីឆ្នាំ២០១៤ មក នៅគ្រាដែលស្ថានភាពជាប់គាំងនយោបាយក្រោយការបោះឆ្នោត ដើម្បីវាយបំបាក់បក្សប្រឆាំង។
ទាំងលោក គល់ បញ្ញា អ្នកឃ្លាំមើលការបោះឆ្នោត និងលោកបណ្ឌិត មាស នី អ្នកឃ្លាំមើលការអភិវឌ្ឍសង្គម បានលើកឡើងដូចគ្នាថា ការចង់ធ្វើវិសោធនកម្មច្បាប់ស្ដីពីគណបក្សនយោបាយនេះ មិនមែនជារឿងនៅចំពោះមុខដែលរដ្ឋាភិបាលត្រូវធ្វើនោះឡើយ បញ្ហាសំខាន់នៅត្រង់ថា តើទង្វើនេះពិតជាទាក់ទាញប្រជាប្រិយភាពគណបក្សប្រជាជនកម្ពុជា ឲ្យប្រសើរឡើងវិញ ឬទាក់ទាញឲ្យកាន់តែធ្លាក់ចុះ នៅគ្រាដែលអំពើអយុត្តិធម៌សង្គម ការរឹតត្បិតសិទ្ធិសេរីភាព ការរំលោភសិទ្ធិមនុស្សដូចជាការបាញ់សម្លាប់លោកបណ្ឌិត កែម ឡី និងអំពើពុករលួយកំពុងកើតមាននៅក្នុងសង្គមនោះ៕
No comments:
Post a Comment