ដោយ រាជ វិញ្ញូ
2017-02-02
រដ្ឋមន្ត្រីក្រសួងមហាផ្ទៃ លោក ស ខេង (កណ្ដាល) បើកកិច្ចប្រជុំបូកសរុបលទ្ធផលយុទ្ធនាការប្រយុទ្ធប្រឆាំងគ្រឿងញៀនខុសច្បាប់លើកទី១ នៅថ្ងៃទី២ ខែកុម្ភៈ ឆ្នាំ២០១៧។ RFA/Rach Vingur
RFA/Rach Vingur
លទ្ធផលនៃយុទ្ធនាការប្រឆាំងគ្រឿងញៀនក្នុងខែដំបូង គឺអាជ្ញាធរបង្ក្រាបបានចំនួនជាង ១ពាន់ករណី និងឃាត់ខ្លួនមនុស្សជិត ៣ពាន់នាក់។ ស្របពេលអាជ្ញាធរឃាត់ខ្លួនអ្នកប្រើប្រាស់គ្រឿងញៀនបានកាន់តែច្រើននេះ អាជ្ញាធរក៏កំពុងប្រឈមនឹងការលំបាក ដោយសារខ្វះមណ្ឌលបណ្ដោះអាសន្នដើម្បីផ្ទុកអ្នកញៀនគ្រឿងញៀន។
យុទ្ធនាការប្រយុទ្ធប្រឆាំងគ្រឿងញៀនខុសច្បាប់លើកទី១ ដែលដឹកនាំដោយរដ្ឋមន្ត្រីក្រសួងមហាផ្ទៃ លោក ស ខេង ប្រចាំខែមករា ឆ្នាំ២០១៧ នៃយុទ្ធនាការដែលមានរយៈពេលចំនួន ៦ខែរបស់រដ្ឋាភិបាល គឺបង្ក្រាបបានគ្រឿងញៀននៅទូទាំងប្រទេសចំនួន ១.១៤៤ករណី ឃាត់ខ្លួនមនុស្សចំនួន ២.៧៧៣នាក់ ស្រី ២៦៧នាក់ និងយកសារធាតុញៀនសរុប ៩.១៤៨,៨៣ក្រាម។ ក្រៅពីនោះ អាជ្ញាធរក៏បង្ក្រាបបានរថយន្ត ១១គ្រឿង ម៉ូតូ ២៥៧គ្រឿង និងទូរស័ព្ទដៃចំនួន ៧០៣គ្រឿង។
នៅក្នុងកិច្ចប្រជុំបូកសរុបលទ្ធផលយុទ្ធនាការប្រយុទ្ធប្រឆាំងគ្រឿងញៀនខុសច្បាប់លើកទី១ ប្រចាំខែមករា នៅថ្ងៃទី២ កុម្ភៈ ឲ្យដឹងថា ក្នុងចំណោមមនុស្សចំនួន ២.៧៧៣នាក់ ដែលអាជ្ញាធរឃាត់ខ្លួនទាក់ទងនឹងគ្រឿងញៀន គឺមានឈ្មួញជួញដូរចំនួន ១.៣៣០នាក់ ស្រី ១៧២នាក់ (នគរបាល ៤នាក់ អាវុធហត្ថ ១នាក់ និងយោធា ១នាក់)។ ចំណែកអ្នកប្រើប្រាស់មានចំនួន ១.៤៤០នាក់ ស្រី ៩៤នាក់ និងឃាត់ខ្លួនតាមដីកាតុលាការពីបទជួញដូរគ្រឿងញៀនមាន ១៩ដីកា ឃាត់ខ្លួន ១៣នាក់ ស្រី ៣នាក់។
របាយការណ៍ដដែលបន្តថា អាជ្ញាធរជាតិប្រយុទ្ធប្រឆាំងគ្រឿងញៀន បានចាត់ក្រុមបច្ចេកទេសចុះពិនិត្យ សិក្សា រៀបចំ និងកសាងមជ្ឈមណ្ឌលជាតិសម្រាប់ព្យាបាល និងស្ដារនីតិសម្បទាអ្នកញៀនគ្រឿងញៀននៅឃុំកែវផុស ស្រុកស្ទឹងហាវ ខេត្តព្រះសីហនុ។ រីឯគណៈកម្មាធិការត្រួតពិនិត្យគ្រឿងញៀនខេត្តកណ្ដាល កំពុងរង់ចាំការសម្រេចពីថ្នាក់ជាតិ ដើម្បីកសាងមណ្ឌលបណ្ដោះអាសន្នសម្រាប់ព្យាបាល ស្ដារនីតិសម្បទា ផ្ដល់វិជ្ជាជីវៈ បំណិនជីវិត ការធ្វើសមាហរណកម្ម និងចាកចេញពីគ្រឿងញៀន។ លើសពីនេះ នៅខេត្តកំពង់ចាម ក៏បានរៀបចំកន្លែងផ្ដល់សេវាព្យាបាលអ្នកញៀនគ្រឿងញៀនចំនួន ២០ទីតាំងនៅតាមមន្ទីរពេទ្យបង្អែក។
ឆែកឆេរគ្រឿងញៀនស្ទឹងត្រែង ៦២០នគរបាលប្រដាប់អាវុធខេត្តស្ទឹងត្រែង ចុះឆែកឆេរទីតាំងផ្ទះជនសង្ស័យជួញដូរគ្រឿងញៀន ក្នុងក្រុងស្ទឹងត្រែង កាលពីថ្ងៃទី៣០ ខែមិថុនា ឆ្នាំ២០១៥។ RFA/Men Sothyr RFA/Men Sothyr
ពាក់ព័ន្ធនឹងវិធានការកម្ចាត់សារធាតុញៀននៅក្នុងខែមករា ក្រសួងសុខាភិបាល ក៏បានព្យាបាលអ្នកញៀនគ្រឿងញៀនចំនួន ៨១៨នាក់ នៅចំនួន ១៧៧កន្លែង និងបានចុះពិនិត្យបច្ចេកទេសនៅមណ្ឌលសុខភាព និងស្ដារនីតិសម្បទារបស់ក្រសួងសង្គមកិច្ច នៅខណ្ឌសែនសុខ ក្នុងគោលបំណងពង្រឹងកិច្ចសហការបច្ចេកទេស។
អំឡុងពេលអាជ្ញាធរអនុវត្តផែនការបង្ក្រាបគ្រឿងញៀននេះ នៅមជ្ឈមណ្ឌលជាតិព្យាបាល និងស្ដារនីតិសម្បទា (ក្រាំងធ្នង់) មានក្រុមអ្នកញៀនគ្រឿងញៀនមានគ្នាចំនួន ១៨នាក់ បានចាប់សន្តិសុខគំរាម ដើម្បីរត់គេចខ្លួន ហើយសមត្ថកិច្ចកំពុងស្រាវជ្រាវឃាត់ខ្លួនមកវិញ។
ក្រៅពីវិធានការក្ដៅដើម្បីឃាត់អ្នកញៀនគ្រឿងញៀន និងអ្នកជួញដូរគ្រឿងញៀន ក្រសួងអប់រំ ក្រសួងប្រៃសណីយ៍ ក្រសួងទេសចរណ៍ និងអគ្គលេខាធិការដ្ឋាននៃអាជ្ញាធរប្រយុទ្ធប្រឆាំងគ្រឿងញៀន ក៏បានចេញសេចក្ដីណែនាំស្ដីពីការទប់ស្កាត់ និងវិធីសាស្ត្រយល់ដឹងទាក់ទងពីផលប៉ះពាល់ធ្ងន់ធ្ងរ នៃការប្រើប្រាស់គ្រឿងញៀន ទៅដល់សិស្សនិស្សិត ម្ចាស់អាជីវកម្មក្នុងវិស័យទេសចរណ៍ រោងចក្រ និងសហគ្រាស និងទីតាំងកម្សាន្តនានាជាដើមនៅទូទាំង ២៥ខេត្ត-ក្រុង។
នាយកប្រតិបត្តិអង្គការខាណា (KHANA) លោក ជួប សុខចំរើន សម្ដែងការសាទរនៅពេលឃើញយុទ្ធនាការរបស់រដ្ឋាភិបាលសម្រាប់ខែមករា អាចបង្ក្រាបអ្នកប្រើប្រាស់ និងជួញដូរគ្រឿងញៀនបានចំនួនច្រើន។ ប៉ុន្តែលោកថា លទ្ធផលបឋមនៃការបង្ក្រាបដែលជាវិធានការក្ដៅនេះ គឺមានចំនួនតិចតួចបំផុត ដែលអាជ្ញាធរអាចបង្ក្រាបឈ្មួញធំៗដែលធ្វើការរត់ពន្ធ និងចែកចាយគ្រឿងញៀន៖ «ប៉ុន្តែយើងសាទរ ប្រសិនបើចាប់អាធំកាន់តែច្រើន»។
លោកសម្ដែងក្ដីព្រួយបារម្ភចំពោះអ្នកប្រើប្រាស់គ្រឿងញៀនមួយចំនួនដែលអង្គការរបស់លោកធ្លាប់រកឃើញថា បានឆ្លងមេរោគអេដស៍ និងតែងតែទទួលបានថ្នាំបង្ការពីអង្គការខាណា។ លោក ជួប សុខចំរើន ចង់ឲ្យអាជ្ញាធរដែលអនុវត្តផែនការប្រយុទ្ធប្រឆាំងគ្រឿងញៀន គួរត្រួតពិនិត្យឲ្យបានច្បាស់ចំពោះអ្នកញៀនគ្រឿងញៀនទាំងអស់ ដែលបានឃាត់ខ្លួនរួចហើយ ត្រូវលៃលកបញ្ជូនពួកគាត់ឲ្យបានសមរម្យ ចំពោះប្រភេទអ្នកញៀនកម្រិតស្រាល និងកម្រិតធ្ងន់ ជាពិសេសអ្នកញៀនគ្រឿងញៀនខ្លះមានឆ្លងមេរោគ និងត្រូវការថ្នាំបង្ការជាទៀងទាត់៖ «គាត់នឹងបាត់បង់សេវាដែលយើងបានផ្ដល់ឲ្យ ហើយបារម្ភមែនទែន ព្រោះអ្នកមួយចំនួន គឺជាអ្នកផ្ទុកមេរោគអេដស៍»។
អាជ្ញាធរជាតិប្រយុទ្ធប្រឆាំងគ្រឿងញៀន ធ្លាប់បង្ហាញរបាយការណ៍ថា អ្នកប្រើប្រាស់គ្រឿងញៀននៅទូទាំងប្រទេសនៅឆ្នាំ២០១៦ កើនឡើងជាង ២ពាន់នាក់ បើប្រៀបធៀបនឹងឆ្នាំ២០១៥ ហើយភាគច្រើនគឺជាយុវជនដែលមានអាយុ ១៨ឆ្នាំទៅ ៣៥ឆ្នាំ។ អ្នកប្រើប្រាស់គ្រឿងញៀន នឹងជួបប្រទះជំងឺផ្សេងៗជាច្រើន ដូចជាខូចថ្លើម តម្រងនោម ជំងឺបេះដូង ស្រកទម្ងន់ ខូចអវយវៈ ញាក់កន្ត្រាក់ ជំងឺបាក់ស្មារតី ចុះខ្សោយរាងកាយ និងរហូតអាចបាត់បង់ជីវិត៕
No comments:
Post a Comment