ដោយ សុ ជីវី
2017-02-03
លិខិតរបស់ទីស្ដីការគណៈរដ្ឋមន្ត្រីបង្គាប់ឲ្យអ្នកស្រី ស៊ុយ សុផាន ចូលរួមដោះស្រាយវិវាទដីធ្លីជាមួយពលរដ្ឋ ចេញថ្ងៃទី២ កុម្ភៈ ឆ្នាំ២០១៧។
Photo: RFA
រដ្ឋាភិបាលបើកផ្លូវអោយរដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ កោះហៅប្រធានក្រុមហ៊ុនផានអ៊ីម៉ិច (Phan Imex) អ្នកស្រី ស៊ុយ សុផាន ចូលទៅដោះស្រាយវិវាទដីធ្លីជាមួយពលរដ្ឋ និងអាជ្ញាធរ។
លិខិតចេញដោយរដ្ឋលេខាធិការទីស្ដីការគណៈរដ្ឋមន្ត្រី លោក ហ៊ីង ថូរ៉ាក់ស៊ី កាលពីថ្ងៃទី២ ខែកុម្ភៈ អោយដឹងថា រដ្ឋាភិបាលយល់ព្រមចំពោះការតម្រូវអោយអ្នកស្រី ស៊ុយ សុផាន ចូលរួមដោះស្រាយវិវាទដីធ្លីជាមួយអ្នកពាក់ព័ន្ធ ដោយសុឆន្ទៈបញ្ចប់វិវាទ និងការទទួលខុសត្រូវ។ ស្របគ្នានេះ រដ្ឋាភិបាលក៏បានយល់ព្រមអោយរដ្ឋបាលសុរិយោដី ផ្អាកការចុះបញ្ជី ឬផ្ទេរផ្ទូរដីដែលមិនទាន់ដោះស្រាយរួច ចៀសវាងធ្វើអោយវិវាទកាន់តែរីករាលដាល។
នៅក្នុងតារាងបញ្ជីករណីវិវាទដីធ្លីរវាងប្រជាពលរដ្ឋ និងអ្នកស្រី ស៊ុយ សុផាន បញ្ជាក់ថា វិវាទដីធ្លីទាំងនោះមាននៅក្នុងភូមិសាស្ត្រ ខណ្ឌច្បារអំពៅ រាជធានីភ្នំពេញ និងក្នុងភូមិសាស្ត្រស្រុកពញាឮ ខេត្តកណ្ដាល។ របាយការណ៍របស់ក្រសួងរៀបចំដែនដី នគរូបនីយកម្ម និងសំណង់ អោយដឹងដែរថា នៅក្នុងខណ្ឌច្បារអំពៅ វិវាទដីធ្លីរវាងពលរដ្ឋ និងក្រុមហ៊ុនផានអ៊ីម៉ិច មានចំនួន ១៩ករណី ក្នុងនោះមានចំនួនពលរដ្ឋសរុបជាង ៤០០គ្រួសារ។ ចំណែកនៅក្នុងស្រុកពញាឮ វិញ ក្រុមហ៊ុននេះប៉ះពាល់ពលរដ្ឋចំនួនជិត ១០០គ្រួសារ។
អ្នកស្រី ស៊ុយ សុផាន ប្រធានក្រុមហ៊ុនផានអ៊ីម៉ិច ក៏កំពុងមានជម្លោះដីធ្លីរ៉ាំរ៉ៃជាមួយពលរដ្ឋនៅកណ្ដាលរាជធានីភ្នំពេញ គឺនៅតំបន់បុរីកីឡា ដែលមិនទាន់ដោះស្រាយចប់សព្វគ្រប់នៅឡើយ៕
No comments:
Post a Comment