ដោយ ប្រាជ្ញ ចេវ
2017-04-22
ក្បួនដង្ហែឃោសនាបោះឆ្នោតរបស់គណបក្សប្រជាជនកម្ពុជា និងគណបក្សសង្គ្រោះជាតិ ថ្ងៃដំបូង នារាជធានីភ្នំពេញ នៅថ្ងៃ២៧ មិថុនា ឆ្នាំ២០១៣។
RFA
គណបក្សមានសំឡេងនៅរដ្ឋសភាទាំងពីរ អះអាងថា បានត្រៀមខ្លួនរួចហើយសម្រាប់យុទ្ធនាការរកសំឡេងឆ្នោតដែលនឹងចូលមកដល់ក្នុងរយៈពេលជាងមួយខែទៀត។ បក្សប្រឆាំងប្រកាសចំណាយលុយយ៉ាងតិច១.៧លានដុល្លារ ក្នុងយុទ្ធការបោះឆ្នោតឃុំ សង្កាត់ ប៉ុន្តែបក្សកាន់អំណាចមិនទាន់បង្ហាញខ្ទង់ចំណាយនៅឡើយទេ។
គណបក្សប្រជាជនកម្ពុជាដែលមានទ្រព្យធន និងអះអាងមានសមាជិកជាង២នាក់ អះអាងថា យុទ្ធនាការឃោសនាបោះឆ្នោតខាងមុខ មិនមានការបង្ហែក្បួនទ្រង់ទ្រាយធំណាមួយ គឺនឹងមានតែបង្ហែក្បួនតាមឃុំ សង្កាត់ និងការចុះពន្យល់ពលរដ្ឋដល់ខ្នងផ្ទះតែម្ដង ត្បិតអីគណបក្សនេះ គោរពតាមច្បាប់បោះឆ្នោត។
អ្នកនាំពាក្យគណបក្សប្រជាជនកម្ពុជា លោក សុខ ឥសាន ឲ្យដឹងថា ការធ្វើយុទ្ធនាការរយៈពេល១៤ថ្ងៃផ្ដោតសំខាន់លើការចុះជួបពលរដ្ឋដល់មូលដ្ឋានរបស់មន្ត្រីគណបក្ស។ លោកបន្តថា ថ្ងៃសំខាន់នៃយុទ្ធនាការនេះគឺថ្ងៃចាប់ផ្តើម គណបក្សឃោសនាដោយភ្ជាប់នឹងថ្ងៃរំលឹកសម្លាប់រង្គាលពលរដ្ឋនៃរបបខ្មែរក្រហម ចំណែក ថ្ងៃបញ្ចប់ក៏គណបក្ស ធ្វើយុទ្ធនាការទ្រង់ទ្រាយធំដែរ។ «»
លោក សុខ ឥសាន ឲ្យដឹងដែរថា គណបក្សត្រៀមខ្លួនចូលរួមវេទិកាសាធារណៈ ជជែកដោយមានការរៀបចំពីអង្គការអន្តរជាតិណាមួយ។ លោក សុខ ឥសាន មិនទាន់ឲ្យថា គណបក្សនឹងត្រូវចាយលុយអស់ប៉ុន្មាននោះទេក្នុងរយៈពេល១៤ថ្ងៃនោះ។
គណបក្សកាន់អំណាចដាក់ចេញពាក្យស្លោកចំនួន៣៥ សម្រាប់ឃោសនាបោះឆ្នោតឃុំសង្កាត់ ដែលសំដៅដល់ការអភិវឌ្ឍ ការរំលឹកគុណនៃជ័យជំនៈថ្ងៃ៧មករា សន្តិភាព កិច្ចការពារធនធានធម្មជាតិជាដើម។
ចំណែក អនុប្រធានគណបក្សសង្គ្រោះជាតិ លោក អេង ឆៃអ៊ាង ឲ្យដឹងដែរថា យ៉ាងហោចណាស់គណបក្សត្រូវចំណាយលុយជាង១.៧លានដុល្លារ ក្នុងយុទ្ធការបោះឆ្នោតឃុំ សង្កាត់ ទូទាំងឃុំ សង្កាត់។ លោក អេង ឆៃអ៊ាង ឲ្យដឹងថា គណបក្សមានផែនការធំៗពីរ គឺ ផ្សព្វផ្សាយគោលនយោបាយអាទិភាពទាំងប្រាំចំណុច និងបណ្ដុះបណ្ដាលភ្ញាក់ងារគណបក្សជាងបួនម៉ឺននាក់ ឲ្យយល់ដឹងពីកិច្ចការបោះឆ្នោត និងការឃ្លាំមើលក្នុងពេលបោះឆ្នោត។«»
លោក អេង ឆៃអ៊ាង ឲ្យដឹងថា យុទ្ធនាការរបស់គណបក្ស មានទាំងការហែក្បួន ការឃោសនាដោយចាក់ផ្សាយសំឡេង និងការចុះដល់មូលដ្ឋាន។ ប៉ុន្តែ លោកមិនទាន់ឲ្យដឹងថា ការហែក្បូនទ្រង់ទ្រាយបែបណានៅឡើយទេ។
ច្បាប់បោះឆ្នោតថ្មី តម្រូវឲ្យគណបក្សនយោបាយធ្វើយុទ្ធនាការឃោសនាបោះឆ្នោតជ្រើសរើសក្រុមប្រឹក្សាឃុំ-សង្កាត់ អាណត្តិទី៤ មានរយៈពេល១៤ថ្ងៃ ចាប់ពីថ្ងៃទី១០ ខែឧសភា រហូតដល់ថ្ងៃទី២ ខែមិថុនា។
គណបក្សមានសំឡេងឆ្នោតទាំងពីរនេះ តែងតែអួតអាងថា នឹងឈ្នះឆ្នោតដែលគ្រប់គ្រងឃុំ-សង្កាត់ទូទាំងប្រទេសច្រើនលើសលុបរៀងៗខ្លួន។ លោក សម រង្ស៊ី អតីតប្រធានគណបក្សសង្គ្រោះជាតិ ថា នឹងឈ្នះឆ្នោតឃុំសង្កាត់។ ដោយឡែក លោកនាយករដ្ឋមន្ត្រី ព្រមាននឹងមានសង្គ្រាមបើគណបក្សរបស់លោកចាញ់ឆ្នោត៕
No comments:
Post a Comment