នាយករដ្ឋមន្រ្តីកម្ពុជា លោក ហ៊ុន សែន និងលោក ង្វៀន សួនហ៊្វុក នាយករដ្ឋមន្រ្តី វៀតណាម។
ដោយ ញឹម សុផល ចុះផ្សាយនៅថ្ងៃ 26/04/2017
rfi
ទស្សនកិច្ចប្តូរវេនរវាងវៀតណាម និងចិន នៅកម្ពុជា ផ្តល់ប្រយោជន៍ច្រើនដល់កម្ពុជាឬយ៉ាងណា? នាយករដ្ឋមន្រ្តីកម្ពុជា លោក ហ៊ុន សែន និងលោក ង្វៀន សួនហ៊្វុក នាយករដ្ឋមន្រ្តី វៀតណាម។
ថតកម្មវិធីនេះទុក
បន្ទាប់ពីចិន ដល់វេនវៀតណាម។ ដំណើរទស្សនកិច្ចឆ្លាស់វេនគ្នារវាងប្រទេសដែលក្លាយជាសត្រូវនឹងគ្នានៅក្នុងជម្លោះដែនទឹកទាំងពីរ ត្រូវបានកត់ចំណាំថា មានស្ថានភាពញឹកញាប់ជាងបណ្តាប្រទេសផ្សេងៗទៀត ដែលជាមិត្តកម្ពុជាដែរនោះ។ ទោះយ៉ាងណាដំណើរទស្សនកិច្ចរបស់នាយករដ្ឋមន្ត្រីវៀតណាម លោក ង្វៀន សួនហ្វុក នៅកម្ពុជាពេលនេះ វាបានបង្ហាញនូវចំណងទំនាក់ទំនងគ្នាជាធម្មតា ក្នុងនាមប្រទេសជិតខាង។ ក៏ប៉ុន្តែទាក់ទងទៅនឹងផលប្រយោជន៍ផ្សេង ត្រូវគេជឿថាមិនដូចគ្នាទេ ក្នុងនោះរួមទាំងកម្ពុជា-ចិន ផងដែរ។
ជាការកត់សម្គាល់ វៀតណាម និងចិន ដែលសុទ្ធសឹងជាប្រទេសកុំមុយនីស្ត ក្រហមឆ្អិនឆ្អៅ បានប្រដាក់គ្នា ចេញ ចូលកម្ពុជា បន្តកន្ទុយគ្នាតាមរយៈទស្សនកិច្ចផ្លូវការណ៍។ ដំណើរទស្សនកិច្ចដែលធ្វើឡើងដោយប្រទេសទាំងពីរនៅលើទឹកដីកម្ពុជា ភាគច្រើនដោយមន្ត្រីជាន់ខ្ពស់ នៃរដ្ឋាភិបាល សមាជិកជាន់ខ្ពស់បក្សកុំមុយនីស្ត ថ្នាក់ដឹកនាំនៃអំណាចនីតិបញ្ញតិ និងមន្ត្រីជាន់ខ្ពស់យោធាផងដែរ។
ដោយឡែកកម្ពុជាក៏បានផ្លាស់ប្តូរទស្សនកិច្ចទៅកាន់ប្រទេសទាំងពីរនេះ ក៏ញឹកញាប់ផងដែរ ក្រោមអត្ថន័យដូចគ្នា គឺយោងតាមការអញ្ជើញរបស់ថ្នាក់ដឹកនាំនេះ ថ្នាក់ដឹកនាំនោះជាដើម។ ជាក់ស្តែង នៅអំឡុងពេលនេះ ប្រទេសកម្ពុជាកំពុងតែទទួលភ្ញៀវ ដ៏សំខាន់មួយរួប គឺលោកនាយករដ្ឋមន្ត្រីវៀតណាម ង្វៀន សួនហ្វ៊ុក ដែលមកបំពេញទស្សនកិច្ចនៅកម្ពុជាចំនួន ៣ថ្ងៃ។
ជាសំណួរ តើដំណើរទស្សនកិច្ចរបស់ថ្នាក់ដឹកនាំជាន់ខ្ពស់វៀតណាមក្តី មេដឹកនាំជាន់ខ្ពស់ចិនក្តៅ នឹងផ្តល់ផលប្រយោជន៍ឲ្យគ្នាទៅវិញទៅមកយ៉ាងណាខ្លះ រវាងកម្ពុជា-វៀតណាម និងកម្ពុជា-ចិន? ជាការពិត តាមរយៈដំណើរទស្សនកិច្ចមួយលើកៗ ប្រទេសដែលរៀបចំទទួល និងប្រទេសដែលជាភ្ញៀវ តែងតែមានផលប្រយោជន៍បំពេញឲ្យគ្នាទៅវិញទៅមក។ គ្រាន់តែពេលខ្លះជាផលប្រយោជន៍ជាក់ស្តែង និងខ្លះជាផលប្រយោជន៍ដោយប្រយោល និងមានអត្ថន័យទៅអនាគត។
សម្រាប់ដំណើរទស្សនកិច្ចនៅកម្ពុជា របស់នាយករដ្ឋមន្ត្រីវៀតណាម លោក ង្វៀន សួនហ៊្វុក នៅពេលនេះ អ្វីដែលជាលទ្ធផលជាក់ស្តែងឃើញថាពិធីសារចំនួន ៤ ត្រូវបានចុះហត្ថលេខារវាងប្រទេសទាំងពីរក្នុងនោះមានការសិក្សារួមគ្នាស្តីពីការសាងសង់ផ្លូវល្បឿនលឿនភ្នំពេញ-បាវិត និងផ្លូវល្បឿនលឿនហូជីមិញ-ម៉ក់បៃ។ ពិធីសារទី ២គឺ គម្រោងសាងសង់មជ្ឈមណ្ឌលផ្តល់សេវាព្យាបាលដោយស្ម័គ្រចិត្ត និងផ្អែកលើសហគមន៍ដល់អ្នកញៀនគ្រឿងញៀន នៅខេត្តព្រះសីហនុ។ ទី៣ ផ្តោតទៅលើកិច្ចសហប្រតិបត្តិការទ្វេរភាគី លើវិស័យជលផល។ និងទី៤ គឺជាពិធីសារដែលមានចុះហត្ថលេខាគាំទ្រដល់ការសាងសង់មហាវិថីមិត្តភាពភ្នំពេញ-ហាណូយ នៅទីក្រុងភ្នំពេញ។
ទោះយ៉ាងណា តាមរយៈដំណើរទស្សនកិច្ចនេះ បង្ហាញថាប្រទេសវៀតណាម ក៏ដូចចិនដែរហាក់មានការចាប់អារម្មណ៍កម្ពុជាកាន់តែខ្លាំងទៅៗ។ នៅចំពោះមុខកម្ពុជា ទាញបានផលប្រយោជន៍ត្រង់ៗពីប្រទេសទាំងពីរវៀតណាម និងចិន។ ជាមួយវៀតណាមនៅតែរក្សាមិត្តភាពម៉ឺនឆ្នាំ ដែលមកដល់ឆ្នាំនេះ គឺជាខួបលើកទី ៥០ នៃទំនាក់ទំនងការទូតកម្ពុជា-វៀតណាម។ ដោយឡែកជាមួយចិន កម្ពុជាបាននឹងកំពង់ក្លាយជាមិត្តដែលចិនយកចិត្តទុកដាក់ និងតម្លើងកំរិតចំណងមិត្តភាព ទៅជាយុទ្ធសាស្ត្រគ្រប់ជ្រុងជ្រោយ។
បង្កើនកំរិតទំនាក់ទំនងក៏ដោយសារកម្ពុជាទទួលស្គាល់នយោបាយចិនមួយ និងអព្យាក្រិត្យភាពលើបញ្ហាសមុទ្រចិនខាងត្បូង រីឯចិនបានចាយលុយមកលើកម្ពុជា តាមរយៈជំនួយឥតសំណង កម្ចីហិរញ្ញប្បទានដែលមានការប្រាក់ទាប។ ចំណុចនេះ អាចថាកម្ពុជាឆ្លាតក៏ថាបាន ដើម្បីយកមកស្តារហេដ្ឋារចនាសម្ព័ន្ធរបស់ខ្លួនបន្ទាប់ពីសង្គ្រាម បើទោះណាជាមានការរិះគន់ដំណាលគ្នាពីការជំពាក់បំណុលបរទេសកាន់តែច្រើន។
ម្យ៉ាងទៀត ប្រទេសចិនដែលកាន់លទ្ធិកុំមុយនីស្តឆ្អិនឆ្អៅនោះ បានព្យាយាមលើកមុខមាត់កម្ពុជា ក៏ប៉ុន្តែកម្ពុជាអាចខាតបង់ខណៈកម្ពុជា ប្រកាន់យករបបដឹកនាំបែបប្រជាធិបតេយ្យ ពោលគឺមានការព្រួយបារម្ភពីប្រជាធិបតេយ្យកម្ពុជាដើរថយក្រោយ។
បើនិយាយរឿងផលចំណេញដោយឡែកផ្សេងទៀត ជាមួយវៀតណាម កម្ពុជាហាក់មានផលចំណេញតិចជាង ពោលគឺទិដ្ឋភាពនយោបាយកម្ពុជានៅបន្តធ្វើឲ្យវៀតណាមសប្បាយចិត្តតាមរយៈការកសាងស្តូបអនុស្សាវរីយ៍រំលឹកដល់យុទ្ធជនវៀតណាម ដែលបានបាត់បង់ជីវិតបន្ទាប់ពីផ្តួលរំលំរបបប្រល័យពូជសាសន៍នៅគ្រប់ខេត្ត-រាជធានី។ ចំណុចនេះក៏មានការលើកឡើងពីអ្នកប្រវត្តិសាស្ត្រ និងអ្នកតាមដាននយោបាយដែរថា វៀតណាម មិនបានធ្វើស្តូបនៅប្រទេសរបស់ខ្លួន ដើម្បីរំលឹកពីគុណូបការៈដល់កម្ពុជាទេ ខណៈដែលកម្ពុជាបានជួយដល់វៀតណាមកាលពីសង្គ្រាមវៀតណាមទសវត្សឆ្នាំ ៦០។
ជុំវិញទំនាក់ទំនងពាណិជ្ជកម្មវិញ ទំហំពាណិជ្ជកម្មរវាងកម្ពុជា និងប្រទេសទាំងពីរ សុទ្ធតែមានការប្តេជ្ញាចិត្តថា នឹងបង្កើនឲ្យដល់ ៥ពាន់លានដុល្លារ។ ក៏ប៉ុន្តែជាក់ស្តែង ការនាំចេញរបស់ កម្ពុជាសុទ្ធតែទាបជាងការនាំចូលរបស់វៀតណាម និងចិន មកកម្ពុជាច្រើន។ ផ្ទុយទៅវិញ កម្ពុជាបានទាញយកប្រយោជន៍ធំជាងនេះ នៅក្នុងទំនាក់ទំនងពាណិជ្ជកម្មជាមួយអាមេរិក និងបណ្តាប្រទេសនៅអឺរ៉ុប។ ទីផ្សារអាមេរិក និងអឺរ៉ុប បង្កលក្ខណៈឲ្យកម្ពុជានាំផលិតផលកាត់ដេររបស់ខ្លួនយ៉ាងច្រើនសន្ធឹកសន្ធាប់ និងជាផ្នែកមួយនៃជន្ទល់សេដ្ឋកិច្ចជាតិខ្មែរផងដែរ៕
1 comment:
Oy Srok Khmer Touv Yuon Ter Madang Touv Ah Kwack Euy !!
Kmean Neak Na Hean Tveu Ey Kdor Ah Chor Kbot Cheat Kwack Ter !!
Post a Comment