ដោយ ម៉ម មុនីរតន៍
2017-09-03
លោកនាយករដ្ឋមន្ត្រី ហ៊ុន សែន ថ្លែងក្នុងខួបទី១០ នៃទិវាអតីតយុទ្ធជនកម្ពុជា ថ្ងៃទី១០ ខែឧសភា ឆ្នាំ២០១៧។ Photo courtesy of PM Hun Sen's Facebook Page
Photo courtesy of PM Hun Sen's Facebook Page
លោកនាយករដ្ឋមន្ត្រី ហ៊ុន សែន បានព្រមានរំលាយគណបក្សប្រឆាំងបន្តទៀត ក្រោយពីចាប់ខ្លួនលោក កឹម សុខា ប្រសិនបើរកឃើញសមាជិករដ្ឋសភា និងព្រឹទ្ធសភារបស់បក្សនេះចេញមុខប្រឆាំងការចាប់ខ្លួនលោក កឹម សុខា ដោយកម្លាំងនគរបាល។ ស្របពេលនេះដែរ លោក ហ៊ុន សែន ក៏អំពាវនាវស្វែងរកជនបរទេសបន្ថែមទៀតដែរ ដែលលោកចោទប្រកាន់ថា មានជាប់ពាក់ព័ន្ធគម្រោងក្បត់ជាតិ តាមរយៈបដិវត្តពណ៌ប្រឆាំងនឹងរដ្ឋាភិបាល។
ប្រើពេលតែប៉ុន្មានម៉ោងប៉ុណ្ណោះ ក្រោយសមត្ថកិច្ចចាប់ខ្លួនមេបក្សប្រឆាំង ប្រធានគណបក្សប្រជាជនកម្ពុជា បានព្រមានអនុវត្តច្បាប់ឲ្យដល់ទីបញ្ចប់ ចំពោះវាសនាបក្សសង្គ្រោះជាតិ ប្រសិនបើមានអ្នកដែលហ៊ានចេញមុខការពារបន្តទៀត។
ការថ្លែងដូចនេះរបស់លោក ហ៊ុន សែន ធ្វើឡើងក្នុងពេលដែលលោកជួបជាមួយកម្មកររោងចក្ររាប់ពាន់នាក់ នៅកោះពេជ្រ កាលពីព្រឹកថ្ងៃទី៣ ខែកញ្ញា។ លោកនាយករដ្ឋមន្ត្រីអះអាងថា មូលហេតុដែលលោកលើកដូច្នេះ ព្រោះតែមេបក្សប្រឆាំងមានភស្តុតាងដាក់បន្ទុករួចទៅហើយ អំពីគម្រោងក្បត់ជាតិប្រឆាំងនឹងរដ្ឋាភិបាល។ ការចាប់ខ្លួនលោក កឹម សុខា ទាំងកណ្ដាលអធ្រាត្រដោយកងកម្លាំងនគរបាល ក្រោមការរិះគន់ដ៏ចម្រូងចម្រាសនេះ ត្រូវបានលោក ហ៊ុន សែន ចោទថា នេះជាបទល្មើសជាក់ស្ដែង មិនចាំបាច់តម្រូវឲ្យមានដីកា ឬហេតុផលអ្វីផ្សេងក្រៅពីនេះឡើយ៖ «យប់មិញនេះយើងត្រូវចាប់លោក កឹម សុខា ទាំងយប់ អំពីទោសក្បត់ជាតិតែម្ដង។ ហេតុអីបានយើងត្រូវចាប់? បើសិនមិនមានរឿងធ្ងន់ធ្ងរ យើងមិនចាំបាច់ចាប់ធ្វើអីទេ។ តែរឿងនេះវាធ្ងន់ពេកហើយវាឈានបណ្ដើរៗហើយ»។
លោក ហ៊ុន សែន ធ្លាប់ព្រមានជាញឹកញាប់ថា នឹងចាត់វិធានការវ៉ៃខ្នោះដៃជនណាក៏ដោយ មិនថាតំណាងរាស្ត្រមានអភ័យឯកសិទ្ធិទេ ប្រសិនប្រព្រឹត្តបទល្មើសជាក់ស្ដែងហើយ ត្រូវចាត់វិធានការបន្ទាន់ ដើម្បីការពារសុខសន្តិភាព។ ប៉ុន្តែ អ្នកច្បាប់ធ្លាប់បកស្រាយថា ការចោទប្រកាន់ជនណាមួយពីបទល្មើសជាក់ស្ដែងទៅបាន លុះត្រាកំពុងធ្វើសកម្មភាពភ្លាមៗ ឬសកម្មភាពដេញប្រផាប់ចាប់ប្រភីងនៅនឹងកន្លែងតែម្ដង។
ច្បាប់ស្ដីពីវិសោធនកម្មច្បាប់គណបក្សនយោបាយមាត្រា ៣៨ ថ្មី កំណត់ថា ការបញ្ចប់ជីវិតនយោបាយបក្សណាមួយទៅបាន គឺគណបក្សនយោបាយនោះប្រព្រឹត្តខុសទៅនឹងរដ្ឋធម្មនុញ្ញ និងច្បាប់ជាធរមានដទៃទៀតរបស់ប្រទេសកម្ពុជា ទើបក្រសួងមហាផ្ទៃ អាចចាត់វិធានការតាមដំណាក់កាល គឺសម្រេចសកម្មភាពបណ្ដោះអាសន្ន បក្សនយោបាយនោះ ក្នុងរយៈពេលមួយជាកំណត់។ បន្ទាប់មក ប្ដឹងទៅតុលាការកំពូល ដើម្បីរំលាយគណបក្សនយោបាយនោះ ក្នុងករណីមានកំហុសធ្ងន់ធ្ងរ។
ជុំវិញការចាប់ខ្លួនប្រមុខដឹកនាំបក្សប្រឆាំងនេះ លោក ហ៊ុន សែន ថ្លែងថា បទល្មើសជាច្រើនសំណុំរឿងក្នុងពេលកន្លងទៅ បូករួមទាំងអំពើហិង្សានៅផ្លូវវ៉េងស្រេង ផង គឺដាក់បន្ទុកឲ្យលោក កឹម សុខា ទទួលទាំងអស់ដោយចោទថា លោក កឹម សុខា ជាជនក្បត់ជាតិ។
ប្រធានគណបក្សប្រឆាំង លោក កឹម សុខា ត្រូវបានកម្លាំងនគរបាលព័ន្ធចាប់ខ្លួនទាំងកណ្ដាលអធ្រាត្រ និងពុំមានដីកាថែមទៀត នៅគេហដ្ឋានរបស់លោកស្ថិតក្នុងខណ្ឌទួលគោក ក្រុងភ្នំពេញ។
បើទោះជាបែបណា រឿងរ៉ាវដែលឈានដល់ការចាប់ខ្លួននេះ ដោយយោងលើអង្គហេតុខ្លះៗតាមរយៈខ្សែអាត់វីដេអូ របស់លោក កឹម សុខា ដែលថ្លែងជាសាធារណៈនៅប្រទេសអូស្ត្រាលី កាលពីដើមឆ្នាំ២០១៤។ មេបក្សប្រឆាំងរូបនេះ អះអាងថា លោកបានរៀនពីរបៀបផ្លាស់ប្ដូរតាមបែបប្រជាធិបតេយ្យជាមួយនឹងសហរដ្ឋអាមេរិក តាំងពីអាណត្តិទី១។ ប៉ុន្តែអ្វីដែលលោកសាបព្រោះវប្បធម៌តាមបែបប្រទេសលោកខាងលិចនោះ ពុំមានអ្វីក្រៅពីគោលការណ៍ជាសាកលស្ដីពីសិទ្ធិមនុស្ស និងប្រជាធិបតេយ្យឡើយ៖ «ប្រជាពលរដ្ឋលោកបានក្រោកនេះ មិនមែនទើបតែក្រោកថ្ងៃហ្នឹងនេះទេ ដោយសារជាយុទ្ធសាស្ត្រច្បាស់លាស់របស់យើងខ្ញុំ។ ខ្ញុំសូមបញ្ជាក់ជូនបងប្អូនជនរួមជាតិថា ហេតុម៉េចបានជាដល់ថ្ងៃនេះប្រជាពលរដ្ឋខ្មែរងើបឡើងកុះករ លែងខ្លាចហើយហ៊ាន និងយល់»។
ក្រៅពីការចាប់ខ្លួនលោក កឹម សុខា ហើយ លោក ហ៊ុន សែន បានចោទប្រកាន់សហរដ្ឋអាមេរិកថា ជាប្រទេសបាតដៃទី៣ ដែលលោកអះអាងថា កំពុងរកមុខជាយូរមកហើយ ដែលនាំឲ្យកម្ពុជា ជួបគ្រោះអាក្រក់តាំងពីក្នុងសម័យលោកសេនាប្រមុខ លន់ នល់។ ជាងនេះទៀត ការចាប់ដៃគូជាមួយលោក កឹម សុខា លើកនេះ ក៏មិនខុសពីប្រវត្តិសាស្ត្រកាលពីជាង ៣០ឆ្នាំមុននោះដែរ ដែលនឹងធ្វើឲ្យកម្ពុជា រកបានសន្តិភាពមកដោយលំបាកនេះ ត្រូវរលាយទៅវិញ ព្រោះតែសម្ពន្ធភាពរវាងសហរដ្ឋអាមេរិក និងលោក កឹម សុខា នេះ៖ «មិនត្រូវបរទេសណាមកត្រូវលូកលាន់កិច្ចការរបស់កម្ពុជា ជាពិសេសអ្នកដែលបាតដៃទី៣ ដែលធ្លាប់ប្រើ លន់ នល់ ធ្វើរដ្ឋប្រហារ»។
បើទោះជាបែបណា ក្នុងពេលកន្លងទៅ ស្ថានទូតអាមេរិកប្រចាំនៅកម្ពុជា ធ្លាប់បដិសេធការចោទប្រកាន់របស់រដ្ឋាភិបាលនេះ។
ស្របពេលលោក កឹម សុខា ត្រូវចាប់ខ្លួន និងព្រមានពីជីវិតនយោបាយចុងក្រោយរបស់បក្សប្រឆាំង លោក ហ៊ុន សែន បានអះអាងថា ទោះជាយ៉ាងណាដំណើរការចុះឈ្មោះ និងថ្ងៃបោះឆ្នោតជ្រើសតាំងតំណាងរាស្ត្រឆ្នាំ២០១៨ នៅតែដំណើរការជាធម្មតាដូចការគ្រោងទុក៕
2 comments:
Who really is Khmer traitor?
In the 1980s, the government of Penn Sovann fiercely defied Yuon's orders and protected Cambodia's interest.
Hun Sen colluded with Yuon to topple Penn Sovann.
That was an act of treason.
Therefore, Ah Kouk Hun Sen should arrest himself.
Ah Runteas Banh Hun Sen Euy !! Khmer people have had enough of you Ah Choy Marai !!
93 Years Old Woman
Pkay Meas Pram Phot Lek Hun Sen. But barely know how to read Khmer, let alone other language. What an asshole leader.
Post a Comment