ដោយ អាស៊ីសេរី
2018-04-29

ផែនទីខេត្តបន្ទាយមានជ័យ
Photo: RFA
ប្រជាពលរដ្ឋនៅស្រុកស្វាយចេក ខេត្តបន្ទាយមានជ័យ គ្រោងលើកគ្នាតវ៉ាឲ្យអាជ្ញាធរបញ្ឈប់ក្រុមហ៊ុន គង់ មាន បោះទីតាំងធ្វើអាជីវកម្មថ្មភ្នំក្នុងពេលឆាប់ៗ។ ពលរដ្ឋនិងមេភូមិគោកកីអះអាងថា មូលហេតុដែលពួកគាត់តវ៉ា ដោយសារក្រុមហ៊ុននេះកំពុងដាក់គ្រឿងចក្របោះទីតាំងដើម្បីវាយថ្មភ្នំយកទៅលក់ ហើយពុំមានអាជ្ញាធរណាទប់ស្កាត់នៅឡើយ។
ប្រជាពលរដ្ឋ និងមេភូមិគោកកី លើកឡើងថា ពួកគាត់មិនចង់តវ៉ាទេ ប៉ុន្តែគ្មានជម្រើសផ្សេងដែលអាចបញ្ឈប់ក្រុមហ៊ុនគង់ មាន ធ្វើអាជីវកម្មថ្មភ្នំនៅតំបន់ពួកគាត់រស់នៅបាន។
មេភូមិគោកកី លោក ឌិន បាន់ ឲ្យដឹងនៅថ្ងៃទី២៩ មេសា ថា ក្រុមហ៊ុន គង់ មាន កំពុងបោះទីតាំងធ្វើអាជីវកម្មវាយកម្ទេចថ្មនៅភ្នំតាដុង ឃុំតាផូ ស្រុកស្វាយចេក យ៉ាងមមាញឹក ចំណែកពួកគាត់បានប្ដឹងទៅអាជ្ញាធរឃុំនិងស្រុករួចហើយ ប៉ុន្តែគ្មានអាជ្ញាធរណាទប់ស្កាត់នោះទេ៖ «តំបន់នេះជាទីកន្លែងសំខាន់បំផុតក្នុងស្រុកស្វាយចេក ឃុំតាផូ ហើយមានប្រាសាទ មានអាងប្រាសាទប្រាំ ទីកន្លែងទេសចរណ៍ របស់ប្រជាពលរដ្ឋទៅលែងកម្សាន្ត ហើយជាជម្រកសត្វកម្រ ដូចជា ឈ្លូស ទន្សាយ ជ្រូកព្រៃ សត្វស្លាបមាន សត្វចង្កៀលខ្យង សត្វកុក និងសត្វផ្សេងៗ។ ហើយប្រសិនបើយកគ្រឿងចក្រទៅធ្វើនៅតំបន់នោះ ធ្វើឲ្យជម្រកសត្វដែលស្ទើរដាច់ពូជគ្មានទីជម្រកទេ»។
ចំណែកតំណាងពលរដ្ឋនៅឃុំតាផូ អ្នកស្រី ណក់ ផាន្នី អះអាងថា ក្រុមហ៊ុនមួយនេះ វាយកម្ទេចថ្មភ្នំតាដុង គឺបានប៉ះពាល់ខ្លាំងដល់ផលដំណាំ និងថ្នូរកប់សពដូនតារបស់ពួកគាត់ ដូច្នេះពួកគាត់ត្រូវតែរារាំងក្រុមហ៊ុននេះមិនអោយធ្វើសកម្មភាពបានជាដាច់ខាត៖ «ខ្ញុំសំណូមពរសុំឲ្យបញ្ឈប់ការឈូសឆាយនេះ ដើម្បីទុកឲ្យក្មេងជំនាន់ក្រោយបានឃើញភ្នំផង ព្រោះដី ភ្នំតូចណាស់ ហើយចម្ការដំណាំដាំដុះនៅជុំវិញភ្នំតែម្ដង។ ដូច្នេះទាំងពួកខ្ញុំ និងមេភូមិគោកកី ចេះតែនាំគ្នាសំណូមពរសុំតវ៉ាឈប់ឲ្យឈូសឆាយភ្នំ»។
មេភូមិគោកកី លោក ឌិន បាន់ មានប្រសាសន៍ថា នៅលើភ្នំនេះមានទូលប្រាសាទបូរាណចំនួន៣កន្លែង ដែលជាទីសក្ការៈរបស់ពលរដ្ឋនៅតំបន់នោះ ហើយជារៀងរាល់ឆ្នាំពលរដ្ឋក្នុងឃុំតាផូ និងឃុំក្បែរខាង តែងតែនាំគ្នាទៅធ្វើបុណ្យទាននៅលើភ្នំមួយនេះជាប្រចាំ។
អាស៊ីសេរីពុំអាចទាក់ទងតំណាងក្រុមហ៊ុន គង់ មាន និងមន្ទីររ៉ែ និងថាមពលខេត្តបន្ទាយមានជ័យ ដើម្បីសុំការពន្យល់ជុំវិញបញ្ហានេះបានទេនៅថ្ងៃទី២៩ មេសា។
ចំណែកអភិបាលស្រុក ស្វាយចេក លោក លឿង សុភ័ក្រ ធ្លាប់មានប្រសាសន៍ថា លោកមិនទាន់អាចបំភ្លឺចំពោះរឿងនេះបានទេ ល្គឹកណាមិនមានបទបញ្ជាពីមន្ត្រីថ្នាក់លើនោះ។
មន្ត្រីសម្របសម្រួលសមាគមការពារសិទ្ធិមនុស្សអាដហុក (Adhoc) ខេត្តបន្ទាយមានជ័យលោក ស៊ុំ ច័ន្ទគា អះអាងថា ការធ្វើអាជីវកម្មនៅលើភ្នំនេះ នឹងបង្កផលប៉ះពាល់ខ្លាំងដល់ការរស់នៅ របស់ពលរដ្ឋជាច្រើនគ្រួសារ ហើយលោកថា បញ្ហាដែលខ្លាំងជាងគេគឺជាភ្នំដែលជាទីសក្ការរបស់អ្នកភូមិ ដែលពួកគាត់មានជំនឿតាំងពីយូរលង់ណាស់មកហើយ៖ «ពួកគាត់ខំតវ៉ាអីនឹងដើម្បីរក្សាភ្នំ ព្រោះថាជាភ្នំប្រវត្តិសាស្ត្រដែលគាត់ត្រូវនិទានប្រាប់កូនចៅជំនាន់ក្រោយ ដែលមានរឿងរ៉ាវមានច្រើន ទាក់ទងនឹងអប្បិយជំនឿផង ប្រវត្តិអីផ្សេងៗផង។ យើងបានសាកសួរពួកគាត់អំពីបញ្ហានឹងដែរ អីចឹងបានជាពួកគាត់ខំតវ៉ាដើម្បីថាធ្វើអីធ្វើចុះកុំឲ្យនាំគ្នាទៅបំផ្លាញភ្នំ ព្រោះបើនាំគ្នាទៅបំផ្លាញអីចឹងពេលក្រោយក្មេងៗលេងស្គាល់ភ្នំហើយ»។
ពលរដ្ឋអះអាងថាក្រុមហ៊ុនបើកដំណើរការទៅបាន ដោយសារមានភ្លើងខៀវពីអាជ្ញាធរខេត្តបន្ទាយមានជ័យ ហើយមេឃុំនឹងអាជ្ញាធរស្រុក មិនហ៊ានចាត់វិធានការលើរឿងនេះទេ។ មេភូមិគោកកីឲ្យដឹងថា ប្រជាពលរដ្ឋនៅក្នុងឃុំតាផូ ប្រមាណ១ពាន់នាក់ គ្រោងនាំគ្នាតវ៉ានៅទីតាំងដែលក្រុមហ៊ុន គង់ មាន កំពុងបោះទីតាំងនៅចង្កេះភ្នំតាដុង ដើម្បីបញ្ឈប់ក្រុមហ៊ុនដោយខ្លួនឯងនៅដើមខែឧសភាខាងមុខ៕
No comments:
Post a Comment