ដោយ វ៉ែន សុមេធ
2018-06-23
rfa
លោកនាយករដ្ឋមន្ត្រី ហ៊ុន សែន ចូលរួមបោះឆ្នោតជ្រើសតាំងសមាជិកព្រឹទ្ធសភា អាណត្តិទី៤ នៅការិយាល័យក្នុងក្រុងតាខ្មៅ ខេត្តកណ្ដាល កាលពីថ្ងៃទី២៥ កុម្ភៈ ឆ្នាំ២០១៨។
Photo courtesy of SPM's page
ប្រជាពលរដ្ឋ និងមន្ត្រីគណបក្សសង្គ្រោះជាតិ អះអាងថា របបលោក ហ៊ុន សែន កំពុងតែគំរាមកំហែងប្រជាពលរដ្ឋគ្រប់រូបភាពនិងជំរុញពលរដ្ឋឲ្យចេញទៅបោះឆ្នោតឲ្យបានច្រើន ទោះបីពួកគេ បោះឲ្យគណបក្សណាក៏ដោយ។ អ្នកវិភាគយល់ថា មូលហេតុដែលចង់បានចំនួនអ្នកបោះឆ្នោតច្រើន ព្រោះគណបក្សកាន់អំណាច បារម្ភខ្លាចមិនមានការទទួលស្គាល់ពីប្រជាពលរដ្ឋ និងសហគមន៍អន្តរជាតិ។
មជ្ឈដ្ឋាននានា មើលឃើញថា របបលោក ហ៊ុន សែន កំពុងប្រើគ្រប់វិធីសាស្ត្រ ដើម្បីឲ្យប្រជាពលរដ្ឋចេញទៅបោះឆ្នោតឲ្យបានច្រើន ដើម្បីយកចំនួនអ្នកបោះ ឆ្នោតច្រើននោះ សម្រាប់ការពារខ្លួនក្រោយពេលបោះឆ្នោតដែលអាចនឹងមានការរិះគន់ពីគ្រប់ទិសទី។
ប្រជាពលរដ្ឋរស់នៅរាជធានីភ្នំពេញម្នាក់ លោក យក់ គីមឈិត រៀបរាប់ថា អាណត្តិទី៦នេះ គណ បក្សកាន់អំណាច បានដឹងមុនជាស្រេចថាគណបក្សនេះ ពិតជាឈ្នះឆ្នោត ព្រោះបានរំលាយគណបក្សសង្គ្រោះជាតិ ដែលជាដៃគូប្រគួតដ៏ស្វិតស្វាញចេញពីសង្វៀននយោបាយរួចទៅហើយ។ចំពោះគណបក្សតូចៗ ឬគណបក្សដែលបង្កើតថ្មី គឺគ្មានអ្វីដែលធ្វើឲ្យគណបក្សកាន់អំណាចបារម្ភនោះទេ។ លោក យក់ គីមឈិត បន្តថា អ្វីដែលធ្វើឲ្យគណបក្សរបស់លោក ហ៊ុន សែន ព្រួយបារម្ភនោះ គឺខ្លាចពលរដ្ឋមិនចេញទៅបោះឆ្នោតច្រើន ម្លោះហើយទើបនៅមុនការបោះឆ្នោតនេះ របបលោក ហ៊ុន សែន ខំប្រើគ្រប់វិធីសាស្ត្រ ដើម្បីឲ្យពលរដ្ឋទៅបោះឆ្នោតឲ្យបានច្រើន ទោះបីជាបោះឲ្យគណបក្សណាក៏ដោយ។
ដោយឡែក សមាជិកក្រុមការងារគណបក្សសង្គ្រោះជាតិប្រចាំខេត្តស្វាយរៀង លោក គង់ ម៉ាស់ មានប្រសាសន៍ថា អាជ្ញាធរនៃរបបលោក ហ៊ុន សែន គ្រប់ជាន់ថ្នាក់ កំពុងតែគំរាមកំហែងពលរដ្ឋតាម ភូមិ-ឃុំ នានាឲ្យចេញទៅបោះឆ្នោតគ្រប់គ្នា បើពុំនោះទេពួកគេនឹងប្រឈមមុខច្បាប់ និងជួបការលំបាក ក្នុងការរកសេវាពីអាជ្ញាធរ។ លើសពីនេះសកម្មជនរបស់គណសង្រ្គោះជាតិ កំពុងត្រូវបានបំភិតបំភ័យ និងឃ្លាំមើលយ៉ាងដិតដល់ពីអាជ្ញាធរ។ របបលោក ហ៊ុន សែន ក៏បានដាក់សម្ពាធដល់ បណ្ដាក្រុមហ៊ុន និងរោងចក្រសហគ្រាស អោយជួយព្រមានទៅបុគ្គលិក និងកម្មករ ថាបើមិនមានស្នាមទឹកខ្មៅជ្រលក់ម្រាមដៃទេ នឹងបណ្ដេញចេញពីការងារជាដើម។ លោក គង់ ម៉ាស់ ចាត់ទុកទង្វើទាំងនេះ ថា ជាទង្វើផ្ទុយនឹងរដ្ឋធម្មនុញ្ញ និងប៉ះពាល់ធ្ងន់ធ្ងរដល់អារម្មណ៍ពលរដ្ឋម្ចាស់ឆ្នោត។ «»
ក្រុមអ្នកឃ្លាំមើលការបោះឆ្នោត មើលឃើញថា អាណត្តិទី៦នេះ ខុសពីអាណត្តិមុនៗ គឺបន្ទាប់ពីមាន ការគំរាមកំហែងធ្ងន់ធ្ងរឲ្យពលរដ្ឋទៅបោះឆ្នោតហើយនោះ របបលោក ហ៊ុន សែន និងគណៈកម្មាធិការជាតិរៀបចំការបោះឆ្នោត ក៏ព្យាយាមជួយសម្រួលឲ្យពលរដ្ឋទៅបោះឆ្នោតដែរ ដែលមិនមានឡើយកាលពីពេលបោះឆ្នោតមុន។ កាលពីពេលថ្មីៗនេះ ក្រសួងការងារ បានបញ្ជាឲ្យក្រុមហ៊ុន និងរោងចក្រសហគ្រាស អនុញ្ញាតឲ្យបុគ្គលិក និងកម្មករឈប់សម្រាក ៣ថ្ងៃ ដើម្បីទៅបោះឆ្នោត។ រីឯក្រសួងអប់រំ ក៏បានប្រកាសឲ្យសិស្សនិស្សិតឈប់សម្រាក ៣ថ្ងៃទៅបោះឆ្នោតដែរ។ ក្រៅពីនេះ លោកហ៊ុន សែន ក៏បញ្ជាមិនឲ្យរថយន្តឈ្នួលដំឡើងថ្លៃពេលពលរដ្ឋ ទៅបោះឆ្នោតដែរ។
សមាជិកក្រុមអ្នកវិភាគវ័យក្មេង លោក បុង ដែត មានប្រសាសន៍ថា ទោះបីជាមានការសម្របសម្រួលផង និងគំរាមកំហែងផងក្ដី ក៏ប្រហែលជាប្រជាពលរដ្ឋ អាចពហិការមិនទៅបោះឆ្នោតច្រើនដែរ ហើយបើទោះមានអ្នកខ្លះទៅបោះឆ្នោត ក៏ពួកគេអាចគូសសន្លឹកឆ្នោតចោលដែរ ព្រោះពួកគេយល់ថា ការបោះឆ្នោតនេះ មិនមានលក្ខណៈប្រជាធិបតេយ្យពិតប្រាកដ និងមិនអាចកែប្រែជីវភាពពួកគេបានទេ។ លោក បុង ដែត បន្តថា ជាការពិតគឺគណបក្សកាន់អំណាច បានដឹងខ្លួនជាមុនថានឹងឈ្នះឆ្នោត ព្រោះគ្មានវត្តមានគណបក្សសង្គ្រោះជាតិ ប៉ុន្តែគណបក្សកាន់អំណាច ត្រូវការចំនួនអ្នកបោះឆ្នោតច្រើន ដើម្បីងាយស្រួលពន្យល់ទៅសហគមន៍ជាតិ និងអន្តរជាតិ ក្រោយពេលបោះឆ្នោតរួច។ ប៉ុន្តែ យ៉ាងណាក្តី សហគមន៍ជាតិ និងអន្តរជាតិ ក៏មិនងាយជឿលើការបកស្រាយណាមួយដែរ ព្រោះពួកគេ ប្រាកដជាបានសិក្សាយ៉ាងស៊ីជម្រៅអំពីដំណើរការរៀបចំការបោះឆ្នោតនៅកម្ពុជារួចទៅហើយ។ «»
ក្រុមអ្នកឃ្លាំមើលការបោះឆ្នោត មើលឃើញថា ការបោះឆ្នោតអាណត្តិទី៦នេះ គឺមានការរឹតត្បិតនិង ការគំរាមកំហែងធ្ងន់ធ្ងរជាងពេលណាៗទាំងអស់ ព្រោះគណបក្សសង្គ្រោះជាតិ ត្រូវបានរំលាយ អង្គការសង្គមស៊ីវិល ត្រូវបានធ្វើទុក្ខបុកម្នេញដូចជាការបិទ «បន្ទប់ស្ថានការណ៍» ដែលជាបណ្ដុំអង្គការសង្គមស៊ីវិល ដើម្បីឃ្លាំមើលការបោះឆ្នោត ប្រព័ន្ធផ្សព្វផ្សាយឯករាជ្យត្រូវបានរឹតត្បិតនិងបិទ ចំណែកម្ចាស់ឆ្នោត ត្រូវរងការដាក់សម្ពាធឲ្យទៅបោះឆ្នោតជាដើម៕
No comments:
Post a Comment